१ टिमोठि 4
4
हुन्नहा खानावाँ चिन्खुबाचिम् बारेबि खानावाँ
1सॆङ्सॆङॆ लावाऎ नुःर इकु, डॆङ्पिऎ लःबि ऎॽवा याॽमिचिऎ चाइबानऎ निवाँयुङ् माइकुचि। हाङ् खोचि बङ्चाखुबा लावाबि ऎन्खॆःॽमि हाङ् चाप्चिऎ लोमिम्पा खानावाँ खेम्कुचि। 2आक्रक्मा खानावाँ चाइ ढाटु बङ्चाखुबा हाङ् हुन्नहाचिबाङ् टा मान्ठाभनॆ काइसॆ नुङ् काम्नुऎ फाक्मॆ उम्चि निवाँन सिखॆम्पा लि 3खोचिऎ भ्या लॆःॽमा फॆन्नि हाङ् निवाँयुङ् लॆःॽमानुङ् चाइबानऎ खानावाँ वाप्खुबाचिऎ निवाँहाङ् ओहाक् पिस्से चामा नुहा निवाँहाङ्ऎ मुबिॽमिम्पा ऎॽवा खालाहा चामा ठका चामा फॆन्नि कामानुङ् याॽमिचि चिनुकुचिमि। 4निवाँहाङ्ऎ मुमिम्पा चोब्न ठका नुऎ लॆ। मसॆ निवाँहाङ् ओहाक् पिस्से टाबा हाङ्ग माङ् ठका सङ्क ऎल्लाङ्मा पाप्नि। 5मान्ठाभनॆ निवाँहाङ्मि खानावाँ हाङ् पारठानाऎ आक्क चामा नुऎ मुकु।
6आनॆ इघा खानावाँ बुबुनानुसाचि चिनुचिना हाङ्ग, आना खिरिस्ट येसुमि योम्पक् पिक्खुबा याॽमि लिक्ना। आनॆ चिन्मिम्पा निवाँयुङ्पिऎ चाइबानऎ खानावाँ हाङ् टिङ्मिम्पा नुऎ खानावाँ खाङ्मिहिकुना। 7निवाँहाङ्बाङ् मिउ टॆखुबा आरेॽऎ हुन्नाहा खानावाँबाङ् मिउन पेनॆ। बोरु टाङ्पॆ टाङ्पान भाक्टि लॆःॽमा चिनॆ 8आक्कुबि गरक्मा खानावाँ चु सालुङ्मि लागि चिन्मिम्पा योम्पक्ऎ मिःक्म टे काम्नुऎ योम्पक् यिगुकु, टर निवाँहाङ्मि भाक्टिमि हिङ्खामाऎ चाइ चोब्न खानावाँमि लागि नुऎ लि। हाङ् हमि हाङ् डॆङ्पिऎ हिङ्खामामि लागि सङ्क चुप्लाङ् हिगुकु। 9ग चाइबानऎ खानावाँ यो, मसॆ चोप्पासॆ निवाँयुङ् लॆःॽमा लॆ। 10मसॆॽन कानि कानिम् निवाँयुङ्मि लागि नुःर पाइकि, मान्ठाभनॆ कानिऎ हुङ्मिम्पा खानावाँ पाइखुबा निवाँहाङ्पि युङ्डा। खो चाइ चोब्न याॽमिचिम् हाङ् आक्क बाङ्स खोबि निवाँयुङ् लॆखुबाचिम् फाक्खुबा रेम।
11हाङ् चोब्न निवाँयुङ् लॆखुबाचि मिठ्टुहा खानावाँ चिनॆचॆ, हाङ् कॆ लोसिन्टॽन लॆटानॆ कामानुङ् लोसॆचॆ। 12वॆन्चा लॆःॽना हाङ्स आसॆस आना सिक्मा आहेमिर। टर निवाँयुङ् लॆखुबाचिम् लुम्पि आम् खानावाँबि, हिङ्खामाबि पाइमाबि, नाम्नाम् पिसिॽमाबि, निवाँयुङ्पि हाङ् सॆङ्सॆङॆ लिमाबि टिङ्मा लॆऎ याॽमि लिसॆ। 13काङा माटारढारि आनॆ मान्डालिमि लागि निवाँनेन् साब्चिरा पाढालिबिॽमाबि लागि निवाँ टिसॆ, खेम्मिटॆचॆ हाङ् चिनॆचॆ।
14आनाबि चुऎ बारडाना माङ्स हॆॽनॆ कामानुङ् आमिनॆ, म बारडाना मान्डालिबि योम्पक् मुबाक्खुबाचिऎ निवाँहाङ्बाङ् यामुसे आना सक्पि हुक् युङ्मार टक्चाडुनॆ रेम। 15आनाम् चोब्न निवाँ इघान लॆःॽमाम् लागि टिसे हाङ् चोब्न याॽमिचिऎ आनाम् नुऎ खाङहिसुचिर। 16टाङ्पा हाङ् टाङ्पॆ चिन्मिम्पा खानावाँबि नुःर निवाँ टिसॆ। हाङ् आक्क योम्पक्पि लागालिढाङ्सॆ। आक्र लॆटाना हाङ्ग, आनॆ आनान हाङ् आनाम् खानावाँ खेम्खुबाचि सङ्क हिङ्पक्मिकुचिना।
ទើបបានជ្រើសរើសហើយ៖
१ टिमोठि 4: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society