Markus 5
5
Isus Nafafiya sik Ama at ke ngay Mafurat fag Falad
(Mat. 8:28-34; Lukas 8:26-39)
1Ay Isus ay at ngay tagadal indasug sas dife Lino Galiliya, sas taw Gerasa at talun. 2Ay Isus nu ndaga wa siginans balutu, sik ama nafablang way sigad anya. Ka fag ama siginan sa sangay faglibingan ay e ngay mafurat fag falad, 3ay sanya wan nu gbanwan. Ay we mafasiyuk anya, dewa kadina. 4Ebi ngayu ginan wan tibak taw nu gkadina at bitis ay at take, ay nafanlifungan wan. Ay we taw mafafatawad anya. 5Kayu menit ay kayu yabi, ka fag ama guro way sa sangay faglibingan ay sa sangay muyud. Ay anggan gfe fakarukan anya mandi batu.
6Ay dewa ngayayu ka fag ama nabantay wa Isus. Ay mafali nu nkakbang ay igseg anya. 7-8Ay Isus nalong sa ka fag mafurat fag falad te, “Alfasi wan sanya ginan fag ama.” Ay gbiya dawdaw ka fag ama nu gelongan te, “Taw ro am fagsalagun angku, Isus, Tiba Tungud fag Diyus at Baguwama? Matvngvd nu glong aw emu sas Diyus at ngayan te, lag gfauri angku.” 9Ay Isus ginto te, “Sinu am ngayan?” Ay kanya nabalus te, “Ku ngayan, Tagngayu, anway ngayu ami.” 10Ay matvngvd nu glong sas Isus te, “Lag gfalo emi ste ginan fag talun.”
11Ay sanya e sik ngay butan gfangudkudan si sangaba tubi. 12Ay matvngvd ka fag ngay mafurat fag falad nu glong sas Isus te, “Afanyui yap emi. Fasakboi yap emi sa sangay butan.” 13Ay Isus nafaning at fagetun. Ay ka fag ngay mafurat fag falad nalfas wa fiya. Ay natsa wa sa ngay butan, nu ndain fagayu 2,000k butan. Ay ka fag ngay butan nafantarungan wan, ay taba wa ntong sasad abat, ay inkafuy wa sasad lino.
14Ay at ngay tagtanud butan nafantarungan sas fulan ay sa sangay fulan sirut laman nanfamansulit at nalag. Ay nu katanya, ngayuk taw indasug sas Isus laman nanlag te, taw katanya. 15Ay ka fag ngay taw inkakbang sas Isus. Ay nalag aro fag ama at ke ngay mafurat fag falad. Kanya malunggung tuwa, ay gbalukasan, ay masine wan at amatanganan. Ay ka fag ngay taw kalimu yay daw glag anya. 16Ay ka fag ngay taw at nalag at kin-gurungan sanya fag ama ay sanya fag ngay butan nafamansulit sa sangay taw. 17Nu katanya, at ngay tagdungug sanya, matvngvd nu get sas Isus te, “Loi wan siginan em fulan.” 18Ay gina Isus gsakbo sasad balutu, aro fag ama at ke ngay mafurat fag falad matvngvd nu get sas Isus te, “Galo kwemu.” 19Ay Isus igsalag way anya te, “Lagi. Ulii way sa am kalongan ay famansuliti sa anya tam Fun at nafagbulun sa emu ay anggan at fakafanyuun sa emu.”
20Ay ka fag ama nalo wan ay nafamansulit wa fiya sa sik fulan at ngayan Dekapulis, aro ataw Isus at nafagbulun sa anya. Ay at ngay tagdungug nadulawan dawdaw.
Isus Nafafiya sik Mangena ay Nafaleleg sik Baguyna at Matean
(Mat. 9:18-26; Lukas 8:40-56)
21Isus gdog yay nasakay sa sik balutu ay infoli sas dife lino. Ay gina sis tigyangan lino, sik ngay taw insafung anya. 22Ay rodi Ayru ndasug, sik tagmagurang sa sangay taw Udyu at bale fakafulan. Ay nu nalag Isus, namalub sat akbang ay gseg. 23Ay matvngvd nu glong sas Isus te, “Ku baguyna gakateun wan. Adasugi ngay ro sa ku bale ay fatayuki am daluwap sa anya umfiya yay ro ay gleleg yay.” 24Ay Isus naalo wa fiya anya. Ay sik ngay taw ayuwayu galo Isus ay gtudtuludan, ay Isus gagitan wan. 25Ay sanya e sik mangena labi duwak banwa wan nu gyud batang katuwas nu gfangigusan. 26Ay mason wan nu gatakan. Dewa ngayu at naanu anya, ay dewa nafamin at nanuranan, wa nfiya. Fangkabat inkugat way baliwa. 27Ay ka fag mangena ebi nadungug tibak taw nu glong sa baliwas Isus at fagbulun. Ay nu katanya, gfabulun wan dewa magit laman fated Isus at balukas. 28Anway gamatangan te, “Dewa kro sirut tumed at balukas, umfiya kwa ro.” 29Ay nu nated wan, intuwas wan nu gfangigusan. Ay nu gamatang anya infiya wan. 30Ay Isus nasaful te, at fagmadaragangun nalfas siginan anya. Ay rodi tv Isus inbiling sa tiba baliwa ay ginto te, “Sinu at nated ku balukas?” 31Ay at ngay tagadal nabalus Isus te, “Nalag wo te ngayuk taw tagtudtuludan ay gagitan wo. Taw am fagintoun emi te, ‘Sinu at nated angku?’ ” 32Ay Isus gfatunglus yay nu glingaman te, “Sinu at nated angku?” 33Ay ka fag ina namatang tuway anya te, infiya wan. Ay kanya kudkulugan kalimu nkakbang sas Isus. Ay inlub sas Isus akbang ay gseg. Ay nafoyung at matuyan fagayu. 34Ay Isus nalong anya te, “Sena, am faginfiyaun teway gafanud tuwo. Loi wa mabayan teway infiya wo.”
35Ay kaduge Isus gelongan, sik ngay taw indasug siginan Ayru at bale. Ay nafoyung Ayru te, “Inkate wan am baguyna, lag gfasalag tam takamoyung.” 36Isus wa nasalagan tibak taw longan, ay nalong sas Ayru te, “Lag kalimu. Afanudi way.” 37Ay Isus igsalag ka fag ngay taw nu nangalo anya, dasday Pedru, ay dugsay Santiagu ay Uan. 38Ay Isus ay at ngay ufud nu ndasug sas Aryu bale, Isus nalag sik ngay taw nu gfanguywayan ay garingang ayuwayu. 39Ay Isus nasakbo sad bale, ay nalong te, “Nataw ay fagaringangun ayuwayu ay ay faguywayun? At baguyna di nkate. Gtiyug wadi!” 40Ay ka fag ngay taw kase gafayudun Isus. Ay Isus nafalaklo fagayu taw siginan sad bale, dasday ka fag baguyna tama ay anggan at tina, ay anggan aro ataw Isus at ngay ufud. 41Ay Isus nated ka fag baguyna at daluwap, ay nalong te, “Talita koum,” at masuwad te, “Nining, alunggungi.” 42Ay ka fag baguyna nlindug way sigad ay glodlowan tuwa. (Ay at banwa anwa 12.) Ay at ngay taw nadulawan dawdaw. 43Ay Isus matvngvd nu gsalag sanya fag ngay taw te, “Lag yap gfoyung sa tibak taw ku nafagbulun katsi.” Ay Isus nasugu te, “Fafangoni anya.”
ទើបបានជ្រើសរើសហើយ៖
Markus 5: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines