१ टिमोठि 6
6
1योम्पक् मुमाम् लागि ठुप्टिखॆॽमिम्पा निवाँयुङ् लॆखुबा चोब्नऎ टाङ्पामि टुङ्घङ्पा हानाम्स नुःर लॆःॽमान लॆ। मसॆ निवाँहाङ्मि निङ् हाङ् काङ्कॆ चिन्मिम्पा खानावाँ याॽमिचिऎ इचाउचिनि। 2निवाँयुङ् लॆखुबा टुङ्घङ्पाचि उम्चि योम्पक् मुमाम् लागि ठुप्टिखॆॽमिम्पाचिऎ निवाँयुङ् लॆखुबा बुबुनानुसाचिनोओ कामानुङ् ङेःप्मा आयाइटुचिर। बोरु खोचिऎ उम्चि टुङ्घङ्पाचि एट्टान ङॆबुचिर, मान्ठाभनॆ खोचिम् योम्पक्बाङ् खोचिऎ नाम्नाम् पिसिम्पा निवाँयुङ् लॆखुबाचिम्न काम्नुऎ लिबिकुचि। गरहा खानावाँन लॆःॽमा आनॆ चिनॆचॆ हाङ् चङ्पकॆचॆ।
हुन्नऎ खानावाँ हाङ् चाइबानऎ चासुम्
3ऎॽवाचिऎ चाइ कानिनुङ् टङ्नॆ खानावाँ चिनुकुचि हाङ्ग, खोचि कानिम् पारभु येसु खिरिस्टमि भाक्टिमि चाइबानऎ खानावाँ नुङ् निवाँहाङ्मि लाम्फुबि लाखॆॽमॆ खानावाँ नुङ् टङ्मिनि। 4खो ग टाङ्पॆ चिन्मिम्पा खानावाँ माङ्स मावाप्रे काङानङाऎ मिनुकु। हाङ् पाप्निहा खानावाँ लामा मिनुक्, साम्देन्ऎ लोमा यकुवॆ खानावाँबि याटक्माटक् नुङ् खिमाटुमा नेन्चाकु। आक्खा खानावाँऎ ग होइढाचि काइर मिॽमॆ, याटक्माटक्, काइसॆ खानावाँ, हुन्न साङ्का लॆःॽमॆ हानाम्स लुक्खॆॽनॆ याटक्माटक् टे लाबकु। 5हाङ् गरहा याॽमिचिम् निवाँन नासॆलिमिम्पा लि हाङ् खोचि चाइबानऎ खानावाँबाङ् मिउन पेनुक्मि। खोचि हानाम्स भाक्टि लॆःॽमॆ योम्पक् चाइ याङ् डुॽमॆ योम्पक् मिनुक्मि।
6टर चेन्चामानुङ् भाक्टि लॆःॽमॆ योम्पक् चाइ म चासुम् डुॽमॆबाङ् स ढ्या यो। 7मान्ठाभनॆ कानि ग बाखाटेम्पि जान्म लिमार माङ्स मालाटे हाङ् सिखॆॽमार सङ्क माङ्स लाखॆॽनि। 8मसॆ कानिनुङ् चामा नुङ् चाङ्माहा चे चु हाङ्ग चेन्चामा ले। 9टर चासुम्टाङ्पा लिमा यक्खुबाचि काइसॆ खानावाँबि सिक्मि हाङ् चिःप्लुङ्पि सिट्टिखॆःॽमि, एट्टान हुन्नहा नुङ् काइसॆ निवाँबिऎ खानावाँबि रुमुक्मि। हाङ् आक्कसॆ खोचि लुक्खॆॽमॆ खानावाँबि होबब लाखॆकुचि। 10मान्ठाभनॆ चासुम्पि टेःॽन निवाँ टिमॆन चोब्न काइसॆ खानावाँमि साम् रेम। ऎॽवाचि याङ्मि लोभाऎ उम्चि निवाँयुङ्न माइडुचि। हाङ् उम्चि टाङ्पॆॽन एट्टान डुखाबि सिॽमिडुचि।
टिमोठिमि लागि पावलमि खानावाँ
11टर निवाँहाङ्मि याॽमि आना चाइ आक्खा काइसॆ खानावाँबाङ् मिउन पेनॆ हाङ् निवाँनेन् लिमॆ खानावाँबि निवाँहाङ्मि लाम्फुबि लाम्ढुमाबि, निवाँयुङ्पि, नाम्नाम् पिसिॽमाबि, योम्पक् यिक्ढाङ्मॆ खानावाँबि हाङ् नुःर पाइमॆ खानावाँबि निवाँ टिसॆ। 12निवाँयुङ्मि लागि नुःर पाइटॆ। आना हानाम्स आसिखॆॽमॆ हिङ्खामा टक्चामाम् लागि सेःॽमिम्पा लॆटाना। म खानावाँ आनॆ डिरिक् याॽमिचिम् लुम्पि टाङ्पामि निवाँयुङ्मि चुमॆक्सङ् नुःर खाङ्मिॽमिम्पा लॆटुना, म खानावाँबि हानाम्स लिढाङ्सॆ। 13चोब्न ठका हिङ्चामिक्खुबा निवाँहाङ् नुङ् पान्टियास पिलाटासमि ङारिङ्पि चाइबान चुमॆक्सङ् पिक्खुबा खिरिस्ट येसुमि निङ्पि कॆ आना काम्नुःर लोक्ना, 14फेरि कानिम् पारभु येसु खिरिस्ट मॆटारढारि ग निवाँहाङ्मि चोब्न खानावाँ आब्डिक् मॆड्डिङ् युङॆ।
15म होइखेपा सङ्क खो पाङ्हाङ्मॆ योम्पक् चाइ निवाँहाङ्ऎ खोम् काम्नुऎ लःबि लॆकु।
हाङ् निवाँहाङ्न चोब्न ठकामि टुङ्घङ्पा यो। हाङ् खोम् निङ् ठेॽमा खेन्चाकु। खोन हाङ्चिम् सङ्क हाङ् नुङ् पारभुचिम् सङ्क पारभु यो।
16हानाम्स आसिखॆखुबा खो टेःॽन। खो आसॆस आखाङ्हिमॆ हाखुबा ठालबि पेनुक् हाङ् आक्क हाखुबाबि आसास खॆॽहिमिनि। आसॆस खो माखाङ्टिटुचि हाङ् खाङ्मा स हेसुचिनि। खोमि निङ् सङ्पि लिर हाङ् हानाम्स खोम् हाङ्डाम् लिढाङ्।
17बाखाटेम्पिह चासुम्टाङ्पाचि काङानङाऎ मिम्मा याइटानॆ कामानुङ् लोसॆचॆ। हाङ् लुक्खॆऎ चासुम्बि निवाँ आटिसानॆ, टर कानि चोब्न ठका खेःॽल पिस्से एट्टान चेन्चामिक्खुबा निवाँहाङ्बि निवाँ टिसानॆ लोसॆचॆ। 18खोचिऎ काम्नुहा योम्पक् यिक्मिर हाङ् काम्नुहा योम्पक्मि चासुम्टाङ्पाचि, ढ्या निवाँ नुङ्मा हाङ् होइढाचिनुङ् हाचाखुबाचि लिसानॆ कामानुङ् लोसॆचॆ। 19गरहाङ् खोचिऎ खोचि टाङ्पॆॽन उम्चि लागि डॆङ्पि टाऎ चाइबानऎ हिङ्खामामि लागि चासुम् खोम्भुङ्सुचिर। गरहाङ् खोचिऎ चाइबानऎ हिङ्खामा टक्चाकुचि।
20खाङॆ टिमोठि, आना पिॽमिम्पा योम्पक् काम्नुःर यिगॆ। हाङ् निवाँहाङ्बाङ् मिउ टॆखुबा हाङ् हुन्नहा खानावाँबाङ् मॆअङ् पेनॆ। ऎॽवा याॽमिचिऎ चाइ मावाप्रे आक्खा खानावाँ निवाँ पिक्खुबा खानावाँ लोकुचि। 21मान्ठाभनॆ ऎॽवाचि आक्खा हुन्नऎ खानावाँबि लागालिडामि हाङ् उम्चि निवाँयुङ् माइडुचि। आन्नानुङ् निवाँहाङ्मि नाम्नावाँ लिर।
ទើបបានជ្រើសរើសហើយ៖
१ टिमोठि 6: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society