१ कोरेन्ठि 13
13
नाम्नाम् पिसिॽमॆ खानावाँन चोब्बाङ् ढ्या
1काङा बाखाटेम्पिहा याॽमिचिमि डिरिक् खाप् हाङ् निवाँखाटॆखुबाचिमि खाप्पि यामुङा, टर काङाबि होइढाचि नाम्नाम् पिसिॽमॆ निवाँ माआ हाङ्ग, काङा एट्टान याकाखुबा घान्टि हाङ् झ्याम्टा रक्मा टे लिःॽङा। 2हाङ् काङानुङ् निवाँहाङ्मि खानावाँ लोमॆ बारडाना, निवाँहाङ्मि चुम्मिम्पा खानावाँ वाब्मॆ बारडाना, चोब्न खानावाँ लेक्खुबा चेन्टुबाङ् निवाँ टक्चाडुङ् हाङ् पङ्पङ्मान मॆॽयङ् वेन्मॆ निवाँयुङ् चुबिॽङा हाङ्स काङाबि नाम्नाम् पिसिॽमॆ निवाँ माआ हाङ्ग, काङा माङ्स हॆॽनॆ। 3काङॆ काङामि चोब्न चासुम् याॽमिचि पिइटुङ्चि हाङ् टाङ्पाम सालुङ् सङ्क सङ्टिबिइॽमाम् लागि पिकुङ्चि। टर काङाबि नाम्नाम् पिसिॽमॆ निवाँ माआ हाङ्ग आक्कसॆ माङ्स योम्पक् यिगुनि।
4नाम्नाम् पिसिखुबा याॽमिऎ डिरिक् खानावाँ आङ्हिकु हाङ् सोक्टुॽवा नुङ्मा लि। नाम्नाम् पिसिखुबा याॽमिऎ सिरि लॆटुनि, काङानङायॆ मिन्नि हाङ् ढ्या लॆङ्नि। 5नाम्नाम् पिसिखुबा याॽमिऎ होइढाचि काइर लॆटुचिनि, टाङ्पाम्टे नुऎ लिर मिन्नि, हुन्न सोम् खेॽनि हाङ् याॽमिचिऎ ऎॽवा काइर लॆटिङ्मिहा लोमॆ मिॽलाउनि। 6नाम्नाम् पिसिखुबा याॽमि काइसॆ खानावाँबि चेन्चानि, टर चाइबानऎ खानावाँबि चाइ चेन्चाक। 7हाङ् नाम्नाम् पिसिखुबा याॽमिऎ चोब्ठका आङुकु, चोब्न खानावाँबि निवाँयुङ् लॆकु, चोब्न खानावाँबि काम्नुऎन लि मिनुकु हाङ् चोब्ठका हुङ्हिकु।
8नाम्नाम् पिसिॽमॆ खानावाँ हानाम्स लुक्खॆॽनि, इॽयाक् निवाँहाङ्बाङ् यामुमॆ बारडाना लुक्खॆ, वाप्निहा खाप् यामुमॆ बारडाना सङ्क लुक्खॆ हाङ् याॽमिचिम् चेन्टुबाङ् निवाँमि बारडाना सङ्क लुक्खॆ। 9मान्ठाभनॆ निवाँहाङ्ऎ चोब्न खानावाँ कानि माखाङ्मिटिट्टि हाङ् कानिऎ लोमिम्पा निवाँहाङ्मि खानावाँ मिःक्म टे यो। 10टर कानि चोब्न खानावाँ वाप्मिखुबा होइखेपा सङ्क टाः हाङ् आक्खा मावाप्टिहा खानावाँ कानि पाप्पिनि।
11काङा पिसा लॆटिङ्र पिसाऎ रॽन यामुयुक्सिङ्, वाब्युङ्सुङ्, मिन्युङ्सुङ्। टर ह काङा पासिङ् पिक्खॆडिङ् मसॆ चाचाबिहा खानावाँ याइटुङ। 12ग हिङ्खामाबि कानिऎ चोब्न खानावाँ वाब्नि, टर आइनाबि खाङ्मिम्पार मर नुःर वाप्टॽमॆ गारि खाङ्टॽनि। टर कानि चोब्न खानावाँ वाप्मिखुबा टा हाङ् चाइ चोब्न खानावाँ टाङ्पाम् मिगॆॽन खाङ्मिम्पार नुःर वाबुक्। ह चाइ कानिऎ मिॽमिॽ टे वाबुक् टर निवाँहाङ्ऎ काम् बारेबि चोब्न खानावाँ लेसिन्ट, आक्रल चोब्न खानावाँ वाबुक्। 13टर इघा निवाँयुङ् लॆःॽमॆ, आसा युङ्मॆ हाङ् नाम्नाम् पिसिॽमॆ लोमॆ सुम्चि खानावाँ चाइ हानाम्स लिढ्याङ। इघा सुम्चिबि चोब्नबाङ् यिक्मान लॆऎ योम्पक् चाइ नाम्नाम् पिसिॽमॆ यो।
ទើបបានជ្រើសរើសហើយ៖
१ कोरेन्ठि 13: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society