हिबुरु 7
7
माल्किसेडेक याटाङ्पा
1माल्किसेडेक चाइ सालेम यिॽमॆ ठालबिऎ हाङ् नुङ् खो चोब्नबाङ् सङ्पिऎ निवाँहाङ्मि याटाङ्पा सङ्क लॆटा। हाङ् आबाराहामऎ खिमाबि हाङ्चि हेचाइटुचि हाङ् खो खिम्पि ऎम्पक्मॆ पाइमार मल्किसेडेकऎ चुबु हाङ् आसिका पिट्टु। 2हाङ् आबाराहामऎ हाङ्चिबाङ् हेचाइटॆॽमिम्पा चासुम्मि एपङ्मि एक्क भाग मल्किसेडेक पिट्टु। मल्किसेडेक लोमिम्पा निङ्ऎ लोमा यकुवॆ चाइ “निवाँनेन् खानावाँमि हाङ्” रेम हाङ् सालेम्मि हाङ् लोमिम्पा चाइ “सान्टिमि हाङ्” रेम। 3हाङ् माल्किसेडेकमि आपा, आमा हाङ् पाप्पाटुबाचि, खोमि जान्म हाङ् सिखॆॽमिम्पा खानावाँ माङ्स खानावाँ मान्साप्टि। खो निवाँहाङ्मि पासा रक्न चोब्न लःमि लागि याटाङ्पा रेम।
4हाङ् माल्किसेडेक ऎॽवा टुङ्घङ्पा याॽमि लॆटॆ लोमॆ वाबाम्नॆ। इस्राएलिचिमि टुबालाबा आबाराहामढारि खोसॆ होइढा हाङ्चि हेचाइमानुङ् लाटॆॽमिम्पा चासुम्मि एपङ् भागमि एक्क भाग खो पिट्टु। 5लेबिमि पासाचि याटाङ्पाचि रेम। खोचिऎ चोब्न इस्राएलि याॽमिचिबाङ् चासुम्मि एपङ् भागबाङ् एक्क भाग खोमुकुचि। मोसामि यायेॽमाऎन खोचि आक्र लॆटानॆ कामानुङ् लोकुचि। हाङ् लेबिमि नुङ् इस्राएलिचि चोब्न आबाराहाममिन पासाचि रेम। 6मल्किसेडेक चाइ लेबिमि पासा हॆॽनॆ, मरहाङ्ग खोसॆ आबाराहामबाङ् एपङ् भाग लासु हाङ् खोसॆ निवाँहाङ्मि चुप्लाङ् टक्चाखुबा आबाराहाम आसिका पिट्टु। 7हाङ् ढ्या याॽमिबाङ् मिःछुपा याॽमिऎ आसिका टक्चाकु लोमॆ ग लेऎ खानावाँन। 8हाङ् इॽयाक् सिखॆखुबा याटाङ्पाचिऎ इस्राइलिचिबाङ् एपङ् भागमि एक्क भाग खोमुकुचि माल्किसेडेक खोचिबाङ् ढ्या रेम मान्ठाभनॆ निवाँनेन् साब्चिराऎ माल्किसेडेक हानाम्स हिङ्चाढाङ्डा कामानुङ् लोकु। 9हाङ् गर स कामा हेकि, एपङ् भागमि एक्क भाग खोम्खुबा लेबिचिऎ आबाराहाम बाङ्न मल्किसेडेक एपङ् भागमि एक्क भाग पिट्टुचि। 10मान्ठाभनॆ माल्किसेडेकऎ आबाराहाम चुब्मार लेबि टाङ्पाम् पाप्पाटुबा अबराहाममि सालुङ हङ्सिन चुआ।
11लेबिमि पासाचिऎ याटाङ्पामि योम्पक् टक्चामिम्पा लॆटुचि। हाङ् इस्राएलि याॽमिचि पिॽमिम्पा यायेॽमा याटाङ्पाचिमि योम्पक् आनुसारॆऎ लॆटा। हाङ् लेबि याटाङ्पाचिमि योम्पक्ऎन चोब्न खानावाँ नुऎ लिसा ग हारुनमि पासार हॆॽनॆ टर मल्किसेडेक् रक्मा याटाङ्पा टामा मापाब्। 12मसॆ याटाङ्पा होइकन लिसा हाङ्ग यायॆॽमा सङ्क होइकन लिमा लॆ। 13मान्ठाभनॆ कानिऎ इःमे पाइमिम्पा याटाङ्पा होइकन सामॆक्बाङ्ऎ यो। खोमि सामॆक्बिहा याॽमिचिऎ याटाङ्पा लिमानुङ् युङ्ठङ्पि हानाम्स योम्पक् मान्यिक्टिटुचि। 14गुबि काङॆ लोमा यकुङॆ खानावाँ चाइ माङ्भनॆ कानिम् पारभु चाइ याहुडामि सामॆक्बाङ् जान्म लिमिम्पा रेम। हाङ् मोसाऎ ग सामॆक्बाङ् याटाङ्पाचि टाःक्मि कामानुङ् हानाम्स मालोसु।
माल्किसेडेक रॽमान होइक याटाङ्पा
15हाङ् यायेॽमा होइकन लॆ लोमॆ नुःर खाङ्ट मान्ठाभनॆ ग योम्पक्बाङ् मल्किसेडेक् रक्मान होइक याटाङ्पा टाडा लोमॆ काम्नुःर वाप्ट। 16येसु चाइ याटाङ्पाचि लेबि सामॆक्बाङ् टामा लॆ लोमॆ यायेॽमा टिङ्से याटाङ्पा मान्लि, टर हानाम्स लुक्खॆॽनॆ हिङ्खामाबि चॆक्मावाबाङ् याटाङ्पा लिमिम्पा यो। 17मान्ठाभनॆ निवाँनेन् साब्चिराबि गरहाङ्, साप्डा “मल्किसेडेक् रक्न आना चोब्न लःबि लागि याटाङ्पाना।”#खोम्मिम्पासाम् ११०:४ 18हाङ् माङ्स ऎलॆहिखुबा हाङ् योम्पक् आपिक्खुबा लिमिम्पासॆ याॽलिऎ यायेॽमा वेल्लाहाङ्डा। 19मान्ठाभनॆ मोसामि यायॆॽमाऎ माङ्स सॆङ्सॆङॆ मान्मुहिसु। गरक्ल कानिनुङ् एक्क काम्नुऎ आस चुःबिकि, हाङ् आक्क आसऎ निवाँहाङ्मि नेन्टाङ् टॆःकि।
20हाङ् निवाँहाङ्ऎ चुप्लाङ् हिक्मानुङ् याटाङ्पा मुमॆ उम्चङ् खानावाँ लाबुकु, टर हारुनमि पासाचि चुप्लाङ् मॆन्डिङ्न याटाङ्पा लिसामि। 21टर येसु नुङ् चुप्लाङ् ठुप्से खो निवाँहाङ्ऎ याटाङ्पा मुमिम्पा यो मान्ठाभनॆ निवाँनेन साब्चिराबि गरहाङ् साब्डा,
“निवाँहाङ्ऎ चुप्लाङ् ठुबु
‘आना चोब्न लःमि लागि याटाङ्पा लिक्न’#खोम्मिम्पासाम् ११०:४ हाङ् खोमि निवाँऎ हानाम्स म चुप्लाङ् हॆॽनॆ कानि।
हाङ् आना चोब्न लःमि लागि याटाङ्पा लिक्ना।”#खोम्मिम्पासाम् ११०:४
22हाङ् मसॆॽन येसुऎ निवाँहाङ् नुङ् कानिमि लुम्पि ठुॽमिम्पा चुप्लाङ् याॽलऎ चुप्लाङ्बाङ् नुऎ लॆ।
23हाङ् याॽलि ओइर याटाङ्पाचि चुआमि हाङ् खोचि सिखॆॽमिहासॆ चोब्न लःमि लागि योम्पक् मुमा माहेसुचि। 24टर येसु हानाम्स हिङ्चाढाङ् मसॆ खो हानाम्स याटाङ्पा लिढाङ्। 25मसॆ खोबि निवाँयुङ् लॆसे निवाँहाङ्पि टाखुबाचि खोसॆ हानाम्स हिङ्चामिॽमा हेकुचि मान्ठाभनॆ खोचिमि लागि निवाँ नुङ् पारठाना लॆमाम् लागि खो हानाम्स लिढ्याङ्।
26हाङ् मसॆॽन येसु चोब्बाङ् ढ्या कानि पाबुकिहा ढ्या याटाङ्पा स गरॽऎन। खो सॆङ्सॆङॆ, आब्डिक मॆड्डिङ्मा, निवाँनेन लॆ हाङ् खोसॆ माङ्स हिङ्वा योम्पक् मान्यिगु पारुबिऎ चोब्बाङ् सङ्पिऎ ठालबि पेन्मिटु। 27हाङ् होइडा चोब्बाङ् ढ्या याटाङ्पाचिऎर खोसॆ चोब्न डिना सङ्टिढाङ्मा पाब्नि। आक्खाचिऎ याॽलि खोचिम् हिङ्वामि लागिॽन आक्र लॆटुचि हाङ् होइढा याॽमिचिमि हिङ्वामि लागि लॆटुचि। टर येसुऎ चोब्न लःमि लागि एक्खेपाब्न खेःॽल टाङ्पेटाङ्पान सङ्टिबिइट्टु। 28हिङ्वा योम्पक् यिक्खुबा हाङ् सिखॆखुबा याॽमिचि यायेॽमाऎ चोब्बाङ् ढ्या याटाङ्पा मुसुचि टर आक्क यायेॽमाबाङ् डॆङ्पि निवाँहाङ्ऎ खोम् पासानुङ्न चुप्लाङ् ठुबुहाङ् चोब्न लःमि लागि सॆङ्सॆङॆ चोब्बाङ् ढ्या याटाङ्पा मुःसु।
ទើបបានជ្រើសរើសហើយ៖
हिबुरु 7: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society