जेपा 15
15
येरुसालेमदु छोक्दु
1होदे स्याम्ने मी रीङगा युदेयाने होरी, आन्तीयोक ग्याजागी धेपा-झ्यीगीनक्याला देरे ॱलापच्या तेरपालाक, “मोशेगी ॱनाङना क्षो़ठीमगी ॱरो च्योक्रे झ्यीये हीन्ना, पाउ चेदी ताक माग्याप्पा, खेक्याला थारपा राक थुक्कीमालाक।” 2देरे ॱलापच्या ॱहाघोरती, पाउलु धाङ बारनाबागी होदेक्यामुला ॱमीच्यीकी लाब झ्येवालाक। धेनी पाउलु धाङ बारनाबा धाङ धेपा झ्यीगीन रीङगाला, येरुसालेमदु दी कोरला कुछापक्या धाङ क्षो़छोकगी गोठीक्यामुला लाब झ्यीरु डोयेला को़वालाक। 3क्षो़छोकने झाजा मी देक्या फोनीके धाङ सामारीयाने झ्युरी, याहुदापा मेन्गीन मीरीकगी मीक्याः को़न्क्षोकला धेपा झ्यीगीन झ्यु हो़तालाक ॱनेरी स्येदी सोवालाक। दे लाब घोरती धेपा-झ्यीगीनक्या ॱमीच्यीकी ङ्यामो घेवालाक।
4खुङक्या येरुसालेमदु ॱलेप्ती, क्षो़छोकगी मीक्या धाङ कुछापक्या धाङ गोठीक्याई, खुङक्याला फेप्सु श्युवालाक। धेनी खुङक्याई थोक्ने, को़न्क्षोकगी जेगीन घीरी स्येपालाक। 5हीना फारुसीपाक्या नाङने धेपा-झ्यीगीन झ्युजाक्या लाङदी ॱनेवालाक, “याहुदापा मेन्गीन मीरीकगी धेपा-झ्यीगीनक्याः पाउ चेदी ताकगो ग्याप घोगीलाक धेनी मोशेगी ठीमक्याला चीघोलालाक।”
6कुछापक्या धाङ गोठीक्या लाब दे कोरला ढो़ झ्यीयेला जोम्बालाक। 7धेनी खुङक्याई ढो़ झ्येसारती पेटो लारी, खुङक्याला ॱनेवालाक, “पी़न्दाक्याओ, को़न्क्षोकगी खेराङक्या नाङने याहुदापा मेन्गीन मीरीकक्याला ताम्शाङ ङी खाने ॱनेरी, धेनी खुङक्याई ङेन्दी धेपा झ्यीयेला ङाला दाम्बालाक ॱनेरी, खेराङक्याला क्षा हो़तालाक। 8धेनी होराङ घीरीगी सेम नाङगी घीरी खेन जेगीन को़न्क्षोकगीराङ, याहुदापा मेन्गीन मीरीकक्याला होराङला च्योक्रे धाम्पे थुक्ङी ॱनाङदी, खुङक्यालाः दाम्बालाक ॱनेरी पाङपो तो़न जेपालाक। 9धेनी खुङक्याई धेपागी झ्येरी, खुङक्याई धीक्पागोवा को़न्क्षोकगी चाङमा शो़ जेपालाक। खोङबागी खुङक्या धाङ होराङला च्यीक च्योक्रे चीदाङ जेदालाक। 10धा, होराङ धाङ होरी धाङबी फामाक्यागीयाः खुर ॱमाथुप्कीन खु दे, खुङक्या खाला कारी, घीझ्येरी को़न्क्षोकला खोङडो लाङाले? 11हीना खुङक्याला क्योप्कीन च्योक्रे, होराङक्याः चोवो येशुगी थुक्जेने क्योप्कीलाक ॱनेरी होराङ धेपा झ्यीदालाक।”
