२ कोरेन्ठि 12
12
पावलऎ पारुमि सेन्चि टक्चामिम्पा
1काङॆ माङ्स टक्चाङानि हाङ्स हानाम्स ठॆँठॆँ लॆःॽमा सिडिङ। ह पारभुऎ काङा पिॽमिम्पा सेन्चि हाङ् खाङ्मिॽमिम्पा खानावाँमि बारेबि इकुङ। 2ग एपङ्ठु निङ् याॽलऎ खानावाँ यो। खिरिस्टबि निवाँयुङ् लॆखुबा एक्क याॽमि लाबा हाङ् आक्क याॽमि पारुढारिन लाखॆटा। आक्क याॽमि कॆ लेकुङ। हाङ् खो चाइ सालुङ्पि चुऎ रु लावाबि चुऎ लोमॆ खानावाँ काङॆ माङ्स लेङानि। टर निवाँहाङ्ऎ लेकु। 3काङा हस काॽङा हाङ् आक्क याॽमि कॆ लेकुङ् खो चाइ पारुढारिन लाखॆटा। खो सालुङ्पि चुऎ रु लावाबि चुऎ लोमॆ खानावाँ काङॆ माङ्स लेङानि। टर निवाँहाङ्ऎ लेकु। 4हाङ् खोसॆ आक्कुबि इमान हेनिहा खानावाँ खेमु। आक्खा खानावाँ याॽमिऎ इमान फॆन्नि। 5हाङ् ग याॽमिमि बारेबि काङा ठॆँठॆँ मिनुॽङा। टर काङामि बारेबि चाइ काङा माङ् खानावाँ मुहिङानि, आक्क खानावाँबि टेः ठॆँठॆँ मिनुॽङा। 6हाङ् काङा ठॆँठॆँ लॆःॽङा हाङ्स निवाँ माइङॆ याॽमि चाइ हॆॽङानॆ मान्ठाभनॆ काङा चाइबानऎ खानावाँ टेः यामुॽङा। टर काङा ठॆँठॆँ लॆःॽङानि मान्ठाभनॆ काङा याॽमिचिऎ काङॆ मुमिम्पा योम्पक् नुङ् यामुमिम्पा खानावाँ बाङ्स ढ्या लोङामिर कामानुङ् मिन्ङानि।
7मान्ठाभनॆ काङॆ आक्खा आक्खॆॽमाहा खानावाँ खाङ्मिम्पासॆ काङॆ एट्टान ठॆँठॆँ आलॆःॽङारा कामानुङ् निवाँहाङ्ऎ एक्क चिचिङ्ऎ रक्न काम् सालुङ्पि ठक्मिडु। आक्कसॆ काङा हानाम्स सालुङ् टुक्मिङा। आक्कसॆ साइटानमि पाङ्कुचाऎर काङा खागुॽङा हाङ् ठॆँठॆँ लॆःॽमाबाङ् ऎगुॽङा। 8काङॆ पारभु सुम्चि खेपा ग चिचिङ् काङाबाङ् लाबक्पिॽङॆ कामानुङ् नुःर लोसुङ। 9टर खोसॆ काङा गरहाङ् लोसिङ्, “आना सक्पि काम् नाम्नावाँ खेःॽल चु मान्ठाभनॆ काम् चॆक्मावा आनॆ माङ्स ऎमुहिमॆ योम्पक्पिन चॆकुवॆ खाङ्मु।” मसॆ खिरिस्टमि चॆक्मावा काङाबि लिर कामानुङ् काङॆ मुहिङानॆ योम्पक्पिॽन काङा चेन्चामानुङ् ठॆँठॆँ लॆःॽङा। 10मसॆ खिरिस्टमि लागि काङा माङ्स लॆःॽमा आहेखुबा लिमार, याॽमिचिऎ सिच्चाङामिर, खोप्चिनाॽवाबि सिःॽङार, याॽमिचिऎ डुखा पिःॽङामिर हाङ् डुखाबि सिॽमार चेन्चाःॽङा। मान्ठाभनॆ काङा माङ्स लॆःॽमा आहेखुबा लिःॽङा रक्न चॆक्मावा नुङ्मा लिःॽङा।
कोरेन्ठिबिहा याॽमिचिमि लागि पावलमि निवाँ
11आन्नॆ काङा गरहाङ् निवाँ मॆड्डिङ्मा याॽमिर पाइखुबा मुसिङ्नि। काङा माङ्स हॆॽङानॆ हाङ्स आन्नॆ काङामि बारेबि काम्नुऎ यामुबिॽमा लॆटॆ। मान्ठाभनॆ आक्खा ढ्या सॆःक्ढुङ्पाचिये लोकाम्चिनि खोचिबाङ् काङा स मॆॽमङ्ऎ हॆॽङानॆ। 12काङॆ आन्नामि लुम्पि आक्खॆॽमा लुहा खानावाँ, चिन्ना खाङ्मिॽमॆ योम्पक् हाङ् चॆक्मावाहा योम्पक् खाङ्मिसे काङा सॆःक्ढुङ्पाङा यो कामानुङ् चुमॆक्सङ् पिडानि। 13काङा पाबुःॽङॆ ठका होइडा मान्डालिबि ङाक्से डुखा पिट्टुङ्चि टर आन्नानुङ् चाइ माङ्स मालासे माल् काङॆ आन्ना काम् हुक्पि माआनिहा याॽमिचिर लॆटानिहॆ टा? चाइबान लोमार काङा पाबुःॽङॆ ठःका मान्ङागानि। आक्क योम्पक्पि काङा फॆल्लिङ्खारिङ् मसॆ यङ्निमा पिॽङानॆ।
14काङा होइखेपा सङ्क आन्नाबि डाब्मॆ पाइङा। ग चाइ आन्नाबि काङा टामिम्पा सुम्चि खेपा लि। काङा आन्नाबि टाःॽङार काङा पाबुॽङॆ ठःकामि लागि आन्नानुङ् चुहा खानावाँ हॆॽनॆ, टर आन्नामि निवाँ चाइ पिॽङानॆ कामानुङ् मिनुॽङा। मान्ठाभनॆ पासाचिऎ आपा आमामि लागि हॆॽनॆ, टर आपा आमॆ रे पासाचिमि लागि पिॽमा लॆःॽमि। 15आन्नामि लागि काङॆ चोब्ठका चेन्चासे पिकानि हाङ् काङान पिॽमा स हेकुङ। काङॆ आन्ना एट्टान नाम्नाम्म् पिसिकानि हाङ्ग, माल् आन्नॆ चाइ काङा मिःक्म टेः नाम्नाम् पिसिङानिहॆ टा? 16हाङ् काङा पाबुॽङॆ ठःका आन्नाबाङ् मॆन्लाङा लोमॆ खानावाँ आन्नॆ लेकाम्निन। हाङ्स आन्ना हङ्सिबि ऎॽवाचिऎ चाइ आन्ना फोप्सिसे बङ्सिटानि काकानि। 17माल् काङॆ पाङ्हाङ्मिम्पा याॽमिचिबाङ् आन्नाबाङ् माङ्माङ् लासुङॆ? 18काङॆ टिटास आन्नाबि खारॆ कामानुङ् नुःर लोसुङ् हाङ् खोनुङ् होइक नुसा स पाङ्हाङ्सुङ। माल् टिटासऎ आन्नाबाङ् माङ्माङ् लासुवॆ? खोसॆ आन्नाबाङ् माङ्स मॆन्लासु। खोनुङ् काङा एक्कन निवाँऎ लिसे एक्कन लाम्फुबि लाम्ढुसाचिगा।
19गरकॆ खानावाँ काङ्कॆ टाङ्पा टाङ्पान आन्नामि लुम्पि नुःचाक्मिहा याॽमिचि लिखाङ्माम् लागि इमिम्पा कामानुङ् मिनुकानि हला। टर निवाँहाङ्मि ङारिङ्पि खिरिस्टबि लिमानुङ् आन्नामि काम्नुऎमि लागिन इघा खानावाँ इमिम्पा यो। 20मान्ठाभनॆ काङा आन्नाबि टाःॽङार काङॆ मिन्मिम्पार आन्ना हाङ् आन्नॆ मिन्मिम्पार काङा लिङानि हला कामानुङ् किसिडिङ। आन्नामि लुम्पि खिमाटुमॆ, सिरि लॆःॽमॆ, सिरिऎ बुःॽमॆ, टाङ्पामि टेः नुऎ लिर मिन्मॆ, वोपे चुमॆ, एक्कमि खानावाँ होइकसॆ चेन्मॆ हाङ् कायाङ्पा मिन्मॆ योम्पक् लि। 21हाङ् काङा होइखेपा टाङार याॽलऎ बाङ्न हिङ्वा लॆखुबाचि, काइसॆ योम्पक् यिक्खुबाचि, ब्याबिचारा लॆखुबाचि हाङ् ङेसिमा लुऎ योम्पक् यिक्से आक्खा योम्पक्बाङ् निवाँ आऎन्खुबाचिम् लुम्पि निवाँहाङ्ऎ ङेसिमिःॽङा हला हाङ् आक्खा डिरिक् याॽमिचिमि लागि काङामि निवाँ टुगुक्।
ទើបបានជ្រើសរើសហើយ៖
२ कोरेन्ठि 12: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society