जेपा 10
10
कोरनेलीहुगी पेटोला भो़वा
1केसारयारु कोरनेलीहु ॱनागीन मी च्यीक हो़तालाक। खो ईटालीपा ॱमाक्छोकगी ग्यापो़न च्यीक लाक। 2खो धाङ खी़ नाङमी घीरी, क्षो़ला घागीन धाङ को़न्क्षोकला चीरी जीक्नाङ झ्यीगीन हो़तालाक। खो मीमाङक्याला ज्यीम्बा ताङालाक धेनी को़न्क्षोकला च्योई सोवा ग्यालाक।
3श्याक्मो च्यीक ङीङमो छुची सुम्बा चो़ला, खी़ थोङनाङला को़न्क्षोकगी भाङछेन च्यीक ॱमीच्यीकी साला थोरी, खोला देरे ॱनेवालाक, “कोरनेलीहु।”
4धेनी खो छु थोरती खोला तेरी ढीवालाक, “चोवो, घी सुङवा हीनो?”
धेनी भाङछेनगी खोला सुवालाक, “ख्यी़ ॱमो़लाम धाङ ज्यीम्बा ताताक्या को़न्क्षोकगी डुङला ॱलेप्दुक। 5धा योफारु सीमोन ॱनागीन पेटोला भो़रु मी रे झोङ। 6खो ग्याछो डामदु हो़गीन कोवा ॱङीखेन सीमोनगी खाङबादु धेदुक।” 7धेनी भाङछेनगो होदेने फेप्ती, खी़ लाम्साङ खोरी ॱयोक्पो ङी धाङ को़न्क्षोकला चीगीन, खोला श्याप्ची श्युगीन ॱमाक्मी च्यीकला केक तावालाक, 8होदुरु झ्युजा घीरी खी़ खुङक्याला स्येदी, खुङक्याला योफारु झावालाक।
9ङीमा स्याम्मागो खुङक्या ढु ग्याप्ती योफा भोलोक्तु ङीङमो ॱलेप्कु झ्यीदी घाङला, पेटो खाङबागी ताङला ॱमो़लाम ग्याप्तु सोवालाक। 10धेनी खो फोवा तोक्ती च्यीक रे शाङी दो़पालाक। हीना शामा शी़ हो़ती घाङला, पेटोगी थोङनाङ च्यीक थोवालाक। 11खी़ नाम्खे श्यीङखाम भेरी होदेने रे क्षे च्यीक, शुर श्यीने ताक्ती जाम्बुलीङ स्योकला भाप्कीन थोवालाक। 12होदे रेदु काङबा श्यी हो़गीन धी़डोक्या धाङ रीताक सेम्चेनक्या धाङ तोडोक्या धाङ ॱनामगी झ्या ॱना घीरी हो़तालाक। 13धेनी केक च्यीकगी खोला सुवालाक, “पेटो, लोङ धेनी सेदी शो।”
14हीना पेटोगी ॱनेवालाक, “चोवो, दे ङा मीझ्यी घीझ्येरी ॱनाना चोक्पा याङना ॱमेचाङा घीन्दा ङी नामाः शा माङ्युङ।”
15धेनी केकगी धाब्ले सुवालाक, “को़न्क्षोकगी चाङमा जेगीनला ख्यो़ ॱमेचाङा ॱनेरी ॱमाना।” 16लेमो सुम थुक्पे देरे झ्युवालाक धेनी होदे रेगो नाम्खे श्यीङखाम स्योकला खेरपालाक।
17दे थोङनाङगी दो़न्दाकगो घी हीन्ढु ॱनेरी, पेटो साम्दी धेदी घाङला कोरनेलीहुगी झाजा मीक्याई सीमोनगी नाङगो ॱङेदी, खाङबागी घोरु लारी धे हो़तालाक। 18खुङक्याई केक ग्याप्ती ढीवालाक, “सीमोन सुङगीन पेटोगो दुरु श्युक हो़ताले?”
19धेनी पेटो होदे थोङनाङगी दो़न्दाकगोला, धोराङा गो थोम्दी धेदी घाङला धाम्पे थुक्ङीगी सुवालाक, “मी सुम ख्यो़ला चारु होदुक। 20लोङ, धेनी माला भाप्ती खुङक्यामुला दोक्पा घीन्दा मीझ्यीदा सुङ घीझ्येरी ॱनाना खुङक्याला ङी झावी।”
21पेटो माला होदे मीक्याचारु सोरी ॱनेवालाक, “खेक्याई चागीन मीगो ङा हीन। खेराङक्या दुरु हुङगीन दो़न्दाक घी ले?”
22खुङक्याई ॱनेवालाक, “ग्यापो़न कोरनेलीहुगी हेक्याला झाजुङ। खोङ को़न्क्षोकला चीगीन मी शाङा च्यीक लाक। खोङला याहुदापा मीक्याई, ॱमीच्यीकी घुस्याप झ्यीदालाक। धाम्पे भाङछेन च्यीकगी खेराङ घी सुङगीनगो ङेन्येला, खेराङला खोरी नाङदु फेप्सु श्यु ॱनेरी सुवालाक।”
23पेटोगी होदे मीक्याला नाङदु भो़री, होदे छेन्मुगो ङ्यारु च्युक्पालाक। ॱङेटोगो खो डाढीक झ्येरी खुङक्यामुला सोवालाक। धेनी योफाने धेपा-झ्यीगीन रीङगा खी़मुला सोवालाक। 24ङीमा स्याम्मागो खुङक्या केसारयारु ॱलेप्पालाक। धेनी कोरनेलीहुगी खोरी पी़न्दाक्या धाङ रोवा ङ्येक्याला भो़री, खुङक्याला घुक्ती धे हो़तालाक। 25धेनी पेटो खी़ नाङदु जुली घाङला, कोरनेलीहुगी खोला थोरी क्षाक क्षावालाक।
26हीना पेटोगी खोला ॱलारी ॱनेवालाक, “याला लोङ। ङाः ख्यो़ च्योक्रे मी च्यीक हीन।” 27धेनी खी़मुला लाब ताङी-ताङी पेटो नाङदु जुली घाङला, मी ॱमीच्यीकी माङा जोम्दी धेदा थोवालाक।
28पेटोगी खुङक्याला ॱनेवालाक, “याहुदापा मी च्यीक याहुदापा मेन्गीन मीरीकगी नाङदु देरे झ्येरी जुये धाङ ढीवा झ्यीये याहुदापा क्षो़ठीमला ॱमीढीयालाक ॱनेरी, खेक्याला क्षा हो़तालाक। हीना ङी सुलाः ॱमेचाङा याङना चोक्पा ॱनेरी साम्लो ताङये मेतालाक ॱनेरी, को़न्क्षोकगी ङाला तो़न जेसोङ। 29होझ्येरी ङाला लेन्दु झाङी घाङला, ङा दोक्पा घीन्दा माझ्येवा होवी। धा, ङाला घीझ्येरी खेराङगी केक तावो?”
30कोरनेलीहुगी लेन तेरपालाक, “ङीमा श्यी एन्ला दे धी़चो़ देलाराङ, ङीङमो छुची सुम्बा चो़ला, ङा ङारी नाङदु ॱमो़लाम ग्याप्ती धेहो़क। धेनी ॱहाताक्पाला हो़क ग्याप्कीन घोलाक घो़न्गा, मी च्यीक ङी दोङदु लारी धेजुङ 31धेनी सुजुङ, ‘कोरनेलीहु, को़न्क्षोकगी ख्यी़ ॱमो़लामक्या सेन्दुक धेनी ख्यी़ ज्यीम्बाक्या श्यीप्ता जेदुक। 32होझ्येरी सीमोन पेटोला लेन्दु झोङ। खो ग्याछो डामदु हो़गीन कोवा ॱङीखेन सीमोनगी नाङदु धेदुक।’ 33होझ्येरी ङी लाम्साङ खेराङला फेप श्युरु झावी। धेनी खेराङ दुरु फेप्ती घायेरे झ्युजुङ। धा चोवोगी खेराङला का ॱनाङना घीरी ङेन्येला, हेक्या घीरी को़न्क्षोकगी डुङदु दुरु जोम हो़क।”
पेटोगी ॱलोप्तो़न
34धेनी पेटोगी गो चुक्पालाक, “को़न्क्षोकगी सुलाः ॱयेवा मेजेदालाक ॱनेरी, धा ङी ॱङोन्ने ॱहाघोजुङ। 35मीरीक घारे हीन्नाः को़न्क्षोकला जीक्नाङ झ्येरी, चीगीन धाङ लेगा शाङा झ्यीगीनला को़न्क्षोकगी खेलेन जेगीलाक। 36येशु मास्यीकागी थोक्ने, को़न्क्षोकमुला श्यीदे हो़गीन ताम्शाङ दे, को़न्क्षोकगी ईस्राएल्पाक्याला ॱनाङना का दे, खेराङक्याला क्षा हो़तालाक। धेनी येशु मास्यीका घीरीगी चोवो लाक। 37योहान्नागी ठी़सो़गी ॱलोप्तो़न स्याम्ने, गालीलने गो चुक्ती युदेया यु घीरीला झ्युजा लाब घीरी खेक्याला छा हो़तालाक। 38धेनी नाजारेतगी येशुला को़न्क्षोकगी धाम्पे थुक्ङी धाङ नी़पागी दामा जेजागो, खेक्याला स्ये हो़तालाक। धेनी को़न्क्षोक खोङमुला झ्येरी, येशु फेप्सा घीरीला लेशाङ धाङ धी़कगी आङजाला ॱनेम्ना घीरीला, चो़गा झ्येरी फेप्पालाक। 39याहुदा धाङ येरुसालेमगी साजा घीरीदु, खोङबागी जेजा क्षाक्ले घीरीगी पाङपोगो, हे कुछापक्या हीन। खुङक्याई खोङबाला ग्याङस्यीङदु क्याङदी सेजुङ। 40हीना श्याक्मो सुम्बागोला, को़न्क्षोकगी खोङबाला कुसो़न्पो श्याङा जेदी, खोङला ॱङो़न्सुमदु तो़न जेजुङ। 41मी घीरीगी खोङबाला ॱमाथोवालाक हीना खोङगी पाङपो झ्युङयेला, को़न्क्षोकगी एम्माने दाम्दा हेक्याई थोवालाक। खोङबा श्याङा जेदी खोङमुला शागीन धाङ थुङगीनगो हेक्या हीन। 42धेनी मीक्याला ॱलोप्तो़न तेरये धाङ खोङबाराङ को़न्क्षोकगी दाम्दा, सो़न्पो धाङ स्यीम्बुगी ठीम्पो़न लाक, ॱनागीन पाङपो तो़न ॱनेरी खोङबागी हेक्याला का ॱनाजुङ। 43खोङबाला धेपा-झ्यीगीनक्याला खोङगी छेनने धीक्पाक्या धाक्कीलाक ॱनेरी, ॱङो़नस्येखेन घीरीगी खोङगी कोरला पाङपो तो़न हो़तालाक।”
44पेटोगी होदे लाबक्या ताङी घाङला, खोला ङेन्दी धेगीन घीरीगी खाला धाम्पे थुक्ङी भाप्पालाक। 45धेनी पेटोमुला योफाने होवा याहुदापा धेपा-झ्यीगीनक्या, याहुदापा मेन्गीन मीरीकगी मीक्यालाः को़न्क्षोकगी धाम्पे थुक्ङीगी ॱनाङज्यीन ॱनाङगीनगो थोरी ॱहालेवालाक। 46घीझ्येरी ॱना ना होदे मीक्याई केक श्येम्मा-श्येम्मा ग्याप्कीन धाङ को़न्क्षोकला तो़टा ताङगीनगो खुङक्याई घोरपालाक। धेनी पेटोगी ॱनेवालाक, 47“होराङ च्योक्रे दे मीक्याला धाम्पे थुक्ङी थोप्जुङ। धा दे मीक्याला क्षुगी ठी़सो़ लेन्येला, सी़ काक थुक्कीले?” 48धेनी पेटोगी खुङक्याला, येशु मास्यीकागी छेनने ठी़सो़ लेन्येला का तेरपालाक। धेनी खुङक्याई पेटोला श्याक्मो तीते, खुङक्यामुला श्युक्रोजे ॱनेरी श्यी़वालाक।
ទើបបានជ្រើសរើសហើយ៖
जेपा 10: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
