1 Akorinti 10
10
1AKWASU, sinupangwa kuti mpululile kuti ausu wasu ŵonse enze pansi pa mkumbi, nopita ŵonse pakati pa chimana, 2nobatiziwa ŵonse kwa Musa pa mkumbi na pa chimana, 3nolyapo ŵonse chakulya chamene chila cha mu mzimu, 4nomwapo ŵonse chakumwa chamene chila cha mu mzimu: pakuti emwapo mwala wa mu mzimu wamene wiŵakonka: na mwala ula wenze Kristo. 5Sembe anyinji ŵala Mlungu ŵaliyotemwa naŵo: chifukwa ewishiwa mmalambo. 6Lomba ivi vintu vyenze milingo yasu, yakuti tisakumbwila viipa seo, nga ni aŵo soti mwenzokumbwilila. 7Namwe msaŵa ŵolambila tulango, nga ni muŵenzele ŵambi a ŵala; umo mkwilembewera, Ŵantu enkala pansi kulya na kumwa, eima kusoŵera. 8Chukanga kachenche tisachita, nga ni mwechichitila ŵambi a ŵala, nolopa zuŵa limo myanda kumi kupasya na makumi aŵiri na vitatu. 9Soti tisamuyezya Asikuru, nga ni mwechimyezizya ŵambi a ŵala, nochenekewa na vinjoka. 10Soti msang'ung'unzila mweo, nga ni mweching'ung'unzilila ŵambi a ŵala, nochenekewa na mcheneki ula. 11Lomba ivi viŵaponera nga ni mlingo; navyo vilembewa kotichimula seo, apezila posililila pa vyaka. 12Chifukwa choteti wamene uyo olinga kuti oima nachenjere angawe. 13Paliye mayezyo emuulani mweo sembe ŵala ŵangopilila naŵo ŵantu; sembe Mlungu ni wozomereka, sangomsiyani kuyezyewa kupula mmulili na mpamvu; sembe pamo na mayezyo azaŵochita soti mopuzumukila, kuti mkumokoselelamo.
14Teti, mwaŵotemweka ŵangu, utukani kulambila tulango. 15Nulaŵira nga ni kwa anzeru; pingulani vununena. 16Ntumo ya shuko itushukisya, kansi nte kusanzyana mu mlopa wa Kristo? Mtanda utusuna, kansi nte kusanzyana mmuŵili wa Kristo? 17se nise anyinji patiri mtanda umo, muŵili umo: pakuti tonse tupokako mtanda uyo umo. 18Ŵonani Israeli a mwa muŵili: kansi ŵala olyapo nsembe ntosanzyana napo popupila? 19Nga nunenanji? kuti chopupila ku tulango chikufwa kantu, kano kuti kalango kakufwa kantu? 20Lomba nikuti ivyo vyakupupa a Mitundu ovipupa ku viŵanda, nte kwa Mlungu: nane sinupangwa musanzyane na viŵanda. 21Simngamwereko ntumo ya Asikuru na ntumo ya viŵanda: simngapokepo polyera pa Asikuru na polyera pa viŵanda. 22Kansi pambi tumulwisya ukwa Asikuru? kansi tina mpamvu yopula yeve?
23Vyonse ni vyozomereka; sembe nte vyonse vyowamila. Vyonse ni vyozomereka; sembe nte vyonse vumanga munzi. 24Muntu asalisakilila yeka viweme, sembe muyake. 25Vyonse vusitiwa potantila nyama ilyani, ŵosakonsha kantu chikomo cha chikumbutima; 26pakuti charo cha pansi ni cha Asikuru, na mazulilo a chine. 27Kati umo wa ŵosamzomera Mlungu akamuitani ku viteŵeto, namwe mkapangwa kuya, ilyani viri vyonse vuŵikiwa mnkonde mwanu, ŵosakonsha kantu chikomo cha chikumbutima. 28Sembe kati muntu akati kwanu, Ichi chipupiwa nsembe, msalya, chikomo cha uyo echiziŵisya na chikomo cha chikumbutima: 29nikuti chikumbutima, nte chako sembe cha muyako; pakuti nsaka yangu yosalula yupinguliwiranji na chikumbutima cha muyangu? 30Kati neo nupokako noŵonga, ni chinji panunenewa viipa pa chunuŵongako? 31Teti kati mkalya, kano kumwa, kano kuchita vyakuti vyakuti, chitani vyonse komchinzika Mlungu. 32Msachita mokumbulwisya Ayuda, kano Ahellene, kano eklezya ya Mlungu: 33nga ni umo neo soti mnutemwesyera ŵonse mvyonse, kusasaka pindu langu namwine, sembe la anyinji ŵala, apuzumushiwe.
ទើបបានជ្រើសរើសហើយ៖
1 Akorinti 10: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.