12होदे घाङला मी घीरी खाबा धेपालाक। पाउलु धाङ बारनाबागी याहुदापा मेन्गीन मीक्याई खोक्दु, को़न्क्षोकगी खुङक्याई थोक्ने जेजा ॱहाङसागीन ताकक्या धाङ लेगाक्याई कोरला स्येली घाङला, घीरीगी घामोमा श्यीप्ता झ्येरी ङेन्दी धेपालाक। 13खुङक्याई लाब तासारती याकोबगी ॱनेवालाक, “पी़नक्याओ, ङी लाब ङेन आ! 14को़न्क्षोकगी ॱङीङजे जेदी, याहुदापा मेन्गीन मीक्याई सेमला लेगा एन्ला जेदी, खुङक्याने रीङगाला खोरी मी को़ ॱनावालाक। दे लाब सीमेयोन पेटोगी खेराङक्याला धान्दाका सुङ ॱनाजुङ। 15ॱङो़नस्येखेनक्याई देरेराङ ढीक हो़तालाक
16‘होदे स्याम्ने ङा लोक्येहीन,
धेनी दावीदगी धीप्ती धेता घुरखाङगो धाब्ले ॱलाङयेहीन।
धेनी धीप्तागो याङ शोयेहीन,
ङा होदेला धाब्ले शोयेहीन।
17ङी मीङने भो़पा याहुदापा मेन्गीन मीक्या,
धाङ श्येम्मा ल्हाक्ला मीक्यागीयाः ङाला चारु हुङयेला ङा देरे झ्यीयेहीन,
सुरी एम्माने ॱहालाराङ दे लाबक्या सुङसा,
18चोवो को़न्क्षोकगी सुङालाक।’”#आमोस ९:११-१२
19धेनी याकोबगी याङ ॱनेवालाक, “होझ्येरी को़न्क्षोक चारु लोक्कीन याहुदापा मेन्गीन मीक्याला, होराङ दुक्पु तेरये मेतालाक, ॱनेरी ङी साम्लो हो़क। घीहीन्ना धा होराङ खुङक्याला 20दे लाबक्याई कोरला देरे यीगी च्यीक ढीउ, ‘ल्हाकुन्डाला पुपा ॱमेचाङा झ्युजा शामा माशा धेनी लोक्येमने जेम्दी धो़क धेनी मीक्पा चीरती सेसा, धी़डोगी स्या माशा धेनी घीन्गीयाः ठाक ॱमाथुङ।’ 21घीझ्येरी ॱनाना मोशेगी ॱनाङना क्षो़ठीमगो एम्मानेराङ, ङासुगीन ङीमा तेनग्याङ छोक्खाङक्याला ढोक्कीन झ्येरी, खी़ ॱलापच्याक्या ग्याजा घीरीला स्ये हो़तालाक।”
याहुदापा मेन्गीन धेपा-झ्यीगीनक्याला ढीक्टा यीक
22होदे स्याम्ने कुछाप धाङ क्षो़छोकगी गोठीक्याई, चोवोला धेपा-झ्यीगीन पी़नक्या घीरीमुला ढो़ झ्येरी, मी ॱङी दाम्बालाक। खुङक्याई होदे ॱङीउला पाउलु धाङ बारनाबामुला आन्तीयोक ग्याजारु झाङये ढो़ झ्येवालाक। होदे दाम्दा मी ॱङीउ बारसाबास ॱनागीन युदा धाङ सीलवानु लाक। धेपा-झ्यीगीन पी़नक्या घीरीगी थोकला होदे ॱङीउ गोठी हो़तालाक। 23खुङ श्यीगी लागाला देरे यीगी च्यीक तेरती झावालाक,
“आन्तीयोक धाङ सीरीया धाङ कीलीकीयारु धेगीन याहुदापा मेन्गीन, धेपा-झ्यीगीन पी़नक्याला
खेराङगी पी़न, हे कुछापक्या धाङ क्षो़छोकगी गोठीक्याने टास्यी धेलेक।
24हेक्या खोक्ने सोसा मी रीङगागी ॱलापच्या शोक्पो तेरती, खेराङक्याला दुक्पु तेरपालाक ॱनागीन लाब हेक्याई ॱहाघोहो़क। हीना हेक्याई होदे मीक्याला झावा मालाक। 25होझ्येरी हेक्याई मुला ढो़ झ्येरी, खेक्याचारु झाङयेला, हीकी खोक्नेराङ पी़न रीङगा दाम्दी, हीकी रोवा ढेन्जे पाउलु धाङ बारनाबामुला झाङये थाक चेवी। 26खुङ ॱङीउगी होरी चोवो येशु मास्यीकागी लेगागी छीला, राङगी मीछेगोवा ङेन्काला तावालाक। 