हिबुरु 6
6
1मसॆ खिरिस्टमि बारेबिहा मिॽमिॽहा खानावाँबि टे पेन्खुबाचि आलिसिये। बोरु आक्कबाङ् सङ्क हिङ्सिॽयुहा खानावाँ वाप्खुबा लिसिये। कानिऎ ग खानावाँ लॆःॽमिम्पा हिङ्वा योम्पक्बाङ् ऎम्पक्मॆ हाङ् निवाँहाङ्बि निवाँयुङ् लॆःॽमाबाङ् परःक्मा पाब्नि। 2हाङ् ह होइखेपा सङ्क आन्नॆ बाप्टिस्मामि बारेबि, याॽमिचिमि निङ्टवाँ सक्पि हुक् युङमॆ बारेबि, सिखॆम्पाबाङ् हिङ्पॽमॆ खानावाँमि बारेबि हाङ् हानाम्स लुक्खॆॽनॆ डान्डामि बारेबि माङ्स खानावाँ चिन्मा पाप्पानिनि। 3मसॆ निवाँहाङ्ऎ मिनु हाङ्ग कानिऎ निवाँहाङ्मि बारेबि हङ्सिहा खानावाँ चिनिये।
4मान्ठाभनॆ एक्खेपा नुऎ खानावाँ वाप्मिम्पा याॽमिचि, हाङ् पारुबिऎ बारडाना टक्चामिम्पाचि हाङ् सॆङ्सॆङॆ लावा सङ्क टक्चामिम्पाचि, 5हाङ् निवाँहाङ्मि खानावाँ ऎॽवाकॆ नुऎ लॆ कामानुङ् लेमिम्पा याॽमिचि, हाङ् निवाँहाङ्ऎ डॆङ्पि मुकुहा चॆक्मावा योम्पक् खाङ्खुबा, 6याॽमि लॆःॽमि हाङ्स हाङ् खोचिऎ निवाँहाङ् याइकुचि हाङ्ग, उम्चि हिङ्वाबाङ् ऎक्पक्मिस्से निवाँहाङ्बि लाटॆॽमा हेनि। मान्ठाभनॆ गरॽहा याॽमिचिऎ ग उम्चि योम्पक्बाङ् निवाँहाङ्मि पासा होइखेपा सङ्क कुरुसाबि कॆङुकुचि हाङ् चोब्नमि ङारिङ्पि खोमि निङ् वेन्कुचि।
7ऎॽवा याॽमिचि चाइ डिरिक् वारि सिःॽमिम्पा बाखा रक्मा रेम। आक्क बाखाऎ आक्क बाखा डःक्खुबाखःक्खुबामि लागि डिरिक् उम्चा सिबिकु। हाङ् आक्क बाखा निवाँहाङ्ऎ आसिका पिकु। 8टर होइढा ऎॽवा याॽमिचि चाइ योम्पक् आपिक्खुबा चिचिङ् नुङ् सिउडि टे सिखुबा रक्मा लॆःक्मि। गरऎ बाखाबि ग निवाँहाङ्मि चाब्हिमा सि हाङ् मिःऎ हिड्ढाङ्।
9टर काङॆ नाम्नाम् पिसिॽमिम्पा बुबुनानुसाचि, काङ्का आन्नानुङ् आक्रहाङ् यामुकिङ्का हाङ्स आन्ना हिङ्चामिम्पा खानावाँबि एट्टान काम्नुऎ आसिका चुबिकानि कामानुङ् मिनुकिङ्का। 10मान्ठाभनॆ निवाँहाङ् निवाँनेन् लॆ। हाङ् आन्नॆ माङ् लॆटाम्नॆ आठावा मान्टहाङ् खो नाम्नाम् पिसिटाम्नॆ लोमॆ मिखॆटुनि। आन्नॆ खोम् याॽमिचि खाङाम्चिनि हाङ् खाङ्मे सङ्क पाइकाम्चिनि। 11हाङ् आन्नॆ निवाँहाङ्बाङ् टक्चाकुङ्का कामानुङ् लॆःॽमिम्पा आस टक्चाइर कामानुङ् लॆःॽमिम्पा रक्न आन्ना चोब्नबि हिङ्चारढारि आक्रक्मान निवाँ लिबिटानिर कामानुङ् काङ्का निवाँ हाङ्सिॽयु बाङ्न मिनुकिङ्का। 12मसॆ आन्ना लावाबि ऎट्टुबाङ् आलिसानॆ, टर आक्रक्मा याॽमि लिसानॆ, खोचिऎ निवाँहाङ्बि निवाँयुङ् लॆकुचि हाङ् निवाँहाङ्ऎ पिकानि कामानुङ् लोमिम्पा खानावाँ माटक्चारढारि हुङुक्मि।
निवाँहाङ्मि चाइबानऎ चुप्लाङ्
13निवाँहाङ्ऎ आबाराहामनुङ् चुप्लाङ् ठुॽमार खोबाङ् ढ्या आस सङ्क माआमिहासॆ खोसॆ खोम्न निङ् लामानुङ् चुप्लाङ् ठुॽमानुङ् गर लोसु, 14“चाइबान काङॆ आना आसिका पिःॽना, आनाम पिसानासाचि डिरिक् मुपिःॽना।”#उट्पाटि २२:१६-१७ 15हाङ् आबाराहामऎ हुङ्ढाङ्सु हाङ् निवाँहाङ्ऎ ठुॽक्मिम्पा चुप्लाङ् टक्चाउ।#६:१५ निवाँहाङ्ऎ चुप्लाङ् हिःगु हाङ्स आबाराहामऎ इसाहाक टक्चामामि लागि २५ निङ् हुङ्मिम्पा लॆटु।
16याॽमिचिऎ चुप्लाङ् ठुॽमार टाङ्पाबाङ् टुङ्घङ्पामि निङ्पि ठुबुचि हाङ् आक्क चाइबानऎ लि हाङ् आक्कुबि टङ्नॆ खानावाँ माङ्स लिनि। 17मसॆ निवाँहाङ्मि चुप्लाङ् टक्चाखुबाचि निवाँहाङ्मि चुप्लाङ् चाइबानऎ कामानुङ् खाङ्मिॽमाम् लागि खोसॆ सङ्क चुप्लाङ् ठुबु। 18मसॆ कानिनुङ् खोम् चुप्लाङ् नुङ् खानावाँ हिच्चिन चु हाङ् आक्क नासॆलॆहिनि मान्ठाभनॆ निवाँहाङ् हानाम्स ढाटु बङ्चानि। मसॆ कानिऎ कानिम् कॆक्पि युङ्मिम्पा निवाँ चॆकुवॆ मुमॆ ढ्या आसमि खानावाँ टक्चाकि, कानि खोबि हिङ्चामामि लागि खारि।
19ग कानिनुङ् चुऎ आस एट्टान चॆकुवॆ लॆहाङ् गरमर लॆःॽमा हेनि। गसॆ कानि निवाँहाङ्बाङ् मिउ टॆटिनि, बोरु गसॆ कानि आक्क चेबाङ् निवाँहाङ्मि एट्टान सॆङ्सॆङॆ ठालबि लाखॆकि। 20कानिमि लागि येसु याॽलन आक्क ठालबि खॆःॽडा। हाङ् खो कानि चोब्नमि लागि माल्किसेडेक रक्न चोब्न लःमि लागि चोब्बाङ् ढ्या याटाङ्पा लिसा।
ទើបបានជ្រើសរើសហើយ៖
हिबुरु 6: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society