Fagsigadan 43
43
Use at ngay Fadugsay nu Kafoli sas Taw Iptu at Talun
1Ay bandi, inson yay nu malunus sanyas talun Kanaan. 2Ay namin wan Akub fag talafuwan at ba fakonun siginans talun Iptu. Nu katanya, Akub igsugu yay fiya at ngay baguwama te, “Katsi sisiyan am, nanbili yangay am fakonun. Dewa yud ro ngayu, nanbili wam.” 3Ay Uda gbalus te, “Yaya ngani mama. Tagmagurang sis talun Iptu ebi glong way emi te, ‘Wam lumag ku mata, way am gtaban ay fuyu.’ 4Ay katsi, nu gfaalo tuwo emi, glo wami nanbili fakonun. 5Ay way o igfaalo emi tam fuyu, wami glo, teway tagmagurang ebi nalong wa ngani emi te, ‘Wam lumag ku mata, way am gtaban ay fuyu.’ ”
6Ay Akub nabalus te, “Am way at fanlonganan katsi ku natakan, teway nafoyung way ngani amay sanya fag tagmagurang te sanya yay ay fuyu. Taw ngani ebi ay fagnanfoyungun?” 7Ay at ngay baguwama gbalus te, “Teway matvngvd dawdaw nu ginto emi sa baliwa tam talafuwan. Kanya fag tagmagurang ginto emi te, ‘Go e tama yay am? Ay go e fadugsay yay am?’ Ay nabalus wami te, ‘Kin yay,’ teway wami nasaful at fagalongunun at masuwad. Ay roro mangaro glong way te, ‘Fastiyei ay fuyu.’”
8Ay nu katanya, Uda nalong sat tama te, “Mama, tumaban wa ngani ami em fuyu ay lumo wami sas talun Iptu. Nanbili wami tam fakonun laman tam talafuwan di mkate. 9Lag gafanawa, aw gulit kwa ban fiya em fuyu laman muli wa fiya sa emu manabayan. Ay nu dakway nafafauli, fagngaba ban ku banwanan e asalanan kway. 10Satu ro, yaman o gugat falugo, duwa ginan wa romi kafoli!”
11Ay Akub nalong sa at ngay baguwama te, “Kin, nu katanya, loi wan. Ay bagu am lumo, buli yap tam ngay nalag at masine fiya fiya ste ginan tam talun: deut ay famabebanglu ay buwadan pistasyu ay buwadan almendru ay sik ngay gamut. Kanya fagayu suwadani sa ay ngay saku, laman e famaumsiganan tuwam sanya fag tagmagurang sis talun Iptu. 12Ay nu guba am ay fansali, falabii tuwa ebi ay ubanan ay fansali, laman ro sadik afud ay fansali ay at sadi ay fanfafoli kayu ebi at nasuwad sa ay ngay saku. Labon ebi at fanafafoliun ay fansali, naligbatan way. 13Ay katsi, loi wan, tabani wan ay ariyan, ay nanlag wam tagmagurang sas talun Iptu. 14Tam Tiba Tungud wa ban tagfamatanganan nangus anya laman umfanyu ayu ay faalo tuwa ayu ay fadugsay fagduwa, tam Simyun ay tam Benamin gina am guli. Ay roro nu dway nafaalo ayu, minfanudan kwa ban katanya.”
15Ay at ngay baguwama nauba at ngay famanyun ay nafaayu wa fiya nu guba at ngay fansali. Ay nalo wa sas talun Iptu gfaygaluwan Benamin. Ay nu ndasug wan, insure yangay sa ebi fag tagmagurang. 16Ay Use nu nalag Benamin ay anggan at ngay kaka, nasugu tagfangguna at ngay fanuguwan te, “Tabani sa em bale ka fag ngay taw. Ay fatei sik balan ay fatamai sik ngay fakonun laman rodi swa bilug menit nangasfuwan ami nanfangon.” 17Ay tagfangguna at ngay fanuguwan nataban wa fiya kanya fag dugsayan sas Use at bale.
18Ay kanya fag dugsayan kalimu te, “Taw ro manga at fagnatabanun antam sas tagmagurang at bale? Labon manga at fagnatabanun antam stiye, kalimata antam te, nauba yay tam ebi tam fasad fansali. Labon tumed wa daw antam ay mul wan tam ngay asnu ay nanfanuguwanan wa antam.” 19Ay gina sad sakbawan bale, igfasulitanan yay tagfangguna fanuguwan te, 20“Sama, agyap sirut. E fagalongun yay ami emu. Ebi ste ginan wami, nanansali ami fakonun. 21-22Ay gina ami guli, inke yabi yay ami, ay igfamenitan yay ami sis day dalan. Ay nabuskad ami em ngay ubanan, ay manlag di ami, em fasad fansali sanya yay mangaro si em tungud ba fakonun. Ay nu glag ami, kayu yay gugat ebi em fasad fansali. Ay wami nasaful te sinu at nasuwad. Ay katsi, tuy yay, igfafoli yay ami sa ayu. Ay em fagbulun fag ngay fakonun katsi ro, e fansali tuwami.”
23Ay tagfangguna fanuguwan nabalus te, “Yaya, lag kalimu. Ebi nabul kwa fiya ay ngay fansali. Am fag talamian ay fagsegan fag Diyus, kanya at nafafoli ay fansali sa ay ngay saku.” Ay tagfangguna fanuguwan nalo wan nanbul Simyun, ay nafaful sat ngay fadugsay. 24Ay rodi ataw nafasakbo wa fagayu sisiyan sad bale. Ay nafon mamam laman at famegus at darafa ay anggan nafon yangay at famaon at ngay asnu. 25Ay e nafoyung sas sisiyan te, “Em tagmagurang ro unu guli yay katsi ro swa bilug menit. Nangasfuwan yay am gfangon.” Ay kaduge yud kadasug, sisiyan kamasadan at fagananfonun sanya fag tagmagurang.
26Ay Use nu ndasug wan, tiba sisiyan gfon wan aro at nafamasadan at fagafonun ay natudan ay namalub sa at daga salubangan, sik famasaful te, gfababaun. 27Ay Use ginto te, “Go mabayan tuwam? Go gleleg yay ay tama ebi ay longan te mafufuwama wa dawdaw? Go mabayan tuwa kanya sigon?” 28Ay tiba sisiyan gbalus te, “Kin tuwa. Em tama gleleg yay ay mabayan tuwa.” Ay kanya fagayu namalub yay fiya.
29-30Ay Use nu nalag at fuyu glong sat iba sisiyan te, “E, go kanya wa ngaro ebi ay longan ay fuyu?” Ay kanya glong sas Benamin te, “Tam Diyus nangus tumarabang tuwa emu.” Ay roro ginanya gauywayun dawdaw teway kanya fagduwa sadi tuwat tina, ay siginan wa ebi ataw aba, Use kabalu dawdaw at Benamin. Ay wa ay mabaris, natarung yay sat fagtiyugan ay sanya yay nu guyway. 31Ay rodi, nafegus yay at mata ay infoli wa sat iba sisiyan. Ay dewa gauywayun, gfabarisun wan. Ay nasugu at ngay fanuguwan te, “Katsi nanbul wam em fakonun.”
32Ay nu gafangonun wan, Use way sesadi si sadik fagfangonan. Ay tiba sisiyan masaman yangay at fagfangonan. Anggan at ngay taw Iptu tagfasfuwan gfangon sanya, saman yangay at fagfangonan teway sisiyan sik ngay taw Ebriyu, ay taw Iptu kafurat way maful taw Ebriyu nu gfangon.#43:32 Ebi, taw Iptu kafurat way maful taw Ebriyu nu gfangon teway taw Ebriyu kon way taw Iptu at fagyudun kon fag fakonun. 33Ay Use nu gfalunggung at iba sisiyan, nafataban tuwa siginant turungana anggan wa sat fuyu. Ay at iba sisiyan igfanlinggatanan teway gaylatan te, “Taw ro fakatanyaun nu gfalunggung antam?” 34Ay Use nafauba sas sik taw sik ngay fakonun siginan anya at fagfangonan ay nafosuk sat iba sisiyan. Ay nu gfon, sadi sadik afud ay sis Benamin lima tuwak afud. Ay nu katanya, kanya fag ngay sisiyan nafasfuwan Use nu gfangon. Ay sisiyan nafangugat wan nu kon ay nu ginum.
ទើបបានជ្រើសរើសហើយ៖
Fagsigadan 43: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines