ག་ལ་ཏི། 2
2
པ་ཝལ་དང་ བཱརའ་སྐུ་ཚབ༌བ།
1ཉི་ཉིང་སོང་ཕིཤི་ག་ཚི་ངེ་ ཇང་ བར་ན་བཱས་ཀབ་ཉི་ ལོག་ཉི་རང་ ཡ་རུ་ཤ་ལེམ་ག་དི༌ཝ། ཉི་ཨུ་ཉུ་གང་ཀ་ ཇི་གི་ ཏི་ཏཱས་བུ་ ཨའི་ཀབ་ཉི་ རིག་ཉི་བུ༌ཝ། 2དཀོན་མཆོག་གི་ ཇ་ག་གེན་གནང་མ་དང་ཏུ་ཉི་ ཇང་ཡ་རུ་ཤ་ལེམ་ག་དིན་ཐཱན་ ཇི་གི་ ཡ་ཧུ་དི་པ་མང་གི་ཁཱན་བ་ཀ་ འཐེན་ལེག་པུ་བཤད་པ་ཀོར་གེ་ ཉ་ག་འགོ་དཔོན་བ་ཀ་ཏཱན་ཞུ༌ཝ། ཇི་གི་ ཨ་ཁཱན་དང་ ཨ་ལེ་ཅམ་ཁཱན་ལའི་ཁེ་པ་ དེན་ཐ་མ་འགྲུབ་ཕཱན་ ལུས་ཏུ་མེ་དག་ཉི་ ཡོང་ཁེ་ཝ་ཨ་དེན་གེ་ ཨོ་ཐ་ཆཱས་ཁེ་པ་ ཇི་གི་འགོ་དཔོན་བ་ཀ་ ཙང་ཀེན་ཨ་ཉི་ཞུ༌ཝ། 3ཇ་ག་ཇ་རོ་ ཏི་ཏཱས་ཁེ་པ་ གིརིག་གིན་ཐཱན་རང་གི་ནེ་བུ་ རོག་ཁེ་པ་ བང་ཙོང་ཉི་ ཤ་ཅཱད་པེ་མ་ཁེན༌ཤི།
4ཨ་ཧ་བྱ་གོད་པེ་དེན་གེ་ ཨ་ཧ་པོང་ཀ་ དད་པ་ཨ་ཁཱན་ རྫུས་མ་ཚེ་བང་ ནུ་ཕ་ཆོ་ཝ་ཨ་དེན་གེ་ ཨོ་ཐ་ཆཱས་ཤོ་ཝ་གི༌ལ། ཁིརིས་ཡི་ཤུ་གི་ ཨ་ཧ་ རང་དབང་རང་ཚད་གནང་མ༌ཅ། དག་པ་ཀབ་ཉི་ ཨོ་ཐ་སོ་ངོ་བ་ཀི་ ཨ་ཧ་བ་ བཀའ་ཁྲིམས་ག་ཟ་པ་ ཅོད་པེ་གོད་ཆོ༌ཝ། 5འཐེན་ལེག་པུ་ག་ དེན་པ་ཁེ་པ་ ན་ཧ་བ་ཀབ་ཉི་ ཆོན་ཆེན་དག་པ་གི་ ཨ་ཤི་ རོག་ཏེ་བ་ཀ་ཆཱས་ ད་སུ་རང་མ་ཉཱན་ཅི།
6ཉི་ཨོ་ཉ་ག་ཆོ་ཁཱན་ ཆོས་ཚོགས་ག་ འགོ་དཔོན་བ་ཀི་ ཇི་གི་ཡེག་ཁཱན་ ཆཱས་ག་ཐུང་ཀེ་ ཧང་རང་མ་པོན་ཤི། རོག་ཏེ་བ་ འགོ་དཔོན་ཆི་ལུ་ གིན་ཐཱན་རང་གི་ནེ་བུ་ ཇ་ག་དེན་གེ་ ཁྱད་པར་ཧང་རང་མཱན༌ཅ། ཧང་ཡ་དག་ནེ་ལ་ དཀོན་མཆོག་གི་ ཕིས་ཀེ་གཟིགས་ཐཱན་ ཁྲིམས་ཅཱད་ཉི་ གནང་མུ་མཱན༌ཅ། 7ལག་ཏང་ པ་ཏྲུས་ཁེ་པ་ ཡ་ཧུ་དི་པ་བ་ཀ་དེན་གེ་ སི་ཝ་པུརུས་ཀིན་ཨ་ཉི་ ཇང་ཤོ་ ཡ་ཧུ་དི་པ་མང་གི་ཁཱན་བ་ཀ་ འཐེན་ལེག་པུ་བཤད་པེ་དེན་གེ་ སི་ཝ་གི་ཝ་ལ་དག་ཉི་ རོག་ཏེ་བ་ཀི་ མཁྱེན་མ་ཆོ༌ཝ། 8ཡ་ཧུ་དི་པ་བ་ ཕཱན་མེ་དེན་གེ་ པ་ཏྲུས་ག་ ཐུང་ཀེ་ཨ་ཉི་ ཕྱག་ལཱ་མཛད་ཁཱན་ དཀོན་མཆོག་གི་ ཇ་ག་ཐུང་ཀེ་ཨ་ཉི་ ཡ་ཧུ་དི་པ་མང་གི་ཁཱན་བ་ ཕཱན་མེ་དེན་གེ་ ཕྱག་ལཱ་མཛད་ཅ་གི༌ལ།
9ཉི་ཡ་ཀུབ་དང་ པ་ཏྲུས་ ཉི་ཡུ་ཧན་ན་བ་ཤོ་ ཆོས་ཚོགས་ག་ ཀ་ཝ་གི་ལ་ཨ་ཉི་ཆིན༌ཅ། ཉི་ཇང་ཤོ་ དཀོན་མཆོག་གི་ ཨོ་ཐ་ལའི་ག་དེན་གེ་ སི་ཝ་གི་ལ་དག་ཉི་ རོག་ཏེ་བ་ཀི་བུ་ མཁྱེན་མ་ཨ་དེན་གེ་ རོག་ཏེ་བ་ཀི་ ཨ་ཧ་ཆ་ཐ་ཉི་ ཇང་དང་ བར་ན་བཱས་ཀབ་ཉི་ ག་དང་ཏུ་ཉི་གནང༌མ། ཨའི་ཤོ་ ཡ་ཧུ་དི་པ་ མང་གི་ཁཱན་བ་ཀ་བཱརང་ཀ་ དི་ལེ་ཁེ༌ལེ། ཉི་རོག་ཏེ་བ་ཤོ་ ཡ་ཧུ་དི་པ་བ་ཀ་བཱརང་ཀ་ དི་ལེ་གི་ལ་དག་ཉི་ རོག་ཏེ་བ་དང་ ཨ་ཧ་བར་ཀ་ ཏུན་ཆ་དྲིག་པ༌ཅ། 10རོག་ཏེ་བ་ཀི་ ཨ་ཧ་ཏཱན་ ཆཱས་ཐུར་ཤ་གསུངས་མ་ ཨུ་ཉུ་ཤོ་ དུག་པུ་ཆོ་ཁཱན་ རོག་ཏེ་བ་ཀ་ སོ་ངོ་བ་ཀ་ ཇ་རོ་ཨ་ཉི་རང་ ཆོ་ལེ་ཁེ་ལེ་དག༌ཉི། ཉི་སོ་ངོ་དུག་པུ་བ་ཀ་ ཇ་རོ་ཨ་ལེ་ག་སེམས་ ཇ་ག་བུ་ གནམ་མེད་ས་མེད༌ཅ༎
པ་ཝལ་གི་ པ་ཏྲུས་བཱརག་པ༌ལ།
11དག་པ་ཀབ་ཉི་ པ་ཏྲུས་ ཨེན་ཏྲི་ཨོ་ཁི་ཡ་ག་ ཕེབས་པ་ཀབ་ཉི་ རོག་ངཱད་པ་ཨ་དེན་གེ་ སོ་ངོ་བ་ཀ་གུབ་ཀ་རང་ ཇི་གི་རོ་ཀ་ ཨུ་ཉུ་ཤོ་ ལེག་པུ་མང་གི་དག་ཉི་ཞུ༌ཝ། 12གོ་མ་ ཡ་ཀུབ་ཀབ་ཉི་ཆོ་ཁཱན་ སོ་ངོ་བ་ ཨོ་ཕ་ཀབ་ཉི་ པ་ཏྲུས་གི་ ཡ་ཧུ་དི་པ་ མང་གི་ཁཱན་བ་ཀབ་ཉི་ ཏབ་ཐུར་ཟ་ཉི་ ཇམ་ཆོ༌ཝ། དག་པ་ཀབ་ཉི་ ཨོ་ཐ་སོ་ངོ་བ་ ཤེག་ཏེན་གེ་ རོ་ཀི་ ཤ་མ་ཅཱད་ཁཱན་ ཡ་ཧུ་དི་པ་ མང་གི་ཁཱན་བ་ཀབ་ཉི་ ཟ་ལེ་མ་ནཱན་ཤི། ཧང་ཡ་དག་ནེ་ལ་ རོག་ཤོ་ ཨོ་ཐ་ ཤ་ཅཱད་ཁཱན་སྡེ་ཚན་གེ་ ཡོང་ཁེ་ཝ་ཆོ༌ཝ། 13བཱརའ་ཡ་ཧུ་དི་པ་ དད་པ་ཨ་ཁཱན་བ་ཀི་བུ་ པ་ཏྲུས་གེ་ དཔེ་གོད་པེ་གོ་ཙུག༌པ། ཉི་བར་ན་བཱས་ཆང་ ཡ་ཧུ་དི་པ་མང་གི་ཁཱན་བ་ཀབ་ཉི་ ཟ་ལེ་མ་ན་ཝ་རི་ཉི་ རོག་ཏེ་བ་ད་བུ་ འུ་དྲ་པ་རི་ཝ༌ལ།
14རོག་ཏེ་བ་ཀི་ འཐེན་ལེག་པུ་ག་ལམ་གེ་ མ་དང་མ་ག་ ཇི་གི་སེ་དེན་གེ་ དད་པ་ཨ་ཁཱན་ ཐམས་ཅན་ག་གུབ་ཀ་རང་ ཇི་གི་ པ་ཏྲུས་ག་ཡེག་པ་ ནཱན་ཤོ་ ཡ་ཧུ་དི་པ་ གིན་ཐཱན་རང་གི་ནེ་བུ་ ཡ་ཧུ་དི་པ་ད་བུ་ཨ་ཉི་ མང་གི་ཝ་ ཡ་ཧུ་དི་པ་མང་གི་ཁཱན་ད་བུ་ཨ་ཉི་ བཞུགས༌ལ། ཉི་ཡ་ཧུ་དི་པ་མང་གི་ཁཱན་བ་ ཡ་ཧུ་དི་པ་ག་ ལུགས་སྲོལ་དང་ཏུ་ཉི་ ཆོ་ལེ་དེན་གེ་ ནཱན་གི་ ཧང་ཨ་ཉི་ རོག་ཏེ་བ་ཀ་ བང་ཙོང་ཅ་ཡ་དག༌ཉི།
15ཨ་ཧ་བ་ཤོ་ ཡ་ཧུ་དི་པ་ཨ་ཉི་ ཀེ་ཝ་གི༌ལ། ཉི་ཨའི་ཤོ་ སྡིག་ཅན་ཨ་ཉི་ཆིན་ཁཱན་ ཡ་ཧུ་དི་པ་མང་གི་ཁཱན་ སོ་ངོ་བ་མང་གི། 16དག་པ་ཀབ་ཉི་ ཨ་ཤི་སེན་ཅ་ སོ་ངོ་ཤོ་ བཀའ་ཁྲིམས་ག་ ཆ་གནས་ཐ་ཝ་ཨ་དེན་གེ་མང་གི་ ཡི་ཤུ་ཁིརིས་ག་ དད་པ་ཨ་ཝ་ཨ་དེན་གེ་ དྲང་པུ་རིན་ཅ་གི༌ལ། ཨོ་ཉི་ཨ་དེན་གེ་ བཀའ་ཁྲིམས་ག་ ཆ་གནས་ཐ་ཉི་ མང་གི་ཝ་ ཁིརིས་ག་དད་པ་ ཨ་ཝ་ཨ་དེན་གེ་ དྲང་པུ་རིན་ཆེན་དག་པ་གི་ ཨ་ཤི་བུ་ ཁིརིས་ཡི་ཤུ་ག་ དད་པ་ཨ་ཝ་གི༌ལ། ཧང་ཡ་དག་ནེ་ལ་ བཀའ་ཁྲིམས་ག་ ཆ་གནས་ཐ་ཉི་ ཨི་བི་རང་ དྲང་པུ་རི་ལེ་རེ་བུ་མཱན༌ཅ།
17ཉི་ཨ་ཤི་ ཁིརིས་གེ་ཨ་ཉི་ དྲང་པུ་རི་ལེ་གོད་ནེ་ལ་ ཨའི་ཤོ་ སྡིག་ཅན་གི་ལ་དག་ཉི་ ཁུངས་ཀེ་ཅ་གི༌ལ། ཧང་ ཨོ་ཐེན་ཡེག་པེ་ དེན་ཐ་ཤོ་ ཁིརིས་གི་ སྡིག་པ་ག་ ཁ་ཨན་ཅ་གི་ལ་སྨོ། ཏི་ངེ་རང་མང་གི། 18བཀའ་ཁྲིམས་གེ་ཨ་ཉི་ དྲང་པུ་རིན་ཅ་དག་ཁཱན་ ལུགས་སྲོལ་ཁེ་པ་ ཇི་གི་ མེ་པ་ཕིན་ཐཱན་ ལོག་ཉི་རང་ ཇི་གི་ ཨོ་ཉ་ལུགས་སྲོལ་དང་ཏུ་ཉི་ ཨ་ལེ་གོད་ནེ་ལ་ ཇང་ཤོ་ བཀའ་ཁྲིམས་དང་ཏུ་ཉི་ མ་ཆོ་ཁཱན་ སོ་ངོ་གི་ཝ་ལ་དག་ཉི་ གེན༌ཅ། 19ཇང་ཤོ་ ཤི་ཝ་ཨ་དེན་གེ་ བཀའ་ཁྲིམས་གི་ ཇང་ཀབ་ཉི་ ཧང་རང་ཨ་ལེ་ཁེ་ཝ་མཱན༌ཅ། ཧང་ཡ་དག་ནེ་ལ་ ཇང་དཀོན་མཆོག་ཀབ་ཉི་ གསོན་པོ་ཨ་ཉི་ ཆོ་ལེ་དེན་གེ་ བཀའ་ཁྲིམས་ག་ཐུང་ཀེ་ཨ་ཉི་ ཇང་ཤི་ཝ་གི༌ལ། 20ཇ་ག་ཚེ་མཱན་མ་ཤོ་ ཁིརིས་ཀབ་ཉི་ ཁྲིམས་ཤིང་ག་ཇཱན་ཉི་ ཤི་ཝ་གི༌ལ། ཉི་ཨོམ་ ཇང་ཆོན་ཅ་མང་གི་ཝ་ ཇ་ག་ནང་ཀ་ ཁིརིས་བཞུགས་ཅ་གི༌ལ། ཇང་ཨོ་ཐ་ ལུས་པུ་ག་ཆོ་ཁཱན་ཤོ་ ཇང་གནམ་མེད་ས་མེད་ཕང་ཉི་ ཇ་ག་དེན་གེ་ ཚེ་གནང་ཁཱན་ དཀོན་མཆོག་ག་སྲས་ག་ དད་པ་ཀེ་ཉི་ ཆོན་ཅ་གི༌ལ། 21ཇི་གི་ དཀོན་མཆོག་ག་ཐུགས་རྗེ་ཁེ་པ་ མ་ཞུ་ཝ་ཨ་ཉི་ ཆོ་ལེ་མར༌བ། ཧང་ཡ་དག་ནེ་ལ་ བཀའ་ཁྲིམས་ག་ ཆ་གནས་ཐ་ཉི་ སོ་ངོ་དྲང་པུ་རི་ལེ་གི་ནེ་ཏ་ ཁིརིས་གཤགས་ཉི་ དེན་ཐ་ཧང་རང་མ༌ལ༎
ទើបបានជ្រើសរើសហើយ៖
ག་ལ་ཏི། 2: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved