Iruruputo 8
8
1Ni voa Saula ta oka zoleike Sitiveni ko vouvaevo.
Saula ko naqunaquemo se lotu maba poso
Ni koa ṉaniu kale inio Jerusalema ama lotu qoqono ta ko tanitake tapata elo ruqe ama naqunaquto kale. Ni kiadamu seke tuvevo putani ta azama buara keta evake koa pado ama Jiudia ni Sameria ma peuru poso kale, melai se apositolo madu ke kiada ta Jerusalema kebeta evake. 2Nio kake lotu maba poso inio ke mutavake vo Sitiveni, seta duki keva evake seko matuma zialo sate. 3Melai Saula ta o madoekake tu niumaeko ko lotu qoqono, so sole vota pade azo pade o kavake ni rajarajaemole o saqorimake seke tuvevo putani reko ni lasive, ni o saputimake pirito pade kale.
Ko Uri ama Bazu ko kaseilo Sameria peuru kale
4Ni seke tuvevo putani se azama buara ke eveni kiadama zae poso kale ta kekai bazubazutake ko Uri ama Bazu maba poso kasi. 5Ni vo Pilipi#8:5 Pilipi: Pui vo apositolo; kea kata 6 vesi 5. ta ota keve Sameria kala matu peuru kale ni ovai bazubazutake saizama maba poso kasi vo Baṉara o soroeveni Pakio Jisu. 6Matuma vaki ta mati keta zoleike tava viqo vo kiovevo seke didieve keru vo ni seke keve keru vo o erekema aqasiele ama iruruputo. 7Ako kubo madu ta kota ma akoivake ko ziolo poso se tonama matuma zialo sate sole, ni kubo lepu amu se pui ke vezokatani ni se loke amu ta keta urikake. 8So sole matuma zoleilo ta kota evake koa peuru kale.
9Ni kala pado maba Saimone va kikelani ta obeta evake koa peuru kale, kama taku kale vo o vuzemeni se Sameria mu voko aqasiele ama iruruputo ziolo ko pizato kale o erekema kale. Vota o aikaivake ta vo inio raura kala kioveni, 10nio sea kiadamu koa peuru kale ke evani, silo amu ni qole amu, raura kamu ni zara kamu, ta ke didievake vo kiolani ni eri kikelake, “Nea maba inio Baṉara ko pizato sala, vo Baṉara jaria Piza kala o ṉi sala,” kikelake. 11Seta ke uria didievake vo ako matu rosi ama taku kale vota lula o vuzema se voko kakokakoto iruruputo ereko kale sole. 12Melai so keru seke tuvevo pueke keru Pilipi okai bazubazutema Uri ama Bazu vo Baṉara ko lekasa puo ko ni Jisu Karisito ko inio seta bapitaiso keta evake, lasive amu ni rekoreko amu. 13Ni Saimone melai ota tuvevo putake; ni voko bapitaiso puilo ko tova, vota o evake Pilipi ko sipole ni vota okai matu vuzeike vo o keve keru ko aqasiele ama iruruputo ni urikato ko ereima.
14Ni apositolo madu Jerusalema ke evani ta ke viqake ta se Sameria mu ta lula ke ṉeamuka vo Baṉara ko bazubazu kio, so sole seta ke soroekake Pita ni Jone sekasi. 15Nio so keru nioqa qo baroa keru sai, nioqata qo mati vararaitake seke tuvevo putani tu seta ke vovou vo Tabu ala Auvana. 16Ako vo Tabu ala Auvana ta pui nio o saqorake se tona sole, ni bapitaiso pala inio keta evake vo Lekasa Jisu ko ṉikale. 17Nio Pita ni Jone ta qomai ivikake nioqako ṉase se tona, ni ke voake vo Tabu ala Auvana.
18Nio vo Saimone ta o keake vo Tabu ala Auvana ko barolo seke tuvevo putani kasi so keru omuqa apositolo qomai ivike keru nioqako ṉase se tona. Nio vota oka okekake ko seleni Pita ni Jone, 19ni eri kiolake, “Aṉa melai katiloko komia pizato, tu aṉa avai iviko ala aṉako ṉase ta o vovou vo Tabu ala Auvana,” kiolake.
20Melai Pita ta o vati tiorikake vo ni eri va kiolake, “Ṉo ni ṉoko seleni ta olako heli kale, ako ṉota ṉo qerukeruta ta ṉota ṉo roveovou tatabaraeko vo Baṉara ko katizato seleni kale kiṉola inio kio! 21Puliama ta ṉoko kena tu ṉota ṉo qovo komia iruruputo kale, ako ṉoko bulo ta pui sidopu vo Baṉara ko kelokelozato kale sole. 22Ṉota liliziovi erisaṉa ṉoko ruqe ama ziozio kale azo, ni vararaite Lekasa kasi ni esa vota ota ṉa akoekou ṉoko kerukerueko soama ruqe. 23Ako aṉata aqai nianiia ta ṉota koṉai sukatani ṉa ko konoilo ni sarueko ko pirieṉani ṉa sole,” kiolake.
24Nio Saimone ta eri kiolake Pita ni Jone kasi, “A matu paseqela qe tu lati vararaitoko Lekasa kasi, tu ko quli ṉoṉo qasekako quli ta pui ko ereilou aṉa kasi,” kiolake.
25Nio Pita ni Jone ta qo pikairikake qo ṉavi qo kevema quli vo Jisu o erekema ni qokai bazubazutake Lekasa ko bazubazu, ni koko tova inio nioqata qota vaitake Jerusalema. Ni nioqako zio keru sai nioqata qokai bazubazutake ko Uri ama Bazu Jisu ko kubo Sameria ma peuru poso kale.
Pilipi ni Itiopia ala raura kala maba
26Ni kala Baṉara vo mateana ta o pesiake Pilipi kasi ni eri kiolake, “Ṉota inainaovi ni ola Jerusalema azo Qaza ko saqorako keve kasi,” kiolake. (Komia keve ta komia taku ta puliala okai talia.) 27-28So sole Pilipi ta o inainaoke ni vota o olake. Nio sai nio o veake kala Itiopia ala maba obeta vaitake ala o peuru kale Jerusalema Baṉara ilusivole azo. Vota ruborubo ala kala matu raura kala maba, vo o kati vailani Itiopia ama reko lekasa ko seleni, ni vota obeta zazuke voko totiaqolo topi ni obeta taliake, ni obeta vaitake o peuru kale. Ni so keru vo obeta papua keru koa totiaqolo topi, vota o tiromikake vo poropita Aisea ko buka ko pesio. 29Ni vo Tabu ala Auvana ta eri kiolake Pilipi kasi, “Ola ni pa taka kejoate koa totiaqolo ni sipole pa taka eve,” kiolake. 30So sole Pilipi ta o rereake ni o kejoatake ni ota va viqake voa Itiopia ala tanala ko tiromiko vo poropita Aisea ko buka kale ama bazubazu. Nio Pilipi ta o kuimaevake vo ni eri kiolake, “Ṉota ṉo baqumuka ko ṉoṉo diromikako pesio ko kio ni kalo kio?” va kiolake. 31Nio voa raura kala maba ta o opatake ni eri kiolake, “Noni kale inio aṉata a vakakukou puliala ta ola zakaremu puekou ko tea?” kiolake. Nio vota o pasevake vo Pilipi tu o zazu koa totiaqolo topi. Sole vota o zazuke ni o papuake sai vo sase. 32Koa kobu Tabu ama Riki vo o tiromikema ta eri nio kikovevo:
“Vota moiza o eve omadeuvo ko sipi ke kati olako vouvaekole jari,
Ni vota omadeuvo sipi ko meqora ko pui ko kujinako koko tou keta ka kobueka keru jari,
vota pui opa pesiovi.
33Vota o zarazaraivake, so keru seke titizive keru sarueko pide ala.
Puliala ta opa roveovou mai bazuto voko vikuvikula kale amu,
ako voko saevo miduku kale ama ta lula kota paita sole,” kikovema.
34Nio vo matu raura kala maba ta o kuimaevake vo Pilipi ni eri kiolake, “Lai bazue, lala inio vo poropita so va kioveni? O ṉavi vo ma edolola maba?” 35Nio vo Pilipi ta o tanitake pesio koa Tabu ama Riki ko kobu kikolani kasi azo ti kobeta baroake vai bazueko vo Jisu Karisito ko Uri ama Bazu. 36Nio nioqako lulueko kale koa keve inio nioqata qo baroake kala pado zaekale ju ko evakoi, nio voa raura kala maba ta eri kiolake, “Kota ju. Ikoana kama quli koko tizaeko ama aṉako bapitaiso elo?” kiolake.#8:36 Se Jiu amu ko lotu bazu kale ta pui o zarizia ruborubo ala maba tu Jiu ala lotu maba elo, melai Jisu ta o baroekima kiadama maba poso. 37Ni vo Pilipi ta eri kiolake vokasi, “Ṉota ṉo duvevo puevou vo Jisu ṉoko pado ama bulo kale inio ṉota ṉo roveovou bapitaiso puilo,” kiolake. Nio voa maba ta o vati tiorikake, “Aṉata a duvevo pueva vo Jisu Karisito ta vo inio vo Baṉara vo Meqora,” kiolake.#8:37 Komia vesi 37 ta puliama kama lulavo ama Quriki pesio kale ama riki poso kale.
38Nio voa raura kala maba ta o bazuevake totiaqolo o taliekani maba tu o dokoliko ko, ni vota o dokolikake, nio Pilipi ni voa raura kala maba ta qo saqorake jukale, ni Pilipi ta bapitaiso o ivake vo. 39Ni so keru nioqa qo kaila keru jukale azo inio vo Lekasa vo Auvana ta o borivake vo Pilipi. Ni voa raura kala maba ta pui mata o veake vo, ni vota mata o tanitake talio matuma zoleilo sate. 40Ni vo Pilipi ta o puratake Azotasi peuru kale, ni vota o olake Sizaria peuru kale, ni voko zio keru sai vota okai bazubazutake vo Jisu Karisito ko Uri ama Bazu kiadama peuru poso kale.
ទើបបានជ្រើសរើសហើយ៖
Iruruputo 8: BLBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in the Bilua language, Solomon Islands © The Bible Society of the South Pacific, 1995.
