जेपा 13
13
बारनाबा धाङ साउलला दाम्बा
1आन्तीयोक ग्याजागी क्षो़छोकला, ॱङो़नस्येखेनक्या धाङ ॱलोपो़नक्या माङा हो़तालाक। खुङक्या बारनाबा धाङ नीगार सीमेयोन धाङ कुरेनेगी लुकीहु धाङ ग्यावु हेरोदेमुला छारछा, मानाहेन धाङ साउल लाक। 2खुङक्या ॱङ्युङनेला श्युक्ती चोवोला तो़पा पुरी धेदी घाङला, धाम्पे थुक्ङीगी होदेक्याला सुवालाक, “बारनाबा धाङ साउलला ङी खुङक्याला भो़पा लेगागी क्षीदु पेरी श्योक।” 3होझ्येरी खुङक्याई ॱङ्युङने धाङ ॱमो़लामगो डुप्सारती, खुङ ॱङीउ खाला लाक्पा श्याक्ती वाङ ॱनावालाक धेनी खुङक्याला झावालाक।
बारनाबा धाङ साउल साईपुरुसरु
4धाम्पे थुक्ङीगी झाजा बारनाबा धाङ साउल आन्तीयोक ग्याजाने सेलुकीया ग्याजारु सोवालाक। होदेने खुङक्या ग्याछोने ढु ग्याप्ती, साईपुरुसला सोवालाक। 5सालामी ग्याजारु ॱलेप्ती, याहुदापाक्याई छोक्खाङक्या नाङदु जुरी, खुङक्याई को़न्क्षोकगी का स्येपालाक। होदे लेगाला रोवा झ्यीयेला, खुङक्याई मारकु ॱनागीन योहान्नालाः मुला ठीक हो़तालाक।
6साईपुरुस नाङ घीरी ढु ग्याप्सारती, खुङक्या पाफोस ॱनागीन ग्याजारु ॱलेप्पालाक। होदुरु खुङक्याई बार-येशु ॱनागीन याहुदापा ॱमीक्ठुल झ्यीगीन मी च्यीक थुक्पालाक। खो खोराङला “ङा ॱङो़नस्येखेन हीन” ॱनेरी ॱनालाक। 7होदे ॱमीक्ठुल झ्यीगीन दे साईपुरुसगी सेरगेहु पाउलुस ॱनागीन, पो़न्पो क्षेगी नाङला डोजीक झ्यीदालाक। सेरगेहु पाउलुसगो मी खेवा च्यीक लाक। खोला को़न्क्षोकगी का ङेन्ये दो़पा झ्येरी, बारनाबा धाङ साउलला केक ताङदु झावालाक। 8हीना एलुमास ॱनागीन ॱमीक्ठुल झ्यीगीनगी (दे खी़ गीरीक मीङ लाक) बारनाबा धाङ साउलला दुक्पु तेरती, पो़न्पो क्षेगोला धेपाने खा ॱलोक्ये झ्येवालाक। 9साउल (खोला पाउलु ॱनालाक) धाम्पे थुक्ङीगी खारी, एलुमासला तेरी धेदी ॱनेवालाक, 10“ख्यो़ लाब शाङा घीरीगी डा लाक धेनी च्यो़पा आ धाङ शोकगी खाङखा धी़कगी टुवा लाक। ख्यो़ चोवोगी लाम शाङागो ॱनोयेला, नामा भोरये मेने? 11धा तो़, चोवोगी ठीम ख्यी़ खाला फोक हो़तालाक। ख्यो़ श्यारा झ्युरी धी़चो़ घाजो़ ङीमागी हो़ गोवा थोङगीमालाक!” होदे घाङलाराङ होदेगी ॱमीकला ॱरीङबा नाक्पो च्योक्रे खोरपालाक धेनी होदे श्यारा झ्युवालाक धेनी लाक्पागी ॱहाला-सुला रोवा झ्यीगीन च्यीक चावालाक।
12चोवोगी ॱलापच्याला हो़गीन स्युक थोरी, पो़न्पो क्षेगो ॱमीच्यीकी ॱहालेवालाक धेनी खी़ चोवो खाला धेपा झ्येवालाक।
पीसीदीया ग्यारापगी आन्तीयोक ग्याजारु
