जेपा 8
8
1धोगोङ श्युरती सेतेफेनला सेगीनगोला, साउलगीयाः ङोलेन झ्येवालाक।
साउलगी धेपा-झ्यीगीनक्याला दुक्पु तावा
होदे ङीमानेराङ येरुसालेमदु हो़गीन, क्षो़छोकला ॱमीच्यीकी दुक्पु ङ्याङये गो चुक्पालाक। धेनी कुछापक्या माना श्येम्मा धेपा-झ्यीगीन घीरी, युदेया धाङ सामारीया यु घीरीला ढाम्बालाक। 2क्षो़वा रीङगाक्याई सेतेफेनगी फुङबुगो कुङबालाक धेनी खी़ क्षीला ॱमीच्यीकी ङुता ग्याप्पालाक।
3हीना साउलगी क्षो़छोक मेताला ताङयेला, नाङ-नाङला सोरी भीजा धाङ भोमो घीरीला ढी़दी सोरी आटा नाङदु दाक्तु च्युक्पालाक।
फीलीपगी सामारीयादु क्षो़ स्येपा
4धा डाम्दी सोसा धेपा-झ्यीगीन घीरीगी राङ घारु डोसादु, ताम्शाङ स्येदी-स्येदी सोवालाक। 5फीलीप सामारीयागी ग्याजारु सोरी, मास्यीकागी कोरला मीक्याला स्येपालाक। 6फीलीपगी स्येगीन लाबला ङेन्दी धेनी खी़ झ्यीगीन ॱहाङसागीन ताकक्या थोरी, मीमाङ घीरी, खी़ ॱनागीनगोला ॱमीच्यी दो़नाङ तेरती ङेन्बालाक। 7ॱनो़पा जुजा मीक्याने ॱनो़पाक्या ॱमीच्यी फेरा ग्याप्ती थो़न्बालाक धेनी शा फोक्पा धाङ श्याक्योवाक्या चो़गा झ्युवालाक। 8होझ्येरी होदे ग्याजारु ॱमीच्यीकी घाटो क्षे झ्युवालाक।
9होदे ग्याजारु सीमोन ॱनागीन मी च्यीक धेतालाक। खी़ एम्माने ॱहाला ॱमीक्ठुल तो़न्दी, सामारीयागी मीक्याला ॱहालेरु च्युक हो़तालाक। धेनी खो खोराङ मी क्षे च्यीक हीन ॱनेरी बोरस्ये स्येदालाक। 10मी क्षे-च्युङ घीरीगी “दे मी नी ‘वाङ क्षे’ ॱनागीन को़न्क्षोकगी वाङगो लाक” ॱनेरी, खोला ॱमीच्यीकी चीलालाक। 11युन्रीङाने हाला खी़ ॱमीक्ठुल तो़न्दी, मीक्याला ॱङोन्नेगी ॱहालेरु च्युक्पालाक धेनी मी घीरीगी ॱनाङवा ठुक्तु च्युक्पालाक। 12हीना फीलीपगी को़न्क्षोकगी ग्याखाप धाङ येशु मास्यीकागी छेनगी कोरला स्येगीन, ताम्शाङगोला मीक्याई धेपा झ्येवालाक धेनी केवे-फो धाङ मो घीरीगी ठी़सो़ लेन्बालाक। 13सीमोनगीयाः खोराङ धेपा झ्येवालाक धेनी ठी़सो़ लेन्सारती, खो फीलीपमुला ग्युक्वालाक। धेनी फीलीपने झ्युजा ताकक्या धाङ ॱहाङसागीन लेगाक्या थोरी खो ॱहालेवालाक।
