Fuɗɗoode 41
41
Koyɗaaji Firawna
1Ɓaawo duuɓi ɗiɗi, Firawna hoyɗii e darii takkol maayo Nili. 2Ɗon nun o yi'i na'i jeeɗiɗi booɗɗi, janɗuɗi ŋabboy diga maayo Nili, e dura takkol maayo ŋon. 3Ɓaawo mum o yi'i na'i jeeɗiɗi goɗɗi, pooƴuɗi ɗi belaa jiiɗe, ŋabboy diga maayo Nili, wari darii takkol arandeeji gonuɗi takkol maayo ŋon. 4Ɗon nun na'i pooƴuɗi ɗin moɗi na'i boomuɗi ɗin, go Firawna fini. 5O ɗaanitii, go o hoyɗi kade koyɗool ɗiɗaɓol. O yi'i gommal alkamaari gootal e sawtini cammeeje jeeɗiɗi dimuɗe sanne. 6O yi'i kade cammeeje alkamaari goɗɗe jeeɗiɗi, ɗe walaa gite, ɗe naaŋe e hennu yoorini, sawtini ley arandeeje ɗen. 7Ɗon nun cammeeje alkamaari jorɗe gite ɗen moɗi cammeeje jeeɗiɗi gooduɗe gite ɗen. Go Firawna fini, tawi koyɗool nun.
8No weeti subaka, hakkillo Firawna jiiɓii. O noddi yiitooɓe e wooduɓe annal der leydi Misira fu. O bati ɓe koyɗaaji makko, amma goɗɗo waaway faamingo mo ɗi. 9Ɗon nun mawɗo hokkooɓe Firawna ko yaretee bati Firawna wi'i: Hanne nun ciwtormi mi woofii. 10Wakkati gom, a maatii mone amen, go kappuɗaa men maɓɓuɗaa der suudu mawɗo reenooɓe kasu. Min e mawɗo hokkooɓe maa nafa. 11Men fu ɗiɗo, men koyɗii jemmaare woore, moy fu e koyɗool mum e ko ŋol yiɗi batugo. 12Emen gondunoo ɗon e gojankeejo Iburaninkeejo gom. O laati nun golloowo mawɗo reenooɓe kasu. No men bati mo koyɗaaji amen, o faamini men ɗi. 13Hande no o faaminiri men ɗi, non non nun ɗum waɗiri. A wittinii am der golle am, den accuɗaa mawɗo hokkooɓe maa nafa ɓilaa dow leggal.
Yusufu faaminii koyɗaaji Firawna
14Ɗon nun Firawna waɗi Yusufu noddee. O wurtinaa diga e kasu e jawɗum, o femmii, o wayliti kolte, o ummii o yahi to Firawna. 15Firawna bati mo wi'i: Mi hoyɗu nun. Goɗɗo bo waaway faaminimmi koyɗool am ŋol. Mi nanii bo to a bataama koyɗool, aa faamina ŋol. 16Yusufu toontii mo wi'i: Min bane, Alla nun faaminte ŋol hande no haaniri.
17Firawna wi'i Yusufu: Der koyɗool am, ji'umi mii darii takkol maayo Nili. 18Ɗon nun ji'umi na'i jeeɗiɗi boomuɗi, booɗɗi ŋabboy maayo Nili, wari e dura takkol maayo ŋon. 19Ɓaawo majjum ji'umi na'i jeeɗiɗi goɗɗi, pooƴuɗi, ɗi belaa jiiɗe ŋabboy diga e maayo ŋon, mi meeɗayno daɗey yi'ugo na'i pooƴuɗi iri majji der leydi Misira fu. 20Na'i pooƴuɗi ɗin moɗi na'i arandeeji jeeɗiɗi boomuɗi ɗin. 21Baa no ɗi moɗi ɗi, goɗɗo waawaataa annitingo naa ɗi moɗii goɗɗum, gam no ɗi pooƴirnoo denno, ɗi baylaaki. Go pinumi. 22Ɓaawo mum, mi hoyɗii kade ji'umi gommal alkamaari gootal e sawtini cammeeje jeeɗiɗi dimuɗe sanne. 23Ɓaawo mum ji'umi kade cammeeje alkamaari goɗɗe jeeɗiɗi ɗe walaa gite, ɗe naaŋe e hennu yoorini sawtini ley arandeeje ɗen. 24Ɗon nun cammeeje alkamaari ɗe walaa gite ɗen, moɗi dimuɗe ɗen. Mi batii yiitooɓe am koyɗaaji ɗin, amma goɗɗo waaway faamingo am ɗi.
25Yusufu wi'i Firawna: Koyɗaaji maa ɗiɗi ɗin laati nun gootol. Alla hollii maa ko yiɗi waɗugo. 26Na'i booɗɗi jeeɗiɗi ɗin laati nun duuɓi jeeɗiɗi, cammeeje alkamaari geete jeeɗiɗi ɗen bo laati nun duuɓi jeeɗiɗi. Koyɗool gootol ŋol nun ɗon. 27Na'i jeeɗiɗi pooƴuɗi, ɗi belaa jiiɗe, ŋabboyɗi ɓaawo arandeeji ɗin laati nun duuɓi jeeɗiɗi. Non non bo cammeeje alkamaari ɗe walaa gite, ɗe naaŋe e hennu yoorini ɗen laatoto duuɓi jeeɗiɗi ɗi rafo. 28Hande no batuno maa mi laamiiɗo, Alla hollii maa ko yiɗi waɗugo. 29Duuɓi jeeɗiɗi waran e haarande mawne, der leydi Misira fu. 30Duuɓi jeeɗiɗi goɗɗi ɗi rafo waran der leydi Misira faa himɓe yeggitana haarande waɗunoone. Rafo ŋon mawnan sanne der leydi ni fu. 31Rafo ŋon mawnan der leydi nin faa haarande nen yeggitanee mam mam. 32Alla yesii waɗugo ɗum, accitere walaa, ɗum ɓooyataa bo, gam majjum acci koyɗuɗaa ɗum faa de ɗiɗi. 33Laamiiɗo, gam majjum, e haani dartaa goɗɗo gooduɗo faamu e hakkillo, ardinaa mo der leydi Misira. 34Cuttaa bo himɓe woɓɓe der duuɓi ɗi haarande ɗin, ɓe joowa ko ruggaa fu joowe joy, ɓe jaɓa joowere mum woore to himɓe leydi Misira fu. 35Ɓe kawrita nafa der duuɓi ɗi haarande ɗin fu e inne maa, ɓe gatta ka der beeme der wanŋarɗe fu, ɓe deena ka. 36Ka suuɗee ɗon gam leydi fu, gam duuɓi jeeɗiɗi ɗi rafo garooji der leydi Misira, gam to rafo waru himɓe.
No Yusufu ardiniraa der leydi Misira
37Haala Yusufu kan welii Firawna e himɓe laamorde mum fu. 38Ɗon nun Firawna ƴami himɓe mum wi'i: En hinaa baawan heɓugo neɗɗo gom iri oo ɗoo? Gooduɗo Ruuhu Alla hande oo ɗoo? 39Firawna wi'i Yusufu: Walaa gooduɗo faamu e hakkillo hande no maa, gam Alla hollii maa kujje ɗen fu. 40An nun hakkilanta wuro am. Himɓe am fu tokkan haala maa, gurol laamu am tan nun ɓuriri maa mi. 41O wi'i mo kade: Mi ardinii maa der leydi Misira fu. 42Firawna sutti hootande ne to inne mum woni, diga e honnu mum, o wattani ne Yusufu e honnu mum, o ɓornini mo kolte booɗɗe ɗe ceede, go o wattani mo coggel kanŋeeri e daane makko. 43O naanni mo der laana pucci makko ɗiɗaɓa. Woɓɓe e ardii yeeso makko e wi'a: Jiccee! Jiccee! Non non nun Firawna ardiniri mo der leydi Misira fu. 44O wi'i kade Yusufu: Min laamiiɗo Misira, min nun yesi kaa ɗoo: To hinaa diga e annagal maa, goɗɗo waawataa waɗugo goɗɗum der leydi Misira fu. 45Firawna wattani Yusufu inne, o noddi mo Jafenati Faneya. O ɓaŋani mo Asenati ɓii Poti Fera, laatiiɗo *liimaamiijo Oni. Yusufu woosii e leydi Misira fu. 46Yusufu e woodi duuɓi laso e sappo (30) wakkati o fuɗɗi gollanaago Firawna, laamiiɗo Misira. O ummii, o wurtii diga laamorde Firawna, o woosii leydi Misira fu.
47Wakkati duuɓi jeeɗiɗi ɗi haarande ɗin fu, leydi waɗii barke, nafa rimi sanne. 48Yusufu hawriti nafa der duuɓi jeeɗiɗi ɗi haarande ɗin fu der leydi Misira. O suuɗi ka der wanŋarɗe. Der wanŋarde fu, o hawriti ɗon nafa gese mum fu. 49O hawriti alkamaari ɗuuɗuni hande jaaneeri maayo, faa goɗɗo waawataa limugo ni gam sabbu ɗuuggo mayri.
50Asenati ɓii Poti Fera *liimaamiijo Oni, rimanii Yusufu sukaaɓe worɓe ɗiɗo go duuɓi ɗi rafo ɗin wara. 51Yusufu noddi suka mum afo Manase, o wi'i: Alla accii jeggitanmi, toora am, e wuro baaba am. 52O hokki suka makko ɗiɗaɓo inne Efurayimu. O wi'i: Gam Alla hokkii am ɓeyŋu der leydi ni der mum jarumi bone.
53Duuɓi jeeɗiɗi ɗi haarande ɗin waɗi yawti der leydi Misira. 54Go duuɓi jeeɗiɗi ɗi rafo yottii hande no Yusufu batirnoo ka. Rafo waɗii e leyɗe fu, amma der leydi Misira kan, nafa e hebbi. 55No rafo naati der leydi Misira bo, himɓe yanti e wullana Firawna laamiiɗo Misira. Amma Firawna wi'i ɓe ɓe jaha to Yusufu, ɓe gaɗa ko o wi'i ɓe fu. 56No Yusufu yi'i rafo mawnii der leydi Misira, o maɓɓiti beeme ɗen fu, oo sippira himɓe alkamaari. Rafo ŋon waɗii semme der leydi Misira. 57Go himɓe e wara Misira diga leyɗe fu gam soodugo alkamaari to Yusufu, gam rafo ŋon mawnii der leydi fu.
ទើបបានជ្រើសរើសហើយ៖
Fuɗɗoode 41: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.