Machitilo 15
15
1ŴAMBINE esikirako kufumila ku Yudaya esambizya akwaŵo echiti, Kati mkakanosirimuka mwa msango wa Musa simngapuzumuke. 2Pamene Paulo na Barnaba akasusyane nokonshana naŵo kwene kantu, akwaŵo etetula kuti Paulo na Barnaba na ayake a ŵeve ŵaye ku Yerusalemi kwa apostolo na akuruakuru zya ntota iyi. 3Teti ŵeve, a mu eklezya eŵapelekezya, epula pa Foinike na Samariya nolulula umo a Mitundu mwakuyarukira mitima: eŵatemwesya ngako ŵonse akwaŵo. 4Nipo akafwike ku Yerusalemi epokelelewa na eklezya na apostolo na akuruakuru, nolulula vyonse vyechichita Mlungu pamo naŵo. 5Euka ŵambi a chipatuko cha Afarisayo aŵo ezomera echiti, Ni chowamila kwasirimula noŵauzya kulisunga dango la Musa.
6Naŵo apostolo na akuruakuru eungana kuyeruzyana zya uyu mlandu. 7Lomba pepenze makonshano anyinji Petro epanama noŵanenera,
Akwasu, muziŵa kuti kale Mlungu esalulamo mwa mweo kuti pakanwa pangu a Mitundu ni pati alimvwe lizu la evangelo nozomera. 8Mlungu wamene oziŵa mitima eŵaŵonesya untoni poŵapa ŵeve Mzimu Mtuŵa nga ni umo mwetipera seo; 9aliyochita salu pali seo na ŵeve, mkutuvya mitima yaŵo na mvwano. 10Nga lomba mumyezyeranji Mlungu, pamsakoŵika lupanda pa mkosi wa asambili litikangotwala ausu wasu na seo? 11Lomba tugomezya kuti tikapuzumuke na chawanzi cha Asikuru Yesu nga ni ŵeve.
12Pamene apo liumba lonse lenze nuu: eteyera matu Barnaba na Paulo olulula viziŵikwilo na vyozizwisya vyechichita Mlungu mwaŵo kwa a Mitundu. 13Nipo pechimyalala ŵeve Yakobo eyasuka echiti,
Akwasu, teyani matu kuli neo: 14Sumeoni walulula mwechiyonzyera Mlungu a Mitundu poyamba, kwapatulilamo zina lake ŵantu. 15Malizu a aŵirizi ozomerezyana na ichi; umo mkwilembewera,
16Pavuli pa ivi nize niwere,
Nochimanga soti chimsasa cha Davide chichiwa;
Nane nize nimange soti pa chiza pake,
Nochipanamika:
17Kuti ŵantu ŵosalapo amsakesake Asikuru,
Na a Mitundu yonse alutuliwa pali ŵeve zina langu,
18Akuti Asikuru, wamene oziŵisya ivi chitatikile pechiyamba charo cha pansi.
19Teti ni panupingula kuti tisavufya a Mitundu amene omyarukira Mlungu; 20sembe kuti tiŵalembere aŵoleka tulango tofifya na kachenche na vyonyongolola na mlopa. 21Pakuti Musa chitatikile mmaluko a chombalimbi ali naŵo mminzi yonse ŵomuŵirizya, pakupendewa malizu ŵake umo mmasunagoge masabata ŵonse.
22Pamene apo kwiŵatemwesya apostolo na akuruakuru pamo na eklezya yamsuma kusalulamo ŵantu mliumba laŵo noŵatumizya ku Antiyokiya pamo na Paulo na Barnaba; niŵo Yuda woitiwa Barsaba, na Sila, ŵantu ŵoziŵikwa mwa akwaŵo: 23elemba teti noŵatuma kuti, Apostolo na akwasu akuru kwa akwasu a mMitundu a ku Antiyokiya na Suriya na Kilikiya mtende: 24Petichimvwa kuti ŵambi efumila kwasu emuŵevyani na malizu nopumvya mitima yanu, atiliyekupa tetulo; 25kwatitemwesya pakuŵa na mtima umo kusalula ŵantu noŵatumizya kwanu pamo na ŵotemweka ŵasu Barnaba na Paulo, 26ŵantu ekaŵalalila moyo waŵo pa zina la Asikuru wasu Yesu Kristo. 27Teti ni patatuma Yuda na Sila ati azamuuzyeni ŵeve vyamene ivi na pakanwa. 28Chikomo kwamtemwesya Mzimu Mtuŵa na seo kusamtwikani mtolo wolema kupula ivi vyowamila; 29vyakuti moleka vyopupila ku tulango na mlopa na vyonyongolola na kachenche; kati mwakulilesya pa ivi mwakuchita paweme. Tasila seo.
30Naŵo akasuzuliwe esikila ku Antiyokiya; lomba akalilonganike liumba ekapeleka kalata. 31Ŵeve akakapende esekelela pochinsa kwa kene. 32Nipo Yuda na Sila pakuŵa aŵirizi ŵeve soti eŵachimula akwaŵo na malizu anyinji noŵakosesya. 33Naŵo akasweko kwa nsita esuzuliwa pa mtendere na akwaŵo kuwerera ku eŵatuma. [34Lomba kwimtemwesya Sila kusalako.] 35Sembe Paulo na Barnaba enkalave mu Antiyokiya, kusambizya noliŵirizya lizu la Asikuru pamo na ayakene anyinji naŵo.
36Akapitepo masiku Paulo emnenera Barnaba, Natiwerere lomba nosondera akwasu a mminzi yonse itenzoŵirizyamo lizu la Asikuru, tikaŵone mankalilo ŵaŵo. 37Lomba Barnaba epangwa kumuula pamo naŵo Yohana soti, zina lake Marko. 38Sembe Paulo ntelinga ni chiweme kumuula naŵo pamo wamene eŵasiya nowerera pa Pamfuliya, paliye kuya naŵo ku mulimo. 39Lomba penze ntota ikuru, tetyo ni pechipatukana umbi na muyake, na Barnaba emuula Marko pamo naye, noima mu wato kuya ku Kupro; 40sembe Paulo esalula Sila noimapo, posungikiwa na akwaŵo ku chawanzi cha Asikuru. 41Naye epita pa Suriya na Kilikiya kwakosesya maeklezya.
ទើបបានជ្រើសរើសហើយ៖
Machitilo 15: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