27खुङक्यामुला हेक्याई युदा धाङ सीलवानुलाः झाहो़क। हेक्याई ढीक्टा लाब खुङक्यागीयाः खेराङक्याला स्येगीलाक। 28धा ची घोगीन लाब ॱनेछागोक्या माना, खेराङक्याला श्येम्मा ठीमक्याई खु खुरतु ॱमीच्युक्ये ॱनेरी, धाम्पे थुक्ङी धाङ हेक्याई धेन्पा साम्जुङ 29ल्हाकुन्डाला क्षो़पा पुपा शामा माशा धेनी घीन्गीयाः ठाक ॱमाथुङ धेनी मीक्पा चीरती सेसा, धी़डोगी स्या माशा धेनी लोक्येमने जेम्दी धो़क। दे लाबक्या चीना खेराङक्याला घा झ्युङगीलाक। खेराङक्या घीरीला घा हुङवास्योक।”
30होदे स्याम्ने होदे पी़न श्यीगी यीक दे खेरती, आन्तीयोक ग्याजारु सोवालाक। होदुरु खुङक्याई धेपा-झ्यीगीन, क्षो़छोकगी मी घीरीला केक तारी होदे यीक तेरपालाक। 31होदे सेमस्युक पारकीन यीक ढोक्ती ॱनी घाङला, मी घीरी ङ्यामो घेबालाक। 32युदा धाङ सीलवानु खोराङ, को़न्क्षोकगी छोकने लाब ताङगीन ॱङो़नस्येखेन लाक। खुङक्याई धेपा-झ्यीगीन पी़नक्याला ॱमीच्यीकी सेमस्युक ॱनाङदी, खुङक्याई धेपा स्युक्क्षे शो़वालाक। 33ङीमा माङपो धेसारती, खुङक्या होदे साजागी पी़नक्यामुला घोङपा श्यी़री, राङला झाङगीन पी़नक्याचारु येरुसालेमला लोक्ती सोवालाक। 34[हीना सीलवानुला होदुरुराङ धेङी दो़पालाक।]#१५:३४ एम्मागी गीरीक धेप ॱङीङबाला दे ३४ दे मेतालाक। धेनी स्याम्ला धेप साबाक्याला दे ढीक्ती होवालाक।
35पाउलु धाङ बारनाबा धी़चो़ घाजीङ आन्तीयोकदु धेपालाक धेनी श्येम्मा मी माङामुला छाम्दी चोवोगी ॱलापच्या तेरती ताम्शाङ स्येपालाक।
पाउलु धाङ बारनाबा खा डावा
36धी़चो़ घाजीङ स्याम्ने पाउलुगी बारनाबाला ॱनेवालाक, “धा होराङगी को़न्क्षोकगी का स्येसा ग्याजा घीरीला धाब्ले ढो। होदुरु हो़गीन धेपा-झ्यीगीन पी़नक्या घारे दुओ ॱनेरी, तारु डो।” 37बारनाबागी मारकु ॱनागीन योहान्नाला मुला ठीक्ङी दो़पालाक। 38हीना पाउलुगी खोला ठीक्ङी मादो़पालाक घीझ्येरी ॱनाना मारकुगी एम्मा लेगा माडुपा, खुङक्याला पामफीलया साजादु भोरती लोक्ती सोवालाक। 39होदे लाबला पाउलु धाङ बारनाबा ॱमाथी़न्पालाक धेनी खुङक्या खा ढावालाक। बारनाबागो मारकुला ठीक्ती, ग्याछोगी लाम्गा झ्युरी साईपुरुसला सोवालाक। 40पाउलुगी राङला रोवा झ्यीयेला, सीलवानुला दाम्बालाक। होदे स्याम्ने धेपा-झ्यीगीन पी़नक्याई, खुङक्याला को़न्क्षोकगी ॱङीङजेगी क्षाकला पुवालाक धेनी खुङक्या सोवालाक। 41सीरीया धाङ कीलीकीया साजाने झ्युरी डी़ घाङला, खुङक्याई होदे साजाक्याई धेपा-झ्यीगीन क्षो़छोकक्याला धेपाला स्युक्क्षे शो़री सोवालाक।
ទើបបានជ្រើសរើសហើយ៖
जेपा 15: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
