Markus 4
4
Isus At Fafaskudanan sa sik Tagfangukasan Fare
(Mat. 13:1-9; Lukas 8:4-8)
1Ay Isus gdog yay gfoyung sis tigyangan lino. Ay sik ngay taw ayuwayu maful anya. Ay nu katanya, Isus nasakbo yay sasad balutu ay malunggung sanya. Ay ngay taw si ways tigyangan lino. 2Ay Isus gfoyung sanya fag ngay taw ngayuk fafaskudanan. Kanya nalong te, 3“Dungugani! Ebi e sik taw nu gtanum fare gfangukasan. 4Ay nu gfangukasan wan, at tiba ntong sa sangaba day dalan, ay sik ngay manuk tungud indasug ay nasinduk wan. 5Ay at tiba ntong sas wa batu at yud bangan e daga, ay mafali tuwa nu natugbung, teway mayangfis wayay at daga sanya. 6Ay at menit nu nkabat wan, inlangke ay nyango wan, teway wa ngabasad at lalid. 7Ay at tiba ntong sas wa madugi. Ay at madugi ndaul yangay ay nafaut at ngay fare, ay wa nabuwadan. 8Ay at tiba ntong sat masine fag daga, ay natugbung ay nabuwadan tuwa. At tibak buwadan kasakan tuwa, ay at tiba ngayu bangan, ay at tiba ngayu tuwa dawdaw.” 9Ay Isus nalong yay te, “Nu nadungug tuwam amatangani tuwa!”
Taw ro Isus at Fagfafaskudanun nu Gfoyung?
(Mat. 13:10-17; Lukas 8:9-10)
10At ngayu daw noli wan. Ay e sawad yay sirut anggan Isus at Nasugu fag Labi Duwa. Ay kanya nainto sas Isus sa aro at fafaskudanan at masuwad. 11Ay Isus nalong te, “Sa ayu, nafon tuwa ayu ay fagsafulun te, laman sumaful am at masuksukan sa baliwas Diyus nu gmagurang taw. Ay sa tibak taw nu gfoyung, sik fafaskudanan wadi, 12laman kanya fag ngay taw,
‘Dewa glinggat, wa glag.
Ay dewa gdungug, wa gtogdungug.
Satu nu gdi katanya, umfoli yay sas Diyus, ay gfalyam yay at asalanan.’#4:12 Isayas 6:9-10.”
Isus Nafoyung at Fafaskudanan at Masuwad
(Mat. 13:18-23; Lukas 8:11-15)
13Ay Isus nainto sa ka fag ngay taw te, “Go wam nasaful aro ku fafaskudanan? Nu dway am nasaful katanya, tain ban nu sumaful am tibak fafaskudanan? 14At nafangukasan fag ngay fare kata wa Diyus at longan. 15Ay at kintong sangaba day dalan kata sik ngay taw gdungugan Diyus at longan. Ay Satanas nu ndasug wan nabul ka fag longan siginan ka fag ngay taw at amatanganan. 16Ay at kintong sas wa batu kata sik ngay taw gdungugan Diyus at longan ay mafali tuwa nu gafanud ay guseganan, 17ay roro ya matvngvd sat amatanganan. Ay nu ndasug wan sik ngay mataka ay sik ngay faurianan at nadungugan Diyus at longan, nalyam way sigad at fagafanudun. 18Ay at kintong sas wa makmak madugi kata sik ngay taw gdungugan Diyus at longan. 19Ay roro matvngvd wayay ka fag ngay taw at fagafanawaun ste swa daga. Ay at fagamatanganun sa way at fagmabalanun. Ay anggan at fakaumsigun sat ngay nanuranan. Nu katanya, kata wa nu nafautan at nadungug at longan sat amatanganan. Ay wa nabuwadan. 20Ay at tiba at kintong sat masine fag daga kata sik ngay taw at nadungug Diyus at longan, ay natogdungug tuwa ay matvngvd nu gafanud. Ay nu katanya, e ngay buwadan tuwa. At tibak buwadan kasakan tuwa, ay at tiba ngayu bangan, ay at tiba ngayu tuwa dawdaw.”
Isus At Fafaskudanan sa sik Salung at Masukluban
(Lukas 8:16-18)
21Ay Isus nainto yangay ka fag ngay taw te, “Go sik taw dewa nasulsul at salung, nansuklub way ay ate nanfatungkud sat daga fagtiyugan? Yaya! Sik taw fagsulsulun at salung, nanfatsa tuwas fagfasayugan. 22Nus nge wain at nafafaliyu, we yud umsure. Ay nus nge wain at nasuksuk, we yud sumasad mayamag. 23Nu nadungug tuwam amatangani tuwa!” 24Ay Isus nalong yangay te, “Amatangani ay asafuli ay nadungug. Nus nga seyu ay nafon, kayu yangay ban anya nu e mon ayu, ay e famut yay. 25Anway sik taw nu e kwa tuwa, gfamut yay ban. Ay sik taw nu dway e kwa, nu alay way, e mul wa ban siginan anya.”
Isus At Fafaskudanan sa sik Fare at Natugbung
26Ay Isus nalong yangay sa ka fag ngay taw te, “Diyus nu gmagurang taw kata yangay sa sik taw at nafangukasan at fare sat gamasun. 27Ay gina nyabi, ka fag taw gtiyug yay. Ay gina nmenit, igfatunglus yay sa tibak fagbulun. Ay ginanya fag ngay menit at fare gtugbung wan ay inkabat wan. Ay wa nasaful te, tain at tanum nu gtugbung ay nu kaabat. 28At daga nafatugbung at fare. Ay inkabat wan. Ay bandi gfangkagud wan. Ay bandi ntaba wan. 29Ay ka fag taw gani wan teway indasug wan at famulan.”
Isus At Fafaskudanan sa sik Butul Mustasa
(Mat. 13:31-32; Lukas 13:18-19)
30Ay Isus nalong yangay te, “Tain ro nu gfafaskudanan tam Diyus nu gmagurang taw? Ay tain tam fafaskudanan laman ro tuy mayamag? 31Diyus nu gmagurang taw kata yangay sa sik butul mustasa. Ka fag butul kanya wan tiba daga fag butul. 32Ay dewa katanya, nu natanum wan, natugbung ay inkabat. Ay bandi nalabi yay fiya fiya tibak gulayan. Ay gbiya at sanga. Ay ngay manuk tungud kasubuk tuwa ay sak tuwa gfugad sat ngay sanga.”
33Ngayu Isus nu gfafaskudanan katanya, gina gfoyung Diyus at longan sa sangay taw. Ay nu gfoyung gfatugan way at taw nu sumaful. 34Ay faggugat Isus nu gfoyung sa sangay taw, igfafaskudanan way. Ay sa long at ngay tagadal, Isus nafayamag tuwa anggan at masuwad.
Isus Nafatuwas sik Mabitsug fag Tagmara
(Mat. 8:23-27; Lukas 8:22-25)
35Ay ginanya fag menit nu nfalyu wan, Isus nalong sat ngay tagadal te, “Bastam. Gdife watam lino.” 36Ay at ngay tagadal naubun at ngay taw ay nasakay sas Isus at fagsakayan fag balutu. Ay gina glo, e ngay balutu yangay fasfuwan anya. 37Ay rodi gina sa sangaba lino, indasug sik mabitsug fag tagmara. Ay at lumbak kafalang wayu daw sa at balutu. Ay arvs at safa gakapnuun sasad balutu. 38Ay Isus gtiyug way gtangilan sas faguyanan baliwa fag fungfung. Ay at ngay tagadal gfanguwig Isus te, “Takamoyung, go wo gafanawa te, umkafuy wa ro tam?” 39Ay Isus infulo, ay nasalag sas tagmara ay sas lumbak te, “Atuwasi wan!” Ay at tagmara gfaning anya ay anggan at lumbak. 40Ay rodi tv Isus nalong sat ngay tagadal te, “Taw ro ay fakalimuun? Go yam e fagafanudun sa angku?” 41Ay at ngay tagadal kalimu gfanlinggatanan, ay igsulitanan sit dayu te, “Sinu tuy fag taw takatvngvd anya at fagbulun? Madyay dewa at tagmara ay at lumbak igfaning tuwa at longan?”
ទើបបានជ្រើសរើសហើយ៖
Markus 4: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines