१ टिमोठि 5
5
डिरिक खालाहा याॽमिचि खानावाँ इमिम्पा
1पासिङ्चि काइर आवोसॆचॆ, टर टाङ्पामि आपार मिन्से काम्नुःर खानावाँ इसॆचॆ। हाङ् मिछुॽहा वेन्चाचि चाइ टाङ्पामि नुसाचि रक्न लोसॆचॆ। 2हाङ् आक्रहाङ्न टाङ्पाबाङ् टुम्मि मेॽनुङ्माचि नुङ् आमाचि रक्न यामुसॆ, हाङ् खुक्माबिहाचि नुङ् चाइ नुसाचि नुङ् रक्न काम्नुऎ निवाँऎ खाङॆचे। 3खाङ्मान लॆःॽमिहा लाङ्मिॽमाचि नुःर खाङॆचॆ। 4टर लाङ्मिमाचिम् पासा याङ्मिन् चुःक्मि हाङ्ग, आक्खा पासा याङ्मिन्चिऎ टाङ्पाम् खिम्पिहा आक्खाचि खाङ्मानुङ् खिम्पिॽन चोब्नबाङ् याॽलि निवाँनेन् लिमा हाङ् आमा नुङ् माॽमाचिऎ टिमिम्पा गुना फङुचिर। मान्ठाभनॆ ग निवाँहाङ्ऎ नेन्चाकुवॆ खानावाँ यो।
5चाइबान डुखाबि सिॽमिम्पा हाङ् चोप्पसॆ याइमिम्पा लाङ्मिॽमाऎ चाइ चोब्न खानावाँ निवाँहाङ्पिॽन युङ्कु, खो लेन्टा सेन्टा काम्नुःर निवाँहाङ्पि ङाग्से पारठाना लॆःॽमॆ योम्पक्पि लागालिढाङ। 6टर निवाँबि माङ्माङ् टाक्र ममनः लॆखुबा लाङ्मिॽमा चाइ हिङ्चा हाङ्स सिखॆॽमिम्पा रकॆन। 7निवाँयुङ् लॆखुबाचि इघा खानावाँ लोसॆचॆ। मसॆ खोचि आसॆस काइर लोहिसुचिनि। 8ऎॽवाचिऎ चाइ टाङ्पामि याॽमिचि, मबाङ्स खिम्पिहाचिन सङ्क खाङुचिनि हाङ्ग गसॆ खिरिस्टबि निवाँयुङ् लॆःॽमा याइमिम्पा खानावाँ खाङ्मुकु। हाङ् खोचि निवाँयुङ् आलॆखुबाचि बाङ्स काइसाचि लिःक्मि।
9ठुपङ् निङ् याक्मिम्पा हाङ् एक्क टे खिम्टाङ्पामि खिम्टाङ्मा लिमिम्पा मेॽनुङ्मा टेःॽन लाङ्मिॽमाचिम् निङ् साप्ठाम् साॽमाराबि टिसॆ। 10हाङ् काम्नुऎ योम्पक्बाङ् खो याॽमिचिम् लुम्पि लेमिम्पा लिमा लॆ। गरहाङ्न टाङ्पामि पिसाचि काम्नुःर कुबक्मिम्पा हाङ् टाबाङ्चि खोम् खिम्पि काम्नुःर लॆःॽमिम्पा, निवाँयुङ्पि लाम्ढुखुबाचिम् लाङ् सःक्पिॽमिम्पा हाङ् डुखाबि सिॽमिम्पाचि खाङ्मिम्पा हाङ् चोब्न खालाहा काम्नुहा योम्पक्पि निवाँ टिमिम्पा लिमा लॆ।
11टर लाङ्मिॽ लाङ्मिॽमाचिम् निङ् चाइ आक्क साॽमाराबि आटिसॆ, मान्ठाभनॆ डॆङ्पि खोचि भ्या लॆःॽमा मिनुक्मि हाङ् लाङ्मिॽमाम् रुपाबि खिरिस्टमि योम्पक् मुःॽङा कामानुङ् लॆःॽमिम्पा उम्चि चुप्लाङ् मिखॆकुचि। 12गरहाङ् खोचिऎ उम्चि याॽलऎ चुप्लाङ् मिखॆम्पासॆ डान्डाबि सिक्मि। 13मबङ्स, खोचि ऎट्टुबाङ् लिक्मि, खिम्खिम्पि वाइसे हुन्न पिन्टिखुबा लिक्मि। हाङ् आक्र टे हॆॽनॆ, खोचि खानावाँ फॆट्टिसे होइढाचि फुसिखुबाचि हाङ् यामुमान फॆन्नॆ खानावाँ यामुखुबा लिःक्मि। 14मसॆ काङा ग लाङ्मिॽ लाङ्मिॽमाचिऎ भ्या लॆःमिर, चाचाचि टगुचिर, टाङ्पामि खिम् खाङुचिर गरहाङ् कानि सिच्चाखुबाचि काइर लोमॆ लाम् आपिट्टुचिर मिनुॽङा। 15कॆग लोकुङ् मान्ठाभनॆ ऎॽवाचिऎ लाङ्मिॽमाचि चाइ साइटान पोट्टा खाइहाङ्डामि। 16निवाँयुङ् लॆखुबा मेॽनुङ्माचिम् खिम्पि लाङ्मिॽमाचि चुःक्मि हाङ्ग खोचिऎन खाङुचिर। हाङ् मान्डालिऎ उम्चि डुखा खिम्मा आसिॽल, मसॆ चाइबान डुखाबि सिॽमिम्पा लाङ्मिॽमाचि खाङ्हिसुचिर।
17मान्डालि नुःर खाङ्खुबाचि हिच्चि खानावाँबि#५:१७ हिच्चि खानावाँ लोमिम्पा चाइ याङ् टक्चामा हाङ् होइढा योम्पक् मुमा लोमॆ रेम। ङेप्माम् लागि नुऎ लिःक्मि। आक्कबाङ्स निवाँहाङ्मि खानावाँ चिन्खुबॆ नुङ् खेम्मिखुबॆ गग टक्चामान लॆ। 18मान्ठाभनॆ निवाँनेन् साब्चिराऎ लोकु, “डाँइ लॆःॽमाम् लागि हिःक्भुङ्पा पिक् मह्ला आटिसाम्नॆ” हाङ् “योम्पक् मुखुबॆ नाम्याक् टक्चामा लॆ।”#यायेॽमा २५:४; लुका १०:७ 19हिप्पा सुम्पा याॽमिचिऎ चुमॆक्सङ् मापिॽलढारि मान्डालिबि योम्पक् मुखुबा सक्पि टिमिम्पा आब्डिक् आखेमॆ। 20हिङ्वा लॆढाङ्खुबाचि मान्डालि खाङ्खुबाचि चोब्न याॽमिचिम् लुम्पि वोसॆचॆ, मसॆ मान्डालिबि योम्पक् मुखुबा होइढाचि सङ्क किसिक्मि।
21निवाँहाङ्, खिरिस्ट येसु हाङ् सॆःक्मिम्पा निवाँखाटॆखुबाचिम् निङ्पि कॆ आना लोक्ना। इघा योम्पक् काम्नुःर यिगॆ। 22मान्डालिबि योम्पक् मुखुबा याॽमि सॆःक्मा आहॆङॆ। हाङ् उम्चि हिङ्वामि एक्क भाग आलिसॆ। टाङ्पाम् हिङ्खामा हानाम्स सॆङ्सॆङॆ युक्से। 23आनाम् बक् हसहस टुक्पऎसॆ योवा टे हॆॽनॆ टर मिॽमिॽम सिढामि लागि डिबु सङ्क डुङ्से लॆटॆ। 24ऎॽवा याॽमिचिम् हिङ्वा चाइ मरक्लन खाङ्मुखुबा लि हाङ् सॆॽलन न्यायॆ लिखॆ। टर ऎॽवाचिम् हिङ्वा चाइ डॆङ्पि टे खाङ्मुब। 25मरहाङ्न ऎॽवा काम्नुहा योम्पक् याॽलिन खाङ्मु हाङ् खाङ्मुनिहा सङ्क इॽया खाङ्मु।
ទើបបានជ្រើសរើសហើយ៖
१ टिमोठि 5: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society