1 Akorinti 7
7
1LOMBA zya vimwilemba: Ni kuweme ku muntu kusakumana na mwanakazi. 2Sembe chikomo cha tuchenche mwanalume ali wonse naaŵe na mkazi wake, na mwanakazi ali wonse na mulume wake. 3Mwanalume napeleke ku mkazi wake vyowamila vyake: tetyo na mwanakazi ku mulume wake. 4Mwanakazi aliye nsaka pa muŵili wake, sembe mulume niye: tetyo na mwanalume aliye nsaka pa muŵili wake, sembe mkazi niye. 5Msachenjererana, sembe pozomerezyana kwa nsita, mulitwale ku malombero nowererana soti, Satana angamyezyeni chikomo chosalilesya kwanu. 6Sembe ichi nunena mozomezya, nte mwa tetulo. 7Lomba nkasa angati ŵonse ŵantu ali nga ni neo. Lomba ali wonse ana mtulo wake kufumila kwa Mlungu, umo wakuti muyake wakuti.
8Lomba nikuti ku ŵosatenga na ku anakazi ŵofwilwa, Nkuweme kwaŵo akankala nga ni neo. 9Sembe kati aliye malilesyo natenge: pakuti nkuweme kutenga kupula kuchentuka. 10Sembe ŵotenga nuŵatetula, inde nte neo sembe Asikuru, Kuti mwanakazi asasiyana na mulume wake 11(sembe kati akamsiya, naaŵe wosatengewa, kano kuyanjana na mulume wake); na kuti mwanalume asamleka mkazi wake. 12Sembe ku ŵosalapo ne nine nikuti, nte Asikuru: Kati mkwanu ali wonse ana mkazi wosamzomera Mlungu, naye mwanakazi akatemwa kunkala naye, asamleka. 13Tetyo na mwanakazi ana mulume wosazomera, naye otemwa kunkala naye mwanakazi, asamleka mulume wake. 14Pakuti mwanalume wosazomera otuvyiwa mu mkazi, na mwanakazi wosazomera otuvyiwa mu mkwanu: angati nte teti, ŵana ŵanu sembe nausali; sembe lomba natuŵa. 15Sembe kati wosazomera akaimapo naimepo: mkwanu kano mlongosi aliye uzya mmilandu yoteti: sembe Mlungu etiita mu mtende. 16Uziŵa syani, we mwanakazi, kati umpuzumusye mulume wako? nawe mwanalume, uziŵa syani kati umpuzumusye mkazi wako? 17Ichi cheka chakuti, nga ni umo Asikuru mwechiyaŵira ali wonse, mwechiitira Mlungu ali wonse, nayende tetila. Nutetula teti mmaeklezya ŵonse. 18Kansi muntu eitiwa wosirimuka? asaŵa wosasirimuka. Kansi muntu eitiwa wosasirimuka? asasirimuka. 19Chisirimuko sichikufwa kantu, na kusasirimuka sikukufwa kantu; sembe kwasunga matetulo a Mlungu niko. 20Ali wonse nankale mmaitiwe ŵechiitiwa naŵo. 21Kansi wiitiwa pewenze kapolo? usaikako mtima: sembe kati ukaŵa na moŵombokwera, ngakongako usapitilwa. 22Pakuti uyo eitiwa mwa Asikuru pakuŵa kapolo ni mwanoŵene wa Asikuru: tetyo na uyo eitiwa pakuŵa mwanoŵene ni kapolo wa Kristo. 23Mwe mwisitiwa chitema chikuru; msaŵa akapolo a ŵantu. 24Mwakwasu, mwechiitiwira ali wonse, nankale mwamene na Mlungu pamo.
25Lomba aziche niliye naŵo tetulo la Asikuru: sembe neo nupingula penili wopokera chifundo kale kwa Asikuru chakuŵa wochetekereka. 26Teti nulinga kuti ichi nchiweme chikomo cha sunzyo lalomba, chakuti nkuweme ku muntu kuŵa nga ni mwalili. 27Kansi umangiwa ku mkazi? usasakomangululiwa. Kansi umangululiwa ku mkazi? usasaka mkazi. 28Sembe kati ukatenga, uliyoifya; na mziche akatengewa, aliyoifya. Sembe ŵoteti azaŵe na matamano mmuŵili: nane nusakompuzumusyamoni. 29Lomba nunena ichi, mwakwasu, chakuti nsita ichepeshewa, kuti chitatikile lomba ŵala ana anakazi aŵe nga aliye, 30na ŵala olila nga ntolila, na ŵala osangalala nga ntosangalala, na ŵala osita nga aliye kantu, 31na ŵala ochitirako charo cha pansi nga ntochitirako kopuzyamo: pakuti maŵonekero a charo chino opitilila. 32Sembe neo nupangwa motekerezya mvya tupwe. Uyo wosatenga ochita tupwe mvya Asikuru, mwati amtemwesisye Asikuru. 33Sembe uyo wotenga ochita tupwe mvya charo, mwati amtemwesisye mkazi wake. 34Soti mtengwa opambana na mziche. Uyo wosatengewa ochita tupwe mvya Asikuru, mwati aŵere mtuŵa muŵili na mzimu: sembe uyo mtengwa ochita tupwe mvya charo, mwati amtemwesisye mulume wake. 35Nunena ichi koshukamo kwanu mweka; nte kuti nimteyereni mwando, sembe kochita vyamchinzi, momuyumilila Asikuru paliye chocheusyacheusya. 36Sembe kati muntu olinga kuti ntomchitira wino mwana wake mziche, akapitilwa posimbi wake, kukasakika kotetyo, nachite chakupangwa; ntoifya; natengewe. 37Sembe uyo opulamo nokoselela mu mtima mwake, paliye chomkangamizya, lomba ana nsaka pa chipangwilo chake nolingilatu ichi mu mtima mwake, chomsunga mwana wake, ochita chiweme. 38Teti uyo omtengesya mwana wake mziche ochita chiweme; na uyo asamtengesya ni ochita chiweme kopulamo. 39Mwanakazi omangiwa nsita yonse yakuŵa na moyo mulume wake; sembe akafwa mulume akuŵa pasweta kutengewa na wakupangwa, sembe mwa Asikuru mpera. 40Lomba opulamo notemwa akankala umo mwalili, mwa upinguzi wangu: nane nulinga kuti neo soti nina Mzimu wa Mlungu.
ទើបបានជ្រើសរើសហើយ៖
1 Akorinti 7: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.