Markus 3
3
Isus Nafafiya sik Ama at yud Mafalelegan at Take
(Mat. 12:9-14; Lukas 6:6-11)
1Ay Isus gdog yay nasakbo sa sangay taw Udyu at bale fakafulan. Ay sanya e sik ama at yud mafalelegan at take. 2Ay taw Parisiyu gulit dawdaw Isus te, go gfafiya ro ka fag ama dewa Fakamatoun fag Menit. Fakatanyaun, anway kaumsig nu e foyungan sa tibak taw te, Isus long e asalanan. 3Ay Isus nalong sa ka fag ama at yud mafalelegan at take te, “Stiyei wan sfagunan.” 4Ay Isus nainto sa sangay taw Parisiyu te, “Inday fag fagbulun tagfaning Muisis at Suguwan sis Fakamatoun fag Menit? Go nanfagbulun masine ay ate at mauri? Ay go nanfalangfe sik taw ay ate nanfate?” Ay ka fag ngay taw wa gbalus. 5Ay Isus kadotama nu glinggat sanya fag ngay taw, ay dewa katanya, kabalu way sit amatanganan, anway ka fag ngay taw gfaning way gugat at fasadan mandi. Ay Isus nalong sa ka fag ama te, “Falugdei am take.” Ay nafalugde wa fiya at take ay infiya wan. 6Ay ka fag taw Parisiyu nalo wan. Ay nanfasulitanan wa sa sangay tagseg fun Erudes te, “Tain tam fagbulun ban laman gfate tam Isus?”
Isus Nafoyung sa sik ngay Taw sas Tigyangan Lino
7Ay Isus ay at ngay tagadal nalo wa sas tigyangan lino. Ay ngayuk taw at naalo anya siginans talun Galiliya, ay siginans talun Udiya, 8ay siginans fulan Erusalem, ay siginans talun Idumiya, ay siginans dife Safa Urdan, ay siginans tagsafungan fulan Tiru ay fulan Sidun. Ka fag ngay taw at fagnaaloun ayuwayu teway nadungug ebi ataw Isus at fagbulun. 9Ay Isus nasugu sat ngay tagadal te, “Famasadani sik balutu laman takadasug fag ngay taw di fiya fiya magit sa angku.” 10Fakatanyaun, ngayu wan ebi Isus at nafafiya, ay katsi fagayu at ke daylan gtudtuludan nantayuk Isus. 11Ay at ke ngay mafurat fag falad nu nalag Isus, natudan inlub sa at akbang ay guro te, “O wan Diyus at Baguwama!” 12Ay Isus matvngvd nu gsalag at ke ngay mafurat fag falad te, lag gfoyung te, sinu aw.
Isus Nafili At Nasugu fag Labi Duwa
(Mat. 10:1-4; Lukas 6:12-16)
13Ay Isus nalo wa sas tungud muyud ay nataban at fagfiliun fag ngay taw. Ay kanya nkakbang sas Isus. 14Ay labi duwak taw Isus at nafili. At fagnafiliun, laman nangufud ban anya ay laman nansugu ban anya te, foyungi sa sangay taw at Masine fag Barita. Isus nafangayan ka fag fulan taw te, at Nasugu fag Labi Duwa. 15Ay nafon anya fagmadaragangun laman mafaayan at mafurat fag ngay falad siginans taw. 16Ay tuy Isus at labi duwak tagadal at ngayan: Simun (Isus nafangayan yay te, Pedru), 17ay dugsay Santiagu ay Uan (Sebidiyu at baguwama fag duwa. Ay Isus nafangayan yay ka fag dugsay te, Buanerges, at masuwad te, talafun at ngay unga), 18ay Andres, ay Filipi, ay Bartulume, ay Matiyu, ay Tumas, ay Santiagu (Santiagu tama Alfiu), ay Tadyu, ay Simun (kanya kaumsig dawdaw taw Israel nu kasaman siginans taw Ruma), 19ay Udas Iskaryute. Udas at namoyung ban Isus sas mauri fag ngay taw.
Isus ay Satanas
(Mat. 12:22-32; Lukas 11:14-23; 12:10)
20Ay Isus nu noli wa sa sik bale, sik ngay taw gdog yay maful sas Isus. Ay katanya wayay, Isus ay at ngay tagadal wa mafafangon. 21Ay Isus at kalongan nu nasaful katanya, kanya nkakbang sas Isus ay nantaban sat dayu. Fakatanyaun tibak taw nalong te, “Isus kalyam at amatanganan.”
22Ay sik ngay tagfoyung Muisis at Suguwan indasug siginans Erusalem ay nalong te, “Satanas, at mafurat fag ngay falad at fun, kanya wan tagmagurang Isus. Ay Isus fagmafaayanun at mafurat fag ngay falad, at fagmadaragangun siginan ways Satanas.” 23Ay Isus nagewan sa anya ngay taw ay nafafaskudanan ay glong te, “Setain ro Satanas nu gayan anya mandi? 24Sa sik fagmagurangan at ngay taw nu dway e fagmasadiun ay garingangan way gugat, ka fag fagmagurangan malyam wan. 25Katanya yangay sa sik talafuwan. 26Satanas ay at ngay taw nu dway e fagmasadiun ay garingangan way gugat, at fagmagurangan malyam wan ay intabu wan.
27“Sik takamul wa maasakbo sa sik madaragang fag taw at bale laman nanfamul at nanuranan, nu yap ngay nasiyuk ka fag taw at madaragang. Ay nu nasiyuk tuwa, mafafamul wa long at nanuranan.
28“Matuyan iglong kwa ayu te, fagayu taw at asalanan mafafalyam tuwa. Ay anggan nus nge wain taw at mauri fag longan sas Diyus baliwa mafafalyam yangay. 29Ay roro nus nga sinu at nalong mauri sa at Masine fag Falad baliwa, kanya wa mafafalyam faggugat. Kanya fag taw e asalanan way faggugat.” 30Fakatanyaun Isus at longan, anway at ngay tagfoyung Muisis at Suguwan nalong te, “Isus e mafurat way fag falad.”
Isus At Tina ay At ngay Fadugsay
(Mat. 12:46-50; Lukas 8:19-21)
31Ay Isus at tina ay at ngay fadugsay indasug wan. Ay gina malindug sis day bale nasugu te, “Longi sas Isus te, ste ami.” 32Ay ngayuk taw at malunggung gsafungan Isus, ay nalong sas Isus te, “Snay sday bale am mina ay am ngay fadugsay, gyalagun emu.” 33Ay Isus nalong te, “Sinu ku mina ay ku ngay fadugsay?” 34Ay Isus glinggat sat malunggung tagsafungan anya ay nalong te, “Nin, ku mina wan ay ku ngay fadugsay wan! 35Anway nus nga sinu tagfaning sas Diyus at fakaumsigun, kanya wan ku ngay fadugsay ay ku mina.”
ទើបបានជ្រើសរើសហើយ៖
Markus 3: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines