Eksodɔs 36
36
1Na Bezalel nye Oholiab nye akoma mu onyansafo biara a EWURADZE dze nyansa nye ntseasee ahyɛ no mu dɛ onhu mbrɛ wosi yɛ krɔnkrɔnbea som no ho edwuma nyinara, nyɛ edwuma, dɛ mbrɛ EWURADZE ahyɛ nyinara.
Nkorɔfo Dze Ayɛyɛdze Pii Ba
2Na Moses frɛɛ Bezalel nye Oholiab, nye akoma mu onyansafo biara a EWURADZE dze nyansa ahyɛ n’akoma mu no, mekyerɛ obiara a n’akoma kenyaan no dɛ ɔmbra edwuma no ho mbɛyɛ bi no nyinara: 3na wɔgyee Moses hɔ ayɛyɛdze no a Israelmba no dze baa dɛ wɔmfa nyɛ krɔnkrɔnbea no som ho edwuma no nyinara, dɛ wɔdze bɛyɛ. Na wɔwɔɔw do ara dze ayamuyi ayɛyɛdze brɛɛ no anapa daa. 4Na enyansafo no nyinara a wɔyɛ krɔnkrɔnbea no ho edwuma no nyinara fifii hɔn edwuma a wɔreyɛ no ho bae; 5na wɔbɛkaa kyerɛɛ Moses dɛ, Ɔman no dza wɔdze ba dɔɔ so sen dza ɔbɔso edwuma a EWURADZE hyɛɛ dɛ wɔnyɛ no yɛ. 6Na Moses hyɛɛ mbra, na wɔmaa wɔbɔɔ no dawur wɔ nseraban no mu nyinara dɛ, Ɔbanyin o, ɔbaa o, mma obiara mmfa biribiara nnyɛ krɔnkrɔnbea no ho ayɛyɛdze bio. Nna ɔman no dze gyaa ba. 7Osiandɛ dza wonyae no ara dɔɔ so ma edwuma no nyinara dɛ wɔdze bɛyɛ ma bi aka.
8Na hɔn a wɔyɛɛ edwuma no mu akoma mu onyansafo biara dze nsensɛnho tam du yɛɛ ntamadan no; ndwera fɛɛfɛw a woefira, nye bibir, nye ɔberdum, nye serdaa, ayɛ mu kerubim a ɔyɛ odwimfo pa edwinsa na wɔdze yɛe. 9Nsensɛnhotam no kor ne tsentsen yɛ basafa duanan, na nsensɛnhotam no kor ne tɛtɛr yɛ basafa ebien: nsensɛnhoatam no nyinara no nsusui gyinaa kor. 10Na ɔdze nsensɛnho tam enum toatoaa do ma kor toaa kor so do: na nsensɛnho tam enum no so ɔdze toatoaa do ma kor toaa kor so do. 11Na ɔdze bibir bobɔɔ nsensɛnho tam kor mbuano do etokur wɔ ano wɔ ntoae no do: dɛmara na ɔyɛe wɔ nsensɛnhotam a odzi ekyir no no mbuano do wɔ ntoae a otsia ebien no do. 12Etokur eduonum na ɔbobɔe wɔ nsensɛnho tam a ɔwɔ ntoae a otsia ebien no so n’ano: etokur no dzi abɔenyim nkorkor. 13Na ɔyɛɛ sika nkɔtɔkorba eduonum, na ɔdze nkɔtɔkorba no yɛe ma nsensɛnho tam no kor toaa kor so do: ma ntamadan no yɛɛ kor. 14Na ɔdze mpɔnkyenhwi yɛɛ nsensɛnho tam dze sii buw wɔ ntamadan no do: ɔyɛɛ no nsensɛnho tam dubiako. 15Nsensɛnho tam kor ne tsentsen yɛ basafa duenum, na nsensɛnho tam kor ne tɛtɛr yɛ basafa ebien: nsensɛnho tam dubiako no no nsusui gyinaa kor. 16Na ɔdze nsensɛnho tam enum toatoae yɛɛ no kor, na ɔyɛɛ nsensɛnho tam esia so kor. 17Na ɔyɛɛ etokur eduonum wɔ nsensɛnho tam kor a odzi ekyir no mbuano do wɔ ntoae no do, na ɔyɛɛ etokur eduonum so wɔ ntoae a otsia ebien no ne nsensɛnho tam no mbuano do. 18Na ɔyɛɛ boran nkɔtɔkorba eduonum dze eesusuo buw no mu atoa mu, ma aayɛ kor. 19Na ɔdze nguannyin nwoma a wɔahyɛ no memen yɛɛ buw no ne nkatado, na ɔdze nsukraman nwoma yɛɛ no sor akatado.
