Iruruputo 9
9
Saula ko lilizio
(Iruruputo 22:6-16; 26:12-18)
1Ni koa taku kale inio Saula ta obeta olake ereko ko ṉavaṉavato sama pesio tu o vouvaemo vo Lekasa ke luluevani. So sole vota o olake Ṉisa Siama kasi 2ni vota o pasekake ko zariekato sama leta poso Damasikasi ama Jiu amu ko ilusato ko pade poso kasi ama, tu vota o vailimou se vo Lekasa ko keve ke luluekani sai Damasikasi, ni vota o noqoemou se, lasive poso ni rekoreko amu melai, tu o mati vaito se Jerusalema.
3Ni so keru Saula o baroa keru Damasikasi peuru ko sipole, ko zakaremu aukale azo ama ta ota podoloa vai laqato ko evake ni ko qoloevake vo. 4Ni vota ota piake miduku kale ni o viqake ko kora ko eri kikovema vokasi, “Saula, Saula! Noi sole inio ṉota ṉo niumaniumaela aṉa?” kikolako.
5Nio Saula ta o kuimanaoke ni eri kiolake, “Lala ṉa inio ṉo Lekasa?” kiolake. Nio koa kora ta ko vati tiorikake ni eri kikolake, “Aṉa inio vo Jisu lala, ṉoṉo niumaniumaelani lala. 6Ṉota zolai ni ola peuru kale ni sai nio kala ta oṉai bazuekou ṉo ṉoṉo ereko ama quli,” kikolake.
7Ni sea maba poso seke taliovini Saula sate ta keta lojoake, ni pulia quli ke kasekake. Seta ke viqake koa kora kikolani, melai puliala ke veake. 8Ni Saula ta o zolaike miduku kale azo ni vota o leqosikake voko vilu, melai pulia quli o keake. So sole seta ke vati olake vo ṉasea tatai kale Damasikasi peuru kale. 9Ni zouke ṉaniu vota pui o keazatake, ni koa taku kale vota pulia quli o kuake ni o nozuekake.
10Ni kala lotu maba ta obeta evake Damasikasi peuru kale Ananaiasi va kikelani. Ni vota o uloitake, nio voko uloi kale inio vo Lekasa ta eri kiolake vokasi, “Ananaiasi!” kiolake. Ni Ananaiasi ta eri kiolake, “Aṉata koi, Lekasa,” kiolake.
11Nio vo Lekasa ta eri kiolake vokasi, “Inainaovi ni lulueka ko keve Sidopu ama Keve kekai nokaekako, ni Jiudasi ko pade kasi nio ṉova kuimanaovou vo Tasisi ala maba Saula o ṉi sala. Vota obeta vararaita, 12ni vota o uloita ni lula o ṉeala voko uloi kale ṉo Ananaiasi ṉoṉo amaqeani ṉa pade kale ni ṉovai ivikani ṉa ṉoko ṉase tu vota mata o keazato mata,” kiolake.
13Nio vo Ananaiasi ta o opatake ni eri kiolake, “Lekasa, matu kubo maba madu ta lula kevai bazuta nea maba aṉa kasi ni kiadama tapata poso vo o erekako ṉoko maba madu kasi Jerusalema ke evani kasi. 14Vota o kuela Damasikasi se raura kama siama madu ko pizato ni zariekato sate tu o noqoeṉelo eṉea kiada ṉela ṉo ṉe ilusiṉani ṉela,” kiolake.
15Nio vo Lekasa ta eri kiolake vokasi, “Ola, ako aṉata a bitoeva vo tu vota ola nabuluputou aṉa sole, tu vota omai baroekikou aṉako bazu se pui Jiu amu ni seko aikovakova poso, ni se Izireli amu. 16Ni aṉa a ṉavi inio kasa ava ikou kiadama koa tola poso vo o kovo ama aṉako ṉi ko kio kale avo,” kiolake.
17So sole vo Ananaiasi ta o olake ni o amaqeake sai Saula o evakoi, ni vota ovai ivikake voko ṉase vo tona ni eri kiolake, “Baerebaere Saula, vo Lekasa ta o soroelala aṉa, vo Jisu, vo oṉai puratalani ṉo keve tona so keru ṉoṉo quela keru koi. Vo inio vo o soroelalani aṉa tu ṉota mata ṉo qeazatou ni oṉai sukatou vo Tabu ala Auvana,” kiolake. 18Nio maba koa taku kale inio niuniu ko kadei jari ama quli ta kota piake Saula ko vilu kale azo, ni vota o roveake keazato mata. Ni vota o lojoake ni bapitaiso o evake; 19ni voko vuato ko tova voko tupu ta mata ko tova pizatake.
Saula ko bazubazuto Damasikasi
Nio Saula ta o evake kama poso ṉaniu seke tuvevo putani sate Damasikasi. 20Ni vota tutumazi avole o olake se Jiu amu ko ilusato ko pade poso ni o tanitake kai bazubazuto ta vo Jisu ta vo Baṉara vo Meqora inio kio.
21Nio kiadamu seke tava viqeni vo ta keta matu vuzeike ni eri kikelake, “Nei nio vo vo Jerusalema o vouvaemeni voa Jisu ke ilusivani, kive? Ni vo tivoine o kuelani koi tu o noqoemo ni o mati vaito sea maba poso se raura kama siama madu kasi!” kikelake.
22Melai Saula ko bazubazuto ta matu ti matu piza kota evake, ni voko tuvevo iko vo Jisu ta vo Baṉara o soroevani Pakio nio kio ta matu niuniala ko imake se Damasikasi ke evani Jiu amu so sole seta pui ke roveake pizato seko vati zolizoliekinio kale vo.
23Ni matu kubo ṉaniu kota paloasake ko tova, nio se Jiu amu ta ke padoivake ni ke erekake ko nakatato tu ke vouvaevo vo Saula kikelake, 24melai vota ota mai potoake seke erekema nakatato, ako kake ta kevai bazueke ko sole. Seta ke kati vailake koa peuru ko veutu ipu ni ṉaniu kale tu ke vouvaevo vo kikelake sole. 25Melai omadeu ipu kale inio vo Saula ke luluevani ta ke vati olake vo ni ke teamuvake matu solou vesa kale ni ke soloevake peuru ko idi ko purapura kale kude.
Saula Jerusalema peuru kale
26Ni vo Saula ta o olake Jerusalema ni oka zariake omadeu mati elo saizamu ke tuvevo putani. Melai seta pui tuvevo ke ikake ta vota kala o liliziovini nio, so sole sea kiadamu ta keta va ṉake vo. 27Sai nio vo Banabasi ta vovo tauvezato o evake ni vota o vati olake vo se apositolo madu kasi. Ni vota oma zakaremu puekake vo Saula ko lula velo vo Lekasa keve tona ni vo Lekasa ko lula vati pesio vo kio. Ni so jari vota omai bazuekake se vo Saula ko parani putole vai bazubazuto vo Jisu Damasikasi peuru kale. 28Nio Saula ta o evake se sate ni o olake koa pado ama Jerusalema ko poro kale, ni parani putole o bazubazutake vo Lekasa Jisu ko ṉikale. 29Ni so jari vota o mati zolizoliekiniake se Jiu amu Quriki pesiomu, melai seta ke madoekake tu ke vouvaevo vo kikelake. 30Nio so keru seke tuvevo putani ke paqumuke keru ko, seta ke vati olake vo Saula Sizaria, ivere ketaketama peuru kale, ni ke soroevake vo vaka kale Tasisi peuru kale.
31Ni kiadama Jiudia, ni Qalili, ni Sameria peuru poso kale ko evako lotu qoqono ta bule ke evake koa taku keru azo. Vo Tabu ala Auvana ko tauvezato kale seta ke pizatake ni kubo ke evake, ni seta ke evake vo Lekasa tava paṉao kale.
Pita Lida ni Jopa peuru kale
32Ni Pita ta o taliake kiadama zae poso kale, ni kama pado taku kale inio vota o olake soipimole se Baṉara ko maba poso Lida peuru kale ke evani. 33Sai nio vota o toraevake kala maba Iniasi va kikelani, vota lepu ala pui o vezokatani, vo lula siotolu sabere kobo topi o tekuani. 34Nio Pita ta eri kiolake vokasi, “Iniasi, vo Jisu Karisito ta o urikiṉa ṉo. Loje ni lokieka ṉoko kobo,” kiolake. Nio Iniasi ta taukavole o lojoake. 35Ni kiadamu Lida peuru kale ni Saroni keta kale ama peuru poso kale ke evani ta ke veake vo, ni seta ke liliziake Lekasa kasi.
36Ni Jopa peuru kale ta kobeta evake ka pado rekoreko koko tuvevo putako koko ṉi ta Tabita. Koko ṉi Quriki pesio kale ta Dokasi kio, ni koko kio ni kalo ta “Dia” ka kikelako matu ileile ama ariku kiti ama biaṉa kio. Kota ko ṉamuke kiadama koko taku koko uri ama iruruputo ko ereko kale ni tauvemo kale se ozaoza kamu. 37Ni koa taku kale kota kota verepake ni kota vouvake. Ni seta ke pusaekake koko tupu ni ke tekuekake ko okate ama volei kale ama lose kale. 38Nio Jopa ta pui vaṉa Lida azo, ni seke tuvevo putani ta ke viqake ta Pita ta Lida inio kio, so sole seta ke soroekake omuqa maba vokasi bazu sate eri kikolako, “Eṉeta ṉe baseṉa tu taukavole kua koi eṉe kasi,” kikolako. 39So sole Pita ta o inainaoke ni vota o luluekake nioqa. Ni so keru vo o baroa keru sai, seta ke vati koitake okate ama lose kale, sai nio kiadama naboko poso ta ke qoloevake vo, ni zialole seta keva kasekake seko sabosabo poso Dokasi saevoma keru koma erekema. 40Ni Pita ta o saqorimake sea kiadamu koa lose kale azo, ni o iqeiqeake ni o vararaitake. Ni vota o lilitake koa vouma tupu kasi ni eri ka kiolake, “Tabita, loje!” kiolake. Ni kota ko leqosikake ko vilu, ni kota ko veake vo Pita, ni kota kota papuake. 41Nio Pita ta o rauqazake ni o lojoekake ko. Ni koko tova inio vota o nokaemake kiadamu seke tuvevo putani, naboko poso sate, ni vota o baroekikake ko sekasi saevoma. 42Ni koa bazu ta kota aerake Jopa peuru kale, ni matu kubo maba madu ta ke tuvevo puevake vo Lekasa. 43Ni Pita ta o loivake Jopa peuru kale matu kubo ṉaniu Saimone kasi bulumakau ko tupu o pidakikani.
ទើបបានជ្រើសរើសហើយ៖
Iruruputo 9: BLBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in the Bilua language, Solomon Islands © The Bible Society of the South Pacific, 1995.
