Fagsigadan 41
41
Diyus Amasafulan yap Ste Swa Daga fag ngay Taw
1Ay nu nlangfe wa duwak banwa, taw Iptu at fun daul nataginfanan. Nu gfasad, kanya malindug sis day Safa Nilu. 2Ay nalag fituk baka nu kasure siginan sad safa. Ay igfansabsaban sanyas tigyangan. Ay ka fag ngay baka masine. Ay mataglu tuwa. 3Ay rodi daw, e nsure yangay fiya fituk baka maniwang dawdaw. Ay ka fag fituk baka maniwang, malindug yangay sis tigyangan safa, makbang aro taguna fag fitu. 4Ay at maniwang fag ngay baka naon wa daw at mataglu fag ngay baka. Ay at fun daul infulo wan.
5Ay rodi ataw, at fun daul gdog yay fiya gtiyug. Ay igtaginfanan yangay fiya. Si at taginfanan, nalag sik familugan trigu. E buwadan fituk baybay. Ay ka fag fituk baybay e bilug tuwa. 6Ay rodi ataw, e nsure yay fiya fituk baybay mafis sanya ginan fag familugan. Ay ka fag fituk baybay at fagmafisun, teway nadalanan sik tagmara masugba. 7Ay manlag di, at mafis fag fituk baybay naon wa daw at ke bilug fag fituk baybay. Ay at fun daul infulo wan, ay gamatangan te, “E, igtaginfanan kway ngaro.”
8Ay balabag di, fun daul at amatanganan fangaayu wan sa at taginfanan baliwa. Ay nu katanya, at fun daul nasugu te, “Fafuli stiye fagayu at mabara ay at masafulan siginans fagdaul ku fagmagurangan.” Ay ka fag ngay taw nu nful wan, at fun daul nafoyung at taginfanan, ay roro nus di sadi we mafafayamag at masuwad. 9Ay nu katanya, tagfosuk fun daul at fanginum nalong sat fun daul te, “Em fun, e fagafoyungun aw emu. Ebi, gina aw inke nasalan sa emu, 10inlimata wo angku anggan sa ku sama tagfatama am tinafay. Ay nafasungsung o emi sa sik bale. Ay sanya fag bale at fun, kanya yangay tagfangguna sa am ngay tagbalabag. 11Ay nu sanya wami gugat sis bale sungsungan, sik yabi nataginfanan ami, ay wa kata at sadi em taginfanan ay anggan at masuwad. 12Ay roro mangaro sanya e ufud ami sik baguwama, sik taw Ebriyu. Ay ka fag baguwama, at fun sanya fag bale sungsungan at fanuguwan. Ay nafoyung ami sa anya em taginfanan, ay kanya nafayamag emi at masuwad. 13Ay in-gurungan wa fiya kata at foyungan emi, madyay nafafoli wo angku sa ebi ku fagbulun, ay ku sama, nafate wo ay nafasuluy wo at bilug sa sik kayu maturuk.”
14Ay nu katanya, at fun daul nasugu at ngay fanuguwan te, “Fastiyei ka fag taw Ebriyu!” Ay at ngay fanuguwan nalo wa gugat, nanbul Use siginan sad bale sungsungan. Ay Use bagu umsure sat fun daul, nalanu yay at umi ay natubus yay at balukas. 15Ay Use nu ndasug wa sat fun daul, at fun daul glong anya te, “Ebi nataginfanan aw, ay katsi we mafafayamag angku at masuwad. Ay nauro aw emu teway nadungug aw te, sik taw galay nafoyung emu at taginfanan, gsaful o unu gfayamag at masuwad.” 16Ay Use gbalus te, “Ku fun, bundi aw at mafafayamag am taginfanan at masuwad. Diyus tuwa at mafafon fagsafulun sa sik taw laman mafafayamag am taginfanan at masuwad, laman ro manabayan tuwa am amatanganan.”
