Iruruputo 10
10
Pita ni Koniliasi
1Ni kala pado maba ta obeta evake Sizaria peuru kale Koniliasi va kikelani, vota kala sirula Romu ama pazokinio ko maba poso vo. Voko vakimuo ko poqala ko ṉi ta “Itali ama vakimuo ko poqala” ikio. 2Vota kala vararaito ko maba; vo ni voko pado ama saidi ta ke ilusivani vo Baṉara. Vo melai o matu tauvemani se Jiu ama ozaoza kama maba poso, ni vo pui o lalamatani vararaito Baṉara kasi. 3Ni sebiviuru zouke koloko tinia keru inio vota o vararaitake ni o erekake kama pado kelokelozato, ko vo uria velo ovai evema vo Baṉara vo mateana vo vai amaqeo, nio voa mateana ta eri kiolake vokasi, “Koniliasi!” kiolake.
4Nio vota o toiritoirivake voa mateana ni voko ṉalo sate vota eri kiolake, “Loma ikio, tanala?” kiolake.
Nio vo mateana ta o vati tiorikake vo ni eri kiolake, “Vo Baṉara ta oka zoleiva ṉoko vararaito ni ṉoko tauvezato sama iruruputo, ni vota o kerukerueṉa ṉo. 5Ni erisaṉa ṉota soroema kama ṉoko maba madu Jopa peuru kale Saimone va kikelani maba kasi, Pita kama pado ṉi sala. 6Vota inevoana Saimone ko pade kasi vo bulumakau ko tupu o pidakikani, vo o evani keta papara,” kiolake. 7Ni vo mateana ta ota olake, nio Koniliasi ta o nokaekake omuqa voko nabulu kidi ni kala vovo pazokinio ko maba vota kala vararaito ko maba, voko matu sipole o iruruputani. 8Ni vota omai bazuekake ko lula ko ereivako quli ni vota o soroemake se Jopa peuru kale.
9Ni koko raneo kale, so keru seke baroi keru Jopa ko sipole, Pita ta ota zakeike lesa pade topi ṉadale vararaitole. 10Ni vota ota luapake sole oka zariake ko sailao; ni so keru ko sailao kobeta inainaiva keru, vota o erekake kama pado kelokelozato. 11Ni vota o keake au ko veukazio, ni kama quli kobeta saqorako sai kazo miduku kale matuma ariku suba sama suma duruo jaria kelo ama. 12Koko poro kale ta kiadama azaazama biaṉa poso ariku kiti ama, ni ko vaerako biaṉa poso, ni ko akazako biaṉa poso. 13Sai nio kama pado kora ta ko kuevake vokasi eri kikovema, “Loje Pita, ni vouvaeka ko ni vuate!” kikovema. 14Melai Pita ta eri kiolake, “Koe maba pui, Lekasa! Aṉata maba pui a quako quli kio ko quli ako matu tabu tu kuo sole,” kiolake.
15Ni koa kora ta mata eri kikolake vokasi, “Ṉota pui kai kuiriko ruqe ama quli vo Baṉara lula uri ni tabu o ikema quli,” kikolake. 16Ni kota zouke taku ko puratake, ni koa kiadama ta mata kota koiviziake ni kota vaitake aukale.
17Ni so keru Pita niuniala obe kai eva keru voko uloito ko kio ni kalo, inio vo Koniliasi o soroemeni maba poso seke vairua paqumukani vo Saimone ko pade ta kebeta lojoake koko veutu tona. 18Ni seta ke nokaoke ni ke kuimanaoke ni eri kikelake, “Kala maba ta inovoana koi vo koi o onotani Saimone Pita va kikelani kio?” kikelake.
19Ni so keru Pita niuniala obe kai eva keru voko kelokelozato ko kio ni kalo inio vo Tabu ala Auvana ta eri kiolake, “Keatini! Zouke maba ta lula koi ṉo ke vailiṉani, 20so sole ṉota inainaovi tu saqore, ni pui tama ṉalo luluemo se ako aṉa inio a joroemani lala ṉokasi,” kiolake. 21So sole Pita ta o saqorake lesa pade kale azo ni eri kiolake sekasi, “Aṉa inio voa maba lala meme vaililani lala. Noi sole inio meta me queva?” kiolake.
22Nio seta eri kikelake, “Vo sirula Koniliasi inio o soroeṉelalani eṉe. Vota kala sidopu ala maba ni o ilusivani vo Baṉara ni se Jiu amu keta va matu paṉaovani maba. Vo Baṉara vo mateana ta o bazuevala vo tu vota o taipaziṉo ṉo voko pade kasi, tu vota o roveovou viqo ṉo kiṉovo avo,” kikelake. 23So sole Pita ta o pasemake se tu seta ke raneovou sai kiolake.
Nio koko raneo kale inio vota o inainaoke ni vota o olake se sate, ni kake se Jopa peuru kale ke evani ke tuvevo putani melai ke luluevake vo. 24Ni koko raneo kale inio vota o baroake Sizaria peuru kale, sai Koniliasi obe taremakoi, vo ni kake voko mabamu ni voko baerebaere poso se vo lula o taipazimeni. 25Ni so keru vo Pita obe amaqeo kiola keru inio vo Koniliasi ta o toraevake vo ni vota o loqunake voko kiti raki kasi. 26Melai Pita ta o zolaevake vo eri kio sama pesio sate, “Loje, ako aṉa melai miduku kale ala maba lala inio sole,” va kiolake. 27Ni Pita ta obeta olake pesio Koniliasi kasi so keru vo obeta amaqea keru pade kale, sai vo o mevekoi matu kubo maba madu seke padoini sai. 28Nio vota eri kiolake sekasi, “Meta meqai matu uria nianiia ta eṉea Jiua ṉela ta pui ko zarieṉela eṉeko lotu bazu tu eṉeta omadeu ṉe melati elou ni ṉe joipimelou me pui Jiu amu mela kio. Melai vo Baṉara ta lula kasa ola ika aṉa tu aṉata pui a qerukeruemelo me koa bazu ko lulueko kale tu aṉata meta tabu tu melati lolopareo me mela kiavo. 29Sokale avo inio so keru meme odiele keru aṉa tu a qilo koi ta pui aba ereke kama lupao sama pesio. So sole aṉata a quimaemela me, noni kale avo inio meta me odiela aṉa koi?” kiolake.
30Nio Koniliasi ta eri kiolake, “Zoukelimana inio aṉata a vararaitala eri ama taku kale zouke koloko kale raisiraisi vasia rana. Ni ota podoloa koi kala maba tapo simanamana kama sabosabo sala ta o lojola aṉako kuleto vasi 31ni eri kiolala, ‘Koniliasi! Baṉara ta ota ṉa viqala ṉoko vararaito ni vota ota ṉa keala ṉoko puaropuaro sama iruruputo se ozaoza kamu kasi. 32Soroema kake Jopa peuru kale Saimone Pita o ṉi sala maba odievole. Vota kala maba o mamazani Saimone ko pade kasi bulumakau ko tupu o pidakikani, vo ivere ketaketa o evani.’ 33So sole aṉata a joroemala se ṉokasi maba koa taku kale, ni matu uri ṉota ṉo rovela kilo. Nio erisaṉa ta eṉea kiada ṉela ta ṉebeta eva koi vo Baṉara ko tanama kale ṉebe tareka tu ṉe viqo ko quli vo lula oṉai bazuekako ṉo tu ṉo ṉelai bazuekou eṉe,” kiolake.
Pita ko pesio
34Nio vo Pita ta o taniekake pesio ni eri kiolake: “Erisaṉa aṉata abe paqumuka ta tuvevo avole vo Baṉara ta pui o roqueṉelani eṉe Jiua ṉela ṉe qiada melai vota ijatinia baisemelo o evani eṉe ni me pui Jiu amu mela. 35Seke ilusivani vo ni sidopu ke erekani ta o roquema azaazama qoqono maba poso. 36Meta meqai nianiia koa bazubazu vo o soroekema se Izireli amu kasi, bule ko kasekema Uri ama Bazu vo Jisu Karisito kale kude ko kuevima, vo kiadamu vo Lekasa. 37Meta meqai nianiia koko ereima quli Izireli, koko tanitema Qalili Jone kai bazubazuto kale voko bapitaiso ko bazubazu ko tova. 38Meta meqai nianiia vo Baṉara ko vai raibiko vo Tabu ala Auvana ko pizato vo Nazareti ala Jisu Karisito tona. Vota o keve kiadama zae poso kale, ni vota o ereke uri ama iruruputo, ni o urikime kiadamu se Setani ko pizato kale ke eveni, ako vo Baṉara ta o eve vo sate sole. 39Eṉe inio ko eṉe ṉe qeveni ṉela kiadama quli vo o erekema Jerusalema ni mata kama Izireli peuru poso kale. Sai kazo inio seta ke patoevake korosi topi ni ke vouvaevake vo. 40Melai vo Baṉara ta o saevivake vo voukale azo zoukema ṉaniu kale ni vota o purativake, 41pui kiadamu kasi nio, melai eṉe kasi vo Baṉara lula o pitoeṉeleni ṉela tu eṉeta ṉe qelo ni ṉeqai bazubazuto ko, eṉe ṉe vati vuateni ṉela ni ṉe vati nozuteni ṉela voko mata saevo voukale azo ama ko tova. 42Ni vota o sorueṉele eṉe tu eṉeta ṉeqai bazubazuto voko Uri ama Bazu maba poso kasi tu ṉema kaseko ta vo inio vo Baṉara lula o pitoini se saevomu ni voumu o titizimo ala. 43Kiadama poropita madu ta kevai bazute vo, ni ke kaseke ta sea kiadamu seke tuvevo puevo amu vo ta kota ma akoilou seko sarueko poso vo Jisu kale kude,” kiolake.
Se pui Jiu amu ko vovo vo Tabu ala Auvana
44Ni so keru Pita obeta pesipesita keru inio vo Tabu ala Auvana ta ota podolo saqoro omai evake sea kiadamu seke didiekeni voko bazubazu. 45Ni se Jiu amu seke tuvevo putani seke kuevini Jopa peuru kale azo Pita sate ta matu aqasiele kekai evake vo Baṉara ko katimo se pui Jiu amu melai voko Tabu ama Auvana. 46Ako seta keta ma viqake seko kai pesio ko edoedoloma pesio poso ni seko rauraevo vo Baṉara sole. Nio Pita ta o pesiake ni eri kiolake, 47“Nia maba poso ta lula ke voa vo Tabu ala Auvana omadeuvo anime lula me voa jari. Sole puliala ta opa roveovou dokolimo se seko jukale ama bapitaiso elo kale,” kiolake. 48So sole vota o bazuemake se tu seta bapitaiso ke elo Jisu Karisito ko ṉikale. Ni seta kevai titiake vo tu vota o elo sekasi kama poso ṉaniu tiniavo, ni vota so o kae.
ទើបបានជ្រើសរើសហើយ៖
Iruruputo 10: BLBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in the Bilua language, Solomon Islands © The Bible Society of the South Pacific, 1995.
