२ कोरेन्ठि 11
11
पावल नुङ् हुन्नहा सॆःक्ढुङ्पाचि
1काङा मिॽमिॽम निवाँ माइङॆ याॽमि लिःॽङा हाङ्स आन्नॆ आङ्पिॽङानॆ। 2मान्ठाभनॆ काङा आन्नानुङ् निवाँहाङ्मि सिरिऎ बुब्खॆडिङ। एक्क टेः खिम्टाङ्पामि सॆङ्सॆङॆ डाङ्मा लिमाम् लागि काङॆ आन्नामि भ्या खिरिस्ट नुङ् लॆपिॽमाम् लागि आन्ना ङागानि। 3टर साइटान बङ्चाखुबा पुसॆःॽमा लिमानुङ् हाब्बा लोमॆ मेॽनुङ्मा बङ्सिटिन्ट आन्नाबि चुऎ खिरिस्टमि नुऎ हाङ् सॆङ्सॆङॆ निवाँन फेल्लाङ् पिकानिहारु कामानुङ् किसिडिङ।#उट्पाटि ३:१-५,१३ 4आन्नॆ ग काङ्कॆ खेम्मिॽमिम्पा येसु हॆॽनॆ, टर होइकन येसुमि बारेबि याॽमिचिऎ इसुचि हाङ्ग खेम्काम्नि। हाङ् काङ्कॆ टक्चामिम्पा लावा नुङ् नुऎ खानावाँ हॆॽनॆ, टर होइकन लावा नुङ् नुऎ खानावाँमि बारेबि याॽमिचिऎ इसुचि हाङ्ग आन्नॆ खेमुकाम्नि। 5टाङ्पॆ टाङ्पान काङा बाङ्स ढ्या सॆःक्ढुङ्पाङाये मिन्खुबाचिबाङ् काङा माङ्पि सङ्क खुक्माबि माइङ्। 6काङा यामुमाबि ग मर याटाखुबा याॽमि लॆःॽङानि हाङ्स हानाम्स निवाँटाङ्पा लॆःॽङा लोमॆ खानावाँ काङॆ आन्ना काम्नुःर खाङ्मिडानि।
7काङॆ आन्ना टुङ्घङ्पाचि मुमाम् लागि काङा चाइ मिःछुपा लॆङ्से निवाँहाङ्मि नुऎ खानावाँ कॆ मरक्न खेम्मिटानि, माल् ग योम्पक् यिक्मार काङॆ हिङ्वा लॆटुङॆ? 8काङॆ आन्ना खाङ्मार पाबुहा याङ् होइक मान्डालिबाङ् लासुङ्। हाङ् आन्नॆ ग योम्पक चाइ काङॆ लुप्चाइन्ट लिसा कामानुङ् लोमा फॆन्नि! 9हाङ् काङा आन्नानुङ् पेन्मार पाबुःॽङॆ ठकामि लागि कॆ आन्ना ङाक्मानुङ् डुखा मान्पिट्टानि। आक्रल काङा पाबुॽङॆ चोब्न ठका माकेडोनियाबिहा बुबुनानुसाचिऎ पिट्टिङ्मि। हाङ् हस काङॆ आन्ना डुखा पिॽमा मिनानिनि हाङ् डॆङ्पि स पिट्टानिनि।#फिलिप्पि ४:१५-१८ 10हाङ् मान्टहाङ् खिरिस्ट चाइबानऎ हाङ् आक्क काङा हङ्सि चु, आखाइया लोमॆ ठालबिहा चोब्न याॽमिचिऎ काङॆ ठॆँठॆँ लॆसे इकुङॆ खानावाँ चेन्हिसुचिनि। 11मान्ठा काङॆ गर लॆःॽङॆ? माल काङॆ आन्ना नाम्नाम् मान्पिस्सिम्पासॆ हॆ? कॆ आन्ना नाम्नाम् पिसिकानि लोमॆ खानावाँ निवाँहाङ्ऎ लेकु।
12हाङ् कॆ मुढाङ्पा योम्पक् यिक्ढाङ्कुङ्। हाङ् टाङ्पॆ टाङ्पान सॆःक्ढुङ्पा काखुबा आक्खा याॽमिचिऎ काङ्कॆ रक्न योम्पक् यिगुकिङ्का कामानुङ् नाबुक् ठेॽमा हेसुचिनि। 13मान्ठाभनॆ आक्खा याॽमिचि हुन्नहा हाङ् बङ्चाखुबा योम्पक् यिक्खुबा सॆःक्ढुङ्पाचि यो। खोचि खिरिस्टमि सॆःक्ढुङ्पार पाइखाङ्मि। 14हाङ् ग खानावाँ आक्टिखॆॽमॆ खानावाँ हॆॽनॆ, मान्ठाभनॆ साइटान स ओऎ निवाँखाटॆखुबार खाङ्मुमा हेकु। 15मसॆ साइटानमि योम्पक मुखुबाचि स निवाँनेन् योम्पक मुखुबार खाङ्मुमॆ खानावाँ आक्टिखॆॽमॆ खानावाँन चाइ हॆॽनॆ। डॆङ्पि ग आक्खाचिऎ टाङ्पाम योम्पक रक्न डान्डा टक्चाकुचिन।
पावलमि डुखा
16काङा हस काॽङा, काङा आसॆस निवाँ मॆड्डिङ्मा याॽमि कामानुङ् आमिॽङामिर। आन्नॆ काङा निवाँ मॆड्डिङ्ऎ मिःॽङानि हाङ्स मिॽङानॆ, आक्र मिम्मानुङ्न काम् खानावाँ खेमाम्नॆ। मरहाङ् काङॆ मिॽमिॽम हाङ्स काम् नाबुक् ठेॽहिकुङ। 17चाइबान ग नाबुक् ठेस्से खानावाँ इटिॽमानुङ् काङा निवाँ मॆड्डिङ्मा याॽमि रक्न यामुमॆ पाइङा। ग खानावाँ पारभुबाङ् टामिम्पा हॆॽनॆ। 18मान्ठाभनॆ डिरिक् याॽमिचि खोचिऎ मुमिम्पा योम्पक्पि नाबुक् ठेरुक्मि। मरहाङ्न काङा स काम् योम्पक्पि नाबुक् ठेरुकुङ्। 19मान्ठाभनॆ निवाँ मॆड्डिङ्हा याॽमिचि चेन्चासे आङ्खुबा आन्ना एट्टान निवाँटाङ्पा याॽमिचि रेम। 20चाइबान लोमार याॽमिचिऎ आन्ना योम्पक् मुखुबा मुकानि, खुप्चाक्मि, लुप्चाक्मि, ढ्या खानावाँ इखाङ्मि हाङ् यापक्पि फॆगुकानि हाङ्स आङुकाम्नि। 21टर काङ्का चाइ आक्रॽमा योम्पक् मुमा ङेसिइङ्का लोमॆ कॆ लेकुङ्।
टर याॽमिचिऎ नाबुक् ठेॽमॆ निवाँ मुकुचि हाङ्ग काङॆ स नाबुक् ठेॽमा लेकुङ। चाइबान लोमार काङा आन्नानुङ् निवाँ माइङॆ याॽमिर यामुमे पाइङा। 22माल् खोचि हिबुरुचि हॆॽनॆ? काङा स मन। माल् खोचि इस्राएलिचि हॆॽनॆ? काङा स मन। माल् खोचि आबाराहाममि पासाचि हॆॽनॆ? काङा स मन। 23माल् आक्खाचि खिरिस्टमि योम्पक मुखुबाचि हॆॽनॆ? काङा निवाँ मॆड्डिङ्मा याॽमिर यामुमे पाइङा हाङ्स काङा खोचिबाङ्स काम्नुऎ योम्पक् यिक्खुबाङा रेटा। खोचिबाङ्स डिरिक् योम्पक् यिक्डिङ्। ऎॽवा खेपा काङा सॆक्चिम्पि सिट्टिङ् हाङ् ऎॽवा खेपा कर्राऎ रक्चामा खाइहाङ्चाइङ् हाङ् ऎॽवा खेपा झान्नॆ सिसुसिखारिङ्।#सॆःक्ढुङ्पा १६:२३ 24याहुडिचिऎ काङा ङाचि खेपाबि कर्राऎ सुपङ्ना खेपा रगिङ्मि।#यायेॽमा २५:३ 25सुम्चि खेप्पा रोमिचिमि हुक्बाङ् डान्ठाऎ रक्मा टुम्चाइङ। याॽमिचिऎ एक्खेपा लुङ्कॽवाऎ डॆसिॽमाम् लागि डॆरिङ्मि। हाङ् सुम्चि खेप्पा काङा ठाङ्मिम्पा योवाखङ्न नासॆलिखारा हाङ् काङा इॽयाक् लेन्लेन् सेन्सेन पॆरॆरॆमाबिन पेन्डिङ।#सॆःक्ढुङ्पा १६:२२; १४:१९
26हाङ् काङा वाइमार लाम्फुबि हङ्माबाङ्, लुप्चाखुबाचिबाङ्, काङाम्न याॽमिचिबाङ्, हॆॽनिबारेक्चिबाङ्, हाटाबिहा याॽमिचिबाङ्, आसास पेन्मिनिहा ठालबाङ्, पॆरॆरॆमाबाङ् हाङ् हुन्नहा खानावाँ चिन्खुबा बुबुनुसाचिबाङ् डुखा आङुङ्।#सॆःक्ढुङ्पा ९:२३; १४:५ 27इम्मास मान्इम्चारे हेर होप्ठेॽवा बिरिरि नुङ्स योम्पक् मुसिङ। चामा डुङ्मा स मॆड्डिङ् लिसिङ् हाङ् ऎॽवा खेपा बखार स मान्चाटॽङा। हाङ् चुङ्पि चे मॆड्डिङ् पेन्मा सिःडिङ। 28गरक्टे हॆॽनॆ, चोब्न मान्डालि कॆ मुबाक्मा लॆःॽमि लोमॆ खानावाँ काम् निवाँबि हानाम्स चुऎसे आक्कसॆ स काङा डुखा पिट्टिङ्। 29एक्क नुसा निम्सुरो लॆ हाङ्ग काङा सङ्क खो रक्न लियुक्सिङ् हाङ् एक्क नुसा हिङ्वाबि सिट्टा हाङ्ग काङा एट्टान याक्चायुक्सिङ। 30हाङ् काङॆ काम् नाबुक् ठेॽमान सिट्टा हाङ्ग कॆ काङा हङ्सि माआह खानावाँ इमाबि काम् नाबुक् ठेरुकुङ। 31हाङ् काङा बङ्चाङानि लोमॆ पारभु येसुमि निवाँहाङ् आपाऎ लेकु। खो हानाम्स चुङ्मा लॆऎ निवाँहाङ् यो। 32हाङ् काङा डामास्कासबि चुइङ्र, आक्कुबिऎ आरिटस यिॽमॆ हाङ्मि खुक्माबिऎ टुङ्घङ्पाऎ काङा लाब्माम् लागि याॽमिचि हाटा खाङाम्नॆ कामानुङ् लोमिम्पा लॆटुचि।#सॆःक्ढुङ्पा ९:२३-२५ 33टर एक्क बचॽवाबि डॆन्टिङ्मि हाङ् हाटामि गारमि झ्यालाबाङ् खुराङ्सिङ्मि हाङ् काङा खोम् हुक्बाङ् हिङ्चाइङ।
ទើបបានជ្រើសរើសហើយ៖
२ कोरेन्ठि 11: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society