དང་པ་ཀོ་རིན་ཐི། 14
14
ལུང་བསྟན༌མེ༌ག་དང་ ཧ་མ༌གོ༌ཁཱན་ལོ་ཨ༌ལེ༌ག་ སེ་རབ།
1སྙིང་རྗེ་ག་ལམ་གེ་ དང་མེ་གོད༌ཅོ། ཉི་ཐུགས་ཉིད་ག་སེ་རབ་བ་ ཉོང་པེ་ག་སེམས་ཨའི། ཙོ་ཙོ་རང་ ལུང་བསྟན་མེ་ག་སེ་རབ་ ཉོང་པེ་ག་སེམས་ཨའི།
2ཧང་ཡ་དག་ནེ་ལ་ ཧ་མ་གོ་ཁཱན་ལོ་ཨ་ཁཱན་གི་ སོ་ངོ་ག་མང་གི་ཝ་ དཀོན་མཆོག་ག་ ཞུན་ཅ་གི༌ལ། ཉི་ཐུགས་ཉིད་ག་ཐུང་ཀེ་ཨ་ཉི་ གུམ་ནང་ཆཱས་བ་ ཨ་ཝ་ཨ་དེན་གེ་ སོ་ངོ་ཐུར་གི་རང་ ཧ་མ་གོ༌ལ། 3དག་པ་ཀབ་ཉི་ ལུང་བསྟན་ཁཱན་ ཐམས་ཅན་གི་ སོ་ངོ་བ་ སྒྲིང་སྒྲིང་ཅོད་པེ་དེན་གེ་དང་ རོག་ཏེ་བ་ཀ་ ནོ་ཝང་ཨ་ཉི་ སེམས་གསོ་ཨ་ལེ་དེན་གེ་ ལུང་བསྟན་ཅ་གི༌ལ། 4མ་སེ་ཁཱན་ལོ་ཨ་ཁཱན་ཤོ་ གཙོ་བོ་ག་ རོག་ཏེན་ སྒྲིང་སྒྲིང་ཅོད་པེ་དེན་གེ་གི༌ལ། དག་པ་ཀབ་ཉི་ ལུང་བསྟན་ཁཱན་ཤོ་ ཆོས་ཚོགས་ སྒྲིང་སྒྲིང་ཅོད་པེ་དེན་གེ་གི༌ལ།
5ནའི་ཐམས་ཅན་གི་ མ་སེ་ཁཱན་ལོ་ ཨ་ལེ་རེ་ཆེན་དག་ཉི་ ཇ་ག་སེམས༌ཅ། དག་པ་ཀབ་ཉི་ ཨོ་ཉ་གེ་བུ་ལག་ཉི་ ན་ཤི་ལུང་བསྟན་མེ་རེ་ཆེན་དག་ཉི་ ཇི་གི་མིན༌ཅ། ཧང་ཡ་དག་ནེ་ལ་ མ་སེ་ཁཱན་ལོ་ཨ་ཁཱན་ཁེ་པ་ ཆོས་ཚོགས་ག་ཕཱན་མེ་དེན་གེ་ དེན་ཐ་ཁྲེ་ཉི་བི་ཁཱན་མ་ནེ་ལ་ མ་སེ་ཁཱན་ལོ་ཨ་ཁཱན་གེ་ལག་ཉི་ ལུང་བསྟན་ཁཱན་ཁེ་པ་ ཆི་ལུ་གི༌ལ།
6ཇ་ག་ཡུང་ཟི་བ་ ཇང་ན་ཧ་བཱརང་ཀ་ ཨོ་ཕ་ཀབ་ཉི་ དཀོན་མཆོག་གི་གསུངས་ཁཱན་ ཨུ་ཉུ་མ་ནེ་ལ་ཡོན་ཏན་ ཉི་ཨུ་ཉུ་མ་ནེ་ལ་ ལུང་བསྟན་ ཨུ་ཉུ་མ་ནེ་ལ་ ཇི་གི་ན་ཧ་ཡེ་ལེ་དེན་གེ་ གསུང་མ་ཕ་ལཱན་ མ་སེ་ཁཱན་ལོ་བ་ཕ་ཉི་ཨུ་ནེ་ལ་ ན་ཧ་ཧང་ཕཱན་ཏོག་པེ་ཡ། 7ཚེ་མ་ཁཱན་ སྙན་ཆ་ནམ་བུརུང་དང་ སྒྲམ་སྙན་གི་ཆང་ ཀཱན་ཇིག༌ཅ། ལམ་ལུགས་དང་ཏུ་ཉི་ མ་ཏྲོག་ནེ་ལ་ སྙན་ཆ་ཧང་ཏྲོག་ཅ་གི་ལ་སྨོ་ སོ་ངོ་བ་ཀི་ ཧང་ཏེན་སེ་ལེ་ཡ། 8ཉི་ཨོམ་ཆང་རང་ དམག་དུང་ཐེད་པ་ཀབ་ཉི་ ཀཱན་དང་སང་ཀིན་ཨ་ཉི་ མ་ཇིག་ནེ་ལ་ སོ་ངོ་བ་ཀི་ ཧང་ཏེན་ཨ་ཉི་ དམག་ཕི་ལེ་ཅམ་པེ་ཡ།
9ཨུ་ཉུ་པུརུས་ཀིན་ཨ་ཉི་ ན་ཤི་བུ་ སོ་ངོ་བ་ཀི་ ཧ་མ་གོ་ཁཱན་ཆཱས་ཨ་ནེ་ལ་ ན་ཤི་ཡེག་ཁཱན་ཁེ་པ་ ཧང་གི་ལ་སྨོ་ རོག་ཏེ་བ་ཀི་ ཧང་ཏེན་ཨ་ཉི་ ཧ་གོ་ལེ་ཡ། ན་ཤི་ཨ་ཁཱན་ཆཱས་ཁེ་པ་ དེ་ཝ་ཏོང་པ་གི༌ལ།
10འཛམ་གླིང་ག་ ལོ་མ་འདྲ་ཝ་མང་པུ་ཐུར༌ཅ། ཉི་ལོ་ཐུར་བུ་ དེན་ཐ་མ་ཝ་མཱན༌ཅ། 11དག་པ་ཀབ་ཉི་ ཇི་གི་ཆཱས་ཧ་མ་གོ་ནེ་ལ་ ཇང་ཨོ་ཉ་སོ་ངོ་ག་དེན་གེ་ ཕིས་ཀ་སོ་ངོ་རི༌ལེ། ཉི་རོག་ ཇ་ག་དེན་གེ་ ཕིས་ཀ་སོ་ངོ་རི༌ལེ། 12ཉི་ན་ཧ་པོང་ཀ་བུ་ ཨུ་ཉུ་ད་བུ་རང་གི༌ལ། ན་ཧ་བ་ཐུགས་ཉིད་ག་ སེ་རབ་ཉོང་པེ་ག་ སེམས་ཨ་ན། ཨོ་ཉི་ཨ་དེན་གེ་ ན་ཤི་ཆོས་ཚོགས་ག་ ཕཱན་ཏོག་ཁཱན་ སེ་རབ་ཁེ་པ་ཉོང་པེ་ མིག་པ་ཕི་ལེ་ཁེ༌ལེ།
13མ་སེ་ཁཱན་ལོ་ཨ་ལེ་ག་ སེ་རབ་ཉོང་ཁཱན་གི་ ཨོ་ཉ་ལོ་ག་དེན་ཐ་ཁྲེ་བེ་ག་ སེ་རབ་བུ་གནང་ཤོ་དག་ཉི་ སྨོན་ལམ་ཏ་པེ་ཁེ༌ལེ། 14ཧང་ཡ་དག་ནེ་ལ་ ཇི་གི་མ་སེ་ཁཱན་ལོ་ག་ སྨོན་ལམ་ཏབ་ནེ་ལ་ ཇ་ག་རྣམ་ཤེས་གི་ སྨོན་ལམ་ཏབ་ཅ་གི༌ལ། དག་པ་ཀབ་ཉི་ ཇི་གི་སྨོན་ལམ་ཏབ་ཁཱན་ཁེ་པ་ ཇི་གི་ཧ་གོ་ལུ་མཱན༌ཅ།
15ཉི་ལ་ ཇི་གི་ཧང་ཨ་ཝ་དྲག་པེ་ཡ། ཇི་གི་ཇ་ག་རྣམ་ཤེས་གི་ སྨོན་ལམ་ཏབ་ཐཱན་རང་གི་ནེ་བུ་ ཇི་གི་ཧ་གོ་ཁཱན་ཚིག་ག་ཐུང་ཀེ་ཨ་ཉི་བུ་ སྨོན་ལམ་ཏ༌པེ། ཉི་ཇི་གི་ ཇ་ག་རྣམ་ཤེས་གི་ མགུར་མ་ཕུལ་ཐཱན་རང་གི་ནེ་བུ་ ཇི་གི་ཧ་གོ་ཁཱན་ཚིག་ག་ཐུང་ཀེ་ཨ་ཉི་བུ་ མགུར་མ་ཕུལ༌བེ། 16ན་ཤི་ ན་ཧ་རྣམ་ཤེས་གི་ཨ་ཉི་ཤ་ དཀོན་མཆོག་ག་ བསྟོད་པ་ཕུལ་ནེ་ལ་ ན་ཤི་ཞུ་ཁཱན་ཁེ་པ་ ཧ་མ་གོ་ཝ་ཨ་དེན་གེ་ ཕིས་ཀ་སོ་ངོ་གི་ ན་ཤི་བཀའ་དྲིན་བསམ་ཁཱན་ སྨོན་ལམ་ག་ ཧང་ཏེན་ཨ་ཉི་ ཨ་མེན་ཡེག་པེ་ཡ། 17ན་ཤི་ གནམ་མེད་ས་མེད་ལེག་པུ་ཨ་ཉི་ བཀའ་དྲིན་བསམ་ཆོ་དུ། དག་པ་ཀབ་ཉི་ ཨོམ་ཐུར་སོ་ངོ་ག་ ཕཱན་ཏོག་པུ་མཱན༌ཅ།
18མ་སེ་ཁཱན་ལོ་ཁེ་པ་ ནའི་ཐམས་ཅན་གེ་མང་པུ་ ཇི་གི་ཨ་ཝ་ཨ་དེན་གེ་ ཇི་གི་དཀོན་མཆོག་ག་ བཀའ་དྲིན་བསམ༌ཅ། 19ཨོ་ཉེ་རང་གི་ནེ་བུ་ ཇི་གི་ཆོས་ཚོགས་ག་ ཡེ་ལ་ཀབ་ཉི་ མ་སེ་ཁཱན་ལོ་ ཚིག་ 10000 ཡེག་པེ་མང་གི་ཝ་ སོ་ངོ་བ་ཀི་ཧ་གོ་ཁཱན་ ཚིག་ལྔ་ཡེག༌པེ།
20ཡུང་ཟི་བ་ ན་ཧ་བ་ཝག་ཙ་བ་ད་བུ་ མི་ལེ་ག་ཐུབ་ཐའི། ངན་པ་ག་ཤེག་པ་ཀབ་ཉི་ ཝག་ཙ་བ་ད་བུ་ ཨོ་ཕེ་ཁེ༌ལེ། དག་པ་ཀབ་ཉི་ མི་ལེ་ག་ཤེག་པ་ཀབ་ཉི་ སོ་ངོ་ཆི་ལུ་ད་བུ་ ཨོ་ཕེ་ཁེ༌ལེ། 21གསུང་རབ་ནང་ཀ་ ཨོ་ཐེན་འབྲི་བ་ཅ་
ཇི་གི་ཇ་ག་སོ་ངོ་བ་ཀ་ མ་སེ་ཁཱན་ལོ་དང་ ཕིས་ཀ་སོ་ངོ་བ་ཀ་ ནོ་ཝང་ག་ཐུང་ཀེ་ཨ་ཉི་ ཆཱས་ཨ༌ལེ། ཨོ་ཉེ་རང་གི་ནེ་བུ་ རོག་ཏེ་བ་ཀི་ ཇི་གི་ཡེག་ཁཱན་ཆཱས་ མ་ཉཱན་པ་#14:21 ཡ་ཤའི་ཡ་ག་དཔེ་ཆ་ 28:11, 12 དག་ཉི་ གཙོ་བོ་གི་གསུངས༌ལ།
22ཨོ་ཉི་ཨ་དེན་གེ་ མ་སེ་ཁཱན་ལོ་ཤོ་ དད་པ་མ་ཁཱན་བ་ཀ་དེན་གེ་ རྟགས་གི༌ལ། དག་པ་ཀབ་ཉི་ ལུང་བསྟན་ཤོ་ དད་པ་མ་ཨ་ཁཱན་བ་ཀ་དེན་གེ་ མང་གི་ཝ་ དད་པ་ཨ་ཁཱན་བ་ཀ་ རྟགས་གི༌ལ། 23ཉི་ཆོས་ཚོགས་ག་སོ་ངོ་ ཐམས་ཅན་ཏབ་ཐུར་ཛོམ་ཉི་ ཐམས་ཅན་གི་ མ་སེ་ཁཱན་ལོ་ཕི་ནེ་ལ་ ཧ་མ་གོ་ཁཱན་དང་ དད་པ་མ་ཨ་ཁཱན་བ་ ནང་ཀ་ཨུ་ནེ་ལ་ ཧང་ ན་ཧ་བ་ ཉོས་པ་ལ་དག་ཉི་ རོག་ཏེ་བ་ཀི་ མ་ཡེག་པ་སྨོ། 24དག་པ་ཀབ་ཉི་ ཐམས་ཅན་གི་ ལུང་བསྟན་མེ་གང་ཀ་ དད་པ་མ་ཁཱན་ ཨུ་ཉུ་མ་ནེ་ལ་ ཧ་མ་གོ་ཁཱན་སོ་ངོ་ཏེ་ ནང་ཀ་ཨུ་ནེ་ལ་ རོག་ཁེ་པ་ སྡིག་ཅན་གི་ཝ་ལ་དག་ཉི་ ཁུངས་ཀེ་བེ་རེ༌བེ། ཉི་ན་ཤི་ཡེག་ཁཱན་ཆཱས་གི་ རོ་ཀ་ཁྲིམས་ཅཱད༌པེ། 25རོག་ཏེ་བ་ཀི་ཉཱན་ཅ་ཨ་ཉི་ རོག་ཏེ་བ་ཀི་ སེམས་ཀ་མི་ཁཱན་ཆཱས་བ་བུ་ གུབ་ཀ་ཤོན་ཁེ༌ལེ། ཉི་རོག་ཏེ་བ་ཀི་ ཕྱག་འཚལ་ཉི་ དཀོན་མཆོག་ག་ གསོལ་ཝ་ཏབ་ཉི་ ཐེ་རི་བ་རི་རང་ དཀོན་མཆོག་ ན་ཧ་པོང་ཀ་ བཞུགས་པ་ལ་དག་ཉི་ ཡེག༌པེ།
26ཡུང་ཟི་བ་ ཉི་ལ་ ཨ་ཤི་ཧང་ཡེག་པེ་ཡ། ན་ཧ་བ་ཏབ་ཐུར་ཛོ་མ་ཀབ་ཉི་ ཐུར་གི་མགུར་མ་ཕུལ་དུ་ ཐུར་གི་ཡེ་དུ་ ཉི་བཱརའ་སོ་ངོ་ཐུར་གི་ དཀོན་མཆོག་གི་ གེན་གནང་ཁཱན་ཀོར་གེ་ཡེག་ཏུ། ཉི་ཨོམ་ཐུར་གི་ མ་སེ་ཁཱན་ལོ་ཨ་ནེ་ལ་ ཐུར་གི་ཨོ་ཉ་ལོ་ག་ དེན་ཐ་ཁྲེ་ཉི་བི༌ལེ། དག་པ་ཀབ་ཉི་ ཨོ་ཐ་བ་ ཐམས་ཅན་རང་ ཆོས་ཚོགས་ ཤུག་ཅཱན་ཅོད་པེ་དེན་གེ་ ཨ་ལེ་ཁེ༌ལེ།
27ཨི་བི་གི་ མ་སེ་ཁཱན་ལོ་ཨ་ཝ་ཐུར་ ཟག་ནེ་ལ་ ཉིག་ཙིང་དང་སམ་ཤ་ ཨོ་ཕེ་ཁེ༌ལེ། ཉི་ཨུ་ཉུ་བུ་ ཐུར་ཆུ་མ་ཀབ་ཉི་ ཐུར་གི་ཨ་ལེ་ཁེ༌ལེ། ཉི་སོ་ངོ་ཐུར་གི་ ཨོ་ཉ་ག་དེན་ཐ་ ཁྲེ་བེ་ཁེ༌ལེ། 28དག་པ་ཀབ་ཉི་ དེན་ཐ་ཁྲེ་ཁཱན་མ་ནེ་ལ་ ཨོ་ཉ་སོ་ངོ་ ཆོས་ཚོགས་ནང་ཀ་ ཙང་ཀེན་ཆོ་ལེ་ཁེ༌ལེ། ཉི་རོག་ཏེན་དང་ དཀོན་མཆོག་ཀབ་ཉི་ ཆཱས་ཨན་ཆེན།
29ཉིག་ཙིང་དང་སམ་གི་ ལུང་བསྟན་མ་ཀབ་ཉི་ བཱརའ་ལུང་བསྟན་པ་བ་ཀི་ཉཱན་ཐཱན་ རྒྱུགས་ལ་ལེ་ཁེ༌ལེ། 30ཉི་ར་ག་ལང་ཁཱན་ ཐུར་ག་ཏཱན་ དཀོན་མཆོག་གི་ ཧང་ཐུར་གསུངས་ནེ་ལ་ ལུང་བསྟན་ཁཱན་ ལུང་བསྟན་པ་ཁེ་པ་ ནོང་མེ་ཁེ༌ལེ། 31ཧང་ཡ་དག་ནེ་ལ་ ནའི་ཐམས་ཅན་གི་ ཐུར་རེ་ཐུར་རེ་ཨ་ཉི་ ལུང་བསྟན་མེ་ཁེ༌ལེ། ཉི་ཤ་ ནའི་ཐམས་ཅན་གི་ ལམ་པེ་རེ༌བེ། ཉི་ནའི་ཐམས་ཅན་ག་ སེམས་གསོ་ཨ༌ལེ། 32ལུང་བསྟན་པ་བ་ཀ་ རྣམ་ཤེས་ཤོ་ ལུང་བསྟན་ཁཱན་བ་ཀི་ཙུང་ཉི་ ཐ་ལེ་རེ་བེ་ཁེ༌ལེ། 33ཧང་ཡ་དག་ནེ་ལ་ དཀོན་མཆོག་ཤོ་ ངང་པེ་རི་ཁཱན་ དཀོན་མཆོག་མང་གི་ཝ་ བཱརའ་ཆོས་ཚོགས་བ་ཀ་ གནང་མ་པུརུས་ཀིན་ཨ་ཉི་ སྐྱིད་པུ་གནང་ཁཱན་ དཀོན་མཆོག་གི༌ལ།
34མེ་ཝག་ཙ་བ་ཤོ་ ཆོས་ཚོགས་ནང་ཀ་ ཙང་ཀེན་ཆོ་ལེ་ཁེ༌ལེ། རོག་ཏེ་བ་ ཆཱས་ཨ་ལེ་མ་ཆོག༌པ། དག་པ་ཀབ་ཉི་ བཀའ་ཁྲིམས་གེ་ ཤོ་ཝ་དང་ཏུ་ཉི་ རོག་ཏེ་བ་ཤོ་ ཕརའ་ཁེ་ཨ་ཉི་ ཆོ་ལེ་ཁེ༌ལེ། 35རོག་ཏེ་བ་ཀི་ ཧང་ཐུར་ཇི་མེ་ཏེ་ཆོ་ནེ་ལ་ ཕའི་ག་རང་རང་ས་ ཕེ་ཝག་ཙ་ག་ ཇི་མེ་ཁེ༌ལེ། ཧང་ཡ་དག་ནེ་ལ་ ཆོས་ཚོགས་ཛོ་མ་ཀབ་ཉི་ མེ་ཝག་ཙ་གི་ ཆཱས་ཨ་ལེ་ཅེམ་པུ་མཱན༌ཅ།
36ཧང་དཀོན་མཆོག་ག་གསུང་ ན་ཧ་བ་ཀེ་ཨ་ཉི་ གོ་ཙུག་པ་སྨོ། ཨུ་ཉུ་མ་ནེ་ལ་ དཀོན་མཆོག་ག་ གསུང་ཉོང་ཁཱན་སོ་ངོ་ ན་ཧ་བ་ཤ་གི་ལ་སྨོ། 37ཨི་བི་གི་ རོག་ལུང་བསྟན་པ་གི་ལ་ ཨུ་ཉུ་མ་ནེ་ལ་ ཐུགས་ཉིད་ག་ཅ་དག་ཉི་ མི་ཝ་ཐུར་ ཇི་གི་འབྲི་ཁཱན་ཁེ་པ་ གཙོ་བོ་ག་བཀའ་གི་ལ་ཨ་ཉི་ ཨོ་ཉ་སོ་ངོ་གི་ སེ་ལེ་ཁེ༌ལེ། 38ཉི་ཨི་བི་གི་ ཨོ་ཐ་ཆཱས་མ་ཉཱན་པ་ཐུར་ ཨོ་ཉ་སོ་ངོ་ག་ཆཱས་བུ་ ཨི་བི་གི་རང་མ་ཉཱན༌པ།
39ཨོ་ཉི་ཨ་དེན་གེ་ ཇ་ག་ཡུང་ཟི་བ་ ལུང་བསྟན་མེ་ག་རང་ སེམས་ཨའི། དག་པ་ཀབ་ཉི་ མ་སེ་ཁཱན་ལོ་ཨ་ལ་ཀབ་ཉི་ མ་ཁག༌ཅོ། 40དག་པ་ཀབ་ཉི་ ཧང་རང་གི་ནེ་བུ་ ལེག་པུ་ཨ་ཉི་ ཨ་ལེ་ཁེ༌ལེ། ཉི་གོ་རིམ་བཞིན་དུ་ཨ་ཉི་ ཨ་ལེ་ཁེ༌ལེ༎
ទើបបានជ្រើសរើសហើយ៖
དང་པ་ཀོ་རིན་ཐི། 14: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved