१ कोरेन्ठि 12
12
सॆङ्सॆङॆ लावामि बारडाना
1बुबुनानुसाचि, ह काङॆ आन्ना सॆङ्सॆङॆ लावामि बारडानामि बारेबि लोकानि। 2हाङ् आन्नॆ लेकाम्निन, पारभुबि निवाँयुङ् आलॆखुबा याॽमिचि लॆटानिर, आन्नॆ हाबि ग हाबि निवाँ टिमानुङ् यामुनॆ मुर्टि चुङ्युक्साम्नि। 3मसॆ आन्नॆ ग खानावाँ वाबाम्नॆ कामानुङ् काङा मिनुॽङा, निवाँहाङ्मि लावाबाङ् यामुखुबा याॽमिऎ “ढिक्कारा येसु” लोसुनि हाङ् सॆङ्सॆङॆ लावाबाङ् टेःॽन याॽमिचिऎ “येसुन पारभु यो” कामानुङ् लोकुचि।
4बारडाना चाइ होइक होइक लि टर आक्खा बारडाना पिक्खुबा सॆङ्सॆङॆ लावा चाइ एक्कन यो। 5मुमा लॆऎ योम्पक् चाइ होइक होइक लि टर आक्खा योम्पक्मि टुङ्घङ्पा चाइ एक्कन यो। 6याॽमिचिऎ मुमे योम्पक् ग होइक होइक लि, टर निवाँहाङ्ऎन आक्खा योम्पक् कानि याॽमिचिबाङ् मुकु। 7कानि चोब्न एक्कसॆ होइक याॽमि योम्पक् मुबाकुर कामानुङ् सॆङ्सॆङॆ लावामि बारडाना पिडि। 8ऎॽवा याॽमिचि सॆङ्सॆङॆ लावाऎ याॽमिचि नुऎ निवाँमि बारडाना पिकुचि हाङ् होइढा ऎॽवाचि चाइ आक्क खानावाँ नुःर वाप्मॆ बारडाना पिकुचि। 9हाङ् आक्क सॆङ्सॆङॆ लावाऎन एक्क याॽमि ढ्या निवाँयुङ् लॆःॽमॆ बारडाना पिकु हाङ् होइक याॽमि चाइ टुक्खाचि नुबॽमिक्खुबा बारडाना पिकु। 10हाङ् कोइचि आक्खॆॽमाहा योम्पक यिग्मॆ चॆक्मावा पिकुचि। हाङ् कोइचि चाइ निवाँहाङ्बाङ् यामुमॆ बारडाना पिकुचि। हाङ् कोइचि चाइ याॽमिचिऎ लोमिम्पा खानावाँ चाइबान रु हॆॽनॆ लोमॆ फाक्मा हेमॆ बारडाना पिकुचि हाङ् कोइचि होइकन खाप्पि यामुमॆ बारडाना पिकुचि। हाङ् कोइचि चाइ आक्खा होइढा खाप्ऎ इमा यकुवॆ खानावाँ लोबिॽमॆ बारडाना पिकुचि। 11टर इघा चोब्न योम्पक् एक्कन सॆङ्सॆङॆ लावामि योम्पक यो। खोसॆ खोम निवाँ आनुसारॆ याॽमिचि होइक होइकन बारडाना पिकुचि।
एक्क सालुङ्पि चुहा डिरिक् खानावाँ
12कानिम् एक्क सालुङ्बि डिरिक् खानावाँ चु हाङ् आक्खा डिरिक् खानावाँबाङ् एक्क सालुङ् लिक, खिरिस्ट सङ्क आक्रऎन यो। 13कानि याहुडिचि हाङ्स, हॆॽनिबारेक्चि हाङ्स हाङ् याॽमिचिमि ढुप्पाट्टबि सिॽमिम्पाचि हाङ्स हाङ् याॽमिचिमि ढुप्पाट्टबि आसिॽमिम्पाचि, कानि एक्कन सॆङ्सॆङॆ लावाबाङ् बाप्टिस्मा टक्चामिम्पासॆ, एक्कन सालुङ् लिडि। कानि चोब्न हङ्सि एक्कन सॆङ्सॆङॆ लावा पेन्डा।
14हाङ् याॽमिमि सालुङ् एक्क भागऎ टेःॽन मुमिम्पा हॆॽनॆ, टर डिरिक् भागऎ टङ्मानुङ् मुबॽमिम्पा लि। 15हाङ् माल् लाङ्ऎ चाइ काङा हुक हॆॽनॆ, मसॆ काङा सालुङ् हॆॽनॆ कासा हाङ्ग, आक्क सलुङ्पिऎ एक्क भाग लिनिहॆ? 16हाङ् नाबाक्ऎ काङा मिक् हॆॽनॆ, मसॆ काङा सालुङ् हॆॽनॆ कासा हाङ्ग, आक्क सालुङ्मि एक्क भाग लिनिहॆ? 17चोब्न सालुङ्बि मिक् टेःॽन चु हाङ्ग माङ्ऎ खेम्मॆ? हाङ् चोब्न सालुङ्पि नाबाक् टेःॽन चु हाङ्ग माङ्ऎ नाम्मॆ? 18टर निवाँहाङ्ऎ खोम् निवाँ रक्न सालुङ्बि चोब्न भाग टङ्मानुङ् युङ्डु। 19माल् एक्क भागऎन चोब्न सालुङ डॆक्खॆकु हाङ्ग, आक्क सालुङ लिऎ? 20मसॆ डिरिक् भाग चु हाङ्स सालुङ् चाइ एक्कन लि।
21मिक्ऎ हुक् “काङा आना पाब्ङानि” लोहिसुनि। मरक्न निङ्टवाँऎ लाङ् “आना काङा पाब्ङानि” लोहिसुनि। 22टर सालुङ्पि मर योम्पक् पिॽनि कामानुङ् खाङ्मुहा भागन कानिमि लागि एट्टान योम्पक् पिक्खुबा लि। 23हाङ् हाम्पिऎ भाग चाइ मर नुःर खाङ्नि, आक्क भागन काम्नुःर खाङुक्। हाङ् हाम्पिऎ भाग चाइ होइढा याॽमिचिबाङ् चुमुक्, आक्क भागन काम्नुःर युङुक्। 24बोरु, काम्नुऎ खाङ्मुहा भागरे कानिऎ मर नुःर खाङ्नि। निवाँहाङ्ऎन कानिम् सालुङ् गरहाङ् टङ्पिडि, मर नुःर योम्पक् पिक्खुबा हॆॽनॆ मिन्मिम्पा भागन काम्नुःर खाङ्मा लॆ कामानुङ् टङ्डु। 25मसॆ चोब्न टङ्चामिर हाङ् एक्कसॆ होइक खाङ्पे चुमिर। 26हाङ् सालुङ्पिऎ एक्क भाग टुगुक्र चोब्न सालुङ्न टुगुक्, मरहाङ्न सालुङ्पिऎ एक्क भाग नुऎ लॆः हाङ्ग, चोब्न सालुङपिहा भाग चेन्चाक्।
27गरहाङ्न आन्ना चोब्न खिरिस्टमि सालुङ रेम। हाङ् आन्ना चोब्न आक्कमि एक्क एक्क सालुङ् रेम। 28हाङ् निवाँहाङ्ऎ चोब्बाङ् याॽलि सॆक्ढुङ्पाचि, मबाङ् निवाँहाङ्मि खानावाँ लोखुबाचि, मबाङ् चिन्खुबाचि हाङ् आक्खॆॽमा योम्पक् यिक्खुबाचि हाङ् टुक्खाचि नुबॽमिक्खुबा बारडाना टक्चाखुबाचि हाङ् होइडाचि खाङ्खुबाचि, साब्मारा साप्खुबाचि हाङ् होइकन खाप् यामुमॆ बारडाना टक्चाखुबाचि मान्डालिबिहा याॽमिचिबि युङ्पिडानि। 29हाङ् निवाँयुङ् लॆखुबाचि चोब्न सॆःक्ढुङ्पा आठावा निवाँहाङ्मि खानावाँ लोखुबा आठावा चिन्खुबाचि लिमिनि। हाङ् चोब्नऎ आक्खॆॽमा लुहा योम्पक् मुमा हेसुचिनि। 30हाङ् निवाँयुङ् लॆखुबा चोब्न याॽमिचि नुङ् टुक्खाचि नुबॽमिक्खुबा बारडाना लिनि। हाङ् चोप्पासॆ होइढा खाप्पि यामुमिनि। हाङ् चोब्नऎ होइक खाप्ऎ माङ् इकुवॆ कामानुङ् इहिसुचिनि। 31मसॆ निवाँयुङ् लॆखुबा होइढा याॽमिचि मुबाक्मॆ खालॆ बारडाना टक्चामॆ ढ्या निवाँ मुसाम्नॆ। टर नाम्नाम् पिसिॽमॆ खानावाँ चाइ आक्खा बारडानाबाङ्स ढ्या यो।
ទើបបានជ្រើសរើសហើយ៖
१ कोरेन्ठि 12: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society