जेपा 12
12
याकोब सेपा धेनी पेटो चो़न्खाङदु छी़पा
1होदे धी़चो़ला ग्यावु हेरोदेगी, क्षो़छोकगी मी रीङगाला दुक्पु ताङये गो चुक्पालाक। 2योहान्नागी नो याकोबला खी़ ढीगी सेदु च्युक्पालाक। 3याहुदापा मीक्या होदेला ङ्यामो घागीनगो थोरी, खी़ पेटोलाः शीम्दु च्युक्पालाक। होदे घाङला क्युरची मेगीन ग्याङगा शागीन धी़छेनगो लाक। 4याहुदापाक्याई पेसाकगी धी़छेन जोक्ती स्याम्ला, खोला मीमाङक्याई दोङदु ठीक्ये साम्दी, खी़ पेटोला शीम्दी चो़न्खाङ नाङदु धाक्पालाक। धेनी ॱमाक्मी च्युढुकने खाक श्यी-श्यी झ्येरी, रेमो ग्याप्ती खोला ॱरुङयेला को़वालाक। 5होझ्येरी पेटो चो़न्खाङदु धाक्पालाक हीना क्षो़छोकगी सेम तीङने, खी़ क्षीला को़न्क्षोकला ॱमो़लाम ग्याप्पालाक।
पेटो चो़न्खाङने थारपा
6हेरोदेगी पेटोला मीमाङक्याई दोङला ठीक्ती हुङये ॱनागीन छेन एम्मागोला, पेटो च्याक्ता ॱङीगी दाम्दी, ॱमाक्मी ॱङीगी घुङदु ङ्यारी धे हो़तालाक। श्येम्मा ॱमाक्मी ॱङीउ चो़न्खाङगी घो ॱरुरी धे हो़तालाक। 7ॱहाताक्पाला को़न्क्षोकगी भाङछेन च्यीक होदुरु थोवालाक धेनी नाङ घीरीदु हो़क ग्याप्पालाक। धेनी भाङछेनगी पेटोला छोक च्यीकने घु-घु तारी ॱङी चेदी “ग्योक्जे लोङ” ॱनेरी ॱनेवालाक। धेनी खी़ लाक्पाने च्याक्थाकगो ढोवालाक। 8धेनी को़न्क्षोकगी भाङछेनगी खोला ॱनेवालाक, “ख्यो़री काउ रेरी पोल्ले घो़न।” धेनी पेटोगी होदेरे झ्येवालाक। धेनी भाङछेनगी खोला ॱनेवालाक, “ख्यो़री घो़ घो़न्दी ङी स्याबाला स्योक।” 9धेनी पेटो चो़न्खाङ फीला खी़ स्याबाला डारी सोवालाक। हीना भाङछेनगी घी झ्यीगीनगो ॱङोन्ने हीन्गीनगो, खी़ ॱहामाघोवा खोराङ थोङनाङ च्यीक थोवा हीन्ढु ॱनेरी साम्बालाक। 10धेनी खुङ ॱङीउ ॱरुङगीन धाङपो धाङ ॱङीवाने थारती, ग्याजा स्योकला डोगीन च्याकगी घो दोङदु ॱलेप्पालाक। होदे घो दे खुङ ॱङीउ क्षीला होझ्येरीराङ बेरी, खुङ ॱङीउ फीला थो़न्बालाक। धेनी ॱराङगाक च्यीकने डी़ घाङला, भाङछेनगो ॱहाताक्पाला येरी सोवालाक।
11धेनी पेटोगी घी झ्युङगीनगो ॱहाघोरती ॱनेवालाक, “धा, दे धेन्पा लाक ॱनेरी ङी ॱहाघोजुङ। चोवो को़न्क्षोकगी खोराङगी भाङछेन झारी ङाला हेरोदेगी आङजा धाङ याहुदापा मीक्याई रेवाने ङाला क्योप जेजुङ।”
12दे ॱहाघोरती खो मारकु ॱनागीन योहान्नागी, आमा मीरीयामगी खाङबादु सोवालाक। होदुरु मी ॱमीच्यीकी माङा जोम्दी ॱमो़लाम ग्यावी धे हो़तालाक। 13पेटोगी घो दुवालाक धेनी रोदे ॱनागीन ॱयोक्मोगो घोच्चारु सुदुक ॱनेरी तारु होवालाक। 14पेटोगी केक ङोस्येरी मो ॱमीच्यीकी ङ्यामो घेवालाक धेनी घोगो ॱमापेवा नाङला भाङ तारी सोरी, पेटो घोच्चारु दुक ॱनेरी स्येपालाक।
15खुङक्याई मोला “ख्यो़ ॱङ्यो़वा माले?” ॱनेरी ॱनेवालाक। हीना मो होदे पेटोराङ लाक ॱनेरी था पी़दी धेदी खुङक्याई मोला ॱनेवालाक, “होदे खी़ भाङछेन हीन्ढु।”
16हीना पेटो घो धुरी धे हो़तालाक धेनी खुङक्याई घो पेरी ती घाङला खोला थोरी ॱमीच्यीकी ॱहालेवालाक। 17पेटोगी खुङ घीरीला खाबा धो़क ॱनायेला जुक्ते झ्येवालाक धेनी चो़न्खाङने फीला चोवोगी घाङगी झ्येरी तो़न्जो ॱनेरी घीरीला स्येपालाक। “लाब दे याकोब धाङ पी़नक्याला स्यो़क।” ॱनेरी खो यु श्येम्मा च्यीकला सोवालाक।
18ॱनाम लारी पेटोला घी झ्युवाले ॱनेरी ॱमाक्मीक्या नाङदु ॱमीच्यीकी ॱङ्योक्टा क्षे झ्युवालाक। 19हेरोदेगी खोरी ॱमाक्मीक्याला पेटोला चायेला का ॱनावालाक हीना खुङक्याई खोला ॱमाङेबालाक। धेनी ॱरुङगीनक्याला ढीवा कुवालाक धेनी खुङक्याला सो़क ॱनेरी का ॱनावालाक। होदे स्याम्ने हेरोदे खोराङ युदेयाने केसारयारु श्याक्मो तीते च्यीक धेदु सोवालाक।
हेरोदे ढोवा
20ताएर धाङ सीदोनगी मीक्यामुला हेरोदे ॱमीच्यीकी छीक्पा शेवालाक। हीना होदे ग्याजागी शामाक्या ग्यावु हेरोदेगी ग्याखापने रा ली़दालाक। होझ्येरी खुङक्याई छोक्पा च्यीक बालास्तो ॱनागीन ग्याखाङगी पो़न्पोला थुक्ती, खी़मुला लाब ज्याबोमा झ्येरी धेनी हेरोदेचारु सोरी छाम्रो झ्यी ॱनेरी, श्योवा पुयेला खी़ रोवा लेन्बालाक।
21धेनी खुङक्यामुला थुक्येला को़का ङीमागो ग्यावुगी घो़न्गीन घो़गो हेरोदेगी घो़न्दी, ठीम्चो़गी ठीला श्युक्ती मीमाङक्याला का ॱनावालाक। 22“दे नी मीगी केक मेन्दा ल्हागी सुङकेक लाक” ॱनेरी मीमाङक्या फेरा ग्याप्ती धेबालाक। 23हेरोदेगी मीमाङक्याई तो़टागो को़न्क्षोकला ॱमापुवा, खोराङ राङ खेलेन्दी लाम्साङ चोवो को़न्क्षोकगी भाङछेनगी खोला क्षेपा कावालाक। धेनी बुगी शेरी खो स्यीवालाक।
24हीना को़न्क्षोकगी का ख्याप्ती सोरी धेपा-झ्यीगीनक्या माङदु-माङदु फेरी सोवालाक।
25धेनी बारनाबा धाङ साउल खोरी लेगा घीरी येरुसालेम थुक्पे डुप्ती, मारकु ॱनागीन योहान्नाला ठीक्ती लोक्ती सोवालाक।
ទើបបានជ្រើសរើសហើយ៖
जेपा 12: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
