གཉིད་པ་ཀོ་རིན་ཐི། 9
9
ནང་དོག༌ཁཱན་ ཡི༌ཤུ༌པ༌བ༌ཀ་རུམ༌ཅོ།
1ཡ་རུ་ཤ་ལེམ་ག་ཆོ་ཁཱན་ ཡི་ཤུ་པ་བ་ཀ་དེན་གེ་ དུས་ཁཱན་སྙན་དར་ག་ཀོར་གེ་ ཇི་གི་ན་ཧ་ ཧང་རང་ འབྲི་བེ་མ་ཁེ༌ལ། 2རོག་ཏེ་བ་ཀ་རུམ་པེ་ག་ ན་ཧ་སེམས་ཅ་དག་ཉི་ ཇི་གི་སེན༌ཅ། ཨ་ཁའི་ཡ་ག་ཆོ་ཁཱན་ ཡི་ཤུ་པ་བ་ཀི་ ཡང་ཐེན་གེ་ག་ཏཱན་རང་ རུམ་པེ་ག་གྲ་སྒྲིག་ཆོ་ཝ་དག་ ཇི་གི་མ་ཀེ་དོ་ནི་ཡ་ག་ ཆོ་ཁཱན་བ་ཀ་ཡེག་ཉི་ ན་ཧ་ཀོར་གེ་ ཇི་གི་བསྟོད་པ་ཕི་ཝ༌ཅ། ཉི་ན་ཤི་ རུམ་པེ་ག་སེམས་ ཨ་ཝ་ཨ་དེན་གེ་ རོག་ཏེ་བ་ཀི་བུ་ རུམ་པེ་ག་སེམས་ཨ་ཝ༌ཅ།
3ཨ་ཤི་ ན་ཧ་ཀོར་གེ་ བསྟོད་པ་ཕི་ཁཱན་ཁེ་པ་ ཁུངས་མ་ཝ་མ་རི་ལ་དག་མི་ཉི་ ཇི་གི་ཨོ་ཐ་ཀོ་ཏ་བ་ ཀུན་ཏིན༌ཅ། ཉི་ཇི་གི་ ན་ཧ་བ་རུམ་པེ་ག་ གྲ་སྒྲིག་ཅ་དག་ཉི་ ཡེག་པ་པུརུས་ཀིན་ཨ་ཉི་ ན་ཧ་བ་དེན་མ་རང་ རུམ་པེ་ག་གྲ་སྒྲིག་ ཨོ་ཕེ་ཁེ༌ལེ། 4དག་པ་ཀབ་ཉི་ མ་ཀེ་དོ་ནི་ཡ་ག་ དད་པ་ཨ་ཁཱན་བ་ ཨའི་ཀབ་ཉི་ཨུན་ཅ་ཨ་ཉི་ ན་ཧ་བ་ རུམ་པེ་ག་གྲ་སྒྲིག་མ་ནེ་ལ་ ཇི་གི་ན་ཧ་ཐུང་ཀ་ ཨོམ་ཏུར་ ལོ་དེ་ཏོག་ཏོ་ ཨ་ཝ་ཨ་དེན་གེ་ ཇང་ངི་ནང་ཁུ་ཝ་རི༌ལེ། ཉི་ན་ཧ་བ་ཏ་ ཨོ་ཉ་གེ་ལག་ཉི་ ངི་ནང་ཁུ་ཝ་རི༌ལེ། 5ཨོ་ཉི་ཨ་དེན་གེ་ ཇི་གི་མི་ཝ་ ཇང་གེ་གོ་མ་ ཨོ་ཐ་ཀོ་ཏ་བ་ཀུན་ཏིན་ཐཱན་ ན་ཤི་བི་ལེ་དག་ཉི་ ཁས་བླངས་ཨ་ཁཱན་ སྙན་དར་ཁེ་པ་ ཕྲིག་ཀིན་ཨན་ ཅམ་ཉི་ཐཱན་ཆེན་དག༌ཉི། ཉི་ཇང་ ཨོ་ཕ་ཀབ་ཉི་ ཕྲིག་ཀིན་ཅམ་པ་ཨོ་ཕེ། ཉི་ན་ཤི་ངོ་ཚ་མར་བཱན་ རུམ་པ་མང་གི་ཝ་ ནའི་ཏེན་གི་རང་རུམ་པེ་ག་ སེམས་ཨ་ཝ་ཨ་དེན་གེ་ ན་ཤི་རུམ་པ་གི་ཝ་ལ་དག་ཉི་ ཨོ་ཉེ་གི་གེན༌མེ།
6སེམས་ཀ་ཐའི་ ལི་ཉུང་པུ་ཡབ་ཁཱན་ སོ་ངོ་གི་ ཐོག་བུ་ཉུང་པུ་ཤ་དུང༌མེ། ཉི་ལི་མང་པུ་ཡབ་ཁཱན་ སོ་ངོ་གི་ ཐོག་བུ་མང་པུ་དུང་མེ་གི༌ལ། 7ཨོ་ཉི་ཨ་དེན་གེ་ ནའི་ཐམས་ཅན་གི་ བི་ལེ་དག་ཉི་ མི་ཝ་དང་ཏུ་ཉི་བི། བི་ལེ་མ་ལ་མེ་ནང་ཀེ་རང་མ་བི་ ཉི་ངོ་ཚ་མར་བཱན་བུ་མ་བི། ཧང་ཡ་དག་ནེ་ལ་ སེམས་ནང་ཀེ་ཨ་ཉི་རང་ ཤོ་ནང་ཕེ་ཉི་བི་ཁཱན་ སོ་ངོ་ཁེ་པ་ དཀོན་མཆོག་གི་ ཕང་ཉི་གནང༌ཅ། 8ནའི་ཚཱས་པ་གེ་ལག་ཉི་ དཀོན་མཆོག་གི་ གནང་མེ་རེ༌བེ། ཉི་ན་ཧ་དེན་གེ་ ཧང་ཁག་ཆི་ཝ་ཐུར་ ན་ཤི་ཉོང༌པེ། ཉི་ལའི་ལེག་པུ་ག་དེན་གེ་ཏ་ ཚཱས་པ་གེ་ལག་ཉི་བུ་ཉོང༌པེ། 9ཉི་གསུང་རབ་གེ་བུ་ཤོན་ཅ་
དུག་པུ་བ་ཀ་ རོ་ཀི་ག་དང་ཡང་པུ་ཨ་ཉི་བིན༌ཅ། ཉི་རོ་ཀི་ཨ་ཁཱན་ ལའི་ལེག་པུ་བ་ ཧ་ལ་རང་ ཡིད་ཀ་མ་མི༌ལ།#9:9 མགུར་མ་ག་དཔེ་ཆ་ 112:9
10ལའི་པ་ག་ ལི་གནང་ཁཱན་དང་ ཟ་ལེ་ག་ལྟོ་གནང་ཁཱན་ དཀོན་མཆོག་གི་ ནའི་ཚཱས་ཁཱན་ ཐམས་ཅན་རང་གནང༌མེ། ཉི་ན་ཤི་ བཱརའ་སོ་ངོ་བ་ཀ་ རུམ་པེ་རེ་བེ་དེན་གེ་ རོ་ཀི་ ན་ཧ་ཆོ་ཁཱན་ཁེ་པ་ སེང་ཉི་གནང༌མེ།
11ཉི་ན་ཧ་བ་ལག་ཏང་ ག་དང་ཡང་པུ་རི་ལེ་དེན་གེ་ ཧང་ག་རང་གི་ནེ་བུ་ ན་ཧ་བ་ བེ་དིང་ཅོད་ཉི་གནང༌མེ། ཉི་ཨ་ཧ་ཐུང་ཀེ་ཨ་ཉི་ ན་ཤི་རུམ་ཁཱན་ག་དེན་གེ་ རོག་ཏེ་བ་ཀི་ དཀོན་མཆོག་ག་ བཀའ་དྲིན་བསམ༌མེ། 12ན་ཤི་ཕུལ་ཁཱན་ སྙན་དར་གི་ ཡ་རུ་ཤ་ལེམ་ག་ ནང་དོག་ཉི་ཆོ་ཁཱན་ ཡི་ཤུ་པ་བ་ཀ་ ཇ་རོ་ཨ༌ལེ། ཉི་ཨུ་ཉུ་མ་ཚཱད་པ་ དཀོན་མཆོག་ག་ཏཱན་ གནམ་མེད་ས་མེད་ བཀའ་དྲིན་བསམ་མེ་རིག༌པེ།
13ན་ཤི་རུམ་པ་ཨ་དེན་གེ་ སོ་ངོ་བ་ཀི་ དཀོན་མཆོག་ག་ བསྟོད་པ་ཕུལ༌བེ། ཉི་ན་ཤི་ ག་དང་ཡང་པུ་ཨ་ཉི་ རོག་ཏེ་བ་དང་ བཱརའ་ཐམས་ཅན་ག་ རུམ་པ་ཀབ་ཉི་ ན་ཤི་ཁ་དོག་ཁཱན་ ཁིརིས་ག་འཐེན་ལེག་པུ་ག་ ཆ་གནས་ཐཱན་ཅ་གི་ལ་དག་ཉི་ ཁུངས་ཀེ༌ཅ། 14ཉི་ན་ཧ་ཐུང་ཀེ་ཨ་ཉི་ དཀོན་མཆོག་གི་ ཐུགས་རྗེ་ཆི་ལུ་གཟིགས་ཉི་ གནང་མ་ཨ་དེན་གེ་ ན་ཧ་དེན་གེ་ སེམས་ནང་ཀེ་ཨ་ཉི་རང་ རོག་ཏེ་བ་ཀི་ སྨོན་ལམ་ཏ༌པེ། 15ཞུ་ལེ་ག་ཚིག་བུ་མ་ཁཱན་ སེ་རབ་གནང་མ་ཨ་དེན་གེ་ དཀོན་མཆོག་ག་ བཀའ་དྲིན་བསམ་ཁེ༎
ទើបបានជ្រើសរើសហើយ៖
གཉིད་པ་ཀོ་རིན་ཐི། 9: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved