Machitilo 16
16
1EFWIKA soti ku Derbe na Lustra: nipo ŵonani, enzeko msambili chite zina lake Timoti, anyina ni Muyuda wozomera, sembe awisi ni Muhellene. 2Wamene uyu enze na mbili iweme mwa akwaŵo a pa Lustra na Ikoniya. 3Paulo epangwa aye naye pamo; emuula nomsirimula chikomo cha Ayuda a mdera ilo: pechiziŵa ŵonse kuti awisi ni Muhellene. 4Naŵo penzekuya nopita pa minzi eŵapa matetulo aŵasunge, ŵechipingula apostolo na akuruakuru a pa Yerusalemi. 5Teti maeklezya etang'ishiwa mu mvwano noyangizyiwa poŵapenda nsiku na nsiku.
6Ŵeve ŵepula pa chitwa cha Frugiya na Galatiya, peleshewa na Mzimu Mtuŵa kuti asalilaŵira lizu mu Asiya; 7naŵo akateezyane na Musiya esaka kuya ku Bituniya, na Mzimu wa Yesu nteŵazomezya; 8lomba polambalala pa Musiya esikila ku Trowa. 9Pamene apo mensompenya emuŵonekera Paulo usiku; Enzepo muntu wa ku Makedoniya enzepeneme kumpapatila kuti, Taukirani kuno ku Makedoniya mze mtiyavye. 10Naye akaŵone mensompenya lomba pano tisakoimapo kuya ku Makedoniya, tichiti Mlungu watiita kuyoŵaŵirizyira ŵeve evangelo.
11Teti tikaimeko ku Trowa mu wato tichiya malungamanya ku Samotrake, na mmawa mwake ku Neapoli; 12kwitiimila nofwika ku Filipi, munzi wa mMakedoniya, ukuru wa mdera lila, mpunda wa Roma: nase tiswamo mmunzi umo masiku ŵambi. 13Zuŵa la sabata tiima kuya kunja kwa linga mmbali mwa kamana mwitilinga ni mwenze mosengera; tinkala pansi nolaŵira na anakazi aŵo elongana. 14Etimvwa umo mwanakazi zina lake Ludiya, wositisya kaniki, wa ku munzi wa Tuwatira, womlambila Mlungu: wechizula Asikuru mtima wake ateye matu ku vinenewa na Paulo. 15Naye akabatiziwe na chiŵanza chake etipapatira kuti, Kati mwalinga nine wozomereka kwa Asikuru izani mng'anda mwangu nonkalamo. Naye etiyumilizya.
16Nipo yenzepo petenzekuya ku malo kosengera etichinzya msimbi ngana ana mzimu wompanda, enze kwayomberamo asikuru ŵake zinyinji pompanda wake. 17Wamene uyu ekonka Paulo na seo nokuwa kuti, Aŵa na akapolo a Mlungu wa Kumulu ngako, omuŵirizizyani njira yopuzumushi. 18Naye echita teti nsiku zinyinji. Sembe Paulo pokwinyilila echeuka nounenera mzimu, Nukuuzya mzina la Yesu Kristo fumamo mwake. Nawo wifuma kansita kamene kala.
19Lomba asikuru ŵake apo akaŵone kuti choyomberamo kwaŵo chasila ekata Paulo na Sila noŵakwekwesyera ku nsaka kwa akuru; 20naŵo akaze naŵo kwa achipingula echiti, Aŵa ŵantu pakuŵa Ayuda otamanya munzi wasu, 21noyeruzya misango itisawamila kuipokera kano kuisunga patiri Aroma. 22Nipo liumba liŵaukira pamo: na achipingula eŵakezulila minjira yaŵo nopanga kuti anyatiwe na minkuru. 23Nipo akaŵanyate vitimbo vinyinji eŵapoza mkambolimboli, nomuuzya chilindila kwasungisya: 24wamene akamvwe tetulo ilo eŵapoza mchipinda cha kuntambo noŵamanila mendo ŵaŵo mu lupanda. 25Lomba nga ni pakati posiku Paulo na Sila enzosenga noimbila Mlungu nzimbo, na ŵomangiwa enzoŵamvwa. 26Kovurumukizya kwenze kuteng'endeka kukuru kwa charo, tetyo makumbililo a kambolimboli ni pechisung'unzikiwa: lomba pano visasa vyonse vizuliwa, na vyomangira vya ŵonse vimanguluka. 27Chilindila naye akaushiwe mtulo twake noŵona visasa vya kambolimboli vyazuliwa esolola chinkalammanja chake, echiti alipaye polinga kuti ŵomangiwa autuka. 28Sembe Paulo ekuwisya echiti, Usalilasa: pakuti tonse tiri muno. 29Nipo eita misaniko eutukiramo, echita chintente noŵafukamila Paulo na Sila, 30eŵafumya kunja nonena, Mwantumwe, nichitenji kuti nipulukwe? 31Ŵeve ŵechiti, Zomera pa Asikuru Yesu, ninga wopulukwa, weo na chiŵanza chako. 32Naŵo elaŵira naye lizu la Asikuru, na kwa aŵo a pa chiŵanza chake. 33Nipo eŵaula nsita yamene yosiku, noŵasuka mikovu yaŵo, nobatiziwa lomba pano yeve na ŵake ŵonse. 34Eloŵa naŵo mng'anda mwake noŵateŵetera vilyo, nosangalala kwene kantu pamo na chiŵanza chake chonse pomzomera Mlungu.
35Nipo kukache achipingula etuma akatembwe echiti, Mkaŵamangulule aŵo. 36Chilindila emkundululila Paulo malizu amene aŵa akuti, Achipingula atituma kuti timmangululeni: teti lomba fumani, nkoyani mtende. 37Sembe Paulo enena naŵo, Etinyata pasweta kwa mangwazi, se nise Aroma, notipoza mkambolimboli; kansi lomba atifumye tyala kunsei? yai mwandi; lomba naaze ŵeka nofuma nase pamo. 38Nipo akatembwe eŵakundululila achipingula malizu aŵa: naŵo eyopa pechimvwa kuti na Aroma; 39echiza noŵapapatira; naŵo akaŵafumye eŵasenga kuti aimepo pa munzi. 40Ŵeve efuma mkambolimboli, noloŵa mwa Ludiya: lomba akaŵone akwaŵo eŵamyalalika noimapo.
ទើបបានជ្រើសរើសហើយ៖
Machitilo 16: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
