जेपा 9
9
साउलगी मीछे ग्युरवा
(जेपा २२:६-१६;२६:१२-१८)
1-2साउल धोराङा चोवोगी ङेनेक्याला, सेयेला जीक्टा कुली हो़तालाक। धेनी खो चो क्षो़पो़नचारु सोरी, चोवोगी लामला डोगीन ङेने फो-मो घीरीला शीम्दी, येरुसालेमला ठीक्ती हुङयेला दामासेकोगी छोक्खाङक्याई पो़न्पोक्याला छोक्चेनगी यीक्चा श्यी़वालाक।
3धेनी खो दामासेको ग्याजारु ॱलेप्कु झ्यीदी घाङला, ॱहाताक्पाला खी़ थाकोरला ॱनामने ॱमीच्यी हो़क साला च्यीक ग्याप्पालाक। 4धेनी खो साला रीरी केक च्यीक देरे ॱनागीन घोरपालाक, “साउल, साउल। ख्यो़ ङाला घीझ्येरी दुक्पु ताङाले?”
5“चोवो, राङ सु हीनो?” ॱनेरी साउलगी ढीवालाक।
धेनी खोङबागी सुवालाक, “ङा नी ख्यी़ दुक्पु ताता येशु हीन। 6हीना ख्यो़ लोङ धेनी ग्याजारु सोङ। होदुरु ख्यी़ झ्यीघोगीनगो, ख्यो़ला ॱनागुलाक।”
7खी़मुला डुगीन रोवाक्याई, केकगो च्यीगा घोरती सुवा ॱमाथोवालाक। धेनी लाब छीक च्यीया ताङ ॱमाथुक्वा लारी धेपालाक। 8साउल साने लारी ॱमीक पेरीयाः घीन्दा थोङ ॱमाथुक्पालाक। धेनी खी़ रोवाक्याई खोला लाक्पा शीम्दी, दामासेकोरु ठीक्पालाक। 9होदुरु खो श्याक्मो सुम थुक्पे, ॱमीक थोङये माझ्युवालाक धेनी शामा माशेबालाक धेनी क्षुवाः ॱमाथुवालाक।
10धा, दामासेकोरु आनानीया ॱनागीन धेपा-झ्यीगीन च्यीक हो़तालाक। चोवोगी खोला थोङनाङला देरे सुवालाक, “आनानीया।”
आनानीयागी लेन ग्याप्पालाक, “ला चोवो, ङा दुरु हो़क।”
11चोवोगी खोला सुवालाक, “लोङ धेनी खाप्ते ॱनागीन ॱराङगाकने सोरी, युदागी खाङबारु टारसो ग्याखापगी साउलला चो। खो सोवा ग्याप्ती धे हो़तालाक। 12आनानीया ॱनागीन मी च्यीक खोचारु होरी, खी़ धाब्ले ॱमीक थोङयेला, खी़ खाला लाक्पा श्याक्कीन थोङनाङ खी़ थो हो़तालाक।”
13आनानीयागी लेन ॱलोक्पालाक, “चोवो, दे मी देगी येरुसालेमदु हो़गीन, खेराङगी धाम्पे मीक्याला ॱमीच्यीकी दुक्पु तादुक ॱनेरी, मीक्याने ङी ॱहाघोसुङ। 14धेनी खो क्षो़पो़न क्षेक्याई आङजाने, खेराङगी छेन भो़गीन घीरीला शीम्दु दुरु होदुक।”
15धेनी चोवोगी खोला सुवालाक, “सोङ, घीझ्येरी ॱनाना याहुदापा मेन्गीन मीरीकक्या धाङ ग्यावुक्या धाङ ईस्राएल्पाक्याचारु, ङी कोरला स्येयेला खो नी ङी दाम्दा लाक्चा हीन। 16धेनी ङी दो़नला खो घाजो़ ङ्याङ घो़गुले ॱनेरी, ङा खोला तो़न्येहीन।”
17धेनी आनानीया सोरी साउल धेता खाङबा नाङदु जुवालाक। खी़ साउलगी खाला लाक्पा श्याक्ती ॱनेवालाक, “साउल, ख्यो़ दुरु हुङी घाङला लाम्गाला जाजा चोवो येशुगी ङाला, ख्यी़ ॱमीक धाब्ले थोङयेला धाङ धाम्पे थुक्ङीगी खाङयेला ख्यी़चारु झाजुङ।”
18धेनी लाम्साङ साउलगी ॱमीकने, ङ्यासाक च्योक्रे च्यीक ल्हीम्बालाक। धा खी़ थोवालाक। धेनी खो लारी ठी़सो़ लेन्बालाक। 19धेनी स्याम्ला खी़ शामा शेरी, धाब्ले तोप जोरपालाक। साउल श्याक्मो तीते धेपा-झ्यीगीनक्यामुला दामासेकोरु धेपालाक।
दामासेकोरु साउलगी कालोप
20लाम्साङ साउल छोक्खाङक्याला सोरी, येशुराङ को़न्क्षोकगी से लाक ॱनेरी, मीक्याला स्येपालाक। 21धेनी खोला ङेन्गीन घीरी ॱमीच्यीकी ॱहालेरी देरे ॱनेवालाक, “दे मी नी येरुसालेमदु येशुगी छेन भो़गीनक्याला मेताला ताङगीनगो माले? धेनी खुङक्याला शीम्दी क्षो़पो़न क्षेक्या चारु ठीक्ती डोयेला, खो दुरु होवा माले?” 22हीना साउलगी कालोप स्युक क्षेरु-क्षेरु सोवालाक धेनी येशुराङ मास्यीका लाक ॱनेरी, खी़ तेरता पाङपोक्या तो़न्दी, दामासेकोरु हो़गीन याहुदापा मीक्या गो थोम्दी, लेन घीन्दा ग्याप ॱमाथुक्पालाक।
23ङीमा घाजीङ स्याम्ने याहुदापाक्याई खोला सेयेला ढो़ झ्येवालाक। 24हीना खुङक्याई ढो़गो साउलगी छोरपालाक। ङीन-छेन खुङक्या खोला सेयेला ग्याजागी घोला ॱरुरी धेदालाक। 25हीना छेन च्यीक साउलगी ङेनेक्याई, खोला कोम्बा नाङदु श्याक्ती क्याने माला पाप्पालाक।
साउल येरुसालेमदु
26साउल येरुसालेमदु ॱलेप्ती, ङेनेक्याला थुक्ये थापस्यी झ्येवालाक। हीना खोवाः ङेने झ्युदुक ॱनेरी बा माधेवा, खुङक्या घीरी खोला जीक्पालाक। 27हीना बारनाबागी खोला कुछापक्याई दोङदु ठीक्ती होरी, दामासेकोगी लाम्गाला खी़ घाङ झ्येरी चोवोला ज्यारी, चोवोगी खोला का ॱनाङना धाङ दामासेकोरु येशुगी छेनने ॱमीच्यी ॱङीङक्षे झ्येरी, खी़ स्येगीनगो खुङक्याला स्येपालाक। 28होझ्येरी साउल खुङक्यामुला धेपालाक धेनी येरुसालेमगी साजा घीरीदु मीक्या घीरीला, येशुगी छेनला माजीक्पा का स्येपालाक। 29धेनी खो च्योई गीरीक याहुदापाक्यामुला लाब तारी थाप्पालाक हीना खुङक्या खोला सेयेला थापस्यी झ्येवालाक। 30धेनी धेपा-झ्यीगीनक्याई दे ॱहाघोरती, खोला केसारयाला ठीक्ती खोरी यु टारसोरु झावालाक।
31दे स्याम्ने युदेया धाङ गालील धाङ सामारीया स्योकगी क्षो़छोक नाङदु श्यीदे झ्युवालाक। धेनी चोवोला जीक्ती धाम्पे थुक्ङीगी सेमस्युक जोरती, क्षो़छोकक्या स्युक्क्षे झ्युरी माङदु सोवालाक।
लुडा धाङ योफा ग्याजारु पेटो
32पेटो ॱहाला-छुला साजा घीरीरु ढु ग्याप्पालाक धेनी लुडा ग्याजारु, हो़गीन धाम्पे मीक्या थुक्तु होवालाक। 33होदुरु खोला एनीया ॱनागीन मी च्यीक थुक्पालाक। होदे मी देला शा फोक्ती लो ग्ये थुक्पे, ङ्याजाने लाङ ॱमाथुक हो़तालाक। 34पेटोगी खोला ॱनेवालाक, “एनीया, येशु मास्यीकागी ख्यो़ला चो़गा ॱनाङगीलाक। लोङ धेनी ख्यो़री तेन तोब।” धेनी लाम्साङ खो लाङबालाक। 35लुडा धाङ स्यारोनदु धेगीन मी घीरीगी, खोला थोरी चोवो स्योकला सेम ग्युरपालाक।
36योफा ॱनागीन ग्याजारु ताबीथा ॱनागीन, धेपा-झ्यीगीन भोमो च्यीक हो़तालाक। गीरीक केकला मी़ मीङ “दोरकास” ॱनाना “स्यावा” लाक। मो नाम्हीना ले शाङा धाङ क्योवाक्याला रोवा झ्यीदालाक। 37हीना मो नेरी स्यीवालाक धेनी मी़ फुङबुगो खुङक्याई ठी़री खीम तो़ला श्याक्पालाक। 38योफा लुडा ग्याजाने ङ्येमोमा हो़तालाक। धेनी योफारु हो़गीन धेपा झ्यीगीनक्याई पेटो लुडारु दुक ॱनेरी घोरती, मी ॱङी झारी लो़न दे कुरपालाक, “हो़च्चो़-हो़च्चो़, मागोरा हीकी चारु लाम्साङ फेप्रोझ्यी।” 39होझ्येरी पेटो लारी खुङक्यामुला सोवालाक। खो होदुरु ॱलेप्ती, खुङक्याई खोला खीम तो़ला ठीक्पालाक। होदुरु युक्जामाक्या ङुता ग्यावी हो़तालाक धेनी खुङक्यामुला हो़ती घाङला, दोरकासगी शो़सा घो़ धाङ घोलाक श्येम्माक्या पेटोला तो़न्बालाक।
40पेटोगी खुङ घीरीला फीला तो़न्दी, पीमु चुक्ती सोवा ग्याप्पालाक। धेनी फुङबु स्योकला तेरी ॱनेवालाक, “ताबीथा लोङ।” धेनी मी़ ॱमीक तेवालाक धेनी पेटोला थोरी मो लावालाक। 41धेनी पेटोगी खोरी लाक्पा तेरती, मो टोङी लाङयेला रोवा झ्येवालाक। खी़ श्येम्मा धाम्पे मीक्या धाङ युक्जामाक्याला भो़री मो सो़न्पो तो़न्बालाक।
42दे लाब दे योफा घीरीला ढाम्बालाक धेनी मी ॱमीच्यीकी मागी चोवोला धेपा झ्येवालाक। 43धेनी पेटो योफारु सीमोन ॱनागीन, कोवा ॱङीखेनचारु श्याक्मो आरुङ माङा धेपालाक।
ទើបបានជ្រើសរើសហើយ៖
जेपा 9: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
