1 Akorinti 6
6
1NGA kansi wa mweo angakaŵalale, pakuŵa na mlandu na muyake, kuyomsimikizya pa nsaka ya ŵosalungama, nte pa nsaka ya asanto? 2Mwati mnaziŵe kuti asanto ni ati azachipingule charo cha pansi? lomba kati charo chupinguliwa namwe, kansi nimwe ŵosawamila kupingula tumilandu tutonto? 3Mwati mnaziŵe kuti se tikapingule malaika? nga kwenekwene vya mmoyo uno? 4Nga mkaŵa na milandu ya mmoyo uno, mngapyanike achipingula ŵala opeluka mu eklezya nakale? 5Nunena ichi nimkolesyeni nsoni. Kansi ni teti kuti muli mweo msaŵa umo wanzeru, angakonkolole mlandu pakati pa akwaŵo, 6sembe mkwaŵo omkulikira mkwaŵo ku nsaka, inde na ku ŵosamzomera Mlungu? 7Yai mwandi, chilimo chendi chilema muli mweo, chakuti mkuŵa na milandu umo na muyake. Ngakongako nchinji pamsapililwa? ngakongako nchinji pamsachenjererewa? 8Yai, sembe mweo mweka mupontera nochenjerera, inde na akwanu. 9Mwati mnaziŵe kuti ŵosalungama sati akapyane ufumu wa Mlungu? Msaŵepekewa: paliye akachenche, kano ŵolambila tulango, kano ŵochende, kano achanakazi, kano ŵoifya na analume ayaŵo, 10kano njivi, kano akaso, kano vikungu, kano amatusi, kano ŵopamba, ati akapyane ufumu wa Mlungu. 11Ŵoteti ni muŵenzele ŵambi a mweo: lomba mwisukiwa, lomba mwituvyiwa, lomba mwichishiwa ŵolungama mzina la Asikuru Yesu Kristo, na mwa Mzimu wa Mlungu wasu.
12Vyonse ni vyozomereka kuli neo; sembe nte vyonse ni vyowamila. Vyonse ni vyozomereka kuli neo; sembe neo nukanonashiwa ulanda ku chiri chonse. 13Vilyo ku vumo, na vumo ku vilyo: sembe Mlungu azalofye leve na vyeve. Lomba muŵili nte wa ku kachenche, sembe wa kwa Asikuru, na Asikuru wa ku muŵili: 14naye Mlungu emzyusya Asikuru, soti azatizyusye seo kwa mpamvu yake. 15Mwati mnaziŵe kuti miŵili yanu ni vizo vya Kristo? nga kansi nilonde vizo vya Kristo novichisya vizo vya wakachenche? Mlungu nalesye. 16Mwati mnaziŵe kuti uyo olundikana na wakachenche ni muŵili umo? chikomo echiti, Ŵonse aŵiri aŵekuŵa muŵili umo. 17Sembe uyo olundikana na Asikuru ni mzimu umo. 18Utukani kachenche. Viipa vyonse vyakuchita muntu viri kunja kwa muŵili; sembe uyo ochenchemwa oifisya muŵili wake mwine. 19Mwati mnaziŵe kuti muŵili wanu ni chipupilo cha Mzimu Mtuŵa ali mkati mwanu, umuli naye kufumila kwa Mlungu? namwe ntemwe ŵanu mweka; 20chikomo mwisitiwa chitema chikuru: ni pamti momzizya Mlungu mmuŵili wanu.
ទើបបានជ្រើសរើសហើយ៖
1 Akorinti 6: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.