13पाउलु धाङ खी़ रोवाक्या पाफोस ग्याजाने डुशीङ श्यो़न्दी, पामफीलया ग्यारापगी ग्याजा पेरगेरु ॱलेप्पालाक। होदेने मारकु ॱनागीन, योहान्नागी पाउलु धाङ बारनाबाला भोरती येरुसालेम स्योकला लोक्पालाक। 14पाउलु धाङ बारनाबागो, पेरगेने पीसीदीया ग्यारापगी आन्तीयोक ग्याजारु सोवालाक धेनी धाम्पे ङासुगीन ङीमाला होदे मी ॱङी छोक्खाङदु सोरी धेपालाक। 15मोशेगी ॱनाङना क्षो़ठीम धाङ ॱङो़नस्येखेनक्याई ढीक्टा धेपने ढोक सारती, छोक्खाङगी पो़न्पोक्याई पाउलु धाङ बारनाबाला केक तारी ॱनेवालाक, “नोक्याओ! खेराङक्यामुला मीक्याला सेमस्युक ॱनाङगीन लाब रे हो़ना सुङरोनाङ।”
16दे ॱहाघोरती पाउलु लावालाक धेनी लाक्पागी जुक्ते झ्येरी लाब दे तावालाक, “ईस्राएल्पा पी़नक्या धाङ को़न्क्षोकला धेपा झ्यीगीन मी श्येम्माक्याओ, ङी लाबला ङेन्रोनाङ। 17ईस्राएल्पा ग्युपागी को़न्क्षोकगी होरी धाङबी फामाक्याला दामा जेसुङ धेनी खुङक्या एजेप ग्याखापदु धेदी घाङला, खुङक्याई मीरीक माङा फेरु च्युक्वा जेसुङ। खोङबागी नी़थु तो़न्दी, को़न्क्षोकगी खुङक्याला एजेप ग्याखापने तो़न्दा जेसुङ। 18खुङक्या रीतोङला धेती घाङला, को़न्क्षोकगी लो श्यीपच्यु थुक्पे, शो़गोम झ्येरी खुङक्याई तादोक झ्येसुङ। 19खोङबागी कानान ग्याखापगी मीरीक धी़नला मेताला ताङा जेसुङ धेनी होदे ग्याखापगी साजा होरी धाङबी फामाक्याई आङजाला ॱनावालाक। 20होदे थुक्पे लो श्यीपग्या ॱङापच्यु चो़जे झ्युसालाक।
“होदे स्याम्ने को़न्क्षोकगी खुङक्याई घुङदु ठीम चेयेला ठीम्पो़नक्या को़जुङ। होदे ठीम्पो़नक्याई च्यीकगी स्याबाने च्यीक झ्येरी, ॱङो़नस्येखेन सामुएलगी धी़चो़ थुक्पे लेगा झ्येवालाक। 21होदे स्याम्ने होरी धाङबी फामाक्याई ग्यावु घो़ली ॱनेरी श्योवा पुवालाक धेनी को़न्क्षोकगी खुङक्याला बेन्यामीनगी ग्युपागी कीशगी भीजा साउलला ग्यावु को़ ॱनाङवालाक। साउलगी लो श्यीपच्यु थुक्पे ग्याखाङ शीम्बालाक। 22धेनी को़न्क्षोकगी खोला तो़न्दी दावीदला, ग्यावु को़ जेपालाक। दावीदगी कोरला को़न्क्षोकगी देरे सुङ हो़तालाक, ‘यीस्येगी भीजा दावीदला थुक्यी घाङला, ङी सेम्बा थेगीन मी जोरसुङ। खी़ ङी छीला झ्यीघोगीन लेगा घीरी डुप्तु च्युक्कीलाक।’#१ सामुएल १३:१४;१६:१२ 23खोङबागी जेजा धाम्चा डुप्ती, को़न्क्षोकगी ईस्राएल्पाक्याई क्षीला ग्यावु दावीदगी ग्युपाने राङ क्योप्खेन च्यीक झाङा जेसुङ। खोङबा नी येशु लाक। 24येशुगी खोरी क्षाक्ले गो चुक्ये एन्ला ठी़सो़ ॱनाङगीन योहान्ना होवालाक। खी़ ईस्राएलगी मीक्याला राङगी धीक्पा पारी, सेम ग्युरये धाङ क्षुगी ठी़सो़ लेन्येगी का स्येपालाक। 25खोरी लेगा डुप्कु झ्यीदी घाङला योहान्नागी ॱनेवालाक, ‘खेक्या ङा सु हीन्ढी़ ॱनेरी सामी हेतो? ङा नी क्याम्गो़नगो मेन हीना खोङबा ङा स्याम्ने फेवी हो़तालाक धेनी ङा नी खोङबागी पोल्लेगी डुताक टोरीन खाये मेक।’
