Fuɗɗoode 42
42
No mawniraaɓe Yusufu wariri soodugo alkamaari faa Misira
1No Yaakuubu nani no alkamaari na'on e leydi Misira, wi'i sukaaɓe mum: Gam ume jooɗiɗon oon daarontira? 2Mi nanii alkamaari na'on faa Misira. Jahee ton, coodanon en alkamaari gam to en maayu gam sabbu rafo. 3Mawniraaɓe Yusufu sappo ummii yahi Misira gam soodoygo alkamaari. 4Amma Yaakuubu accay Benyamin miiraawo Yusufu yaada e maɓɓe, gam oo hula waraa bone gom heɓa mo. 5Sukaaɓe Yaakuubu yahi ton soodoygo alkamaari e himɓe Kanaana woɓɓe, gam rafo ŋon e toora himɓe Kanaana fu.
Yusufu e toora mawniraaɓe mum
6Yusufu nun ardanii leydi nin fu. Kanko nun sippirta himɓe leydi nin fu alkamaari. No mawniraaɓe Yusufu yottii, ɓe jiccanii mo, ɓe tuggi geese maɓɓe e leydi. 7No Yusufu yi'i ɓe, o anniti ɓe, amma, o waɗi hande o annaa ɓe. O falmi ɓe e semme o wi'i: Diga toy nun ƴiwuɗon? Ɓe toontii mo ɓe bi'i: Diga leydi Kanaana nun men ƴiwoy, men gari soodugo nafa. 8Yusufu annitii mawniraaɓe mum, amma, kamɓe kan ɓe annitay mo. 9Yusufu siwtorii koyɗaaji ɗi hoyɗunoo dow maɓɓe. O wi'i ɓe: On laati nun daarooɓe no leydi jooɗorii. On garu nun daarugo nokkuuje leydi amen ɗe walaa semme. 10Ɓe toontii mo ɓe bi'i: Aawo, kanjum bane waddi men joomiraawo, men garu nun soodugo alkamaari. 11Gooŋa nun men batata. Baaba gooto nun rimi men. Men laati nun maccuɓe maa, men laataaki daarooɓe no leydi jooɗorii. 12Yusufu wi'i ɓe: Fewre nun, on garu nun daarugo nokkuuje amen ɗe walaa semme. 13Ɓe toontii mo kade ɓe bi'i: Men laati nun himɓe worɓe sappo e ɗiɗo (12). Baaba gooto on nun rimi men der leydi Kanaana. Miiragel amen na'on wondi ton e baaba amen. Amma gooto amen maayii. 14Yusufu wi'i ɓe kade: Fewre nun. On laati nun daarooɓe no leydi jooɗorii. 15No poonniranmi on woni, mi hunorake e inne Firawna, on burtataako ɗoo, sey to miiragel mon warii. 16Lilee gooto mon yaha waddaa miiragel mooɗon ŋel, non non nun annitiranmi no gooŋa nun batoton. To gooŋa bane, den mum mi hunorake e inne Firawna, on laati nun daarooɓe no leydi jooɗorii. 17Go o maɓɓi ɓe ɓe fu der kasu, faa balɗe tati.
18Der nyalaane mum tatawre, Yusufu wi'i ɓe: Mii kuluɗo Alla nun, gam mum, accee mi bata on ko gaɗoton gam keɓon daɗon. 19To gooŋa nun batoton, accee gooto mooɗon der kasu ɗoo, horiiɓe mon hoota yaarana himɓe mon nafa gam sabbu rafo. 20Den mum, gaddanon am miiragel mon pettel, gam mi annita, no gooŋa batoton gam to bareɗon. Ɓe jaɓi ka o bati ɓe. 21Ɓe janti ɓee bi'ontira: E gooŋa, ko gaɗanɗen miiraawo men Yusufu wooɗay. Gam en ji'ii toora makko, go o sawrini en, amma en jaɓay. Kan nun acci toora kaa ɗo tawi en. 22Rubeni wi'i ɓe: Mii batannoo on to on gaɗanee suka on ko halli. Amma on nananay am. Nani jooni, Alla e ƴama en ƴiiƴam makko. 23Ɓe annaa Yusufu e nana haala maɓɓe, gam goɗɗo nun yottinanannoo ɓe haala. 24Yusufu yawti woɗɗodii ɓe, yahi wulloygo.
