Machitilo 18
18
1PAVULI pa ivi eima pa Atene, efwika ku Korinti. 2Efwangako Muyuda chite zina lake Akula, mtundu wake ni Mponto, efuma lomba pano ku Italiya, pamo na mkazi wake Priskilla, pakuti Klaudiyo eŵauzya ŵonse Ayuda afumemo mu Roma: naye eŵazila; 3pakuŵa a umasiri umo enkala naŵo pamo, naŵo epotola; pakuti umasiri waŵo wenze wotima mahema. 4Naye enzokonshana msunagoge masabata ŵonse nosakoŵeteka Ayuda na Ahellene.
5Sembe pechifwika Sila na Timoti kufumila ku Makedoniya lizu ilo limkakamizya Paulo, eŵachitira untoni Ayuda wakuti Yesu ni Kristo. 6Naŵo pechikanilila nochita msiyakuŵi eivurumura minjira yake nonena naŵo, Mlopa wanu uŵe pa mitu yanu mweka; neo niliye mlandu: chitatikile lomba nakuya kwa a Mitundu. 7Naye eima kwamene kula noloŵa mnanda ya chite zina lake Tito Yusto, wamene emlambila Mlungu, nanda yake yenzomangizyane na sunagoge. 8Nipo Krispo mkuru wa sunagoge ezomera pa Asikuru pamo na chiŵanza chake chonse; na Akorinti anyinji pechimvwa ezomera nobatiziwa. 9Nipo Asikuru emnenera Paulo usiku mmensompenya, Usayopa; nkonena, usamyalala: 10pakuti neo nili nawe pamo; palive muntu ati azakuukile kukulasa: chikomo nili naŵo ŵantu anyinji muno mmunzi. 11Naye elalukamo chirimika chimo na myezi isano na umo, kulisambizya lizu la Mlungu mwa ŵeve.
12Lomba pamene Galliyo peenze mmbili wa Akaya Ayuda emuimila Paulo na mtima umo, echiya naye ku chilimba chopingula 13echiti, Uyu muntu oŵenzya ŵantu kumlambila Mlungu kosusya dango. 14Lomba Paulo pesakoimya pakanwa Galliyo eŵanenera Ayuda, Kati ukaŵa mlandu wa viipa kano kaŵiŵe kaipa, mwa Yuda, sembe namzomerezyani: 15sembe kati akaŵa makonsho a malizu na mazina na dango lanu mwaŵene, pingulani mweo mweka; sinupangwa neo kupingula milandu iyi. 16Naye eŵautusya pa chilimba chopingula. 17Nipo ŵonse emkata Sostene, mkuru wa sunagoge, nomnyata pantanzi pa chilimba chopingula. Naye Galliyo echenda ivi vyonse.
18Paulo akankalemo nsiku zinyinji pavuli pa ivi elailana na akwaŵo, noimapo mu wato kuya ku Suriya, enze naye pamo Priskilla na Akula; naye emeta mpala mKenkreya, pakuti elapa. 19Ŵefwika ku Efeso, naye eŵasiya kulakwa: sembe yeve yeka eloŵa msunagoge nokonshana na Ayuda. 20Apo pechimsenga kunkala naŵo nsita ikuru ekana; 21lomba polailana naŵo echiti, Nimuwerereni soti akapangwa Mlungu, nipo eima ku Efeso mu wato. 22Naye akafume mu wato pa Kaisariya, echiyoilonjera eklezya nosikira ku Antiyokiya. 23Akasweko kwa nsita eimako, epita pa charo cha Galatiya na Frugiya mminzi mminzi, kwakosesya asambili ŵonse.
24Lomba echiza ku Efeso Muyuda muyake woitiwa Apollo, mtundu wake ni wa ku Alesandriya, wolongosola kwa nzeru; enze na mpamvu ya pa malembo. 25Uyu eyeruzyiwa mnjira ya Asikuru; na mtima wake pewenze na ntina enzolaŵira nosambizya wino vintu vya Yesu, eziŵa ubatizo wa Yohana weka: 26naye eyambolaŵira kokaŵalala msunagoge. Sembe pemumvwa Priskilla na Akula emuulila kwaŵo nomlululira wino njira ya Mlungu. 27Nipo pechiti nitaukire ku Akaya akwaŵo emchinchilisya noŵalembera asambili kuti amlondere: naye akafwike eŵayavya ngako amene ŵala ezomera mchawanzi: 28pakuti eŵakanikizya Ayuda kwene kantu pa menso pa ŵantu, nolangizya mmalembo kuti Yesu ni Kristo.
ទើបបានជ្រើសរើសហើយ៖
Machitilo 18: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
