Fagsigadan 39
39
Use Dewa Gatakan, Yawi Di Gfabayan
1Ay ginanya, at ngay taw tagsiginans Ismael fag fulan taw, at nataban Use, indasug sas talun Iptu. Ay nafabili Use sas sik taw at ngayan Putifar. Putifar at fagbulun, kanya gfangguna sa sangay tagbalabag at fun daul.
2Ay Use dewa sik fanuguwan, mabayan tuwa nu gbanwan si at fun at bale, teway Yawi igtarabang tuwa anya. 3Ay Putifar nu gulit wa gugat Use nu gfagbulun, nasaful te, Yawi igtarabang anya, madyay fagayu at ngay fagbulun Yawi nafe fanambagun. 4Ay Putifar kaumsig tuwa glag Use at ngay leleganan, ay nalong anya te, “Katsi oi wan tagfafagbulun iste si ku bale ay anggan tagfatvngvdun ku ngay fagmabalanun.” 5Ay siginan ginanya, Yawi igfasigad igfamanyun sas Putifar anggan sas fagayu tagbanwan sanya sit bale, teway Use wan tagfafagbulun sanya. Yawi nafaayu wan dewa takabul siginant gamasun ay dewa tagsit bale fag ngay fagnuwan. 6Ay Putifar nafatanud wa sas Use fagayu at fagmabalanun. Ay siginan ginanya, Putifar we fagbulun, dasday igfili at nateboan fag fakonun.
Ay Use nu kalag, sik masine fag baguwama, ay mafandaragangan. 7Ay roro Use nu glugo wa sanya, Putifar mangena gyay wan. Ay nalong anya te, “Sai wa angku.” 8Ay Use nalong te, “Yaya. Kwa kaumsig. Igsaful wa ro o te, ku fun nafatanud wa sa angku fagayu fagayu at fagmabalanun iste fag bale. 9Ay we glabi angku. Ay ku fun we nafayud angku. Ay o long fagsadi at mangena wa nafon angku. Kwa kaumsig katanya fag fagbulun teway mauri way dawdaw sa ku fun. Asalanan way katanya. Diyus kalimata way.” 10Ay dewa kayu menit kayu menit ka fag mangena nu glong te, “Sai wa angku,” Use wa gfaning at fagetun.
11Ay bandi sik menit, gina Use nasakbo sas Putifar at bale laman nanfagbulunan kata ebi ataw fag ngay menit, roro tibak fanuguwan wa sanya ginanya. 12Ay Putifar mangena inkakbang sas Use ay nated wa daw at balukas, ay glong te, “Sai wa angku.” Ay roro Use nafanlelegan, ay inluslus wa mandi siginant balukas. Ay natarung wan. Nalfas wa siginan sad bale. Nu katanya, Putifar mangena nafabul wan Use balukas. 13Ay nalag wa te, Use natarung wan. Ay gamatangan te, “Tuy yay daw at balukas.” 14Ay ginanya long nauro tibak fanuguwan te, “Stei! Ku mangama at nafastiye fag taw Ebriyu, anway mangaro nanfe fanlonganan antam. Kanya nasakbo sa ku fagtiyugan ay satu ro suma angku. 15Ay naurok tuway, kanya natarung wa sasad talun. Ay nafamato wan at balukas.”
16Ay kaduge gfanya at mangama nu kadasug sa at bale, si yay anya Use at balukas. 17Ay nu ndasug wan, nalong sat mangama te, “Aro kanya fag fanuguwan Ebriyu am nafastiye gafanlukun angku. 18Ay naurok tuway, kanya natarung wa sasad talun. Ay nafamato wan at balukas. Tuy wa ngani.”
19Ay Putifar nu nadungug at mangena longan sas Use baliwa, inlimata dawdaw. 20Ay nasugu sik ngay taw te, “Nanbul am Use, ay tabani sa tam fun daul at fagagbilugun fag bale sungsungan. Ay sungsungi wa Use sanya.” Ay kanya fag ngay taw nafaning wa fiya.
Ay Use dewa masungsungan, 21Yawi di gfabayan. Igtarabang tuwa gugat anya. Ay Yawi gfamatanganan at fun sanya fag bale sungsungan te, laman kaumsig tuwa Use at ngay leleganan. 22Ay nu katanya tuwa, at fun sanya fag bale sungsungan nalong wa sas Use te, “Katsi o wan tagsugu sa am ngay iba at masungsungan ay tagfafagbulun iste sad bale sungsungan.” 23Ay Use nu gfagbulun sanya, Yawi tuwa tagtarabang anya. Ay gfe fanambagun tuwa fagayu at fagbulun. Ay nu katanya, at fun sanya fag bale sungsungan nafabayan wa Use nu gfagbulun sanya sad bale sungsungan.
ទើបបានជ្រើសរើសហើយ៖
Fagsigadan 39: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines