Fagsigadan 42
42
Use nu Gfasaful sat ngay Kaka te Mauri way Ebi at Nafagbulun
1-2Ay Akub nadungug te, ngayu yay at fakonun sas talun Iptu. Ay Akub nu nasaful, nalong sa at ngay baguwama te, “Sisiyan am, ngayu yay unu at fakonun sas talun Iptu. Taw yay am gugat sanya? Loi wan! Nanbili wam laman di tam umkate.”
3Ay Akub at ngay baguwama at safulu glo wa sanya ginans talun Kanaan, nanbili fakonun sas talun Iptu. 4Ay ginanya, at tama wa nafaalo Benamin, Use at ariyan, teway goyan te, labon e umgurungan mauri sa anya.
5Ay Akub baguwama at safulu kaduge glo, ngayu yangay at faygaluwan fag ngay taw Kanaan, at nanbili yangay fakonun sas talun Iptu, teway kanya sigon kalunus wa dawdaw. Ay kanya fagayu nu ndasug was talun Iptu, nanlag wa sas tagfabili fakonun. Ay nanbili wan.
6Ay roro ginanya, Use wan tagmagurang sis talun Iptu ay kanya wan tagfabili fakonun sas fagayu taw. Ay Akub ngay baguwama nu nalag ka fag tagmagurang tagfabili fakonun, kanya fagayu natudan ay namalub sit daga salubangan, sik famasaful te, igfababaun. 7-8Ay wa natoglag te, kanya at ariyan wa mangaro gugat Use. Ay roro ka fag tagmagurang natoglag wa te kanya at ngay kaka wan. Ay dewa katanya, wa nafatoglagan anya te kanya wan at ariyan Use. Fangkabat malimu way nu gelongan, nu ginto te, “Daginan am?” Ay at ngay kaka gbalus te, “Siginan amis talun Kanaan. Em fagnaloun stiye, nanbili ami em fakonun.” 9Ay Use namatang ebi at taginfanan sa baliwa at ngay fadugsay,#42:9 Use at taginfanan at masuwad, Use ban sik fun, ay at ngay fadugsay sumeg ban anya. Tapi Fagsigadan 37:2-11. ay nalong te, “Sek yaya long! Ay fagnaloun stiye, nanlingaman way long am em talun te go inda fag lungud at yud e gbalabag, ay nanfoyung ban am sa em ngay fabarangyan te sanya.”
10-11Ay at ngay kaka nabalus te, “Yaya! Sik dugsayan way ami. Di ami e fasadanan nanlingaman ay talun. Em fagnaloun stiye, nanbili way ami fakonun. Fagayu em longan wami gfanlamangan. Katanya wa fiya.” 12Ay Use gbalus te, “Kwa long gafanud katanya ay longan! Nanlingaman way long am fiya em talun, ay bandi nanfamansulit am sa em ngay fabarangyan nus nga setaw ay nalag ste ginan.” 13Ay kanya fagayu nabalus te, “Yaya, sik dugsayan way long ami. Nu fagayu wami dugsayan, satu labi duwa tuwami. Anway te, at sadi, em fuyu, sa yay em tama, sa em fulan, ay at sadi, nalyam wan.”
14Ay Use nalong te, “Yaya long, kwa gafanud. Nanlingaman wa long am fiya em talun. 15-16Ay kin nu gdi, laman nu matuyan wa fiya nu gelongan am, am at sadi ulii wan. Ay tabani wa stiye ay fuyu. Ay kadugenya, am at sawad fagayu sumungsung kyay iste, yap ngay ay fuyu indasug. Ay nu lumag aktuwa ay fuyu, gafanud kwa long te matuyan wa ngaro fiya nu gelongan am. Ay roro nu dway am fafataban stiye ay fuyu, gtungul wa fiya ku longan aro te, nanlingaman wam ngani fiya em talun! Mafanud wa fiya kanya ku longan. Nus nga setvngvd nu madaragang at fun daul ste fag talun, ku elongan nu mafanud, katvngvd yangay anya.”#42:15-16 Ebi, taw Ebriyu at ugali nu gfatvngvd at elongan, gdalan at fun ngayan ate at fagsegan ngayan. Kanya at famasaful tibak taw te kanya gurunganan wa fiya at elongan. 17Ay Use nafasungsung yay at ngay kaka tuluk menit.
18Ay nut si was fatuluk menit, Use nalong sat ngay kaka te, “Katsi dungugani ku longan ayu, ay nu nafaning tuwam, dakdi gfate ayu, teway intuyan kyangay kata ayu te Diyus madaragang. 19Laman nu matuyan wa ro fiya ay ngay longan, am at sadi afamatoi yap ste. Ay am tiba loi wan, ubai wa ay ba fakonun sa ay fulan laman ay fon ay kalongan. Kalunus wa ro. 20Ay bandi, afolii yap istiye ay tabani ay fuyu. Ay nu lumag aktuwa ban anya, sumaful aw te, matuyan wa fiya ay ngay longan. Ay nu katanya, dakdi ban gfate ayu.”
Ay at ngay kaka nabalus te, “Kin, nanfaning wami am longan.” 21Ay kanya igsulitanan ayuwayu te, “Katsi long ngani tam Diyus gfafoli wa long sa antam ebi tam nafagbulun sa tam ariyan. Ebi glag watam anya nu gatakan, ay kanya guro antam te, ‘Tarabangi angku!’ ay wa tam infanyu anya. Ay katsi, itam yangay tagatakan.” 22Ay Rubin nalong te, “Ebi ngani nalong kwa ayu te, ‘Lag fauri tam ariyan,’ ay wamay nafaning ku longan, katsi ngani tam Diyus gfafoli wa sa antam.” 23Ay Use at ngay kaka nu gfasad, at nafasungsung anya fag tagmagurang wa gtogdungug sisiyan fanlong, madyay nu gelongan, taw Iptu way fanlong, ay e sadi yak taw tagfayamag ka fag tagmagurang at longan. 24Ay roro Use gtogdungug way. Ay kanya nu nadungug sisiyan nu gsulitanan, nalo yay sirut sa at dayu. Ay roro sanya guyway. Ay rodi daw infoli yangay sat ngay kaka ay nafasaman Simyun. Ay nasugu at fanuguwan te, “Siyuki anya!” Ay tiba sisiyan gulit yay gina gsiyuk Simyun. Ay kanya wan takafamato.
25Ay rodi Use nasugu at ngay fanuguwan te, “Katsi nansuwad wam ka fag ngay taw ba fakonun sat ngay saku. Fapnui tuwa. Ay suwadi yangay sanya ka fag ngay taw at fasad fansali. Ay foni yangay at fakonun sa sangaba dalan.” Ay at ngay fanuguwan nafaning wa fiya at longan.
26Ay rodi, Use at ngay kaka nafauba wa at ngay ba fakonun sat ngay asnu ay nalo wan. 27Ay nu glo sangaba dalan, inke yabi yay. Ay igfamenitan yays day dalan. Ay at sadi nabuskad at ubanan laman nanfaon at asnu. Ay manlag di, sanya yay mangaro at fasad fansali, sit tungud ba fakonun. 28Ay kanya nu nalag te, sanya yay mangaro, nalong sat ngay fadugsay te, “E! Tuy yay daw ku fasad fansali! E nasuwad yay sa ku ubanan!” Ay at ngay fadugsay nu nadungug at longan, inlimu dawdaw ay ginto te, “Taw manga tam Diyus fakatanyaun at fagbulun sa antam?”
29Ay bandi, gina indasug sat fagbanwanan sis talun Kanaan, nafamansulit sat tama fagayu at nadalan, te, 30“E sik ama tagmagurang sis talun Iptu ay kanya glong way dawdaw emi te, em fagnaloun unu sanya, nanlingaman way ami sanya fag talun. Ay nanfamansulit unu ami sat fabarangyan bandi ataw em ngay nalag sanya ginan. 31-32Ay nabalus ami te, ‘Yaya! Sik dugsayan way ami. Wami e fasadanan nanlingaman ay talun. Em fagnaloun stiye, nanbili way ami fakonun. Fagayu em longan wami gfanlamangan. Katanya wa fiya. Nu fagayu wami dugsayan, satu labi duwa tuwami. Anway te, at sadi, em fuyu, sa yay em tama, sas talun Kanaan, ay at sadi, nalyam wan.’ 33Ay kanya fag tagmagurang nabalus emi te, ‘Laman ku fagsafulan te, matuyan wa fiya nu gelongan am, am at sadi afamatoi yap ste. Ay am tiba loi wan, ubai wa ay ba fakonun sa ay fulan laman ay fon ay kalongan. Kalunus wa ro. 34Ay bandi, afolii yap istiye. Ay tabani ay fuyu. Ay nu lumag aktuwa ban anya, sumaful aw te, matuyan wa fiya nu gelongan am ay di am ngaro nanlingaman em talun. Ay nu ntuyan kwan, igfauli kwan ay fadugsay sa ayu. Ay dewa ban am nangayayag nus nganday fag lungud stiye sa em talun, dakdi igsalag ayu.’ ”
35Ay rodi, gbuskad wa at ngay ubanan. Ay kadkad wa at ngay ba fakonun. Ay manlag di, sanya yay ngaro ayuwayu fagayu at fasad fansali. Masifigan yay. Ay talamian inlimu dawdaw.
36Ay at tama glong te, “Ebi nkate wa ngani ay fadugsay Use. Ay katsi wam nafafauli at sadi ay fadugsay. Ay gatabanun yay am ku fuyu. Nanfafamut way ro am ay nafalyam! Go wam saful te, gatakan kwa dawdaw?” 37Ay Rubin get at tama te, “Mama, faaloi wemi em fuyu gina ami glo. Lag gafanawa. Aw gulit kwa ban fiya laman muli wa fiya sa emu manabayan. Ay nu dakway nafafauli, fatei wa long ban ku baguwama fagduwa.” 38Ay at tama nabalus te, “Yaya. Kwa long gfaalo ayu ku Benamin teway kanya way ngani ku sena Rakel unga at sawad. At kaka ngani Use inkate wan. Kwa long gfaalo ayu, teway labon e mgurungan mauri sa anya sangaba dalan. Ay mafufuwama kwa ngani. Way ro am fafauli, katvngvdan nu kabalu aw, aw ngap mandi umkate kwan.”
ទើបបានជ្រើសរើសហើយ៖
Fagsigadan 42: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines