ག་ལ་ཏི། 3
3
དད་པ་དང་ བཀའ་ཁྲིམས།
1ནའི་ ག་ལ་ཏི་ སོ་ངོ་བ་ ཡོང་བ་གི་ཝ༌ལ། ཨི་བི་གི་ ན་ཧ་ངཱན་ཕི་ཝ་ཡ། ཧང་ཡ་དག་ནེ་ལ་ ཡི་ཤུ་ཁིརིས་ ཁྲིམས་ཤིང་ག་གཤགས་པེ་ག་ ཇུང་ཚེན་ཁེ་པ་ ན་ཤི་ཏེན་ཏེན་ཨ་ཉི་རང་ ཧ་གོ་ཝ་ཆོ༌ཝ།
2ཇི་གི་ ན་ཧ་ཆཱས་ཐུར་ཇི་མེ་ ན་ཤི་དམ་པའི་ཐུགས་ཉིད་ཁེ་པ་ བཀའ་ཁྲིམས་ག་ ཆ་གནས་ཐ་ཉི་ ཉོང་པ་སྨོ། ན་ཤི་ ན་ཐ་ཁཱན་ འཐེན་ལེག་པུ་ག་ དད་པ་ཨ་ཉི་ ཉོང་པ་གི་ལ་ཡ། 3ན་ཧ་བ་ ཉོས་ཅ་ཏེ་ མང་གི་སྨོ། ན་ཤི་ དམ་པའི་ཐུགས་ཉིད་ག་ ཐུང་ཀེ་ཨ་ཉི་ གོ་ཙུག་པ་གི༌ལ། ཉི་ཨོམ་ ནའི་ཏེན་གི་ ཙ་དྲེག་ཉི་ ན་ཧ་མིག་པ་ཁེ་པ་ འགྲུབ་ཕེ་གོད་ཅ་སྨོ། 4ན་ཧ་བ་ གནམ་མེད་ས་མེད་ དཀའ་ཝ་ཅཱད་ཁཱན་ཁེ་པ་ དེན་ཐ་ཧང་རང་མ་ཝ་ དཀའ་ཝ་ཅཱད་པ་གི་ལ་སྨོ། ཇི་གི་ཨ་ནེ་ལ་ ན་ཤི་དེན་ཐ་ ཧང་རང་མ་ཝ་ དཀའ་ཝ་ཅཱད་པ་ཏ་ མང་གི་དུ་དག་ཉི་ རེ་ཆ་ཨན༌ཅ།
5ན་ཤི་བཀའ་ཁྲིམས་ག་ ཆ་གནས་ཐ་ཝ་ཨ་དེན་གེ་ དཀོན་མཆོག་གི་ ན་ཧ་དམ་པའི་ཐུགས་ཉིད་དང་ ན་ཧ་པོང་ཀ་ རྫུ་འཕྲུལ་ག་ལའི་ ཆི་ལུ་ཆི་ལུ་བ་ གནང་མ་གི་ལ་སྨོ། ཧང་ ན་ཤི་ན་ཐ་ཁཱན་འཐེན་ལེག་པུ་ག་ དད་པ་ཨ་ཝ་ཨ་དེན་གེ་ མང་གི་སྨོ།
6ཨ་བཱརའ་ཧམ་ག་ཀོར་གེ་ མི་ཉི་གོད་ཅོ༌ལེ། ཨ་བཱརའ་ཧམ་གི་ དཀོན་མཆོག་ག་ དད་པ་ཨ་ཝ་ཨ་དེན་གེ་ རོག་ཁེ་པ་ དྲང་པུ་ཨ་ཉི་ ཆིན་མ༌ཅ།#3:6 ཇུན་པ་ག་དཔེ་ཆ་ 15:6 7ཨོ་ཉི་ཨ་དེན་གེ་ ཨ་བཱརའ་ཧམ་ག་ སྲས་སྲས་མོ་ ངོ་མ་བ་ཤོ་ དཀོན་མཆོག་ག་ཏཱན་ དད་པ་ཨ་ཁཱན་བ་ གི་ལ་ཨ་ཉི་ ན་ཤི་ཧ་གོ་ལེ་ཁེ༌ལེ།
8ཡ་ཧུ་དི་པ་མང་གི་ཁཱན་ སོ་ངོ་བ་བུ་ དད་པ་ག་ཐུང་ཀེ་ཨ་ཉི་ དཀོན་མཆོག་གི་ རོག་ཏེ་བ་ དྲང་པུ་ཅོད་ཉི་ གནང་མ་གི་ལ་དག་ཉི་ གསུང་རབ་ནང་ཀ་ གོ་མ་གེ་རང་ ལུང་བསྟན་ཉི་ཐ་ཝ༌ལ། ཨོ་ཐ་འཐེན་ལེག་པུ་ཁེ་པ་ གོ་མ་གེ་ཤ་ དཀོན་མཆོག་གི་ ཨ་བཱརའ་ཧམ་ག་ གསུངས་མ་ལ་ ན་ག་ཐུང་ཀེ་ཨ་ཉི་ མི་རིགས་ ཐམས་ཅན་གི་ བྱིན་རླབས་ཉོང་པེ་ གི་ལ་#3:8 ཇུན་པ་ག་དཔེ་ཆ་ 12:3, 18:18, 22:18དག༌ཉི། 9དད་པ་ཨ་ཁཱན་ སོ་ངོ་བ་ཀི་ ཨ་བཱརའ་ཧམ་གི་ཉོང་ཁཱན་ བྱིན་རླབས་ཉོང་ཅ་གི༌ལ། ཧང་ཡ་དག་ནེ་ལ་ ཨ་བཱརའ་ཧམ་ཤོ་ དད་པ་ཀེ་ཁཱན་ སོ་ངོ་གི་ཝ་ཆོ༌ཝ།
10དག་པ་ཀབ་ཉི་ བྱིན་རླབས་ཉོང་པེ་དེན་གེ་ བཀའ་ཁྲིམས་ག་ཏེན་ཁཱན་ སོ་ངོ་བ་ཤོ་ ཁྲིམས་ཉོང་པེ་ཅམ་ཁཱན་བ་གི༌ལ། ཧང་ཡ་དག་ནེ་ལ་ གསུང་རབ་གེ་ ཨོ་ཐེན་ཤོན་ཅ་ བཀའ་ཁྲིམས་གེ་ཤོ་ཁཱན་ ཐམས་ཅན་རང་ ཚང་པ་ཨ་ཉི་ ཆ་གནས་མ་ཐ་ཁཱན་སོ་ངོ་ ཨི་བི་རང་གི་ནེ་བུ་ ཨོ་ཉ་སོ་ངོ་གི་ ཁྲིམས་ཉོང་པེ་#3:10 ཁྲིམས་ལུགས་ག་དཔེ་ཆ་ 27:26དག༌ཉི། 11བཀའ་ཁྲིམས་ག་ ཆ་གནས་ཐ་ཉི་ སོ་ངོ་ཐུར་གི་རང་ དཀོན་མཆོག་ག་སྐུན་མདུན་ག་ དྲང་པུ་རི་ལེ་མར༌བ། ཧང་ཡ་དག་ནེ་ལ་ གསུང་རབ་གེ་ཤོན་ཅ་ སོ་ངོ་དྲང་པུ་གི་ དད་པ་ག་ཐུང་ཀེ་ཨ་ཉི་ ཆོན་ཅ་གི་ལ་#3:11 ཧ་བ་ཀུག་ག་དཔེ་ཆ་ 2:4དག༌ཉི། 12དག་པ་ཀབ་ཉི་ བཀའ་ཁྲིམས་ཤོ་ དད་པ་གེ་ཤོ་ཝ་མང་གི། ཧང་ཡ་དག་ནེ་ལ་ གསུང་རབ་གེ་ཤོན་ཅ་ བཀའ་ཁྲིམས་ག་ ཆ་གནས་ཐ་ཉི་ ཚེ་ཉོང་པེ་ག་ སེམས་ཨ་ཁཱན་ སོ་ངོ་གི་ བཀའ་ཁྲིམས་གེ་ཤོ་ཁཱན་ཐུར་བུ་ ཐིག་མ་ཤོར་བ་ཨ་ཉི་ ཆ་གནས་ཐ་ལེ་ཁེ་ལེ་#3:12 ལེ་ཝི་ག་དཔེ་ཆ་ 18:5དག༌ཉི།
13དག་པ་ཀབ་ཉི་ བཀའ་ཁྲིམས་གི་ ཀེ་ཁཱན་ཁྲིམས་གེ་ ཁིརིས་གི་ ཨ་ཧ་བ་ཤོག་ཉི་གནང༌མ། ཁིརིས་རོག་ཏེན་ ཁྲིམས་བང་ཁཱན་རི་ཉི་ ཨ་ཧ་ཁྲིམས་ཁེ་པ་ རོ་ཀི་ཁྲིམས་ཤིང་ཐུང་ཀ་ བང་ཉི་གནང༌མ། ཧང་ཡ་དག་ནེ་ལ་ གསུང་རབ་གེ་ཤོན་ཅ་ ཨི་བི་ཤིང་གེ་ཞུ་ཝ་ཐུར་ ཨོ་ཉ་སོ་ངོ་ཁེ་པ་ ཁྲིམས་བང་ཁཱན་གི་ལ་#3:13 ཁྲིམས་ལུགས་ག་དཔེ་ཆ་ 21:23དག༌ཉི། 14དཀོན་མཆོག་གི་ གནང་མེ་དག་ཉི་ དབུ་མནའ་བཞེས་ཁཱན་ དམ་པའི་ཐུགས་ཉིད་ཁེ་པ་ དད་པ་ག་ཐུང་ཀེ་ཨ་ཉི་ ཨ་ཤི་ཉོང་ཅེན་དག་པ་གི་ ཁིརིས་ཡི་ཤུ་གི་གནང་ཁཱན་ ཕྱག་ལཱ་ག་ཐུང་ཀེ་ཨ་ཉི་ ཨ་ཧ་བ་ཤོག་ཉི་ ཨ་བཱརའ་ཧམ་ག་གནང་ཁཱན་ བྱིན་རླབས་ཁེ་པ་ ཡ་ཧུ་དི་པ་མང་གི་ཁཱན་བ་ཀ་བུ་ གནང་མ༌ལ༎
བཀའ༌ཁྲིམས་དང་ དཀོན༌མཆོག༌གི་དབུ༌མནའ་བཞེས༌ཁཱན།
15ཇ་ག་ཡུང་ཟི་བ་ ཇི་གི་ན་ཧ་ ཏ་བུ་ག་ཚེ་གེ་ དཔེ་ཐུར་གེན༌མེ། འགན་རྒྱ་ཅོད་ཉི་ཆུམ་དེན་གེ་ ཨི་བི་གི་རང་ གེ་མེ་ཆོག་པུ་མཱན༌ཅ། ཉི་འགྱུར་བེ་བུ་ ཆོག་པུ་མཱན༌ཅ། ཉི་ཨུ་ཐུ་བུ་ ཨུ་ཉུ་པུརུས་ཀིན་རང་གི༌ལ། 16དཀོན་མཆོག་གི་ ཨ་བཱརའ་ཧམ་དང་ རོ་ཀ་སྲས་ཀབ་ཉི་ དབུ་མནའ་བཞེས་ཉི་གནང་མ་ཆོ༌ཝ། གསུང་རབ་གེ་ ན་ག་ཝག་ཙ་བ་དག་ཉི་ གསུངས་མུ་མ༌ལ། ན་ག་ཟ་#3:16 ཇུན་པ་ག་དཔེ་ཆ་ 12:7, 13:15, 24:7དག་ཉི་ གསུངས་མ༌ཅ། སོ་ངོ་མང་པུ་ག་ གསུངས་མ་མང་གི། ཨོ་ཐེན་གསུངས་མེ་དེན་ཐ་ཤོ་ སོ་ངོ་ཐུར་ཤ་གི་ལ་ ཉི་ཨུ་ཉུ་ཤོ་ ཁིརིས་གི༌ལ། 17ཇི་གི་ཡེག་པེ་མིག་པ་ཕི་ཁཱན་ཤོ་ ཨོ་ཐ་ཆཱས་གི༌ལ། དཀོན་མཆོག་གི་ ཨ་བཱརའ་ཧམ་ཀབ་ཉི་ དབུ་མནའ་བཞེས་ཉི་ ཉིང་ 430 ག་ཚི་ངེ་ དཀོན་མཆོག་གི་ མོ་ས་ག་ བཀའ་ཁྲིམས་གནང་མ་ཀབ་ཉི་ དཀོན་མཆོག་གི་ ཨ་བཱརའ་ཧམ་ཀབ་ཉི་ འགན་རྒྱ་ཁེ་པ་ མ་ཝ་མ་ཅོད་ཅི། ཉི་དཀོན་མཆོག་ རོག་ཏེན་གི་ དབུ་མནའ་བཞེས་ཁཱན་ཁེ་པ་ མ་མཛད་པ་མ་ཨན་ཤི། 18ཧང་ཡ་དག་ནེ་ལ་ དཀོན་མཆོག་ག་ སེ་རབ་ཁེ་པ་ བཀའ་ཁྲིམས་ག་ཏེན་ཉི་ཤ་ ཉོང་པེ་གི་ནེ་ཏ་ རོ་ཀི་དབུ་མནའ་བཞེས་ཁཱན་ག་ ཏེན་མེ་ཁེ་ཝ་མཱན༌ཅ། དག་པ་ཀབ་ཉི་ ཨོ་ཉ་སེ་རབ་ཁེ་པ་ རོ་ཀི་དབུ་མནའ་བཞེས་ཝ་ཨ་དེན་གེ་ དཀོན་མཆོག་གི་ ཨ་བཱརའ་ཧམ་ག་ གནང་མ་གི༌ལ།
19ཉི་ལ་ བཀའ་ཁྲིམས་ཤོ་ ཧང་ཨ་ཉི་གནང་མ་གི་ས་དག་ནེ་ལ་ སོ་ངོ་ ཧབ་ཏུར་ མ་ལེག་པ་ཅ་གི་ལ་སྨོ་ གེན་མེ་དེན་གེ་ གནང་མ་གི༌ལ། དག་པ་ཀབ་ཉི་ ཨོ་ཐ་བཀའ་ཁྲིམས་ཤོ་ རོ་ཀི་ རོ་ཀ་སྲས་ ཀུན་ཏི་ལེ་དག་ཉི་ དབུ་མནའ་བཞེས་ཁཱན་ཁེ་པ་ མ་བྱོན་མ་སག་པུ་ཤ་གི༌ལ། ཉི་ཨོ་ཐ་ བཀའ་ཁྲིམས་ཁེ་པ་ བར་ཀ་སོ་ངོ་ མོ་ས་ག་ཏཱན་ ཞིང་ཁམས་ག་འཐེན་པ་བ་ཀ་ཐུང་ཀེ་ཨ་ཉི་ གནང་མ་ཆོ༌ཝ། 20ཉི་ཨོམ་ བར་ཀ་སོ་ངོ་ཤོ་ སོ་ངོ་ཉིག་ཙིང་ག་བར་ཀ་ འགན་རྒྱ་ཅོད་པ་ཀབ་ཉི་ ཚཱས་ཅ་གི༌ལ། དག་པ་ཀབ་ཉི་ དཀོན་མཆོག་ རོག་ཏེན་གི་ ཨ་བཱརའ་ཧམ་ཀབ་ཉི་ དབུ་མནའ་བཞེས་ཉི་གནང་མ༌ལ།
21ཉི་ཧང་ དཀོན་མཆོག་གི་ དབུ་མནའ་བཞེས་ཁཱན་དང་ བཀའ་ཁྲིམས་ མ་དྲིག་ཅ་གི་ལ་སྨོ། ཏི་ངེ་རང་མང་གི། བཀའ་ཁྲིམས་གི་ ཨ་ཧ་ཚེ་སིང་མ་ ག་ལེ་གི་ནེ་ཏ་ བཀའ་ཁྲིམས་ག་ ཆ་གནས་ཐ་ཉི་ ཨའི་དཀོན་མཆོག་ག་སྤྱན་ག་ དྲང་པུ་རི་ལེ་ཆོ༌ཝ། 22དག་པ་ཀབ་ཉི་ གསུང་རབ་གེ་ཤོ་ན་ སྡིག་པ་ཨ་ཝ་ཨ་དེན་གེ་ འཛམ་གླིང་ ཐམས་ཅན་རང་ བཙོན་པ་རི་ཝ་ལ་དག༌ཉི། ཨོ་ཉི་ཨ་དེན་གེ་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ ཞུ་ལེ་གི་ལ་དག་ནེ་ལ་ ཡི་ཤུ་ཁིརིས་ག་ དད་པ་ཨ་ལེ་ཁེ༌ལེ༎
དཀོན་མཆོག་ག་ སྲས་སྲས་མོ།
23ཨོ་ཉ་དད་པ་ག་ དུས་ཙུན་མ་རེན་པེ་གོ་མ་ ཨ་ཧ་བ་ ཐམས་ཅན་རང་ བཀའ་ཁྲིམས་གི་དབང་པ་ཆོ༌ཝ། ཁིརིས་མ་བྱོན་མ་སག་པུ་དང་ ཨ་ཤི་རོ་ཀ་ དད་པ་མ་ཨ་ཝ་སག་པུ་ ཨ་ཧ་བ་ བཙོན་པ་རི་ཉི་ ཐ་ཝ་ཆོ༌ཝ།
24ཁིརིས་ག་དད་པ་ཨ་ཉི་ ཨ་ཧ་བ་ དྲང་པུ་རིན་ཆེན་དག་པ་གི་ ཁིརིས་མ་བྱོན་མ་སག་པུ་ བཀའ་ཁྲིམས་ཤོ་ ཨ་ཧ་བ་ ཁིརིས་ག་ སྐུན་མདུན་ག་ཏཱན་ རིག་ཁཱན་ཨ་ཉི་ ཐཱན་གནང་མ་ཆོ༌ཝ། 25ཉི་ཨོམ་ཤོ་ དད་པ་ག་ དུས་ཙུན་གི་ཝ་ཨ་དེན་གེ་ ཨའི་བཀའ་ཁྲིམས་ག་ཕརའ་ཁེ་ ཆོ་ལེ་མ་ཁེ༌ལ།
26ཁིརིས་ཡི་ཤུ་ག་ དད་པ་ཨ་ཝ་ཨ་དེན་གེ་ ན་ཧ་བ་ ཐམས་ཅན་རང་ དཀོན་མཆོག་ག་ སྲས་སྲས་མོ་གི༌ལ། 27ཉི་ཁིརིས་ག་ནང་ཀ་ ཁྲུས་གསོར་ལ་ཁཱན་ ནའི་ཐམས་ཅན་གི་ ཁ་མུང་སིང་མ་ ཡེ་ཝ་པུརུས་ཀིན་ཨ་ཉི་ ཁིརིས་ཡེ་ཝ༌ཅ། 28ཡ་ཧུ་དི་པ་དང་ གིརིག་ ཉི་ཟ་པ་དང་ ཟ་པ་མང་གི་ཁཱན་ ཉི་ཕེ་ཝག་ཙ་དང་ མེ་ཝག་ཙ་དག་ཉི་མཱན༌ཅ། ཧང་ཡ་དག་ནེ་ལ་ ནའི་ཐམས་ཅན་རང་ ཁིརིས་ཡི་ཤུ་ག་ནང་ཀ་ དོ་ལུ་རི་ཝ༌ཅ། 29ན་ཧ་བ་ ཁིརིས་ག་གི་ནེ་ལ་ ན་ཧ་བ་ཤོ་ ཨ་བཱརའ་ཧམ་ག་ ཝག་ཙ་བ་གི༌ལ། ཉི་དཀོན་མཆོག་གི་ དབུ་མནའ་བཞེས་ཝ་དང་ཏུ་ཉི་ ན་ཤི་བུ་ ཐོབ་ཐང་བ་ཉོང༌པེ།
ទើបបានជ្រើសរើសហើយ៖
ག་ལ་ཏི། 3: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved