जेपा 11
11
पेटो येरुसालेमदु लोक्पा
1धेनी कुछापक्या धाङ युदेयारु हो़गीनक्याई, याहुदापा मेन्गीनक्यागीयाः को़न्क्षोकगी का खेलेन झ्येदुक ॱनेरी ॱहाघोरपालाक। 2होझ्येरी पेटो येरुसालेमदु ॱलेप्ती, याहुदापा धेपा-झ्यीगीनक्याई खोला क्यो़न चुक्पालाक। 3खुङक्याई ॱनेवालाक, “ख्यो़ याहुदापा मेन्गीन मीरीकक्या चारु डो़नला सोरी, खुङक्यामुला शामा शेदुक।”
4धेनी पेटोगी खुङक्याला घी झ्युङगीनगो घीरी रेमीला स्येपालाक, 5“योफा ग्याजारु ङा ॱमो़लाम ग्यावी घाङला, ङी थोङनाङ च्यीक थोजुङ। रे क्षे च्योक्रे च्यीक नाम्खे श्यीङखामने, शुर श्यीने ताक्ती, ङी खाला भाप्कीन ङी थोजुङ। 6ङी होदे रेला ती घाङला, काङबा श्यी हो़गीन धी़डोक्या धाङ रीताक सेम्चेनक्या धाङ तोडोक्या धाङ ॱनामगी झ्या ॱना घीरी थोजुङ। 7धेनी ङी देरे सुङगीन केक च्यीक घोरजुङ, ‘पेटो, लोङ धेनी सेदी शो।’ 8हीना ङी देरे ॱनेवी, ‘चोवो, दे ङा मीझ्यी, घीझ्येरी ॱनाना ङी खा नाङदु चोक्पा याङना ॱमेचाङा घीन्दा नामाः चुक माङ्युङ।’ 9हीना नाम्खे श्यीङखामने केकगी़ धाब्ले सुजुङ, ‘को़न्क्षोकगी चाङमा शो़सागोला ख्यो़ ॱमेचाङा ॱनेरी ॱमाना।’ 10लेमो सुम थुक्पे देरे झ्युजुङ धेनी होदे रेगो, नाम्खे श्यीङखाम स्योकला खेरजुङ। 11लाम्साङ हे धेजा खाङबारु केसारयाने जाजा मी सुम ॱलेप्जुङ। 12धेनी धाम्पे थुक्ङीगी ङाला दोक्पा घीन्दा मीझ्यीदा, खुङक्यामुला सोङ सुजुङ। धेनी दुरु हो़गीन पी़न ढुक ङीमुला सोरी, हे घीरी होदे मीगी़ नाङदु सोवी। 13खी़ हेक्याला भाङछेन च्यीक खोरी नाङदु, खी़चारु थोरी देरे सुङगीनगो हेला स्येजुङ, ‘योफारु मी च्यीकला सीमोन ॱनागीन पेटोला भो़रु झोङ। 14ख्यो़ धाङ ख्यी़ नाङमी घीरीला, घाङ झ्येरी क्योप्ये ॱनेरी, खी़ ख्यो़ला का ॱनाङगीलाक।’ 15धेनी ङा लाब ताङी घाङला, होराङक्याई खाला गोमा धाम्पे थुक्ङी भाप्कीन च्योक्रे, खुङक्या खाला भाप्सुङ। 16‘योहान्नागी क्षुगी ठी़सो़ ॱनावालाक हीना खेक्याला धाम्पे थुक्ङीगी ठी़सो़ जोरकीलाक।’ ॱनेरी चोवोगी सुङगीन कागो ङी ढेन्जुङ। 17होझ्येरी चोवो येशु मास्यीकाला धेपा झ्येरी, को़न्क्षोकगी होराङला ॱनाङना ॱनाङज्यीन च्योक्रे, खुङक्याला होदे ॱनारी मेताला, को़न्क्षोकला काक्कीन ङा सु लाक से?”
18धेनी दे ॱहाघोरती खुङक्याई पेटोला क्यो़न चुक्ये भोरती, को़न्क्षोकला तो़पा देरे पुवालाक, “धा ॱहाना को़न्क्षोकगी याहुदापा मेन्गीनक्यालाः खोरी धीक्पा पारी सेम ग्युरये धाङ थामेपे छेसोक थोप्येगी घुकाप ॱनाङदुक।”
आन्तीयोकदु क्षो़छोक
19सेतेफेन सेदी धेपा-झ्यीगीनक्याला दुक्पु ङ्याङी घाङला, खुङक्या फोनीके धाङ साईपुरुस धाङ सीरीयागी आन्तीयोकगी ग्याजाक्याला ढु ग्याप्ती ढाम्बालाक। खुङक्याई याहुदापाक्याला च्यीगा को़न्क्षोकगी का स्येपालाक। 20घीहीन्ना साईपुरुस धाङ कुरेनेने आन्तीयोकदु ॱलेप्ला धेपा-झ्यीगीन रीङगाक्याई, चोवो येशु कोरला याहुदापा मेन्गीनक्याला का स्येपालाक। 21चोवोगी वाङ खुङक्यामुला झ्युरी, मी ॱमीच्यीकी माङागी धेपा झ्येरी चोवो स्योकला ग्युरपालाक।
22येरुसालेमदु हो़गीन क्षो़छोकरु दे लाबक्या घोरती, खुङक्याई बारनाबाला आन्तीयोकदु झावालाक। 23होदुरु ॱलेप्ती को़न्क्षोकगी थुक्जेगी ढेबु थोरी, खो ॱमीच्यीकी ङ्यामो घेवालाक धेनी धेपा-झ्यीगीनक्याला धोराङा चोवोगी नाङ तेन्पो झ्युरी धेयेला सेमस्युक पारपालाक। 24बारनाबा नी, मी शाङपो धाङ धाम्पे थुक्ङी धाङ धेपागी खाङखा, मी च्यीक लाक। खी़ झ्येरी मी ॱमीच्यीकी माङागी, चोवोला धेपा झ्येवालाक।
25धेनी बारनाबा साउलला चारु टारसोरु सोवालाक। 26धेनी खोला साउल ॱङेपालाक धेनी खोला आन्तीयोकदु ठीक्ती होवालाक। लो च्यीक घाङजाङ खुङक्या होदुरु हो़गीन, क्षो़छोकगी मीक्यामुला थुक्पालाक धेनी मी ॱमीच्यीकी माङाला क्षो़ ॱलाप्पालाक। ङेनेक्याला थेङ घोमा मास्यीकावा ॱनेरी, आन्तीयोकदु ॱनेवालाक।
27होदे घाङला येरुसालेमने आन्तीयोकदु, ॱङो़नस्येखेन रीङगा फेप्पालाक। 28आगाबु ॱनागीन ॱङो़नस्येखेन च्यीक छोक्पागी खोकला लारी, धाम्पे थुक्ङीने साजा घीरी ॱमीच्यीकी क्षे मुगेला स्योरकीलाक ॱनेरी ॱङो़न खेन्बालाक। (कालोदेहु ग्यावुगी धी़चो़ला ॱङो़नस्ये दे डुप्पालाक।) 29होझ्येरी आन्तीयोकदु हो़गीन धेपा-झ्यीगीनक्याई, युदेयारु धेगीन पी़नक्याला रोवा झ्यीयेला, मीरी-मीरीने घी थुक्तु कुरये ढो़ झ्येवालाक। 30देरे झ्येरी होदे आलेगो क्षो़छोकगी गोठीक्याला पुयेला, बारनाबा धाङ साउलगी लागाला कुरपालाक।
ទើបបានជ្រើសរើសហើយ៖
जेपा 11: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