Mawniraaɓe Yusufu wittii leydi Kanaana
Ɓaawo mum o wittoy o baddi ɓe, o etti Simeyon, o haɓɓi mo yeeso maɓɓe. 25Yusufu wi'i maccuɓe mum loowa alkamaari der saakiiji mawniraaɓe mum hebbina. Moy fu e maɓɓe bo wittinanee ceede mum der saakiya mum. Ɓe kokkee bo nafa ka ɓe nyaamata e laawol. Ɓe gaɗi hande no Yusufu batiri ɓe. 26Ɓe doonini babbi maɓɓe alkamaari maɓɓe ɓe jawti. 27No ɓe jottii nokkuure to ɓe baalata, gooto maɓɓe firti saakiya mum gam hokka babba mum fuɗo. Ɗon nun o tawi ceede makko der saakiya makko. 28O wi'i banniraaɓe makko: Mi wittinanaama ceede am. Nanii ɗe der saakiya am. Ɗon nun ɓerɗe maɓɓe taƴi, ɓe janti ɓee diwna. Ɓe bi'ontiri: Ume nun Alla waɗani en ɗoo?
29No ɓe kooti Kanaana to Yaakuubu, baaba maɓɓe, ɓe pillanii mo ko tawi ɓe fu. 30Ɓe bi'i: Gorko laatiiɗo mawɗo leydi nin sattani men sanne, o wi'i men garu nun daarugo no leydi maɓɓe jooɗorii. 31Men toontii mo men bi'i: Menen, men laati nun hoolaaɓe, men daarooɓe no leydi jooɗorii bane. 32Men laati nun ɓiɓɓe worɓe sappo e ɗiɗo (12). Men fu, baaba gooto nun rimi men. Gooto amen maayii. Amma miiragel amen pettel na'on wondi e baaba amen faa leydi Kanaana. 33Ɗon nun gorko laatiiɗo mawɗo leydi nin wi'i: Go mi annita e gooŋa, on laati nun hoolaaɓe, accanee am ɗoo gooto mooɗon, onon horiiɓe, ettee nafa kooranon himɓe mon gam sabbu rafo. 34To on kootii, gaddanon am miiragel mon pettel, den mum mi annitan on laati nun hoolaaɓe, on laataaki daarooɓe no leydi jooɗorii. Mi hokkitan on gooto mooɗon, jahon gaɗon filu der leydi nin fu.
35No ɓe juppi saakiiji maɓɓe, baa moy fu e maɓɓe tawi ceede mum der saakiya mum. No ɓe ji'i ɗe, kamɓe e baaba maɓɓe, ɓe kuli sanne. 36Baaba maɓɓe Yaakuubu wi'i: On kalkidanan am sukaaɓe am. Yusufu walaa, jooni bo Simeyon walaa. Go oon jiɗi bo ettugo Benyamin ɗum fu bo, dow hoore am nun ɗum yanata. 37Rubeni wi'i baaba mum: To mi wartiranay maa Benyamin baraa sukaaɓe am ɗiɗo. Halfinan mo, mi wartirante mo. 38Yaakuubu wi'i: Suka am yaadataa e mon. Gam mawniiko, Yusufu maayii, kanko tan nun horii e yonki. To bone gom heɓii mo e laawol, on accan mi maaya e biisere ɓerne der dottinnaaku am.
ទើបបានជ្រើសរើសហើយ៖
Fuɗɗoode 42: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.