Machitilo 14
14
1NIPO yenzepo pa Ikoniya kuti ŵeloŵa pamo msunagoge la Ayuda nolaŵira tetyo, ni pewizomera mpingo ukuru wa Ayuda na Ahellene. 2Sembe Ayuda ŵosamvwila evundula mitima ya a Mitundu noŵaipilisya na akwaŵo. 3Teti enzonkala nsita ikuru nolaŵira kokaŵalala mwa Asikuru, wamene elichitira untoni lizu la chawanzi chake, wakupa viziŵikwilo na vyamazuzu vichitike na manja ŵaŵo. 4Sembe mpingo wa mmunzi wipatukana; chitwa chilemelela kwa Ayuda, chitwa kwa apostolo. 5Nipo pechiŵasimukira a Mitundu na Ayuda pamo na akuru ŵaŵo kwamvwisya vyankanza noŵapozera myala 6ŵeziŵa noutukira ku minzi ya Lukaŵoniya na Lustra na Derbe na ku chitwa chozunguluka: 7kwamene kwechiŵirizya evangelo.
8Pa Lustra penzenkezi chite womyalala mmendo notendeŵala chivyalikwilo mvumo mwa anyina, aliyoyenda nsita zyonse. 9Wamene uyo emumvwa Paulo enzolaŵira: wamene emlolesisya, eŵona kuti enze na mvwano wopozyewa nawo, 10echiti na malizu akuru, Panama ulungame na mendo ŵako. Naye enyotoka noyenda. 11Maumba naŵo akaŵone chachita Paulo etumpula malizu enena mchilaŵiro cha Lukaŵoniya, Milungu yatisikila mchipazyo cha ŵantu. 12Naŵo emteya Barnaba Zeu, na Paulo Herme, pakuti enze mkuru wolaŵira. 13Naye wansembe wa Zeu, chipupilo chake chenzoteezyana na munzi uyo, echiza nazyo ng'ombe na nkata zya maluŵa ku vilyango, esakopupa nsembe pamo na maumba. 14Sembe apostolo Barnaba na Paulo akamvwe epezula minjira yaŵo, elumpa noutukira mu ŵantu nokuwa 15kuti, Mwantumwe, muchitiranji ivi? Nase nise ŵantu a unkalo umo na mweo, nomleterani nkani ziweme, zyakuti mfutatire ivi vyatyala nochungulukira Mlungu wamoyo, epoza vya mlulezi na vya pansi na chimana na vyonse virimo: 16wamene mmaluko akale enzozomezya a mitundu yonse kuyenda mnjira zyaŵo ŵene. 17Chukanga teti aliyolisiira aliye untoni, pechichita viweme nompani mvula na nyengo zyakupya vintu kufumila kumulu, nozuzya mitima yanu vyakulya na chimwemwe. 18Polaŵira teti esunzyiwa poŵalesya maumba asaŵatilila ŵeve nsembe.
19Pamene apo ezako Ayuda kufumila ku Antiyokiya na Ikoniya: eŵaŵenzya maumba nompozera myala Paulo nomkulira kunja kwa linga, echiti wafwa. 20Sembe penzomzinga asambili eima noloŵa mmunzi: na mmawa mwake efuma pamo na Barnaba kuya ku Derbe. 21Naŵo akaŵirizye evangelo ku munzi uyo nochisya anyinji asambili ewerera ku Lustra na ku Ikoniya na ku Antiyokiya, 22kukosesya mitima ya asambili noŵachimula kunkalave mu mvwano, echiti topita mmazuzyo anyinji kuyoloŵa mu ufumu wa Mlungu. 23Nipo akaŵasintilile manja akuru mu eklezya iri yonse, nosenga nolitana vilyo, eŵasungisya kwa Asikuru wechizomera. 24Naŵo epula pa Pisidiya nofwika ku Pamfuliya. 25Akalilaŵire lizu mPerga esikila ku Attaliya; 26kwamene kwechiimila na kuya mu wato ku Antiyokiya, kwechisungikiwa kale ku chawanzi cha Mlungu ku mulimo uyo wechisilizya. 27Apo akafwike nokusa a mu eklezya ekundulula vyonse vyechichita Mlungu naŵo pamo, umo mwechizulila a Mitundu pa mulyango pozomera. 28Naŵo enzonkala nsita ikuru kwa asambili aŵo.
ទើបបានជ្រើសរើសហើយ៖
Machitilo 14: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
