1 Akorinti 9
9
1KANSI ntene mwanoŵene? kansi ntene mpostolo? kansi ntenimuŵona Yesu Asikuru wasu? kansi mwe ntemwe mulimo wangu mwa Asikuru? 2Kati ku ŵambi ntene mpostolo, sembe kuli mweo nine, pamuli malaka okomewa popostolo wangu mwa Asikuru. 3Kulikanila kwangu kwa ŵala onikonsinsha ni uku. 4Kansi tiliye nsaka yakulya na kumwa? 5Kansi tiliye nsaka youla polwendo mkazi wommvwila Mlungu, nga ni apostolo ayasu na akwaŵo a Asikuru na Kefa? 6Kano neo neka na Barnaba, kansi tiliye nsaka yosakata milimo? 7Nga linjolinjolinji likuya ku nkondo nolichizya leka? ni ŵani ozika munda wa mipesya nosalya vitwalo vya wine? ni ŵani oŵeta mkusi nosamwa sulu la mkusi? 8Kansi nunena ivi mwakunenera ŵantu? kansi nalo dango silunena vyamene? 9Pakuti kwilembewa mdango la Musa, Usaimanga pakanwa ng'ombe payunyanyantila mapira. Kansi ni ng'ombe zyakukungulila Mlungu, 10kano echiti teti chikomo cha seo seka? Aye, chikomo cha seo ni pikwilembewa: pakuti uyo olima aŵolima mchigomezyo, na uyo osansa aŵosansa mchigomezyo chopokako. 11Kati timkomolerani vya mu mzimu, kansi nchikuru tikasanja vyanu vya mmuŵili? 12Kati ŵambi ana nsaka iyi pali mweo, nga kwenekwene seo? Chukanga teti sitiichitirako nsaka iyi; lomba tupilila vyonse, tingachilingizye evangelo ya Kristo. 13Mwati mnaziŵe kuti aŵo otumikila mvintu vyozila olyamo vya mchipupilo, na aŵo opafwinda popupila oyaŵana napo popupila? 14Tetyo na Asikuru etetula kuti aŵo oiŵirizya evangelo naŵochila na evangelo. 15Sembe neo sinuvichitirako ivi vyonse: nane sinulemba ivi kuti kuchitike tetyo kuli neo: nkasa nifwe kupula muntu achisye kwatyala kulitamya kwangu. 16Chikomo kati nuiŵirizya evangelo niliye cholitamyirako, pakuti chonikakamizya chiri pali neo; shamo kwangu nikalekoiŵirizya evangelo. 17Pakuti nikachita teti kozomera, nina chilambu: sembe kati nte kozomera, nina uchilolesya wisungikiwa kuli neo. 18Nga chilambu changu ni chinji? Ni chakuti, nikaiŵirizya evangelo, niichisye evangelo yabule, nisakumanizyirako nsaka yangu ya pa evangelo. 19Pakuti chukanga nenze mwanoŵene pa ŵonse nilichisya mulanda wa ŵonse nipindule naŵo anyinji. 20Kwa Ayuda nenze nga nine Muyuda nipindule naŵo Ayuda; kwa ŵala olimvwila dango nga nulimvwila dango, panisalimvwila dango, nipindule naŵo olimvwila dango; 21kwa ŵala aliye dango nga niliye dango, panisali niliye dango kwa Mlungu, sembe womvwila dango kwa Kristo, nipindule naŵo aliye dango. 22Kwa ŵolenda nenze wolenda, nipindule naŵo ŵolenda: nikuŵa vyonse ku ŵonse nipuzumusyireko moyezya monsemonse. 23Nane nuchita vyonse chikomo cha evangelo, nisanzyane nayo. 24Kansi simuziŵa kuti aŵo opikisyana makani outuka ŵonse, sembe wolonda chilambu ni umo? Tetyo namwe moutuka, mkalondere. 25Ali wonse naye oyezyana mmasoŵera olilesya mvyonse. Lomba aŵa ochita tetyo kuti alondere chapeu chopulamo chufota; sembe seo chosafota. 26Teti neo ni panuutuka tetila, nte chimuutukiramo; nikulwa na vimfwau, nte konyata mpepo: 27sembe neo nukuntakunta muŵili wangu nouchisya ukapolo: kuti nikaperoŵirizya ku ŵambi neo namwine kano ningaŵe wotaika.
ទើបបានជ្រើសរើសហើយ៖
1 Akorinti 9: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.