14येरुसालेमदु हो़गीन कुछापक्याई सामारीया मीक्याई, को़न्क्षोकगी का खेलेन्दुक ॱनेरी ॱहाघोरती, पेटो धाङ योहान्नाला खुङक्याचारु झावालाक। 15खोङ ॱङीउ होदुरु ॱलेप्ती, दे मीक्याला धाम्पे थुक्ङी जोरास्योक ॱनेरी, ॱमो़लाम ग्याप्पालाक। 16घीझ्येरी ॱनाना धान्दा थुक्पे, खुङक्याई येशुगी छेनने ठी़सो़ लेन्गीनगो माना, धाम्पे थुक्ङी खुङक्याई खाला माभाप हो़तालाक। 17धेनी पेटो धाङ योहान्नागी खुङक्या खाला लाक्पा श्याक्पालाक धेनी खुङक्याला धाम्पे थुक्ङी थोप्पालाक।
18धा कुछापक्याई मीक्या खाला लाक्पा श्याई घाङला, थुक जोरकीनगो थोरी सीमोनगी होदे वाङ ङ्योयेला खुङ ङीउला आले पुरी 19श्यी़वालाक, “ङी लाक्पा श्याक्जा हो़लेला धाम्पे थुक्ङी भाप्येला, दे वाङ दे ङाला ॱनाङरोनाङ।”
20हीना पेटोगी खोला ॱनेवालाक, “ख्यी़ को़न्क्षोकगी ॱनाङज्यीनगो आलेगी ङ्यो़री थोप्टु ॱनेरी साम्दी, ख्यो़ धाङ ख्यी़ आले मेताला डोवास्योक। 21हीकी लेगाला ख्यो़ला थोप्ताङ घीन्दा मेतालाक घीझ्येरी ॱनाना को़न्क्षोकगी डुङदु ख्यी़ सेम ढाङपो मीदुक। 22ख्यी़ साम्लो ङेन्पागोला ग्यो़पा झ्यी धेनी देरे साम्लो ताङगीनगोला च्यीक झ्यीना घोङपा रास्योक ॱनेरी, चोवोला सोवा ग्योप। 23घीझ्येरी ॱनाना ङी ख्यो़ ॱमीच्यीकी ठादोकगी, खाङखा धाङ धीक्पे ढेन्योकला स्योरस्योवा थोङी।”
24धेनी सीमोनगी ॱनेवालाक, “खेराङगी सुङगीन च्योक्रे ङाला मीझ्युङयेला, ङी क्षीला खेराङ राङ चोवोला सोवा ग्याप्रो झ्यी।” 25पेटो धाङ योहान्नागी येशुगी पाङपो झ्यीये धाङ चोवोगी का स्येसारती, येरुसालेमदु लोक्पालाक। धेनी लाम्गाला डी़ घाङला, सामारीयागी यु माङक्षेला ताम्शाङगो स्येदी-स्येदी सोवालाक।
फीलीप धाङ ईथोपीयागी मी
26धा नाम्खे भाङछेन च्यीकगी फीलीपला ॱनेवालाक, “लोङ धेनी येरुसालेमने गाजा स्योकला डुगीन, ल्हो स्योकगी रीतोङगी लाम्गाला सोङ।” 27होझ्येरी खो क्षोम्दी सोवालाक। होदुरु ईथीयोपीयागी ग्यामु कान्दाकेगी ॱङुङेर, ईथीयोपीयापा ङ्युकरुमपा#८:२७ ङ्युकरुम ॱनाना एम्मा-एम्मा ग्यावुक्याई ॱमाक्मी खाक्क्षेक्याला ॱनालाक। खुङक्याई चीङ ताङजागो चेचा हुङालाक। च्यीकला खी़ थुक्पालाक। होदे ॱङुङेर दे येरुसालेमदु क्षो़पा पुरु सोरी, 28धेनी खो स्यीङता खोरलो खाला श्यो़न्दी, खोरी नाङ स्योकला लोक्यी हो़तालाक। होदे घाङला खो ॱङो़नस्येखेन यस्यायागी धेप ढोक्ई हो़तालाक।
29धेनी धाम्पे थुक्ङीगी फीलीपला सुवालाक, “स्यीङता खोरलो भोलोक्तु सोङ धेनी होदेमुला सोङ।” 30धेनी फीलीप भाङ तारी, होदे भोलोक्तु सोवालाक। धेनी होदे मीगी यस्यायागी धेप ढोक्कीनगो खी़ ॱहाघोरपालाक। “ख्यी़ होदे ढोक्कीनगी दो़न्दाकगो ॱहाघोरी?” ॱनेरी फीलीपगी खोला ढीवालाक।
31होदे मीगी लेन ग्याप्पालाक, “सी़ च्यीया ङाला दी दो़न्दाकगो ॱमाटो थुक्पे, ङा घाङ झ्येरी ॱहाघोरये?” धेनी खी़ फीलीपला स्यीङता खोरलो खाला, मुला श्युक्रो झ्यी ॱनेरी श्यी़वालाक। 32खी़ सुङरापने ढोक्कीन छीक्छामगो दे लाक,
“खो नी स्यावाला ठीक्कीन लुक च्योक्रे ठीक्पालाक,
धेनी पु डेगीन दोङदु लुक्टु खाबा धेगीन च्योक्रे,
खी़ खाने छीक च्यीया ॱमातो़न्बालाक।
33खोला ॱमेटा पाई घाङला,
ठीम ढाङपो खोला ॱमाचेपालाक।
खी़ ग्युपागी कोरला सी़ स्येये?
घीझ्येरी ॱनाना खी़ ॱरोकगो दे जाम्बुलीङने खेरती सोवालाक।”
34होदे ॱङुङेरगी फीलीपला ढीवालाक, “ॱङो़नस्येखेन दी खोराङगी कोरला सुङवाले याङमेना मी श्येम्मागी कोरला सुङवाले? ङाला सुङरोनाङ।” 35धेनी फीलीपगी होदे सुङरापगी छीक्छामने गो चुक्ती, खोला येशुगी कोरला ताम्शाङगो स्येपालाक।
36धेनी खुङक्या होदे लाम्गाने डी़ घाङला, क्षु हो़जारु ॱलेप्पालाक। धेनी होदे ॱङुङेरगी ॱनेवालाक, “तो़दाङ, दुरु क्षु दुक। ङा ठी़सो़ लेन्येला घीन्गी काक थुक्कीले?”
37[धेनी फीलीपगी ॱनेवालाक, “ख्यी़ सेम नाङने धेपा झ्यीना ठी़सो़ लेन्ना ढीक्कीलाक।”
होदे मी दी लेन ग्याप्पालाक, “येशु मास्यीका को़न्क्षोकगी से हीन ॱनेरी, ङा धेपा झ्यीदाहीन।”]#८:३७ एम्मागी गीरीक धेप ॱङीङबाला दे ३७ दे मेतालाक। धेनी स्याम्ला धेप साबाक्याला दे ढीक्ती होवालाक। 38धेनी खी़ स्यीङता खोरलोगो घुक्तु च्युक्पालाक। धेनी फीलीप धाङ ॱङुङेर ॱङीगारा क्षु नाङदु जुरी, फीलीपगी खोला ठी़सो़ तेरपालाक। 39खुङ ॱङीउ क्षुने फीला थो़न्दी घाङला, चोवो को़न्क्षोकगी थुक्ङीगी फीलीपला लाम्साङ खेरती सोवालाक। धेनी होदे ॱङुङेरगी, धाब्ले खोला नामा ॱमाथोवालाक हीना खो ॱमीच्यीकी ङ्यामो घी-घी सोवालाक।
40स्याम्ला फीलीपगी खोराङला आजोतोरु ग्याजारु थोवालाक। धेनी खो केसारयारु ॱमालेप्कीन थुक्पे, ग्याजा ॱलेप्सा घीरीला ताम्शाङ स्येदी-स्येदी सोवालाक।
ទើបបានជ្រើសរើសហើយ៖
जेपा 8: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
