हिबुरु 8
8
येसु कानिमि चोब्बाङ् ढ्या याटाङ्पा
1काङ्कॆ लोढाङ्मिम्पा चोब्बाङ् ढ्या खानावाँ चाइ माङ् भने, कानिनुङ् चोब्बाङ् ढ्या याटाङ्पा चु, खो पारुबि ढ्या निवाँहाङ्मि पेन्ठाम् ठालबिऎ चुप्ठिङ् पोट्टा पेन्डा।#खोम्मिम्पासाम् ११०:१ 2निवाँहाङ्ऎ मोसाबाङ् बाखाटेम्पि मुमिॽमिम्पा आक्क युङ्ठङ् याॽमिमि हुगॆ मुमिम्पा रेम। टर पारुबि चुऎ युङ्ठङ्, निवाँहाङ्ऎन मुमिम्पा यो। हाङ् ह येसुऎ योम्पक् यिक्ढाङ्मिम्पा एट्टान सॆङ्सॆङॆ ठाल चाइबानऎ युङ्ठङ् रेम।
3चोब्न चोब्बाङ् ढ्या याटाङ्पाचि भेटि नुङ् सङ्टिॽमॆ योम्पक् यिक्माम् लागि सॆःक्मिम्पा लिक्मि। मसॆ कानिमि चोब्बाङ् ढ्या याटाङ्पाऎ सङ्क एक्क ना एक्क सङ्टिॽमॆ योम्पक् ग निवाँहाङ्मि लागि लॆःॽमान लॆटा। 4हाङ् ह खो ग बाखाटेम्पिन चुआग याटाङ्पा आलिखुबा लॆटा। मान्ठाभनॆ आक्कुबि याटाङ्पाचि चुःक्मि खोचि ग याॽलऎ बाङ्न चुःक्मि खोचिऎ यायेॽमा रक्न सङ्टिॽमॆ योम्पक् यिगुक्मि। 5हाङ् खोचिऎ योम्पक् यिग्मॆ ठाल पारुबिऎ चाइबानऎ खानावाँ रक्मान खानावाँ नुङ् लावा टेःॽन यो। मान्ठाभनॆ मोसाऎ सॆङ्सॆङॆ युङ्ठङ् मुःमा परक्मार निवाँहाङ्ऎ गर लोमिम्पा लॆटा, “आना पॆस्सङ्पि खाङ्मिॽमिम्पा रक्न चोब्न मुमालॆकुना।”#पारास्ठान २५:४०
6टर येसुऎ टक्चामिम्पा योम्पक् होइढा याटाङ्पाचिबाङ्स योम्पक् पिक्खुबा लॆ। गरहाङ् येसुऎ निवाँहाङ् नुङ् खोम् याॽमिचिमि लुम्पि ठुॽमिम्पा चुप्लाङ् याॽलिऎ चुप्लाङ्बाङ् एट्टान ढ्या लॆ, मान्ठाभनॆ ग उम्चङ् चुप्लाङ्बि काम्नुहा खानावाँऎ पिकानि कामानुङ् लोडि। 7मान्ठाभनॆ याॽलऎ चुप्लाङ् आब्डिक मॆड्डिङ्मा लॆटा ग होइक चुप्लाङ् ठुॽमान आपाब्खुबा लॆटा। 8टर निवाँहाङ्ऎ खोम् याॽमिचिबि काइसॆ खानावाँ खाङ्टकु हाङ् खोसॆ लोसु,
“पारभुऎ गर लोसु, आक्क डिना टामेपाइ,
काङॆ इस्राएलि एक्क उम्चङ् याॽमिचि नुङ्
हाङ् याहुडामि खिम्पिहाचिनुङ् एक्क चुप्लाङ् ठुबुकुङ।
9हाङ् ग चुप्लाङ् खोचिमि टुबालाबाचिनुङ् काङॆ ठुॽमिम्पा चुप्लाङ् रॽमा लिनि।
आक्रल ग काङॆ खोचि हुक्पि लाब्मानुङ् मिस्र हाङ्टेम्बाङ् लाबकुङ्चि।
टर काङॆ खोचिनुङ् ठुॽमिम्पा चुप्लाङ् खोचिऎ माखेमुचि मसॆ काङॆ सङ्क खोचि खाङ्मा याइटुङ्चि।
10टर पारभुऎ गरहाङ् लोसु, ह टाऎ डिनाबि इस्राएलि याॽमिचि नुङ् काङॆ उम्चङ् चुप्लाङ् ठुबुकुङ।
हाङ् काङॆ काङामि यायेॽमा उम्चि निवाँबि युङ्पिकुङ्चि हाङ् उम्चि निवाँब्न साप्पिकुङ्चि।
हाङ् काङा खोचिमि निवाँहाङ् लिॽङा हाङ् खोचि काङामि याॽमिचि लिक्मि।
11हाङ् आक्रल आसॆ सङ्क टाङ्पामि गॆअङ्मॆअङ्बिहा
हाङ् टाङ्पामि याॽमिचि ‘पारभु लेसाम्नॆ’ कामानुङ् चिन्मा पाब्नि
मान्ठाभनॆ मिःछुपाबाङ् टुङ्घङ्पा चोब्न याॽमिचिऎ काङा लॆःॽङामि।
12हाङ् काङॆ खोचिमि हिङ्वा यङ्निपिकुङ्चि हाङ् खोचिम् आब्डिक हानाम्स मिॽलाङानि।”#यारमिया ३१:३१-३४
13हाङ् निवाँहाङ्ऎ ग चुप्लाङ् “उम्चङ्” लोमिम्पासॆ खोसॆ याॽलऎ चुप्लाङ् ढुप्पाट्ट मुसु। हाम्पे खानावाँ ढुप्पाट्ट मॆड्डिङ्मा हाङ् याॽलिहा लॆ आक्खा खानावाँ माखॆसे खॆ।
ទើបបានជ្រើសរើសហើយ៖
हिबुरु 8: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society