20Na ɔdze akeesia dua yɛɛ ntamadan no ne ntaabow a osisi hɔ no. 21Basafa enum yɛ taabow kor ne tsentsen, na bɛyɛ anamɔn ebien nye fa yɛ taabow kor ne tɛtɛr. 22Anan ebien tuatua taabow kor mu, susuoo kor mu faam kor so ho: dɛm na ɔyɛe maa ntamadan no ne ntaabow no nyinara. 23Na ɔyɛɛ ntamadan no ne ntaabow no; ntaabow eduonu dzi pomu afamu kyerɛ pomu: 24na ɔyɛɛ ntaabow eduonu no n’ase dwetɛ ngyinado eduanan; ngyinado ebien hyehyɛ taabow kor ase ma n’anan ebien no, na ngyinado ebien hyehyɛ taabow kor so ase ma n’anan ebien no: 25Na ntamadan no n’afa a otsia ebien no a odzi kwaamu afamu no, ɔyɛɛ ntaabow eduonu, 26nye no dwetɛ ngyinado eduanan; ngyinado ebien hyehyɛ taabow kor ase, na ngyinado ebien hyehyɛ taabow kor so ase. 27Na ntamadan no n’ekyir a odzi anee afamu no ɔyɛɛ ntaabow esia. 28Na ɔyɛɛ ntaabow ebien maa ntamadan no no kutuw do wɔ n’ekyir afamu. 29Na ɔpaam ho wɔ ase, na ɔyɛɛ mu dɛmara kodur no sor nkaba kor ho: dɛm na ɔdze yɛɛ n’ebien nyina wɔ kutuw ebien no do. 30Na ɔyɛɛ ntaabow awɔtwe, nye no dwetɛ ngyinado, ngyinado duesia; ngyinado ebien hyehyɛ taabow biara n’ase. 31Na ɔdze akeesia dua yɛɛ mbeabeamu; enum yɛ ntamadan no ne nkyɛn kor ntaabow no nedze, 32na mbeabeamu enum so yɛ ntamadan no ne nkyɛn kor no ne ntaabow no dze, na mbeabeamu enum so yɛ ntamadan no ne nkyɛn ekyir wɔ anee afamu ntaabow no dze. 33Na ɔyɛɛ finimfin mbeamu a ɔwɔ ntaabow no ne finimfin no ma otwaa mu fi tsir kodur tsir. 34Na ɔdze sika duraduraa ntaabow no ho, ɔdze sika yɛɛ no ho nkaba no ma ɔyɛɛ mbeabeamu no hyehyɛbea, na ɔdze sika duraduraa mbeabeamu no ho.
35Na ɔdze bibir, nye ɔberdum, nye serdaa, nye ndwera fɛɛfɛw a woefira yɛɛ ntwamutam no: ɔyɛɛ mu kerubim a ɔyɛ odwimfo pa edwinsa. 36Na ɔyɛɛ ho akeesia edum anan, na ɔdze sika duraduraa ho: no nkwaba yɛ sika; na oguu ase dwetɛ ngyinado anan. 37Na ɔdze bibir, nye ɔberdum, nye serdaa, nye ndwera fɛɛfɛw a woefira ween nkyermu dze yɛɛ ntamadan no n’abowano nkataano; 38na ɔyɛɛ n’edum enum no nye no nkwaba: na oduraduraa n’etsir nye no mbɔtsir ho sika: na ne ngyinado enum no yɛ boran.
ទើបបានជ្រើសរើសហើយ៖
Eksodɔs 36: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.