26“पी़नक्याओ, आब्राहामगी ग्युपागी टुवाक्या धाङ को़न्क्षोकला जीक्नाङ झ्यीगीन याहुदापा मेन्गीनक्याओ, दे थारपागी का दे को़न्क्षोकगी होराङ घीरीगी क्षीला ॱनावालाक। 27हीना येरुसालेमदु धेगीनक्या धाङ खुङक्याई पो़न्पोक्याई येशुला क्याम्गो़नगो लाक ॱनेरी ङो ॱमास्येवालाक। ॱङो़नस्येखेनक्याई क्षो़ठीमला ढीक्टा लाब धाम्पे ङासुगीन ङीमाला च्योई ढोक्कीन झ्येरीया, खुङक्याई ॱहामाघोरपालाक। येशुला सेये छेपा तेरती खुङक्याई क्षो़ठीमला, खोङबागी कोरला ढीक्टा लाबगो डुप्पालाक। 28होदेक्याई येशुला सेये खुङ ॱमाङेबालाक हीना खुङक्याई येशुला से घोगीलाक ॱनेरी, पीलातुला श्योवा पुवालाक। 29देरे झ्येरी क्षो़ठीमला खोङबागी कोरला ढीक्टा लाब घीरी डुप्ती, खुङक्याई खोङबाला ग्याङस्यीङने माला पाप्ती, धेनी धी़ठोदु श्याक्पालाक। 30हीना को़न्क्षोकगी येशुला छीवाने सो़न्पो श्याङ जेपालाक। 31गालील ग्यारापने खोङबामुला येरुसालेमदु होवाक्याई श्याक्मो ॱमीच्यीकी माङा थुक्पे, खोङबाला ज्याये राक्पालाक धेनी खुङक्यागो धान्दा ईस्राएलगी मीक्याई छीला खोङबाला ज्याजा पाङपोक्या लाक। 32धा हेक्या खेराङक्याला दे ताम्शाङ स्येयेहीन, को़न्क्षोकगी होरी धाङबी फामाक्याला जेजा धाम्चा, 33खोङबागी खुङक्याई टुवाक्या क्षीलाराङ डुप जे हो़तालाक। येशुला छीवाने सो़न्पो श्याङी घाङला, खोङबागी होदे क्षो़ताम होरी क्षीलाराङ डुप जेपालाक। धा को़न्क्षोकगी खोङबाला छीवाने सो़न्पो श्याङगीलाक ॱनागीन लाबगी कोरला सुङगुरगी लेहु ॱङीवाला होझ्येरी ढीक हो़तालाक,
‘ख्यो़ ङी भीजा हीन,
धीरीङ ङा नी, ख्यी़ याप हीन।’#सुङगुर २:७
34“धेनी खोङबाला धाब्ले नामा सेमेघोगीन झ्येरी, सो़न्पो श्याङा जेगीलाक ॱनागीन लाबगी कोरला, को़न्क्षोकगी देरे सुङ हो़तालाक
‘दावीदला धाम्चा जेजा धाम्पा धाङ ॱमो़लाम ॱङोन्नेगो,
ङा खेक्याई खोक्दु झाङाहीन।’#यस्याया ५५:३
35“याङ, सुङगुरगी श्येम्मा ॱलुला दावीद ग्यावुगी देरे ढीक हो़तालाक,
‘को़न्क्षोक, खोङबागी खेरी धाम्पे मीला रुरी जोक्तु च्युक्कीमालाक।’#सुङगुर १६:१०
36“दे लाबगो दावीदगी खोरी कोरला ॱनेवामालाक। घीझ्येरी ॱनाना खोरी धी़चो़ला, को़न्क्षोकगी दो़पाने लेगा झ्येसारती, खो नी स्यीवालाक धेनी खोरी धाङबी फामामुला कुङदी रुवालाक। 37हीना को़न्क्षोकगी छीवाने सो़न्पो श्याङगीनगो, होदेरे झ्येरी मारुवालाक। 38होझ्येरी पी़नक्याओ, येशुने धीक्पा दाक्कीलाक ॱनेरी खेक्याई स्येलास्योक। 39येशुला धेपा-झ्यीगीनक्या घीरी धीक्पाने थारपा थोप्ती, को़न्क्षोकगी डुङदु ढाङपो झ्युङगीलाक। दे लेगा मोशेगी ॱनाङना क्षो़ठीमगी डुप ॱमाथुक्पालाक। 40होझ्येरी शाप-शाप झ्येरी धो़क धेनी ॱङो़नस्येखेनक्याई सुङसा दे लाबक्या, खेराङक्या खाला माझ्युङवास्योक।
41‘खे ॱमेटा पाप्कीनक्याओ,
ॱहाङसा झ्यी धेनी मेताला सोङ!
घीझ्येरी ॱनाना खेक्याई धी़चो़ला ङा देरे लेगा च्यीक झ्यीयेहीन,
होदे लेगागी कोरला सी़या खेक्याला ॱनानाः
खेक्याई धेपा झ्यीगीमालाक।’”#हाबाकुक १:५
42पाउलु धाङ बारनाबा छोक्खाङने थो़न्दी घाङला मीक्याई, “श्येम्मा ङासुगीन ङीमाला दे लाबक्याई कोरला हेला धोराङा सुङरोनाङ” ॱनेरी श्योवा पुवालाक। 43छोक्दी़ जोक्ती याहुदापाक्या धाङ याहुदापा क्षो़ चीगीन श्येम्मा मीरीकगी मीक्या, पाउलु धाङ बारनाबागी स्याम्ला सोवालाक। पाउलु धाङ बारनाबागी होदेक्यामुला लाब तारी च्योई, को़न्क्षोकगी ॱङीङजे नाङ धो़क ॱनेरी च्याक ग्याप्पालाक।
44श्येम्मा ङासुगीन ङीमाला ताम्शाङ ङेन्येला, ग्याजागी मी माङक्षे घीरी रुप्ती होवालाक। 45याहुदापाक्याई मीगी छाङगा देरे माङा थोरी, पाउलु धाङ बारनाबाखाला ठादोक झ्येवालाक। होदेक्याई पाउलुगी सुङगीनला क्षाले झ्येरी ॱमेटा पाप्पालाक। 46हीना पाउलु धाङ बारनाबागी ॱयोल्ले जीक्टा ॱमीझ्यीदा ॱनेवालाक, “खेक्याचारु एन्ला को़न्क्षोकगी का स्येघोये हो़क हीना खेराङक्याई माङेन्बालाक। खेराङक्या राङला थामेगीन छेसोकगो थोप्ये मेगीन शो़वालाक, होझ्येरी हेक्या श्येम्मा मीरीकगी मीक्याचारु डोवालाक। 47घीझ्येरी ॱनाना चोवोगी हेला ‘जाम्बुलीङगी था थुक्पे मीक्याई थारपा थोप्पास्योक ॱनेरी, ङी खेक्याला याहुदापा मेन्गीन मीरीकक्याई खोक्दु हो़क झ्युङयेला को़वाहीन।’#यस्याया ४२:६;४९:६ सुरी देरे का ॱनावालाक।”
48दे लाब ॱहाघोरती याहुदापा मेन्गीन मीक्या ङ्यामो घेरी, चोवोगी ॱनाङना काला तो़टा पुवालाक। थामेगीन छेसोकगी छीला एम्माने ॱहालाराङ, को़न्क्षोकने दाम्दा घीरीगी येशु मास्यीका खाला धेपा झ्येवालाक।
49चोवोगी का होदे साजागी छोक घीरीला ख्याप्पालाक। 50हीना याहुदापाक्याई, याहुदापागी क्षो़लुक झ्यीगीन भोमो खाक्क्षेक्या धाङ ग्याजागी पो़न्पोक्याला खोक ग्यावालाक धेनी खुङक्याई होदे ग्याजागी मीक्याला, पाउलु धाङ बारनाबाला दुक्पु ताङयेला ॱलाप्पालाक। धेनी खुङ ॱङीउला होदे ग्यारापने फीला तो़न्बालाक। 51धेनी पाउलु धाङ बारनाबागी होदे मीक्याला, को़न्क्षोकगीराङ ठीम चेगीलाक ॱनेरी तो़न्येला, खोरी काङबागी थाला ॱरुक्ती धेनी ईकोनीयोन ग्याजा स्योकला सोवालाक। 52धेनी धेपा झ्यीगीनक्या घाटो धाङ धाम्पे थुक्ङीगी खावालाक।
ទើបបានជ្រើសរើសហើយ៖
जेपा 13: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