17Ay at fun daul nafansulit at taginfanan sas Use, te, “Sadaw unu, malindug aw sis guba Safa Nilu. 18Ay manlag akdi, fituk baka insure siginan sad safa. Ay igfansabsaban sanyas tigyangan. Ay ka fag ngay baka masine, ay mataglu tuwa. 19Ay rodi ataw, e nsure yangay fiya fituk baka maniwang dawdaw. Kya batang glag takatvngvd anya nu maniwang sas fagdaul ku fagmagurangan. 20Ay nu gulit kwa gugat, ka fag fituk baka maniwang naon wa at mataglu fag fituk baka. 21Ay dewa naon, we nbali at bilug. Katvngvd way gugat aro taw nu maniwang. Ay infulo kway sigad. 22Ay rodi, igtiyug kyangay. Ay nataginfanan kyay fiya. Si ku taginfanan, nalag aw sik familugan trigu. E buwadan fituk baybay. Ay ka fag fituk baybay e bilug tuwa. 23Ay rodi ataw, e nsure yay fiya fituk baybay mafis sanya ginan fag familugan. Ay ka fag fituk baybay at faginmafisun, teway nadalanan sik tagmara masugba. 24Ay manlag akdi, at mafis fag fituk baybay naon wa daw at ke bilug fag fituk baybay. Ay balabag di, nafoyung akwa sa sangay taw at mabara, ay nus di sadi we mafafayamag angku.”
25-26Ay Use nabalus te, “Ku fun, fagduwa am taginfanan, sadi way at masuwad. Diyus gfatagak emu at fagnanfagurunganun ban. Kanya fag fituk baka mataglu ay fag fituk baybay ke bilug, at masuwad, fituk banwa mabuwadan. 27Ay ka fag fituk baka maniwang ay ka fag fituk baybay mafis, at masuwad, fituk banwa malunus ban dawdaw. 28Ku fun, kata ku longan emu, Diyus igfatagak emu at fagnanfagurunganun ban. 29Siginan katsi ay anggan wa umtabu fituk banwa, ngayu ban dawdaw at fakonun sis fagdaul talun Iptu. 30-31Ay at fadogan ban fag fituk banwa, at ngay taw kalunus ban dawdaw. Katvngvdan nu kalunus, wa namatang ebi fag fituk banwa fag ngay fakonun ayuwayu. Wa ban mamatang ebi fag ngay banwa gina kapsug. Wa ban e kabul fakonun siginans taw Iptu at ngay daga. 32Ku fun, duwa ginan fiya fiya Diyus nu gfataginfanan emu laman fasaful emu te, fagurungan wa fiya katanya. Ay aro ku longan fag fituk banwa at mabuwadan, gafasigadun wan katsi.”
33Ay Use nu nafayamag wan fun daul at taginfanan, glong yangay sat fun daul te, “Ku fun, aw nu gamatangan aw, at masine siring am fagbulun, sarapi wa sik taw at maamatanganan ay at masafulan, laman kanya fag taw tagtarabang ban emu igmagurang stes talun Iptu. 34-35Ay sarapi yangay sik ngay taw tagsugu sa baliwa at ngay taw nu gfaful at naani. Ay gina at mabuwadan fag fituk banwa, kanya nanfaful at falimank afud at naani fag ngay buwadan trigu, ay nansandig sa at ngay fulan, ay nanfatanud yangay sa sik ngay taw at nasandig fag ngay buwadan. 36Ay kanya wa ban fag ngay buwadan at ngay taw Iptu fakonun gina ban indasug ka fag fituk banwa at malunus dawdaw iste fag talun, laman at ngay taw Iptu di mkate dewa dawdaw malunus.”
Use nu Gfalangfe at ngay Taw Siginans Fanlunus Daul
37Ay nu katanya, at fun daul ay at ngay fun sirut inkumsig Use at ngay longan. 38Ay at fun daul nalong sa at ngay fun sirut te, “Wa tam e nalag tibak taw takatvngvd Use nu gsaful, teway Diyus wa at falad tagtarabang anya.” 39Ay nu katanya, at fun nalong sas Use te, “We katvngvd emu nu mamatanganan ay nu masafulan, anway Diyus tuwa at nafoyung emu aro am ngay longan. 40-41Nu katanya, fagayu taw Iptu gfaning wa ban am suguwan. Ay o yangay tagsugu ku ngay taw ste si ku bale. Ay roro dewa katanya, aw yay taglabi emu. Katsi nafili aw emu laman o wan tagmagurang stes talun Iptu.” 42Nu katanya, at fun nabul wan at fanumyu ay nafasulun sas Use at sumyu. At masuwad nga sinu tagfanumyuwan kanya fag fanumyu, kanya e fagmadaragangun igsugu tiba kata at fun daul. Ay nafasulun yangay sas Use sik mafilian fag balukas. At fangawat, sik falefe malagsi. Ay nafasulun yangay fiya sik dalag gintu. 43Ay at fun daul nafon yay sas Use at faduwak karitun. Ay kaduge Use igsakay, sik ngay taw igguna anya ay guro sa sangay taw te, “Fagayu am tudani! Fauseganani tam tagmagurang!” Ay siginan ginanya, Use wan tagmagurang sis fagdaul talun Iptu.
44Ay at fun daul nalong yangay fiya sas Use te, “Aw yay at matuyan at fun daul istes talun Iptu. Ay roro dewa katanya, we taw mafafagbulun nus nge wain ste si ku fagmagurangan nu dway o kaumsig at fagbulun.”
45-46Ay at fun daul nalong yay te, “Katsi ban am ngayan bunwa Use, antuwa Safenat-Panea.” Ay at fun nafon Use at mangena. At ngayan, Asenat. Ay Asenat tama, at ngayan Putifera. Putifera at tagfangguna at ngay taw tagfatvngvdun at ngay tawtawan sis fulan Un. Ay gina Use gfasigad gfatarabangan taw Iptu at fun, at banwa 30 wan. Ay nalo wan siginan at fun at akbang ay nasafungan wa sas fagdaul talun Iptu. Ay taw Iptu igfaning tuwa at longan.
47Ay ginanya fag fituk banwa, ngayu wa fiya at buwadan sas taw Iptu at ngay daga. 48Ay kadugenya fag fituk banwa nu si aba, Use igsugu at ngay tagtarabang te, “Fafuli wa gugat gugat at ngay taw naani siginan at ngay gamasun at falimank afud. Ay nu gsandig am, sanyai wa sit ngay fulan mandi.” Ay at ngay tagtarabang nafaning wa fiya at longan. 49Ay gina igfaful fag ngay banwa, Use gyasafulun te, “Seyu manga katsi at kinful?” Ay roro at kayuwan kayu was lagnas sis tigyangan dagat. Ay Use nasonan te, “At kayuwan ngaro we mangatap.” Ay nasugu te, “Katsi ban deyud wan ay natap. Fafuli way gugat gugat fagsadi.”
50Ay gina mabuwadan fag fituk banwa, Use inke unga wa duwa siginan at mangena at ngayan Asenat. 51Ay Use at turungana nu nsalug wan, Use nalong te, “Igfangayan aw tuy ku ngenge te, Manasis,#41:51 Sis Fangebriyu, galay glong te, Manasis, at masuwad, sik famalyaman. teway tam Diyus igfalyaman angku ebi ku ngay natakan ay nu kabalu aw ku ngay kalongan.” 52Ay bandi, Use inke unga yangay fiya. Ay nalong te, “Igfangayan aw tuy ku ngenge te, Efraim,#41:52 Sis Fangebriyu, galay glong te, Efraim, at masuwad, ngayu fag buwadan. teway Diyus famanyun angku, ngayu tuwa. Ebi, ngayu wan ku natakan istes talun Iptu. Ay roro katsi Diyus famanyun angku, ngayu tuwa.” Ay nu katanya, nafangayan at unga te, Efraim.
53Ay nu nlangfe wan at mabuwadan fag fituk banwa sas talun Iptu, 54gfasigad wan at malunus fag fituk banwa, kata ebi Use at longan. Ay ginanya sas tibak talun, gfasigad wa kalunus. Ay roro taw Iptu dya kalunus teway e kabul yay fakonun siginan at ngay daga. 55Ay bandi nu glugo wa sirut, anggan taw Iptu kalunus wan. Ay nu katanya, taw Iptu gfasigad wa nanget fakonun sa at fun daul. Ay at fun daul nabalus te, “Nanlag wam sas Use ay faningi wa nus nga setaw at longan ayu.”
56Ay Use nasaful te, nus nganday fag fulan at ngay taw nu kalunus, mason wan. Ay nu katanya, Use nasugu sat ngay tagtarabang te, “Katsi luwangi wan fagayu bale fagfafulan.” Ay nu katanya, at ngay taw Iptu nanbili wa long trigu, teway ka fag ngay taw kalunus wa ayuwayu. 57Ay anggan tibak taw siginan sangay talun, nalo wa sas talun Iptu, laman nanbili Use at nafamasadan fag trigu, teway mason wan nu kalunus nus nganday fag talun.
ទើបបានជ្រើសរើសហើយ៖
Fagsigadan 41: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines