जेपा 14
14
ईकोनीयोन ग्याजारु
1आन्तीयोकदु च्योक्रे, पाउलु धाङ बारनाबा ईकोनीयोन ग्याजालाः याहुदापाक्याई छोक्खाङदु सोरी, होदुरु खुङक्याई क्षो़ स्युक क्षे स्येदी, ॱमीच्यीकी माङा याहुदापा धाङ गीरीक मीक्या चोवोला धेपा-झ्यीगीन झ्युवालाक। 2हीना धेपा मीझ्यीगीन याहुदापाक्याई याहुदापा मेन्गीन मीक्याला खोक्पा ग्यारी, धेपा झ्यीगीनक्याई डाला ॱलावालाक। 3होझ्येरी पाउलु धाङ बारनाबा, होदे ग्याजारु ङीमा माङा धेपालाक। खुङ ॱङीउगी ॱङीङक्षे झ्येरी चोवोगी थुक्जेगी कोरला क्षो़ स्येपालाक। धेनी चोवोगी खुङक्याला ॱहाङसागीन ताक धाङ लेगाक्या झ्यीयेला स्युक ॱनाङदी, खुङक्याई स्येगीन लाबगो धेन्पा लाक ॱनेरी पाङपो ॱनावालाक। 4हीना ग्याजागी मीक्या छोक ॱङीला खा ढावालाक। मी रीङगा याहुदापाक्या स्योकला धेनी मी रीङगागो कुछापक्या स्योकला सोवालाक। 5याहुदापा मेन्गीनगी मीक्या धाङ याहुदापाक्या धाङ खुङक्याई पो़न्पोक्या रुप्ती, पाउलु धाङ बारनाबाला ॱङ्याप्चो़ स्येदी धोगोङ श्युरती सेये ढो़ झ्येवालाक। 6हीना पाउलु धाङ बारनाबागी दे लाब ॱहाघोरती, खुङक्या डो़री सोरी लुकोनीया साजाला हो़गीन लुस्टा धाङ धेरबे ग्याजारु सोवालाक। 7होदे ग्याजा ॱङीउ धाङ ॱये-ॱयो़नला हो़गीन साजाक्याला, खुङक्याई चोवोगी ॱनाङना ताम्शाङ स्येपालाक।
लुस्टा धाङ धेरबे ग्याजारु
8लुस्टा ग्याजारु मी श्याक्योवा च्यीक धेदालाक। खो केने ॱहालाराङ, श्याक्योवा झ्युरी नामा घोबा चुक ॱमाथुक्पालाक 9पाउलु लाब ताङी घाङला खो घामोमा श्यीप्ता झ्येरी, ङेन्दी धे हो़तालाक। पाउलुगीयाः खी़ ङोरोङला घामोमा तेरी, होदे मीला खोराङ ढाक थुक्येगी धेपा हो़गीनगो थोवालाक। 10पाउलुगी ॱमीच्यीकी केक क्षेला ॱनेवालाक, “ख्यो़री काङबा खाला टोङी लोङ।” देरे ॱनागीनगो घोरलुङ मेताला, होदे मी उक्कुरा लावालाक धेनी खोरी काङबा चुक्ती घोबा ग्याप्पालाक।
11पाउलुगी देरे लेगा झ्येजा थोरी, होदे साजागी मीक्याई खोरी लुकोनीया केकला फेरा ग्याप्ती ॱनेवालाक, “ल्हाक्या नी मी झ्युरी होराङक्या चारु फेप्दुक” 12खुङक्याई बारनाबाला जीउस ॱनागीन ल्हा साम्बालाक धेनी पाउलुगो लाब ताङगीनगो झ्येरी, खोला हेरमे ॱनागीन ल्हा साम्बालाक। 13जीउस ल्हागी ल्हाखाङगो, होदे ग्याजागी थामालाराङ हो़तालाक। होदे ल्हाखाङगी क्षो़पो़नगी ॱलुङ धाङ मेन्तोकक्या खेरती ग्याजागी घोरु होवालाक। खुङक्याई बारनाबा धाङ पाउलुगी दोङदु ॱलुङक्या ॱमारछो़ पुयेला, डाढीक झ्येवालाक।
14दे लाब ॱहाघोरलुङ मेताला पाउलु धाङ बारनाबा, सेम्बा क्यो़री राङ-राङगी घोलाक रावालाक धेनी भाङ तारी मीगी छाङगाला सोरी फेरा ग्याप्ती ॱनेवालाक, 15“खेराङक्याई दे घी झ्यीदाले? हेक्याः खेराङक्या च्योक्रे मी हीन। हेक्या खेराङक्याला ताम्शाङ स्येये ॱनेरी होवाहीन। देरे क्षोमेगीन लेगा भोरती, नाम्खे श्यीङखाम धाङ जाम्बुलीङ धाङ ग्याछो धेनी होदुरु हो़गीन घीरी को़ ॱनाङगीन, सो़न्पो को़न्क्षोकला यीच्चे झ्यीघोगुलाक। 16एम्मागी मीक्याला को़न्क्षोकगी, राङ थेगीनगो झ्यीदु च्युक जेपालाक। 17खोङबागी ले शाङा झ्यीयेला बोर माजेपालाक। खोङबागी नाम्खाने क्षावा तारी धेनी धी़चो़ला लोदोक शोवा जेपालाक। शामा मेछो़ली ॱनाङदी मीक्याई सेम घाटोगी खाङ जेपालाक। देरे जेदी को़न्क्षोकगी क्षाक्लेक्याईराङ, खोङबागी पाङपो ॱनाङालाक।” 18दे लाब घीरी ॱनेरी पाउलु धाङ बारनाबा, राङला पुयेला डाढीक झ्येजा ॱमारछो़ला ॱमीच्यीकी काल्ले झ्येरी काक थुक्पालाक।
19होदे स्याम्ने आन्तीयोक धाङ ईकोनीयोन ग्याजाने, याहुदापा रीङगा होदुरु होवालाक धेनी खुङक्याई मीछोकगी घुङदु लाब शो़वालाक। खुङक्याई पाउलुला धोगोङगी श्युरपालाक धेनी खो स्यीवालाक साम्दी ढी़दी सोरी ग्याजा फीला तो़न्बालाक। 20हीना ङेनेक्या होरी, पाउलुगी थाकोरला जोम्बालाक धेनी खो लारी ग्याजा स्योकला सोवालाक। ॱङेटोगो खो बारनाबामुला धेरबे ग्याजारु सोवालाक।
सीरीया स्योकगी आन्तीयोक ग्याजारु लोक्पा
21पाउलु धाङ बारनाबा धेरबे ग्याजारु ताम्शाङ स्येदी, मी ॱमीच्यीकी माङाला चोवो येशुगी ङेने शो़वालाक। होदे स्याम्ने खुङक्या लुस्टा धाङ ईकोनीयोन ग्याजाने झ्युरी, पीसीदीया ग्यारापगी आन्तीयोकदु लोक्पालाक। 22खुङक्याई होदे साजाक्याला हो़गीन चोवोगी ङेनेक्याला स्युक्क्षे शो़री, धेपाला धेयेला सेमस्युक तेरपालाक। “को़न्क्षोकगी ग्याखापला ॱलेप्ये एन्ला, होराङगी ॱमीच्यीकी माङा दुक्पु शो़पा झ्येरी धे घोगीलाक” ॱनागीन लाब ॱलाप्पालाक। 23खुङक्याई क्षो़छोक घीरीला गोठीक्या को़वालाक धेनी ॱङ्युङनेला श्युक्ती सोवा ग्याप्ती, होदे ङेनेक्याला, खोरी धेपा झ्येजा चोवोगी क्षाकला पुवालाक।
24पीसीदीयाने झ्युरी खुङक्या पामफीलयाला लोक्ती होवालाक। 25पेरगेदु खुङक्याई चोवो येशु मास्यीकागी कोरला स्येपालाक। होदे स्याम्ने, खुङक्या आटालीया स्योकला बाप्पालाक। 26होदुरु डुशीङ श्यो़न्दी आन्तीयोक ग्याजारु लोक्पालाक। होदे ग्याजारुराङ एम्मा चोवोला धेपा-झ्यीगीनक्याई, पाउलु धाङ बारनाबाला को़न्क्षोकगी थुक्जेला पुरी, ताम्शाङ स्येगीन लेगाला झावालाक। धेनी धान्दा होदे लेगा डुप्ती, खुङक्या होदुरुराङ लोक्पालाक।
27आन्तीयोकदु लोक्ती होसारती, पाउलु धाङ बारनाबा धेपा-झ्यीगीन क्षो़छोकगी मी घीरीला केक तावालाक। को़न्क्षोकगी खुङक्या थोक्ने, लेगा घारे-घारे जेसुङ धेनी घारे झ्येरी याहुदापा मेन्गीन मीरीकगी मीक्याला, धेपा झ्यीयेगी लाम तो़न जेसुङ ॱनेरी खुङक्याई होदेक्याला ॱनेवालाक। 28होदे स्याम्ने खुङक्या श्याक्मो आरुङ माङा, होदुरु हो़गीन ङेनेक्यामुला धेपालाक।
ទើបបានជ្រើសរើសហើយ៖
जेपा 14: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
