དང་པ་ཀོ་རིན་ཐི། 16
16
ཡ་རུ༌ཤ༌ལེམ༌ག་ དཀོན༌མཆོག༌ག་སོ༌ངོ༌བ༌ཀ་དེན༌གེ་ སྙན༌དར།
1ཉི་ཨོམ་ དཀོན་མཆོག་ག་སོ་ངོ་བ་ཀ་ རུམ་པེ་དེན་གེ་ ན་ཤི་སྙན་དར་དུས་པེ་ག་ ཤེག་པ་ཀབ་ཉི་ ཇི་གི་ ག་ལ་ཏི་ཡ་ག་ ཆོས་ཚོགས་བ་ཀ་ ཡེག་པ་པུརུས་ཀིན་ཨ་ཉི་ཨའི།
2ཇང་ཨོ་ཕ་ཀབ་ཉི་ སྙན་དར་དུས་པེ་མ་ཁེ་ལེ་དེན་གེ་ ཧབ་ཏང་དྲང་རང་ གཟའ་ད་ཝ་ག་ནོང་ཀ་ ནའི་ཐམས་ཅན་གི་ རང་རང་ས་ འབབ་ཁུངས་དང་ཏུ་ཉི་ ཉོང་ཁཱན་ཏི་རུ་གེ་ ད་ཟེ་རེ་སོ་སུ་ཨན་ཤོན་ཐཱན་ སག་ཉི་ཐའི། 3ཉི་ཇང་ ན་ཧ་བཱརང་ཀ་ཤེག་ཏེན་གེ་ ན་ཤི་ཀེ་ཁཱན་ལག་ཏ་ཁེ་པ་ ཡ་རུ་ཤ་ལེམ་ག་ནུང་མེ་དེན་གེ་ ན་ཤི་སི་ཁཱན་ སོ་ངོ་བ་ཀ་དེན་གེ་ ཇི་གི་ཡི་གུ་ཐུར་འབྲི་ཉི་བི༌ལེ། 4ཉི་ཇང་བུ་ དི་ལེ་ཁེ་ཝ་ད་བུ་ཏེ་ཨ་ནེ་ལ་ རོག་ཏེ་བ་ ཇང་ཀབ་ཉི་ཨུན་ཆེན༎
པ་ཝལ་ག་འཆར་གཞི།
5ཇང་མ་ཀེ་དོ་ནི་ཡ་ག་དི་ལེ་ག་ འཆར་གཞི༌ཅ། ཉི་ཉ་གེ་ཨ་ཉི་ ཇང་ན་ཧ་བ་ཆོ་ས་ག་ཨོ་ཕེ། 6ཇང་ན་ཧ་བ་ཀབ་ཉི་ ད་སུར་ཕང་ཆོ་ཝ་ད་བུ་ཏེ་ཨ་དུ། ཡང་ན་ལ་ ཇང་ཨོ་ག་དི་ཝ་ཐུར་ ན་ཤི་ ཇ་ག་ཇ་རོ་ཨ་ལེ་དེན་གེ་ ཏོན་མ་ཆུ་མ་སག་པུ་ ཇང་ན་ཧ་བ་ཀབ་ཉི་རང་ཆོ་དུ། 7ཨོ་ཐ་ཤེག་པ་ ཇང་ན་ཧ་བ་ཆོ་ས་ག་ཤོན་ཐཱན་ རུ་མ་ཐྲེ་ཀེ་རང་ དི་ལེ་ག་ སེམས་མཱན༌ཅ། གཙོ་བོ་གི་ གནང་མ་ད་བུ་ཨ་ནེ་ལ་ ཇང་ན་ཧ་བ་ཆོ་ས་ག་ཨུན་ཐཱན་ ད་སུར་ན་ཧ་བ་ཀབ་ཉི་རང་ ཆོ་ལེ་ག་སེམས༌ཅ། 8དག་པ་ཀབ་ཉི་ པེན་ཏི་ཀོས་ག་ནོང་#16:8 པེན་ཏི་ཀོས་དག་པེ་དེན་ཐ་ཤོ་ ནོང་ 50 དག་པ་ག་ རྩིས་ གི༌ལ། པེན་ཏི་ཀོས་ག་དུས་ཆེན་ཤོ་ གོག་ཉི་དི་ཝ་ག་དུས་ཆེན་ཆུམ་ཉི་ ངམ་ 50 ག་ ཁེན་ཅ་གི༌ལ། ཉི་ཨོ་ཐ་དུས་ཆེན་ཤོ་ ཐོག་དུང་མ་ག་དུས་ཆེན་གི༌ལ།སག་པུ་ ཇང་ཨེ་ཕི་སཱས་ག་རང་ ཆོན་ཐ༌ལེ། 9ཧང་ཡ་དག་ནེ་ལ་ ཐ་ག་ལའི་ཆི་ལུ་ཨ་ལེ་དེན་གེ་ གོ་སྐབས་ཆི་ལུ་ཉོང་པ༌ཅ། དག་པ་ཀབ་ཉི་ ཇ་ག་དགྲ་ཨ་ཁཱན་བ་བུ་ མང་པུ་ཐུར༌ཅ།
10ཏི་མོ་ཐི་ ན་ཧ་བཱརང་ཀ་ ཨོ་ཕེ་གང་ཀ་ ན་ཤི་རོ་ཀ་ གུས་ཞབས་ཨ་ལེ་ཁེ༌ལེ། ཧང་ཡ་དག་ནེ་ལ་ ཇི་གི་ཨ་ཝ་པུརུས་ཀིན་ཨ་ཉི་ རོ་ཀི་བུ་ གཙོ་བོ་ག་ཕྱག་ཞུན༌ཅ། 11ཨི་བི་གི་རང་ རོ་ཀ་ཏཱན་ ངལ་མ་རངས་པ་མ་ཨན་ཆེན། དག་པ་ཀབ་ཉི་ རོག་ལོག་ཉི་ ཇང་ཆོ་ས་ག་ ཨོ་ཕ་ཀབ་ཉི་ ན་ཤི་ རོག་སྐྱིད་པུ་ཨ་ཉི་ ཨོ་ཕེ་བི། བཱརའ་ཨ་ཏ་ཀོ་ཏ་བ་ཀབ་ཉི་ རོག་བུ་རུ་མེ་ག་ ཇི་གི་རེ་ཆ་ཨ་ཝ༌ཅ།
12ཉི་ཨོམ་ ཀོ་ཏ་ཨ་པོལ་ལོས་ག་ཀོར་གེ་འབྲི༌ཅ། བཱརའ་ཨ་ཏ་ཀོ་ཏ་བ་ཀབ་ཉི་ཏབ་ཐུར་ག་ རོག་ན་ཧ་བ་ཆོ་ས་ག་ དིན་གོད་ཅོ་དག་ཉི་ ཇི་གི་རོ་ཀ་ཡེག༌ཅ། དག་པ་ཀབ་ཉི་ རོག་ཨོ་མ་དི་ལེ་ག་ སེམས་མ་ཝ༌ལ། ཨོ་ཉེ་རང་གི་ནེ་བུ་ ཏབ་ཉམ་པེ་གང་ཀ་ རོག་ ན་ཧ་བ་ཆོ་ས་ག་ཤེག༌པེ།
13ན་ཧ་བ་ རིག་པ་སྒྲིམ་ཉི་ཆོའི། ཉི་ན་ཧ་དད་པ་ཁེ་པ་ སྒྲིང་སྒྲིང་ཚཱས༌པེ། ན་ཧ་བ་ ཡོང་ཐེད་པུ་ཚཱས་པེ་ ཉི་དོ་རི་རི་ཨོ་ཕེ་ཁེ༌ལེ། 14ཐམས་ཅན་རང་ སྙིང་རྗེ་ག་ཐུང་ཀེ་ཨ་ཉི་ཨའི།
15ཨ་ཁའི་ཡ་ག་ སོ་ངོ་བ་ཀ་པོང་ཀེ་ ཐམས་ཅན་གེ་གོ་མ་ ཨིས་ཏི་ཕ་ནཱས་#16:15 མཛད་པ་ 6–8དང་ རོ་ཀ་ཕའི་ག་སོ་ངོ་བ་ཀི་ དད་པ་ཨ་ཝ་གི་ལ་དག་ཉི་ ན་ཤི་སེན༌ཅ། ཉི་རོག་ཏེ་བ་ཀི་ བཱརའ་ཡི་ཤུ་པ་བ་ཀ་ ཕྱག་ཞུ་ལེ་གང༌ཅ། ཨོ་ཉི་ཨ་དེན་གེ་ ཡུང་ཟི་བ་ ཇི་གི་ན་ཧ་ཡེག་ཅ་ 16རོག་ཏེ་བ་ཀ་ གནམ་མེད་ས་མེད་ གུས་ཞབས་ཨ་ལེ་ཁེ༌ལེ། ཉི་རོག་ཏེ་བ་ད་བུ་ཨ་ཉི་ སེམས་ཤོ་ཉི་ གཙོ་བོ་ག་ ཕྱག་ཞུ་ཁཱན་བ་ཀ་བུ་ གུས་ཞབས་ཨ་ལེ་ཁེ༌ལེ། 17ཨིས་ཏི་ཕ་ནཱས་དང་ ཕོར་ཏྲུ་ན་ཏྲས་ ཉི་ཨ་ཁའི་ཀཱས་ཤེག་པ་ཀབ་ཉི་ ཇང་གནམ་མེད་ས་མེད་ ཤོ་ནང་ཕེ༌ཝ། ཧང་ཡ་དག་ནེ་ལ་ ནའི་ཐ་ག་མ་ཝ་ཨ་དེན་གེ་ ན་ཤི་མ་ཨ་ཁཱན་ཁེ་པ་ རོག་ཏེ་བ་ཀི་ཨ་ཉི་ག༌ཝ། 18རོག་ཏེ་བ་ཀི་ ཇ་ག་དང་ ན་ཧ་རྣམ་ཤེས་ཁེ་པ་ ཤོང་ལ་ལེ་ག་ཝ་ཨ་དེན་གེ་ ན་ཤི་ ཨུ་ཉུ་ད་བུ་སོ་ངོ་བ་ཀ་ གུས་ཞབས་ཨ་ལེ་ཁེ༌ལེ།
19ཨེ་ཤི་ཡ་ག་ཆོས་ཚོགས་བ་ཀི་ ན་ཧ་སྐུ་གཟུགས་བཟང་པོ་དག་ཉི་ཡེག༌ལ། ཨ་ཀི་ལཱས་དང་པིརིས་ཀི་ལ་ ཉི་རོག་ཉིག་ཙིང་ག་ ཕའི་ག་ཛོམ་ཁཱན་ ཆོས་ཚོགས་གི་བུ་ གཙོ་བོ་ག་མཚན་ག་ སེམས་ཀི་ཨ་ཉི་རང་ ན་ཧ་ཏཱན་ སྐུ་གཟུགས་བཟང་པོ་དག་ཉི་ཡེག༌ལ། 20ཉི་བཱརའ་ཡུང་ཟི་ ཐམས་ཅན་གི་ ན་ཧ་སྐུ་གཟུགས་བཟང་པོ་དག་ཉི་ཡེག༌ལ། ཉི་དམ་པའི་ཅུབ་ཨ་ཉི་ ན་ཤི་ཐུར་གི་ཐུར་ག་ སྐུ་གཟུགས་བཟང་པོ་དག་ཉི་ཡེག༌ཅོ།
21ཉི་པ་ཝལ་ ཇང་ཏེན་ག་ ག་དང་གི་འབྲི་ཉི་ སྐུ་གཟུགས་བཟང་པོ་ཨ་ཉི་ཡེག༌ཅ།
22ཨི་བི་གི་ གཙོ་བོ་མ་ཕང་པ་ཐུར་ ཨོ་ཉ་སོ་ངོ་གི་ ཁ་རབ་ཉོང༌པེ། ནཱན་བྱོན་ཤོ་ གཙོ་བོ།
23གཙོ་བོ་ཡི་ཤུ་གི་ ན་ཧ་བ་ཀ་ ཐུགས་རྗེ་གནང་ཆེན།
24ཉི་ཁིརིས་ཡི་ཤུ་ག་མཚན་ག་ ཇི་གི་ན་ཧ་བ་ཕང༌ཅ། ཨ་མེན༎
ទើបបានជ្រើសរើសហើយ៖
དང་པ་ཀོ་རིན་ཐི། 16: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved