१ पाट्रुस 2
2
हिङुऎ लुङ्कॽवा हाङ् सॆङ्सॆङॆ याॽमिचि
1मसॆ चोब्न काइसॆ खानावाँ, ढाँटु बङ्चामॆ खानावाँबाङ् मिउन पेनानॆ हाङ् हुन्नऎ खानावाँ इटिॽमॆ, सिरि लॆटिॽमॆ हाङ् इचाटिॽमॆ योम्पक् याइटानॆ। 2हाङ् हहन जान्म लिमिम्पा चाचाचिऎ डुरु डुङ्मा यगिन्टक्न आन्नॆ लावामि डुरु डुङ्मा यगाम्नॆ, आक्कसॆ आन्ना फाक्मॆ खानावाँबि पुबक्मिकानि। 3मान्ठाभनॆ पारभु ऎॽवाकॆ नाम्नावाँ नुङ्मा लॆऎ लोमॆ खानावाँ आन्नॆ वाप्सिडाम्नि।
4हाङ् खोबि खारानॆ, खो याॽमिचिऎ सिच्चामिम्पा टर निवाँहाङ्मि लागि चाइ एट्टान योम्पक् पिक्खुबा हिङुऎ लुङ्कॽवा रेम। 5आन्ना स हिङ्चाऎ लुङ्कॽवा लिमानुङ् टाआनॆ हाङ् लावामि निङवाँहाङ्मि खिम् हेप्माम् लागि टाङ्पेटाङ्पान सङ्टिॽसाम्नॆ। आक्कुबि आन्ना येसु खिरिस्टबाङ् निवाँहाङ्ऎ नेन्चाकुवॆ सङ्टिॽखुबा सॆङ्सॆङॆ याटाङ्पाचिमि योम्पक् यिगुकानि। 6मान्ठाभनॆ निवाँनेन साब्चिराबि गरहाङ् साब्डा,
“खाङाम्नॆ, काङॆ सॆःग्मिम्पा हाङ् एट्टान योम्पक् पिक्खुबा एक्क लुङ्कॽवा युङ्कुङ्
हाङ् खोबि निवाँयुङ् लॆखुबा आसास ङेसिमाबि सिॽनि।”#यासाइया २८:१६
7मसॆ आन्ना आसॆ खोबि निवाँयुङ् लॆडाम्नि खो आम्नि लागि एट्टान योम्पक् पिक्खुबा लुङ्कॽवा रेम। टर निवाँयुङ् आलॆखुबाचिम् लागि चाइ
“खो ठक्खुबाचिऎ माङ्स योम्पक् पिॽनि कामानुङ् कॽहाङ्पा टर म कहाङ्पा लुङ्कॽवान एट्टान योक्पक् पिक्खुबा लुङ्कॽवा लिसा।”#खोम्मिम्पासाम् ११८:२२
8हाङ् गरहाङ् साब्डा, “एक्क लुङ्कॽवा, गसॆ याॽमिचि टक्सिमिकुचि, हाङ् एक्क लुङ्कॽवा, गसॆ खोचि गाङ्मिकुचि।”#यासाइया ८:१४ मान्ठाभनॆ खोचिऎ निवाँहाङ्मि खानावाँ खेमुचिनि। निवाँहाङ्ऎ गरक्न लिमिर कामानुङ् आक्खाचिम् लागि साप्मिम्पा लॆटा।
9टर आन्ना ग निवाँहाङ्ऎ सॆःग्मिम्पा याॽमिचि, हाङ्मि याटाङ्पाचि, सॆङ्सॆङॆ याॽमिचि हाङ् निवाँहाङ्मि टाङ्पाम् याॽमिचि यो। आन्नॆ निवाँहाङ्मि नुऎ योम्पक् याॽमिचि खाङ्मिहिकाम्नि मान्ठाभनॆ खोसॆ आन्ना माॽयाक्टबाङ् उजेलबि टॆःडानि। 10याॽलि आन्ना निवाँहाङ्मि याॽमि मालॆटानि, टर ह चाइ निवाँहाङ्मि याॽमि लिडानि। याॽलि आन्नॆ नाम्नावाँ माटक्चामिम्पा लॆटानि टर ह चाइ टक्चाडाम्नि।
निवाँहाङ्मि योम्पक् मुखुबॆ यिक्मॆ योम्पक्
