Eksodɔs 35
35
Ahomgyeda No Ho Mbra
1Na Moses poon Israelmba mboanofo no nyinara hyiae, na ɔsee hɔn dɛ, Nsɛm a EWURADZE ahyɛ dɛ hom nyɛ nye yi. 2#Eks 20.8-11; 23.12; 31.15; 34.21; Lev 23.3; Deut 5.12-14 Nda esia na wɔmfa nyɛ edwuma, na da a otsia esuon no nyɛ da krɔnkrɔn mma hom, ahomgyeda pa mma EWURADZE: obiara a ɔbɛyɛ edwuma biara wɔ mu no woboku no. 3Mma hom nnsɔ gya wɔ hom tsenabea nyinara ahomgyeda no.
Ntamadan Krɔnkrɔn No Ho Mbra
(Eksodɔs 25.1-9)
4Na Moses kasaa kyerɛɛ Israelmba mboanofo no nyinara dɛ, Iyi nye dza EWURADZE hyɛe no, dɛ, 5Hom nyiyi ayɛyɛdze wɔ hom mu mma EWURADZE: obiara a n’akoma pɛ no, ɔmfa EWURADZE n’ayɛyɛdze mbra; sika, nye dwetɛ, nye boran; 6nye bibir, nye ɔberdum, nye serdaa, nye ndwera fɛɛfɛw, nye mpɔnkyenhwi; 7nye nguannyin nwoma a wɔahyɛ no memen, nye nsukraman nwoma, nye akeesia dua; 8nye kandzea no ho ngo, nye ɔserango no nye ɔhyeweduhuam no ho nduhuam; 9nye epopobibirbo, nye nsisimu abo a wɔdze besisi asɔfontar egugudo no nye akatabo no mu. 10Na wɔmma hom mu onyansafo biara mbra, na ɔmbɛhyɛ dza EWURADZE ahyɛ nyinara; 11ntamadan no no buw, nye ne nkatado, nye nkɔtɔkorba, nye ne ntaabow, ne mbeabeamu, n’edum, nye ne ngyinangyinado; 12adaka no, nye no ho mpoma no, mbɔbɔrhu egua no, nye nsensɛnho ntwamutam no; 13ɔpon no, nye no mpoma no, nye no ho ndzɛmba nyinara, nye ɔkyerɛ edziban no: 14eso kandzea no ne kandzeadua no, nye no ho ndzɛmba, nye ne nkandzea, nye kandzea no ho ngo; 15nye eduhuamhyew afɔrmbukyia no, nye no mpoma, nye ɔserango no, nye ɔhyeweduhuam no nye ntamadan abow no, n’abowano nsensɛnho no; 16ɔhyew afɔr afɔrmbukyia no, nye boran serɛnkye no, no mpoma, nye no ho ndzɛmba nyinara, eguarsɛn no nye ne ntaease; 17dampan no ne nsensɛnho no, n’edum no, nye ne ngyinangyinado no, nye dampan no n’abotsen ano nkataano no: 18ntamadan no ho mbɔfondua, nye dampan no ho mbɔfondua, nye ne ntampehoma; 19ntar fɛɛfɛw a wɔapempam, wɔdze som wɔ bea krɔnkrɔn no, ɔsɔfo Aaron ne ntar krɔnkrɔn no, nye ne mbabanyin hɔn ntar a wɔdze bedzi asɔfo no.
Nkorɔfo No Dze Hɔn Ayɛyɛdze Ba
20Na Israelmba mboanofo no nyinara fii Moses enyim kɔree. 21Na wɔbae, obiara a n’akoma maa no do, nye obiara a no sunsum kaa no no, na wɔdze EWURADZE ayɛyɛdze no baa dɛ wɔmfa nyɛ ehyiadzibuw no, nye no ho som ndzɛmba nyinara, nye ntar krɔnkrɔn no. 22Na wɔbae, mbanyin nye mbaa nyina, dodow a hɔn akoma pɛ nyinara, na wɔdze nkapo, nye asowamuadze, nye nsɔwanonkaba, nye nkrakyer, sika edwindzi ahorow nyinara bae; mekyerɛ nyimpa biara a ɔpɛɛ dɛ ɔdze sika ayɛyɛdze bɔ afɔr ma EWURADZE. 23Na nyimpa biara a ne nsamu wɔ bibir nye ɔberdum, nye serdaa, nye ndwera fɛɛfɛw, nye mpɔnkyenhwi, nye nguannyin nwoma a wɔahyɛ no memen, nye nsukraman nwoma, ɔdze bae. 24Obiara a ɔbɔɔ dwetɛ nye boran ayɛyɛdze afɔr no ɔdze EWURADZE ayɛyɛdze no bae: na nyimpa biara a ne nsamu wɔ akeesia dua a wɔdze bɛyɛ som edwuma no biara no, ɔdze bae. 25Na mbaa a wɔwɔ nyansa akoma nyinara wɔdze hɔn nsa toow asaaba, na wɔdze dza wɔtowee no bae, bibir, nye ɔberdum, nye serdaa, nye ndwera pa. 26Na mbaa a hɔn akoma kenyaan hɔn wɔ nyansa mu nyinara toow mpɔnkyenhwi no. 27Na mpanyimfo no dze epopobibirbo, nye nsisimu abo a wɔdze besisi egugudo no, nye akatabo no bae; 28nye eduhuam, nye ngo; kandzea ho dze, nye ɔserango ho dze, nye ɔhyew eduhuam ho dze. 29Israelmba no dze ayamuyi ayɛyɛdze brɛɛ EWURADZE; ɔbanyin nye ɔbaa biara a hɔn akoma maa hɔn do dɛ wɔmfa edwuma nyinara a EWURADZE nam Moses ne nsa do hyɛɛ dɛ wɔnyɛ no no ho biribi mbra no a.
Edwumayɛfo a Wɔbɛyɛ EWURADZE Ne Ntamadan
(Eksodɔs 31.1-11)
30Na Moses see Israelmba no dɛ, Hom nhwɛ, EWURADZE abɔ Bezalel, Uri ba no, Hur ba no a ofi Juda ebusuakuw mu no ne dzin afrɛ no: 31na ɔdze Nyankopɔn sunsum ahyɛ no ma, wɔ nyansa, nye ntseasee, nye nyimdzee, nye edwindzi ahorow nyinara mu; 32na ɔdze aadwen ne tsir mu edzi sika, nye dwetɛ, nye boran, 33nye nsisimu abo ntwitwae, nye nduasian mu edwin, ma oeedzi edwin horow nyinara. 34Na ɔdze ahyɛ n’akoma mu dɛ ɔmfa nkyerɛkyerɛ, ɔno, nye Oholiab, Ahisamak ne babanyin no a ofi Dan ebusuakuw mu no, beenu. 35Hɔn na ɔdze akoma mu nyansa ahyɛ hɔn ma, dɛ wondzi edwin horow nyinara, ɔbosiamfo, nye duadwimfo, nye ɔwemfo a odzi bibir, nye ɔberdum, serdaa, nye ndwera fɛɛfɛw mu edwin, nye ɔtanwemfo dze no, mekyerɛ hɔn a wodzi edwin biara, nye hɔn a wɔdwen hɔn tsir mu dzi edwin horow.
ទើបបានជ្រើសរើសហើយ៖
Eksodɔs 35: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.