1 Akorinti 11
11
1IŴANI ŵonikonkesya neo, nga ni nane kumo mnumkonkesyera Kristo.
2Lomba numlumbani pamunikumbuka mvyonse, novikatisya visiilano nga ni mnimperani. 3Lomba nupangwa mziŵe kuti mutu wa mwanalume ali wonse ni Kristo, na mutu wa mwanakazi ni mwanalume, na mutu wa Kristo ni Mlungu. 4Mwanalume ali wonse akalomba kano kuŵirizya na mutu wovwinikiliwa opuvya mutu wake. 5Sembe mwanakazi ali wonse akalomba kano kuŵirizya na mutu wosavwinikiliwa opuvya mutu wake: pakuti ni pamo nga emetewa. 6Pakuti kati mwanakazi akaŵa wosavwinikiliwa nasesewe soti: sembe kati ni nsoni ku mwanakazi kumetewa kano kusesewa navwinikiliwe. 7Pakuti mwanalume chendi sangaŵe na mutu wovwinikiliwa, paali chipazyo na mchinzi wa Mlungu: sembe mwanakazi ni mchinzi wa mwanalume. 8Pakuti mwanalume sefuma mmwanakazi, sembe mwanakazi ni efuma mmwanalume: 9soti mwanalume sepozewa ku mwanakazi, sembe mwanakazi ni epozewa ku mwanlume: 10chikomo choteti mwanakazi ni pati aŵekuŵa na nsaka pa mutu wake chikomo cha malaika. 11Lomba mwanakazi ntakuŵa chiliye mwanalume, kano mwanalume chiliye mwanakazi, mwa Asikuru. 12Chikomo nga ni umo mwanakazi mwechifumila mmwanalume, tetyo na mwanalume soti ni mwakuŵera mmwanakazi; sembe vyonse vufumila kwa Mlungu. 13Mopingula mweka: kansi nchiweme ku mwanakazi kumlomba Mlungu wosavwinikiliwa? 14Kansi chukanga kamerero kene sikomsambizyani kuti mwanalume akaŵa na sisi litali ni lumpuvya? 15Sembe mwanakazi akaŵa na sisi litali ni lumzizya, sisi lake pelipewa kuli yeve mvwinikilo. 16Sembe kati muntu oŵoneka wantota tiliye msango woteti, chukanga maeklezya a Mlungu.
17Sembe pomuuzyani teti sinumlumbani, pamsalonganila viweme sembe viipa. 18Pakuti poyamba mkulongana kwanu mu eklezya nikumvwa kuti alimo malekano mwanu, nane nuzomera patonto. 19Pakuŵa soti panu mapatukano, kuti aŵo ozomereka aŵoŵoneka pasweta mwanu. 20Teti apo pamulongana sikukumika kulya mulalilo wa Asikuru: 21pakuti mkulya kwanu umo otanguloula mulalilo wake mwine; umo ana njala, muyake okolwa. 22Ni chinji? nga muliye mang'anda amngalyeremo nomweramo? kano muipelula eklezya ya Mlungu, noŵamvwisya nsoni ŵosoŵelwa? Ninenenji kwanu? kansi nimlumbeni pa ichi? ntenumlumbani. 23Pakuti nipokera kwa Asikuru chila chinimpelekerani soti, chakuti Asikuru Yesu usiku ula wechipunziwiramo eula mtanda; 24nipo akayamike eusuna nonena, Uyu ni muŵili wangu uli pa milandu yanu: nkochitani ichi chakuŵa chilukano cha neo. 25Tetyo na ntumo pavuli pa mulalilo kuti, Ntumo iyi ni mapangano alomba a mu mlopa wangu: nkochitani ichi pali ponse mkamwapo chakuŵa chilukano cha neo. 26Pakuti pali ponse mkalya mtanda uyu na kumwa ntumo iyi muŵirizya imfwa ya Asikuru mpaka pati aze. 27Teti ali wonse akalya mtanda kano kumwa ntumo ya Asikuru kosawamila azaŵe na mlandu wa muŵili na mlopa wa Asikuru. 28Lomba muntu nalilinge, ni mwati alyere mtanda na kumwa ntumo. 29Pakuti uyo akulya na kumwa, akulya na kumwa upinguzi ku mwine, kati ntouziŵisya muŵili. 30Chifukwa choteti ni pakulenda anyinji a mweo nomyalala mvizo, na anyinji ali mtulo. 31Sembe angati tuliziŵisya seka sembe situpinguliwa. 32Lomba tikapinguliwa tulangiwa na Asikuru, tisakonwa pamo na a mcharo chino. 33Teti, akwasu, pamulongana kulya molindilana. 34Kati muntu ana njala naalye kwake, mngalonganile upinguzi. Vyasalapo nize niviwamye nikaza.
ទើបបានជ្រើសរើសហើយ៖
1 Akorinti 11: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.