དང་པ་ཀོ་རིན་ཐི། 15
15
ཁིརིས་གསོན༌པོ་ཨ༌ཉི་ སྐུ་བཞེངས༌པ་ཀོར༌གེ།
1ཉི་ཨོམ་ ཡུང་ཟི་བ་ གོ་མ་ ཇི་གི་ན་ཧ་བཤད་ཁཱན་ འཐེན་ལེག་པུ་ག་ཀོར་གེ་ ཇི་གི་ན་ཧ་ལོག་ཉི་ཡེག༌པེ། ན་ཤི་ ཨོ་ཉ་འཐེན་ལེག་པུ་ཞུན་ཐཱན་ ན་ཤི་ཨོ་ཉ་འཐེན་ལེག་པུ་ག་ དད་པ་ཨ་ཉི་ཐིང་མ༌ཅ། 2ན་ཤི་ ཨོ་ཐ་འཐེན་ལེག་པུ་ཁེ་པ་ སྒྲིང་སྒྲིང་ཨ་ཉི་ཙུང་ཉི་ཐ་ནེ་ལ་ ཨོ་ཐ་འཐེན་ལེག་པུ་ག་ཐུང་ཀེ་ཨ་ཉི་ ན་ཤི་ཐར་པ་ཉོང་པ༌ཅ། ཨུ་ཉུ་མ་ནེ་ལ་ ན་ཤི་དད་པ་ཨ་ཉི་ ཁུངས་ཧང་རང་མཱན༌ཅ།
3ཐམས་ཅན་གེ་ ཁག་ཆི་ལུ་ཆོ་ཁཱན་ཁེ་པ་ ཇི་གི་ཉོང་ཏེན་གེ་ ན་ཧ་ཏཱན་སྤྲོད༌པ། ཁིརིས་ཤོ་ གསུང་རབ་གེ་ཤོ་ཝ་དང་ཏུ་ཉི་ ཨ་ཧ་སྡིག་པ་དེན་གེ་གཤགས༌པ། 4ཉི་རོ་ཀ་སྐུ་ཕུང་ དུར་ནང་ཀ་ཙུག་པ་ཆོ༌ཝ། དག་པ་ཀབ་ཉི་ གསུང་རབ་གེ་ཤོ་ཝ་དང་ཏུ་ཉི་ ནོང་སམ་ག་ནོང་ཀ་ རོག་ལོག་ཉི་སྐུ་བཞེངས༌པ། 5རོ་ཀི་པ་ཏྲུས་ག་ མཇལ་ཁ་གནང༌མ། ཉི་གེ་ བཱརའ་སྐུ་ཚབ་སོང་ཉིག་ཙིང་ག་ཏཱན་ མཇལ་ཁ་གནང་མ༌ལ། 6ཉི་ཨོ་ཉ་ཚི་ངེ་ ཤེབ་ཐུར་ག་རང་ རོ་ཀི་རོ་ཀ་སློ་མ་ 500 ཕང་ག་ མཇལ་ཁ་གནང་མ༌ལ། རོག་ཏེ་བ་ཀ་པོང་ཀེ་ ཚེ་བང་ཤིན་ཐཱན་རང་གི་ནེ་བུ་ མང་པུ་ཐུར་ ཨོ་མ་བུ་ མ་ཤི་ཝ༌ཅ། 7ཉི་གེ་ རོ་ཀི་ཡ་ཀུབ་ག་ མཇལ་ཁ་གནང་མ༌ལ། ཨོ་ཉ་ཚི་ངེ་ བཱརའ་སྐུ་ཚབ་ ཐམས་ཅན་ག་ མཇལ་ཁ་གནང་མ༌ལ། 8ཇུ་ཀ་དག་པ་ཀབ་ཉི་ རོ་ཀི་ཇ་ག་བུ་ མཇལ་ཁ་གནང༌མ། མ་པ་ཏ་ ཇང་ཤོ་ དུས་ཙུན་མ་རེན་པ་ཀབ་ཉི་ཀེ་ཁཱན་ སོ་ངོ་ད་བུ་ཐུར་གི༌ལ། 9ཇང་ཤོ་ སྐུ་ཚབ་ཐམས་ཅན་གེ་ ཟེ་མུ་གི༌ལ། ཉི་ཇི་གི་ དཀོན་མཆོག་ག་ཆོས་ཚོགས་ གནམ་མེད་ས་མེད་ ཀ་ལུ་ཅོད་པ་ཨ་དེན་གེ་ ཇང་ཁེ་པ་སྐུ་ཚབ་ཨ་ཉི་ ར་ལེ་མ་རུང་ཁཱན་ སོ་ངོ་ཐུར་གི༌ལ།
10དག་པ་ཀབ་ཉི་ ཨོ་མ་ཇང་ ཧང་ད་བུ་ཅ་གི་ལ་སྨོ་ ཨུ་ཉུ་ཤོ་ དཀོན་མཆོག་ག་ ཐུགས་རྗེ་གི་ཨ་ཉི་གི༌ལ། ཉི་ཇ་ག་ནང་ཀ་ཆོ་ཁཱན་ རོ་ཀ་ཐུགས་རྗེ་ ཁུངས་མ་ཝ་མཱན༌ཅ། ཧང་ཡ་དག་ནེ་ལ་ ཇི་གི་བཱརའ་ཐམས་ཅན་གེ་ ཙ་དྲེག་ཉི་ལའི་ཨ་ཝ༌ཅ། དག་པ་ཀབ་ཉི་ ཇི་གི་མང་གི་ཝ་ ཇང་ཀབ་ཉི་ཆོ་ཁཱན་ དཀོན་མཆོག་ག་ ཐུགས་རྗེ་གི་ མཛད་པ་གི༌ལ། 11ཨོ་ཉི་ཨ་དེན་གེ་ རོག་ཏེ་གི་ནེ་བུ་ ཇང་གི་ནེ་བུ་ ཨོ་ཐ་ཆཱས་ཁེ་པ་ ཨ་ཤི་བཤད༌ཅ། ཉི་ཨོ་ཐ་ཆཱས་ག་ ན་ཤི་དད་པ་ཨན༌ཅ༎
ཨའི་ཤི་ཝ༌གེ་གསོན༌པོ་ཨ༌ཉི་ཝུ༌ལེ།
12ཉི་ཨོམ་ ཁིརིས་གཤགས་པ་གེ་ གསོན་པོ་ཨ་ཉི་སྐུ་བཞེངས་པ་དག་ཉི་ བཤད་ནེ་ལ་ ནའི་ཚེ་བང་གི་ སོ་ངོ་ཤི་ཝ་གེ་ གསོན་པོ་ཨ་ཉི་མ་ཝུ་ལ་དག་ ཧང་ཏེན་ཡེག་པེ་རེ་ཅ་ཡ། 13སོ་ངོ་ཤི་ཝ་གེ་ གསོན་པོ་ཨ་ཉི་མ་ཝུ་ལ་དག་ཉི་ ཡེག་ཁཱན་ཁེ་པ་ དེན་པ་གི་ནེ་ལ་ ཉི་ལ་ ཁིརིས་བུ་ བཞེངས་པ་རང་མང་གི་ཝ༌ལ། 14ཉི་ཁིརིས་མ་བཞེངས་པ་གི་ནེ་ལ་ ཨ་ཤི་གསུང་བཤད་ཉི་ ཁུངས་ཧང་རང་མཱན༌ཅ། ཉི་ན་ཧ་དད་པ་བུ་ ཁུངས་ཧང་རང་མཱན༌ཅ། 15ཨོ་ཉ་གེ་ལག་ཉི་ དཀོན་མཆོག་གི་ ཁིརིས་གཤགས་པ་གེ་ ལོག་ཉི་བཞེངས་པ་དག་ཉི་ ཨ་ཤི་ཡེག་པ་ཨ་དེན་གེ་ ཨའི་དཀོན་མཆོག་ག་ཀོར་གེ་ སོ་ད་ཕི་ཁཱན་སོ་ངོ་རི༌ཝ། ཉི་ཤི་ཁཱན་བ་ལོག་ཉི་ ཝུ་ལེ་མ་ཝ་ག་ དེན་པ་གི་ནེ་ཏ་ དཀོན་མཆོག་གི་ ཁིརིས་བུ་གཤགས་པ་གེ་ལོག་ཉི་ མ་བཞེངས་པ་ཨོ་ཕེ། 16ཧང་ཡ་དག་ནེ་ལ་ ཤི་ཁཱན་བ་ ལོག་ཉི་མ་ཝུ་ལེ་གི་ནེ་ཏ་ ཁིརིས་བུ་ ལོག་ཉི་མ་བཞེངས་པ་ཨོ་ཕེ། 17ཉི་ཁིརིས་མ་བཞེངས་པ་གི་ནེ་ལ་ ན་ཤི་དད་པ་ཨ་ཉི་ ཁུངས་ཧང་རང་མཱན༌ཅ། ཉི་ན་ཧ་བ་ ཨོ་མ་བུ་ སྡིག་པ་ནང་ཀ་རང༌ཅ། 18ཉི་ཁིརིས་ག་ དད་པ་ཀེན་ཐཱན་ ཤི་ཁཱན་བ་བུ་ དམྱལ་བ་ག་དི༌ལེ། 19ཉི་ཚེ་ད་ལྟ་ག་དེན་གེ་ཤ་ ཨ་ཤི་ཁིརིས་གེ་ རེ་ཆ་ཨ་ནེ་ལ་ ཨོ་ཐ་འཛམ་གླིང་ག་ སོ་ངོ་ཐམས་ཅན་གེ་མང་པུ་ ཨ་ཧ་ཏཱན་སྙིང་རྗེ་ཨ་ལེ་ཁེ༌ལེ།
20དག་པ་ཀབ་ཉི་ ཁིརིས་ཤོ་ ཏེན་ཏེན་རང་ གཤགས་པ་གེ་ལོག་ཉི་ སྐུ་བཞེངས་པ༌ཅ། ཉི་ཐམས་ཅན་གེ་གོ་མ་ ཁིརིས་ལོག་ཉི་ སྐུ་བཞེངས་པ་ཨ་དེན་གེ་ ཤི་ཁཱན་ཐམས་ཅན་རང་ ཤི་ཝ་གེ་ ལོག་ཉི་ཝུ་ལེ་གི་ལ་དག་ཉི་ ཁིརིས་གི་ཁུངས་ཀེ༌ཅ།
21ཧང་ཡ་དག་ནེ་ལ་ སོ་ངོ་གེ་ཨ་ཉི་ ཤི་ལེ་ག་ཇུན་པ་ཨ་དེན་གེ་ སོ་ངོ་གེ་ཨ་ཉི་རང་ གསོན་པོ་ཨ་ཉི་ཝུ་ལེ་ག་ ཇུན་ཅ་གི༌ལ། 22ཨ་དམ་ག་ཡོར་ཀེ་ཨ་ཉི་ སོ་ངོ་ཐམས་ཅན་རང་ ཤི་ལེ་ཁེ་ཝ་པུརུས་ཀིན་ཨ་ཉི་ ཁིརིས་ག་ཐུང་ཀེ་ཨ་ཉི་ སོ་ངོ་ཐམས་ཅན་གི་ ཚེ་ཉོང༌པེ། 23དག་པ་ཀབ་ཉི་ ཐམས་ཅན་རང་ གོ་རིམ་བཞིན་དུ་ཨ་ཉི་ཝུ༌ལེ། གོ་རང་ ཁིརིས་བཞེངས༌པེ། ཉི་རོག་ལོག་ཉི་བྱོན་མེ་གང་ཀ་ རོ་ཀ་དད་པ་ཨ་ཁཱན་བ་ ལོག་ཉི་ཝུ༌ལེ།
24ཉི་ཤ་ ཇུག་དུང་མེ་གི༌ལ། དབང་ཁཱན་བ་དང་ དབང་ཚད་བ་ ཉི་ཤུགས་སྟོབས་བ་ ཐམས་ཅན་རང་ རོ་ཀི་མ་ཝ་ཅོད་གེམ་ཐཱན་ རྒྱལ་སྲིད་ཁེ་པ་ རོ་ཀི་ ཡབ་དཀོན་མཆོག་ག་ཏཱན་ རྩིས་ཕུལ༌བེ། 25ཁིརིས་གི་ རོ་ཀ་དགྲ་བྱང་ཕིཤི་བ་ ཐམས་ཅན་རང་ རོ་ཀ་ཞབས་ཕརའ་ཁ་ཙུག་ཉི་ མ་ཆུ་མ་སག་པུ་ རོ་ཀི་དབང༌པེ། 26ཉི་ཇུ་ཀ་དག་པ་ཀབ་ཉི་ ཇཝ་ཆུ་མེ་ཁེ་ཁཱན་ དགྲ་བྱང་ཕིཤི་ཁེ་པ་ ཤི་སྲོག་གི༌ལ། 27གསུང་རབ་གེ་ཤོན་ཅ་ རོ་ཀི་ཐམས་ཅན་རང་ རོ་ཀ་ཞབས་ཕརའ་ཁ་ ཙུག་ཉི་ཆུ་མ་#15:27 མགུར་མ་ག་དཔེ་ཆ་ 8:6དག༌ཉི། ཉི་ཨོམ་ ཐམས་ཅན་རང་ རོ་ཀ་ཞབས་ཕརའ་ཁ་ཙུག་པ་དག་ཉི་ ཤོ་ལེ་དེན་ཐ་ཤོ་ དཀོན་མཆོག་བུ་ རོ་ཀ་ཞབས་ཕརའ་ཁ་ ཙུག་པ་ཅ་དག་ཉི་ ཤོན་ཅ་མང་གི། ཧང་ཡ་དག་ནེ་ལ་ ཐམས་ཅན་རང་ ཁིརིས་ག་ཕརའ་ཁ་ ཙུག་ཉི་གནང་ཁཱན་རང་ དཀོན་མཆོག་གི༌ལ། 28དཀོན་མཆོག་གི་ ཐམས་ཅན་རང་ ཁིརིས་ག་ཕརའ་ཁ་ཙུག་ཏེན་གེ་ ཁིརིས་རོག་ཏེན་གི་བུ་ ཐམས་ཅན་རང་ རོ་ཀ་ཕརའ་ཁེ་ཙུག་གནང་ཁཱན་ དཀོན་མཆོག་ག་ཕརའ་ཁེ་ཨ་ཉི་ བཞུགས༌པེ། ཨོ་ཐེན་ཨ་ཉི་ ཐམས་ཅན་རང་ དཀོན་མཆོག་གི་ དབང་པེ་གི༌ལ།
29ཉི་ཨོམ་ ལོག་ཉི་མ་ཝུ་ལེ་གི་ནེ་ལ་ ཤི་ཁཱན་བ་ཀ་དེན་གེ་ ཁྲུས་གསོར་ཞུ་ཁཱན་བ་ཀ་ ཧང་ཇུང་མེ་ཡ། ཤི་ཁཱན་བ་ལོག་ཉི་ མ་ཝུ་ལེ་གི་ནེ་ལ་ ཨོ་ཉ་དེན་གེ་ ཧང་ཨ་ཉི་ཁྲུས་གསོར་ཞུ་ལེ་ཡ།
30ཉི་གཱན་དྲ་དྲང་རང་ ཨའི་ཤི་ལེ་ཅམ་ནེ་བུ་ ཨ་ཤི་ཧང་ཨ་ཉི་ ཙ་དྲེག་པེ་ཁེ་ཝ་ཅ་ཡ། 31ཇ་ག་ཇ་རོ་བ་ ནོང་དྲང་རང་ ཇང་ཤི་ལེ་ཅམ་ཁཱན་ཁེ་པ་ དེན་པ་གི༌ལ། ཉི་ཨུ་ཉུ་དེན་པ་གི་ཝ་པུརུས་ཀིན་ཨ་ཉི་ ཨ་ཧ་གཙོ་བོ་ཁིརིས་ཡི་ཤུ་གེ་ཨ་ཉི་ ན་ཧ་ཐུང་ཀ་ ཇང་ངལ་རངས༌ཅ། 32སོ་ངོ་ག་མི་ཐང་དང་ཏུ་ཉི་ ཇི་གི་ཨེ་ཕི་སཱས་ག་ བོ་རང་སེམས་ཅན་ཀབ་ཉི་ བེ་ཐ་ཕི་ཝ་གི་ནེ་ཏ་ ཁུངས་ཧང་རང་མཱན༌ཅ། དག་པ་ཀབ་ཉི་ ཤི་ཁཱན་བ་ ལོག་ཉི་མ་ཝུ་ལེ་གི་ནེ་ཏ་ ཨ་ཧ་བ་ཟཱན་ཇམ་ཉི་ཆོ་ཁེ། ཧང་ཡ་དག་ནེ་ལ་ ནམ་ནིང་ ཨའི་ཤི་ལེ་གི༌ལ།#15:32 ཡ་ཤའི་ཡ་ག་དཔེ་ཆ་ 22:13 33ན་ཧ་བ་ ཡོང་བ་མ་རི། ཇ་རོ་མ་ལེག་པ་གི་ འབད་བཞག་ལེག་པུ་ཆོ་ཁཱན་བུ་ མ་ལེག་པ་ཅོད༌ཅ། 34ན་ཧ་བ་ལོག་ཉི་ དྲཱན་མ་ཏག༌ཅོ། ཉི་སྡིག་པ་ཨ་ལེ་ག་ཐུབ་ཐའི། ཇི་གི་ན་ཧ་ ངི་ནང་ཁུ་ལེ་ བི་ལེ་དེན་གེ་ཡེག༌ཅ། ནའི་ཚེ་བང་གི་ དཀོན་མཆོག་ གུམ་རང་མ་ཡེ་ཝ༌ལ།
35དག་པ་ཀབ་ཉི་ ཚེ་བང་གི་ཇིམ་དུ་ ཤི་ཁཱན་ལོག་ཉི་ ཧང་ཏེན་ཝུ་ལེ་ཡ། ཉི་རོག་ཏེ་བ་ཀ་ ལུས་པུ་ཤོ་ ཧང་ད་བུ་ཨོ་ཕེ་ཡ་དག༌ཉི། 36ན་ཧ་བ་ ཧབ་ཏུར་རང་ ཡོང་བ་གི་ཝ་ལ་ཡ། ན་ཤི་ ལི་ས་ག་ཡ་ཕ་ཀབ་ཉི་ གོ་རང་ ཨོ་ཉ་ལི་མ་ཤི་ཝ་སག་པུ་ ལིག་པུ་མཱན༌ཅ། 37ན་ཤི་ས་ག་ཆེ་ལ་ཀབ་ཉི་ ཤིང་ཡ་ཕུ་མཱན༌ཅ། དག་པ་ཀབ་ཉི་ བོང་གི་ནེ་བུ་ ཡང་ན་ལ་ བཱརའ་ཧང་ལི་རང་གི་ནེ་བུ་ ན་ཤི་ས་ག་ཡབ༌ཅ། 38དག་པ་ཀབ་ཉི་ དཀོན་མཆོག་གི་ རོ་ཀ་ཐུགས་དང་ཏུ་ཉི་ ཨོ་ཉ་ལི་ག་ལུས་པུ་གནང༌ཅ། ཉི་ལི་མ་འདྲ་ཝ་ཐམས་ཅན་ག་ རང་རང་ས་ལུས་པུ་ དཀོན་མཆོག་གི་གནང་ཅ་གི༌ལ། 39ཤ་ཐམས་ཅན་རང་ ཅིག་པུ་མཱན༌ཅ། སོ་ངོ་བ་ཀ་ཤ་སོ་སུ༌ཅ། ཉི་སེམས་ཅན་བ་ཀ་ཤ་སོ་སུ༌ཅ། ཁ་བ་ཀ་སོ་སུ༌ཅ། ཉི་གེ་ ང་ག་ཤ་བུ་སོ་སུ༌ཅ།
40ཞིང་ཁམས་ག་ ལུས་པུ་བ༌ཅ། ཉི་འཛམ་གླིང་ག་བུ་ ལུས་པུ་བ༌ཅ། འཛམ་གླིང་ག་ ལུས་པུ་བ་ཅེམ་པུ་ཆོ་ཝ་གེ་ མ་འདྲ་ཝ་ཨ་ཉི་ ཞིང་ཁམས་ག་ ལུས་པུ་བ་ཀ་ གཟི་བརྗིད་སོ་སུ༌ཅ། 41ངམ་ག་གཟི་བརྗིད་སོ་སུ༌ཅ། ཉི་ལ་ཉི་ངམ་ག་ གཟི་བརྗིད་སོ་སུ༌ཅ། ཉི་སྐར་མ་སྨིན་དྲུག་བ་ཀ་ གཟི་བརྗིད་སོ་སུ༌ཅ།
42ཤི་ཝ་གེ་གསོན་པོ་ཨ་ཉི་ཝུ་ལེ་ག་ ཤེག་པ་ཀབ་ཉི་བུ་ ཨུ་ཉུ་པུརུས་ཀིན་རང་གི༌ལ། ཨ་ཧ་ ཨོ་ཐ་འཛམ་གླིང་ག་ ལུས་པུ་ཁེ་པ་ཤི༌ལེ། དག་པ་ཀབ་ཉི་ གསོན་པོ་ཨ་ཉི་ཝུ་ཁཱན་ ལུས་པུ་ཁེ་པ་ ཧ་ལ་རང་མ་ཤི༌ལ། 43ཨ་ཧ་ལུས་པུ་ཆེ་ལ་ཀབ་ཉི་ གུས་ཞབས་མ་ཝ་ཨུན༌ཅ། དག་པ་ཀབ་ཉི་ ཝུ་ལ་ཀབ་ཉི་ གཟི་བརྗིད་གི་ཕུང་མ་རིན༌ཅ། ཨ་ཧ་ལུས་པུ་ཆེ་ལ་ཀབ་ཉི་ ཤུག་མ་ཝ་ཨུན༌ཅ། དག་པ་ཀབ་ཉི་ ཝུ་ལ་ཀབ་ཉི་ གནམ་མེད་ས་མེད་ ཤུག་ཅཱན་རིན༌ཅ། 44ཨ་ཧ་ལུས་པུ་ཆེ་ལ་ཀབ་ཉི་ རང་བཞིན་ག་ ལུས་པུ་ཨུན༌ཅ། དག་པ་ལོག་ཉི་ཝུ་ལ་ཀབ་ཉི་ ཐུགས་ཉིད་ག་ ལུས་པུ་རིན༌ཅ། རང་བཞིན་ག་ལུས་པུ་ ཆོ་ཝ་པུརུས་ཀིན་ཨ་ཉི་ ཐུགས་ཉིད་ག་ལུས་པུ་བུ་ ཨོ་ཕེ་ཁེ༌ལེ།
45ཨོ་ཉི་ཨ་དེན་གེ་ ཨོ་ཐེན་འབྲི་བ་ཅ་ དང་པ་སོ་ངོ་ཨ་དམ་ཁེ་པ་ གསོན་པོ་རི་ཝ་#15:45 ཇུན་པ་ག་དཔེ་ཆ་ 2:7དག༌ཉི། དག་པ་ཀབ་ཉི་ ཇུ་ཀ་ཨ་དམ་ཁེ་པ་ ཚེ་གནང་ཁཱན་ ཐུགས་ཉིད་རི་ཝ༌ཅ། 46གོ་མ་ཨུ་ཁཱན་ཁེ་པ་ རང་བཞིན་ག་ ལུས་པུ་གི་ཝ་ཆོ༌ཝ། དག་པ་ཀབ་ཉི་ ཐུགས་ཉིད་ག་ལུས་པུ་ཁེ་པ་ ཚི་ངེ་བྱོན༌མ། 47དང་པ་ཨ་དམ་ཤོ་ ས་གེ་ཨ་ཉི་ བཀོད་པ་གི་ཝ་ཨ་དེན་གེ་ འཛམ་གླིང་གེ་ཨོ་ཕ་གི༌ལ། དག་པ་ཀབ་ཉི་ གཉིས་པ་ཨ་དམ་ཁེ་པ་ ཞིང་ཁམས་གེ་དོང་ བྱོན་མ་གི༌ལ། 48འཛམ་གླིང་ག་སོ་ངོ་བ་བུ་ ས་གི་ཅོད་ཁཱན་ སོ་ངོ་ད་བུ་རང་གི༌ལ། ཉི་ཞིང་ཁམས་ག་སོ་ངོ་བ་ཤོ་ ཞིང་ཁམས་གེ་དོང་ བྱོན་ཁཱན་ད་བུ་རང་གི༌ལ། 49ཨ་ཧ་བ་ ཨོ་མ་ ས་གི་ཅོད་ཁཱན་ ཨ་དམ་ད་བུ་ ཆོ་ཝ་པུརུས་ཀིན་ཨ་ཉི་ ནོང་ཐུར་ ཨ་ཧ་བ་ ཞིང་ཁམས་གེ་བྱོན་ཁཱན་ ཁིརིས་པུརུས་ཀིན་རང་རི༌ལེ།
50ཡུང་ཟི་བ་ ཇི་གི་ན་ཧ་ཡེག་ཅ་ ཤ་དང་ཞི་གི་ དཀོན་མཆོག་ག་རྒྱལ་སྲིད་ ཉོང་པེ་མར༌བ། ཉི་ཨོ་ཐ་མེ་པ་དི་ཁཱན་གི་ ཧ་ལ་རང་ མེ་པ་མ་དི་ཁཱན་ནང་ཀ་ ནུ་ཕེ་མར༌བ།
51ཉཱན་ཅོ་ ཇི་གི་ ན་ཧ་གུམ་ནང་ཆཱས་ཐུར་ཡེག་པེ་ ཨའི་ཐམས་ཅན་རང་ཏ་ མ་ཤི༌ལ། དག་པ་ཀབ་ཉི་ ཨའི་ཐམས་ཅན་རང་ འགྱུར་བེ་ཁེ༌ལེ། 52དམག་དུང་མཇུག་དུས་ཁེ་པ་ ཐེད་པ་ཀབ་ཉི་ ཨ་ཧ་བ་ ཐམས་ཅན་རང་ སོར༌པེ། ཨ་ཧ་མིང་ཐྲི་པ་ད་བུ་རང་ རེབ་ཀིན་ཐུར་ག་བར་ཀ་ ཨ་ཧ་བ་འགྱུར༌བེ། དམག་དུང་ཐེད་པ་ཀབ་ཉི་ ཤི་ཁཱན་བ་ ལོག་ཉི་ཧ་ལ་རང་ མ་ཤི་ལེ་དེན་གེ་ཝུ༌ལེ། ཉི་ཨ་ཧ་བ་བུ་ སོར༌པེ། 53ཨ་ཧ་ཨོ་ཐ་མེ་པ་དི་ཁཱན་ ལུས་པུ་ཁེ་པ་ ཧ་ལ་རང་ མེ་པ་མ་དི་ཁཱན་དང་ ཧ་ལ་རང་མ་ཤི་ཁཱན་ ལུས་པུ་ག་འགྱུར་བེ་ཁེ༌ལེ།
54ཨ་ཧ་ཨོ་ཐ་མེ་པ་དི་ཁཱན་ ལུས་པུ་ཁེ་པ་ ཧ་ལ་རང་མེ་པ་མ་དི་ཁཱན་རི་ཉ་ ཧ་ལ་རང་མ་ཤི་ཁཱན་ ལུས་པུ་ག་འགྱུར་དེན་གེ་ གསུང་རབ་གེ་ཤོ་ཁཱན་ཁེ་པ་ དེན་ཐ་འགྲུབ་ཕེ།
དཀོན་མཆོག་གི་ ཤི་སྲོག་ཕམ་ཉི་གནང་མ༌ཅ།#15:54 ཡ་ཤའི་ཡ་ག་དཔེ་ཆ་ 25:8 55དབའི་ཤི་སྲོག་ ན་ག་རྒྱལ་ཁ་ ཨོ་ག་ཅ་ཡ། དབའི་ཤི་སྲོག་ ན་ག་དུག་ ཨོ་ག་བུ་ཝ་ཡ།#15:55 ཧོ་ཤེ་ག་དཔེ་ཆ་ 13:14
56ཤི་སྲོག་ག་དུག་ཤོ་ སྡིག་པ་གི༌ལ། ཉི་སྡིག་པ་ག་དབང་ཚད་ཤོ་ བཀའ་ཁྲིམས་གི༌ལ། 57དག་པ་ཀབ་ཉི་ ཨ་ཧ་གཙོ་བོ་ ཡི་ཤུ་ཁིརིས་ག་ཐུང་ཀེ་ཨ་ཉི་ ཨ་ཧ་རྒྱལ་ཁ་གནང་མ་ཨ་དེན་གེ་ དཀོན་མཆོག་ག་ བཀའ་དྲིན་བསམ༌ཤོ།
58ཨོ་ཉི་ཨ་དེན་གེ་ ཇ་ག་ཡུང་ཟི་བ་ ན་ཧ་བ་ ཧང་གི་རང་ ལེ་མེ་མར་བེ་དེན་གེ་ སྒྲིང་སྒྲིང་ཨ་ཉི་ཆོའི། ཧ་ལ་རང་གི་ནེ་བུ་ གཙོ་བོ་ག་ཕྱག་ལཱ་ག་ བརྩོན་འགྲུས་ཀེ་ཉི་ ལའི་ཨའི། ཧང་ཡ་དག་ནེ་ལ་ ན་ཤི་གཙོ་བོ་ག་དེན་གེ་ ལའི་ཨ་ཁཱན་ཁེ་པ་ བ་ཏོང་མ་དི་ལ་དག་ཉི་ ན་ཤི་སེན༌ཅ༎
ទើបបានជ្រើសរើសហើយ៖
དང་པ་ཀོ་རིན་ཐི། 15: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved