२ कोरेन्ठि 13
13
पावलमि डॆङ्पिऎ खानावाँ
1काङा आन्नाबि टामा परःक्डिङ। ग चाइ काङा आन्नाबि टामिम्पा सुम्चि खेपा लि। निवाँनेन् साब्चिराऎ “याॽमिचि टिमिम्पा आब्डिक हिप्पा सुम्पा याॽमिऎ सङ्क चाइबानऎ कामानुङ् चुमॆक्सङ् पिकुचि हाङ्टेःॽन आक्क चाइबानऎ यो लोमा लॆ इकु।”#यायेॽमा १७:६; १९:१५ 2काङा आन्नाबि टाइङ। आक्रल काङा आन्नाबि टामिम्पा हिच्चि खेपा लिमिम्पा लॆटा। काङॆ याॽल स आन्ना नुःर लोमिम्पा लॆटानि हाङ् ह आन्नामि लुम्पि माइङ्र सङ्क आक्क खानावाँन लोकानि। आक्कुबि डाप्ङार हिङ्वा लॆखुबाचि हाङ् होइढाचि आसस कॆ याइटानिनि। 3काङाबाङ् खिरिस्ट यामुऎ रु यामुनॆ कामानुङ् आन्नॆ चाइबान खाङ्मा मिकाम्नि। आन्नामि लुम्पि योम्पक् मुमार खो चॆक्मावा मॆड्डिङ्मा हॆॽनॆ, टर चॆक्मावा नुङ् योम्पक् यिगुक्। 4मान्ठाभनॆ खो चॆक्मावा मॆड्डिङ्मा लिमानुङ् कुरुसाबि कॆङ्माखॆच्चाआ, टर निवाँहाङ्मि चॆक्मावाबाङ् खो हिङ्चाःॽडा। गरहाङ्न काङ्का सङ्क खो रक्न चॆक्मावा मॆड्डिङ्मा लिडिङ्का, टर आन्ना मान्टहाङ् लॆःॽमा लॆकानिहा लोमॆ खानावाँबि काङ्का खोनुङ्न हिङ्चामिम्पा रक्न निवाँहाङ्ऎन चॆक्मावा पिकिङ्का।
5आन्ना निवाँयुङ्पि ऎॽवा चॆकुवॆ लॆकानिहा कामानुङ् टाङ्पॆ टाङ्पान ठागानॆ। आन्नॆ येसु खिरिस्ट आन्नानुङ् चु कामानुङ् वाप्मा लॆ। येसु खिरिस्ट आन्नाबि माआ हाङ्ग आन्ना ठाग्मार टॆगुकानि। 6हाङ् कानि चाइ मान्टॆक्लिङ्खॆडि कामानुङ् निवाँयुङ् लॆकानि लोमॆ खानावाँबि कॆ निवाँयुङ् लॆकुङ। 7हाङ् आन्नॆ माङ्स काइसॆ योम्पक् यिक्मा आसिॽल कामानुङ् आन्नामि लागि काङ्का निवाँहाङ् नुङ् पारठाना लॆकिङ्का। ग पारठाना चाइ काङ्का टाङ्पॆ टाङ्पान काम्नुहाचि कामानुङ् खाङ्मिॽमाम् लागि हॆॽनॆ, टर काङ्का चाइ योम्पक्बि टॆःक्लॆखुबा याॽमि रक्मान लिडिङ्का हाङ्स आन्नॆ चाइ नुऎ टे योम्पक् मुसानॆ मिनुकिङ्का। 8मान्ठाभनॆ काङ्का चाइबानऎ खानावाँ रक्न योम्पक मुकिङ्का, हाङ् हुन्नऎ खानावाँ रक्न माङ्स लॆटिटिङ्कानि। 9काङ्का माङ्स आलॆहिखुबाचिर लॆकिङ्का हाङ् आन्ना चॆक्मावा नुङ् चोब्न योम्पक् यिक्मा हेखुबा लिडानिहाबि काङ्का चेन्चाडिङ्का। आन्नामि निवाँयुङ्पि चॆकुवॆ लिसे खॆॽल कामानुङ् पारठाना लॆकिङ्का। 10मसॆ काङा आन्नानुङ् माइङर काङॆ ग साब्हाङ्डानि। काङा आन्नाबि टामार पारभुऎ काङा पिॽमिम्पा ढुप्पाट्ट आन्नामि लुम्पि काइर गारि पाइॽमा आसिॽङार। आक्क ढुप्पाट्ट चाइ खोसॆ काङा आन्ना नासॆलॆसि हॆॽनॆ, टर नुऎ लाम्फुबि टॆःॽमामि लागि पिॽमिम्पा रेम।
11बुबुनानुसाचि, ह ग साब्चिरा लुक्पिॽमा ठाबाक्मार कॆ लोकानि, हाङ्हाङ् मिनानॆ, हेर निवाँऎ चेप्खॆॽमा यगानॆ, एक्कसॆ होइकमि खानावाँ खेमानॆ, काम् खानावाँ खेमाम्नॆ, टङ्चाआनॆ। हाङ् निवाँहाङ्मि नाम्नाम् पिसिॽमा हाङ् सान्टि आन्नानुङ् लिर। 12एक्कसॆ होइक नाम्नाम् पिसिसे स्यामिपे चुआनॆ। 13खिरिस्टमि सॆङ्सॆङॆ याॽमिचिऎ आन्ना स्यामुहाङ्डानि। 14पारभु येसु खिरिस्टमि नाम्नाँवा, निवाँहाङ्मि सोम्टुॽवा हाङ् सॆङ्सॆङॆ लावामि साङ्गाटि आन्ना चोब्नुङ् लिढाङ्र।
ទើបបានជ្រើសរើសហើយ៖
२ कोरेन्ठि 13: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society