लुका 5
5
येशुगी ङेने धाङपोक्याला भो़वा
(मेथा ४:१८-२२; मारकु १:१६-२०; योहान्ना १:४०-४२)
1ङीमा च्यीक, येशु गेन्नेसारेत छो डामदु श्युक हो़तालाक धेनी मीमाङक्या छाङगा ग्याप्ती, खोङबाला कोरती को़न्क्षोकगी का ङेन्दी धे हो़तालाक। 2येशुगी छोगी डामदु डु ॱङी शीक्पालाक हीना ङ्यापाक्या डु भोरती, ङ्यारे ठी़री धे हो़तालाक। 3धेनी खोङबा सीमोन ॱनागीनगी डु नाङदु फेप्ती, डुगो छोगी थामाने ॱहाचो़ला क्यो़ सुरी सीमोनला सुवालाक। धेनी होदुरु श्युक्ती, खोङबागी मीक्याला क्षो़ तो़न जेपालाक।
4खोङबागी कालोप सुङसारती सीमोनला सुवालाक, “क्षु तीङ रीङा स्योकला सोरी, ङ्या शीम्येला ङ्यारे माला तोङ।”
5धेनी सीमोनगी ॱनेवालाक, “ॱलोपो़न ला, हीकी छेन्घाङ काल्ले ग्याप्पी धेनी घीया शीम ॱमाथुक। हीना खेराङगी सुङगीनला क्षा श्याक्ती, ङा ङ्यारे माला पाबाहीन।” 6धेनी खुङक्याई ङ्यारे माला पाप्ती ॱमीच्यीकी माङा ङ्या शीम्दी, ङ्यारेगो राये झ्येवालाक। 7होझ्येरी खुङक्याई डु श्येम्माला हो़गीन रोवाक्याला, रोवा झ्यीयेला लाक्ते झ्येवालाक। धेनी होदेक्या होरी डु ॱङीगाराला ङ्या कावालाक धेनी खुङक्या बीप्कु झ्येवालाक।
8दे थोरी सीमोन पेटो येशुगी दोङला पीमु चुक्ती श्यी़वालाक, “चोवो, ङा मी धीक्चेन च्यीक हीन। ङाने ॱहाला फेप्रोनाङ।” 9घीझ्येरी ॱनाना देरे माङा ङ्या शीम्गीनगोला, सीमोन धाङ खी़मुला हो़गीन घीरी ॱहाङसावालाक। 10देरे झ्येरीराङ सीमोनगी लेरोक जेबेदीगी भीजा याकोब धाङ योहान्ना ॱहालेवालाक।
धेनी येशुगी सीमोनला सुवालाक, “ख्यो़ माजीक। धा देने ॱहाला ख्यो़ मीक्याई ङ्यापा झ्युङगीलाक।” 11धेनी खुङक्याई डु थामाला थेन्दी, होदे घीरी भोरती, येशुगी स्याबाला डावालाक।
जेने मी च्यीक ढाक्पा
(मेथा ८:१-४; मारकु १:४०-४५)
12येशु यु च्यीकला हो़ती घाङला, जेनेगी तुम्दी धेदा मी च्यीक होदुरु होवालाक। धेनी येशुला ज्यारी खी़ क्षाक छारी श्यी़वालाक, “चोवो, खेराङगी थुकोङ हो़ना, ङाला चाङमा जे थुक्कीलाक।”
13येशुगी क्षाक क्याङा जेदी, खोला जुवा जेदी सुवालाक, “ङा दो़दीहो़क। ख्यो़ चाङमा झ्युङ।” धेनी लाम्साङ जेनेगो खोने दाक्पालाक।
14धेनी खोङबागी खोला का दे ॱनावालाक, “लाब दे सुलाः ॱमास्ये हीना सोरी राङला क्षो़पो़नचारु तो़न। धेनी मोशेगी का ॱनाङगीन च्योक्रे, खुङक्याला पाङपो हुङयेला ख्यो़ चाङमा झ्युङयेगी क्षीला क्षो़पा पु।”
15हीना येशुगी कोरला लाबक्या साजा घीरीला धोराङा माङा ढाम्बालाक धेनी मीछोक क्षे च्यीक खोङबाने कामो़न ङेन्ये धाङ नाजाने ढाक्येला येशुचारु जोम्बालाक। 16हीना खोङबा साजा एन्दोङक्याला फेप्ती, सोवा धेबालाक।
येशुगी शा फोक्पा मीला चो़गा जेपा
(मेथा ९:१-८; मारकु २:१-२)
17श्याक्मो च्यीक येशु क्षो़ तो़न जेदी घाङला, फारुसीपाक्या धाङ क्षो़ठीमगी ॱलोपो़नक्या होदुरु धे हो़तालाक। खुङक्या गालील यु घीरीने धाङ युदेया धाङ येरुसालेम ग्याजाने होवालाक। धा ढाक्सो़ ॱनाङयेला को़न्क्षोकगी नी़थु येशुमुला हो़तालाक। 18धेनी मी रीङगागी शा फोक्पा मी च्यीकला, ङ्याजेमुलाराङ खेरती होवालाक। धेनी खुङक्याई खोला नाङदु खेरती, येशुगी डुङदु श्याक्ये थापस्यी झ्येवालाक। 19हीना मीछोकगी झ्येरी नाङदु खेरती हुङयेला लाम्गा माजोप्पा, खुङक्या खीमगी ताङला सोवालाक। धेनी थोक स्यी़री, खोङबा श्युक्कीनगी खाप्ते माला खोला ङ्याजेमुलाराङ माला पाप्पालाक। 20धेनी येशुगी खुङक्याई धेपागो शीक्ती खोला सुवालाक, “भीजाओ, ख्यी़ धीक्पाक्या सेजुङ।”
21धेनी क्षो़ठीमगी ॱलोपो़नक्या धाङ फारुसीपाक्याई देरे ढीवा गो चुक्पालाक, “को़न्क्षोकला कुरवा धेप्कीन दे सुले? को़न्क्षोक च्यीगागी माना, सी़ धीक्पा से थुप्कीले?”
22धेनी खुङक्याई साम्लो खेन्दा जेदी, येशुगी खुङक्याला सुवालाक, “खेक्या राङगी सेम नाङदु घीझ्येरी देरे साम्लो ताङाले? 23‘ख्यी़ धीक्पा सेजु’ याङना ‘लोङला घोबा चुक’ ॱनेरी ॱनायेला घीन्गो ॱनाना लेल्हा दुओ? 24हीना दे जीक्तेनदु मी-भु#५:२४ येशुगी मीङ च्यीक लाक। ला धीक्पा सेयेगी आङजा हो़तालाक ॱनेरी खेक्या स्येलाझ्यी।” धेनी येशुगी होदे शा फोक्पा मीला सुवालाक, “ङा ख्यो़ला ॱनाहीन लोङ धेनी ख्यो़री ङ्याजे खुरती खीमला सोङ।” 25धेनी खो लाम्साङ खुङक्याई दोङला लारी, खोराङ ङ्यारी धेता ङ्याजे खुरती को़न्क्षोकला तो़टा तारी खीमला सोवालाक। 26धेनी खुङक्या घीरी ॱमीच्यीकी ॱहालेरी जीक्टागी खावालाक। धेनी को़न्क्षोकला तो़टा पुरी ॱनेवालाक, “धीरीङ हीकी ॱमीच्यीकी ॱहाङसागीन लेगा थोजुङ।”
येशुगी लेवीला भो़वा
(मेथा ९:९-१३; मारकु २:१४-१७)
27होदे स्याम्ने येशु फीला फेप्ती, लेवी ॱनागीन ठा धुगीन मी च्यीकला, खोरी लेगा झ्यीजारु धेदी श्याक्कीनगो शीक्पालाक। धेनी येशुगी खोला “ङी स्याम्ला डोङ।” सुरी सुवालाक। 28धेनी खो होदे घीरी भोरती खोङबागी स्याबाला डावालाक।
29धेनी लेवीगी येशुला खोरी नाङदु श्युक्टा ताक्पालाक। धेनी खुङक्यामुला होदुरु ठा धुगीनक्या धाङ श्येम्माक्याई मीछोक क्षे च्यीक हो़तालाक। 30धेनी फारुसीपाक्या धाङ खुङक्याई छोखाकगी क्षो़ठीमगी ॱलोपो़नक्या, येशुगी ङेनेक्याला देरे ॱनेरी ॱङेतोक स्येपालाक, “ठा धुगीनक्या धाङ धीक्चेनक्यामुला खेक्या घीझ्येरी शा-थुङ झ्यीदाले?”
31धेनी येशुगी खुङक्याला सुवालाक, “आम्ची नी थाङाक्याला मेन्दा नेपाक्याला घोलालाक। 32धेनी ङा ढाङतेनक्याला मेन्दा, धीक्चेनक्याला राङगी धीक्पा पारी सेम ग्युरयेला भो़रु होवाहीन।”
ॱङ्युङनेगी कोरला ढीवा
(मेथा ९:१४-१७; मारकु २:१८-२२)
33खुङक्याई येशुला श्यी़वालाक, “योहान्नागी ङेनेक्या ॱङ्युङने श्युक्ती सोवा ग्याई। धेनी फारुसीपागी ङेनेक्याः देरेराङ झ्यीदी हीना खेराङगी ङेनेक्या शा-थुङ झ्यीदी।”
34धेनी येशुगी खुङक्याला सुवालाक, “ॱनामा लेन्जारु माक्पा खुङक्यामुला हो़ती घाङला, डो़न्बोक्याला खेक्या ॱङ्युङने ॱरुङदु च्युक थुक्कीले? 35हीना माक्पागो खुङक्याने खा टागीन धी़गो ॱलेप्कीलाक धेनी होदे धी़ला, खुङक्या ॱङ्युङने ॱरुङगीलाक।”
36धेनी येशुगी खुङक्याला याङ पे च्यीक सुवालाक, “सी़या घोलाक साबा रारी, ॱङीङबा घोलाकला ल्हेम्बा मेग्यालाक। हुरे झ्यीना, खी़ घोलाक साबागो रागीलाक धेनी साबा ल्हेम्बा ॱङीङबाला ॱमीथी़न्गीलाक। 37धेनी सी़या घुन्क्षाङ साबागो, पीखु ॱङीङबा नाङदु ॱमीलुक्कीलाक। हीना ॱलुक्ना, पीखु रारी क्षाङगो भो़गीलाक धेनी पीखुगोवाः नोगीलाक। 38हीना घुन्क्षाङ साबागो पीखु साबा नाङदुराङ ॱलुक घोगुलाक। 39धेनी घुन्क्षाङ ॱङीङबागो थुरी सी़या, घुन्क्षाङ साबागो थुङये दो़पा मीझ्यीगीलाक घीझ्येरी ॱनाना ‘ॱङीङबागो राङ घा दुक’ ॱनेरी खुङक्याई ॱनागीलाक।”
ទើបបានជ្រើសរើសហើយ៖
लुका 5: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