11बुबुनानुसाचि, काङॆ आन्ना नुःर लोकानि, ग बाखाटेम्पि आन्ना होइकन हाङ्टेम्बिऎ एक्क वाइटिखुबा याॽमिरः लॆकानि। हाङ् लावाबिऎ खानावाँनुङ् टङ्नॆ बाखाटेम्पिहा काइसॆ खानावाँ आटिङाम्नॆ। 12हाङ् निवाँयुङ् आलॆखुबा याॽमिचिम् लुम्पि आन्ना नुःर पाइटानॆ। हाङ् खोचिऎ आम्नि काइसॆ खानावाँ खाङ्मिॽमा यक्मार खोचिऎ आम्नामि काम्नुऎ योम्पक् खाङ्टकुचिर हाङ् निवाँहाङ् न्यायॆ लॆसि टाऎ डिना खोचिऎ खोम् निङ्लावा लॆटुचिर। 13पारभुमि लागि चोब्न टुङ्घङ्पाचिमि ढुप्पाट्ट हङ्सि पेनानॆ। हाङ् चोब्बाङ् ढ्या ढुप्पाट्ट नुङ्मा हाङ्मि ढुप्पाट्ट हङ्सि पेनानॆ। 14हाङ् टुङ्घङ्पाचिम् ढुप्पाट्ट हङ्सि स पेनानॆ। खोचि काइसॆ योम्पक यिक्खुबाचि डान्डा पिस्सि हाङ् काम्नुऎ योम्पक् यिक्खुबाचि नुःर लॆसि निवाँहाङ्ऎन योम्पक्पि टिमिम्पाचि रेम। 15मान्ठाभनॆ खानावाँ मान्वाब्ले यामुखुबा याॽमिचिम् या आन्नॆ आम्नामि नुऎ योम्पक्ऎन यङ् उःप्खॆमिट्टुचिर कामानुङ् निवाँहाङ् मिनुक्।
16हाङ् आसाम् सङ्क हुक्पिसु आपेनानॆ, टर आसॆ माङ्स लॆङामिनि कामानुङ् काइसॆ योम्पक आयिगानॆ। बोरु निवाँहाङ्मि योम्पक मुखुबा लिसानॆ। 17हाङ् चोब्न याॽमिचि ङेबाम्चिनॆ, निवाँयुङ् लॆखुबा बुबुनानुसाचि नाम्नाम् पिस्सिटाम्चिनॆ। निवाँहाङ्मि किसिमाबि पेनानॆ, हाङ् चाइ नुःर ङेबाम्नॆ।
खिरिस्टऎर डुखा आङ्मॆ
18आन्ना योम्पक् मुखुबाचिऎ आन्नामि टुङ्घङ्पा नुःर ङेःप्मानुङ् खोचिम् ढुप्पाट्टबि पेनानॆ। आन्ना नुःर लॆखुबा टुङ्घङ्पाचिम् ढुप्पाट्टबि टे हॆॽनॆ टर काइर लॆखुबा टुङ्घङ्पाचि स नुःर ङेबाम्चिनॆ। 19हाङ् आन्नॆ आङ्मा पाब्निहा डुखा स निवाँहाङ् मिॽलाब्से आङाम्नि हाङ्ग आन्ना निवाँहाङ्ऎ आसिका पिकानि। 20मान्ठाभनॆ आन्नॆ यिक्मिम्पा काइसॆ योम्पक्मि लागि डुखा आङाम्नि हाङ्ग म ढ्या खानावाँ हॆॽनॆ। टर आन्नॆ नुऎ योम्पक् यिग्मार सङ्क आङ्मा सिऎ डुखाबि निवाँहाङ्ऎ आसिका पिकानि। 21गमि लागिॽन निवाँहाङ्ऎ आन्ना सेःॽमिम्पा। मान्ठाभनॆ खिरिस्टऎ स आन्नामि लागि डुखा आङु हाङ् आङ्मा लॆ लोमॆ खानावाँ खाङ्मिडानि। मसॆ आन्ना स खोसॆ खाङ्मिॽमिम्पा लाम्फुबि लाम्ढुमा लॆ।
22“खोसॆ माङ्स हिङ्वा मालॆटु हाङ् खोमि याबाङ् आसॆस बङ्चामॆ खानावाँ मान्खेमुचि।”#यासाइया ५३:९ 23हाङ् आक्खाचिऎ खो काइर लोसुचि हाङ्स खोसॆ खोचि माङ्स मालोसुचि। हाङ् डुखा पिॽमार कॆ गर लॆकानि मर लॆकानि कामानुङ् माङ्स मालॆटुचि। टर नुःर न्यायॆ लॆखुबा निवाँहाङ्मि हुक्पिॽन चोब्न खानावाँ युङु। 24हाङ् खिरिस्टऎ खोम् सालुङ्बि एक्क सिङ्मि कुरुसाबि कानिम् हिङ्वा खिनु। मसॆ कानि स हिङ्वामि लागि सिखारि हाङ् निवाँहाङ्मि निवाँ आनुसारॆ हिङ्चामाम् लागि चाइ हिङ्पकि हाङ् खोमि हुवाऎ आन्ना नुबकानि। 25मान्ठाभनॆ आन्ना फोप्सिखॆॽमिम्पा सामुङ्चिर लॆटानि, टर ह आन्नामि लावा कुखुबा नुङ् कोप्खुबाबि ऎन्टाडानि।
ទើបបានជ្រើសរើសហើយ៖
१ पाट्रुस 2: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society